M̧weo Ijo Jetōb eo an Irooj ej Jokwe ie
Kwonaaj lo jet iaan lan̄lōn̄ ko am̧ reļļap tata ilo kijejeto ko am̧ n̄an kōm̧m̧ane m̧weo im̧ōm̧ juon jikin tōmak ilo Irooj Jisōs Kraist im juon jikin me eobrak kōn iakwe.
Ro jeiū im jatū rejitōn bōro, ij kam̧m̧oolol kōn kar kajjitōk bwe in ekōnono n̄an kom̧ ilo 189th Kweilo̧k in Eļap an Kabun̄ eo an Jisōs Kraist im Armej ro Rekwojarjar ilo Raan-ko Āliktata. Ilo iien in ilo 1830 eo, Josep Smith eaar kajutak Kabun̄ in ium̧win tōl eo an Irooj. Eaar kōm̧m̧ane ilo m̧weo im̧ōn Whitmer baam̧le iturinļo̧k Fayette, New York. Ekar ewōr jiljino membōr ro im emaron̄ 50 armej ro jet raar itok limo ilo raan jab eo.
Men̄e ijjab jeļā ta eo Rikanaan Josep eaar ba ak ekōjkan an kar lale ke eaar jutak im̧aan kumi jidikdik eo, ijeļā ta eo armej ro ewōr aer tōmak ilo Jisōs Kraist rekar en̄jake. Raar en̄jake Jetōb Kwojarjar, im raar en̄jake bwe raar pād ilo juon jikin ekwojarjar. Em̧ool raar en̄jake bwe raar koba āinwōt juon wōt.
En̄jake kabwilōn̄lōn̄ eo ej ta eo jej aolep kōņaan ilo im̧ōko im̧ōd. Ej juon en̄jake me ej itok jān erom, āinwōt an Paul kar kōmeļeļeik, “ļōmņak an jetōb.”1
Jibadbad eo aō rainin ej n̄an katakin ta eo ijeļā kōn ekōjkan ad maron̄ karbōb n̄an en̄jake jab eo im kūrtok en̄jake kwojarjar eo aitok kitien n̄an an pād ilo baam̧le ko ad. Āinwōt ami jeļā jān en̄jake, bwe ejjab pidodo n̄an kōm̧m̧ane. Akweel, utiej bōro, im jerawiwi aikuj in kabōjraki. Iakwe eo erreo an Kraist aikuj itok n̄an bōro ko an ro ilo baam̧le eo ad.
Adam im Iv, Liai im Sara, im m̧am̧a im baba ro jet jejeļā jān jeje ko rekwojarjar kar lo bwe juon idajon̄jon̄ epen. Aaet eaar wōr waanjon̄ak ko rōkektak kōn m̧ōņōņō eo ej wōnm̧aanļo̧k wōt ilo baam̧le ko im im̧ōko n̄an kaenōm̧m̧an kōj. Im waanjon̄ak ko rej kōtļo̧k bwe jān lo wāween eo emaron̄ waļo̧k n̄an kōj im baam̧le ko ad. Kwoj keememej ke bwebwenato eo jān 4 Nipai:
“Im ālkin men kein eaar ejjeļo̧k jum̧ae doon ilo āneo, kōnke iakwe eo an Anij eo eaar pād ilo buruōn armej ro.
“Im eaar ejjeļo̧k juunm̧aad ko, ak akwāāl ko, ak ailwaro ko, ak ļōn̄ ko, ak riab ko, ak uror ko, ak jabdewōt wāween m̧ōm̧ an kanniōk; im em̧ool eaar ejjeļo̧k bar armej rem̧ōņōņōļo̧k ilubwiljin armej ro otemjej kar ejaak jān pein Anij.
“Eaar jab wōr riko̧o̧t ro, ak riuror ro, im eaar ejjeļo̧k riLeman, ak jabdewōt; riAelōn̄, a raar juon, ro nejin Kraist, im rijolōt e aelōn̄ in Anij.
“Im ekōjkan aer kar jeram̧m̧an! Bwe Irooj eaar kōjeraam̧m̧an er ilo aolep kōm̧m̧an ko aer; aaet, em̧ool raar jeraam̧m̧an im eddekļo̧k m̧ae jibukwi im jon̄oul iiō raar eļļāļo̧k; im epepen eo m̧oktata jān Kraist eaar eļļāļo̧k, im eaar ejjeļo̧k epelon̄lon̄ ilo aolepān āneo.”2
Āinwōt am̧ jeļā, bwe iien m̧ōņōņō eaar jab aitok an pād. Bwebwenato eo ilo 4 Nipai ej kōmeļeļeik kakōļļe ko āliktata in m̧ōjņo̧ļo̧k in jetōb eo ilubwilijin juon kumi in armej ro rem̧m̧an. Ej juon jon̄ak me eaar waļo̧k ilo aolep iiō ko ippān aolep armej ro, ilo jarlepju ko, im, ekabūrom̧ōjm̧ōj tata, ilo baam̧le ko. Jān ekkatak kōn jon̄ak jab in, jemaron̄ lo ekōjkan ad maron̄ kōjparok im em̧ool kōļapļo̧k en̄jake ko an iakwe ilo baam̧le ad.
