Elder John A. McCune

Ritōl Eutiej Jiljilimjuonn̄oul an Kabun̄ in

Jinoin ilo jerbal in pejnej eo an, Elder John A. McCune ekar bwebwenato ippān boss eo an ilo iien eo me emōkaj an erom juon kam̧ool bwe em̧m̧aan in ekar jab jeļā eļap kōn Kabun̄ eo an Jisōs Kraist im Armej ro Rekwojarjar ilo Raan-ko Āliktata. Boss eo an ekar kajjitōkin Elder McCune etke Armej ro Rekwojarjar ilo Raan-ko Āliktata rekar jab tuuj ak m̧ōņā kukiij.

“Ealikkar ij m̧ōņā kukiij,” Elder McCune ekar ba n̄an boss eo an kōn juon ettōn̄ dikdik, eoeoik lojien. “Ij ļōmņak kopok kōn kōm ippān bar jet armej.”

Ke raar kōnono, Elder McCune ekar kallikkar jameļeļe ko kōn Kabun̄ in. Kōnono eo ekar bōkļo̧k n̄an juon bar bwebwenato kōn gospel eo an Jisōs Kraist im bar ālij n̄an Elder McCune aorōk eo an iien otemjej pojak n̄an kwaļo̧k gospel eo.

“Jej rikaļoor ro an Rilo̧mo̧o̧r Jisōs Kraist, jekdoon ia eo jej pād ie, ilo jabdewōt jekjek, ilo jabdewōt iien ko rem̧m̧an,” Elder McCune ej ba. “Ewōr ad jo̧o̧b ko im jerbal ko, bōtaab rej pād ijo n̄an rie baam̧le ko ad im likūt kōj ilo jekjek ko n̄an kwaļo̧k gospel eo. En̄in ej eddo eo ad jinoin tata āinwōt rikaļoor ro an Jisōs Kraist.”

John Allen McCune ekar ļotak ilo Santa Cruz, California, USA, ilo Juun 20, 1963 eo, n̄an Clifford im Joan Schulties McCune. Ekar rūttoļo̧k eļap tata ilo Nyssa, Oregon, USA.

Ālkin an jerbale juon mijen edipio ilo Fukuoka, Japan, Elder McCune ekar m̧areik Debbra Ellen Kingsbury ilo Salt Lake Tampeļ ilo 1984 eo. Rej jinen im jemān emān ajri ro im rej jokwe ilo Midway, Utah, USA.

Elder McCune ekar bōk juon bachelor of science degree ilo finance jān Brigham Young University im tokālik bōk master degree kōn business administration ikkijien finance jān University of California, Los Angeles (UCLA). Ekar jerbal āinwōt senior vice būreejtōn im managing tōreektōr n̄an Capital Investment Advisors jān 1997 n̄an 2012 eo. Innām ekar jerbal āinwōt juon būreejtōn an Utah Provo Mijen eo m̧okta jān an erom donor liaison n̄an principal gifts ippān LDS Philanthropies.

Elder McCune ekar jerbal āinwōt juon Eria Jiljilimjuonn̄oul ilo iien kūr eo an ekāāl. Ekar barānwōt jerbal āinwōt juon stake būreejtōn, bisop, rikakpilōklōk ilo juon bisoprik im ilo juon branch būreejtōnji, im būreejtōn an doulul eo an elder ro.