En̄in ej jon̄ak eo an m̧ōjņo̧ļo̧k eo me eaar waļo̧k ālkin 200 iiō ko in mour ilo aenōm̧m̧an eo eweppān gospel eo ej bōktok:
Utiej bōro jidik kōn jidik ej ejaak.
Armej eaar bōjrak aer kwaļo̧k ta eo eaar wōr ippāer ippān doon.
Raar jino watōk er make kajjojo ekkar n̄an jekjek ko aer ilo bun̄bun̄ im m̧weie.
Raar jino makunļo̧k ilo tōmak eo aer ilo Jisōs Kraist.
Raar jino matōrtōr.
Raar jino kōm̧m̧ane aolep kain jerawiwi ko.
M̧am̧a im baba ro rōlo̧ļe enaaj bwe aer mejān iruj n̄an kile kakōļļe ko n̄e rej waļo̧k ilubwilijin ro uwaan baam̧le eo aer. Renaaj, aaet, n̄ūrbōktak. Bōtaab renaaj jeļā bwe un eo ej kōm̧m̧ane ej kareel eo an Setan ej kajjieon̄ likūt armej ro rem̧m̧an ilo juon jekjek n̄an jerawiwi im bwe ren luuji kareel eo an Jetōb Kwojarjar. Kōn menin m̧am̧a im baba ro ro̧lo̧ļe naaj lo bwe iien eo em̧m̧an ej pād ilo tōl kajjojo ajri, im er make, n̄an lukkuun in bōk kūr eo an Irooj n̄an itok n̄an E.
Emaron̄ wōr jon̄an am̧ tōprak jiron̄ juon ajri n̄an ukweļo̧k, n̄an waanjon̄ak, jān utiej bōro. Komaron̄ kajjieon̄ kareel ajri ro n̄an kwaļo̧k ta eo eļapļo̧k aer jouj ie. Komaron̄ kajjitōk ippāer n̄an bōjrak jān aer en̄jake rem̧m̧anļo̧k jān bar juon ilo baam̧le eo. Bōtaab innām kwoj itok n̄an jekjek eo ikar kōmeļeļeik m̧oktaļo̧k āinwōt “Raar jino makunļo̧k ilo tōmak eo aer ilo Kraist.”
En̄eo eo ej uwaak eo n̄an tōl baam̧le eo am̧ n̄an karūttoļo̧k n̄an jikin eo ilo jetōb kwon kōņaan n̄an er—im n̄an kwe n̄an pād ijo ippāer. Ilo am̧ jipan̄ er eddōk ilo tōmak bwe Jisōs Kraist ej aer Ripinmuur ej iakwe, renaaj en̄jake juon ikdeelel n̄an ukweļo̧k. Ilo aer kōm̧m̧ane, ettā enaaj jino bōk jikin utiej bōro. Ilo aer jino en̄jake ta eo Irooj eaar leļo̧k n̄an er, renaaj kōņaan kwaļo̧k eļapļo̧k ilo jouj. Jiāe ko kōn kappok bun̄bun̄ ak kile eo ejeno̧lok naaj makunļo̧k. Matōrtōr naaj kadiwōjļo̧k kōn iakwe. Im āliktata, āinwōt ikdeelel eo eaar kōm̧m̧an n̄an armej ro raar oktak jān Kiin̄ Benjamin, ikdeelel eo n̄an kōm̧m̧an em̧m̧an naaj kōkajoorļo̧k er ņae kapo n̄an jerawiwi. Armej ro doon Kiin̄ Benjaim raar kam̧ool bwe raar “jab itok wōt in kōm̧m̧an nana.”3
Kōn menin kalōk tōmak ilo Jisōs Kraist ej jino in oktak in m̧ōjņo̧ļo̧k in jetōb eo ilo baam̧le eo am̧ im m̧weo im̧ōm̧. Tōmak in ej āinwōt eļapļo̧k an bōktok ukweļo̧k jān am̧ kwaļo̧k ņae kajjojo jekjek an m̧ōjņo̧ļo̧k ilo jetōb.
Enaaj em̧m̧antata am̧ tōl kōn waanjon̄ak. Ro uwaan baam̧le eo im ro jet raikuj lo am̧ eddōkļo̧k ilo tōmak eo am̧ make ilo Jisōs Kraist im ilo gospel eo An. Ejjab to kar lewaj n̄an eok jipan̄ eo eļap. Ro jinen im jemen ilo Kabun̄ in kar kōjeraam̧m̧an er kōn juon laajrak in kein katakin eim̧we n̄an baam̧le ko im kajjojo armej. N̄e kwoj kōjerbale, kwonaaj kalōk tōmak eo am̧ im tōmak eo an ajri ro nejūm̧ ilo Irooj Jisōs Kraist.
Eddōkļo̧k ilo Tōmak
Am̧ tōmak ilo Rilo̧mo̧o̧r eo em̧ōj an eddōkļo̧k ilo am̧ kar ļoor kajjitōk eo an Būreejtōn Russell M. Nelson n̄an bar riiti Bok in Mormon. Kwar kakōļļeik eoon ko im naan ko me rej iookļo̧k Rilo̧mo̧o̧r eo. Am̧ tōmak ilo Jisōs Kraist eaar eddōkļo̧k. Ak āinwōt juon menin eddōk kāāl, kain tōmak in ilo Jisōs Kraist enaaj m̧ōjņo̧ļo̧k ijello̧kin kwoj kappukōt juon kijejeto ejjab bōjrak n̄an kejekļo̧kjeņ im jar n̄an kōļapļo̧k.
Waanjon̄ak eo am̧ kōn eddōkļo̧k ilo tōmak maron̄ jab ļoore jān aolep ro uwaan baam̧le eo am̧ kiiō. Bōtaab komaron̄ bōk kōketak jān en̄jake eo an Alma eo Edik. Ilo aikuj eo ekōmettak an n̄an ukweļo̧k im jeorļo̧k bōd, eaar keememej tōmak eo an jemen ilo Jisōs Kraist. Ajri ro nejūm̧ remaron̄ keememej tōmak eo am̧ ilo Rilo̧mo̧o̧r eo ilo iien eo n̄e rej lukkuun in aikuj in ukweļo̧k. Alma eaar ba kōn kain iien in:
“Im ālikin men kein ke iaar āindein widbwebwe kōn en̄taan, ke iaar ikimmaļ kōn ememļo̧kjeņ eo kōn jero̧wiwi ko aō rellōn̄, lo, iaar keememej barāinwōt n̄an ron̄ an jema kar kanaan n̄an armej ro kōn itok eo an juon Jisōs Kraist, juon Nejin Anij, n̄an pinmuur kōn jero̧wiwi ko an laļ.
“Kiiō, ke koļmānļo̧kijeņ eo aō eaar pen ilo ļōmņak in, iaar kūr ilo buruō: O Jisōs, kwe Nejin Anij, kwōn tūriam̧o kake eō, eo ej pād ilo jekjek eo enana, im ej jepooļ kōn tomede in mej ejjeļo̧k jem̧ļo̧kier.
“Im kiiō, lo, ke iaar ļōmņake men in, iaar jab bar keememejļo̧k metak ko aō; aaet, iaar jab bar ikimmaļ kōn ememļo̧kjeņ kōn jero̧wiwi ko aō.”4
Jar kōn Iakwe
Ilo kakobaba n̄an waanjon̄ak eo am̧ kōn eddōkļo̧k ilo tōmak, jar eo am̧ āinwōt juon baam̧le emaron̄ kōm̧m̧ane juon m̧ōttan eaorōk ilo kōm̧m̧ane m̧weo juon jikin ekwojarjar. Juon armej ekkā kāālete āinwōt eo ej jar an baam̧le eo. N̄e jar eo ej alikkar n̄an Anij ilo etan armej ro rej bukwelōlō im ron̄jake, tōmak ej eddōkļo̧k ilo aolepāer. Remaron̄ en̄jake kakōļļe ko an iakwe n̄an Jemedwōj Ilan̄ im n̄an Rilo̧mo̧o̧r eo. Im n̄e armej eo ej jar ej kwaļo̧k ro me rej bukwelōlō ilo doulul eo an eo me rej aikuj, aolep remaron̄ en̄jake iakwe eo n̄an er im n̄an kajjojo ro uwaan baam̧le.
Jekdo̧o̧n n̄e ro uwaan baam̧le eo rejjab jokwe ilo m̧weo, jar emaron̄ ejake en̄jake ko an iakwe. Jar ilo baam̧le eo emaron̄ wōr kilaan ilo aolepān laļ in. Elōn̄ļo̧k jān juon alen iaar ekkatak bwe juon uwaan baam̧le eo eaar pād ettoļo̧k kar jar ilo ejja iien eo wōt kōn ejja men eo wōt ke iaar. N̄an n̄a, jabōn kennan eo “Baam̧le eo me ej jar ippān doon ej pād ippān doon” emaron̄ depakpakļo̧k n̄an “Baam̧le eo me ej jar ippān doon ej ippān doon, jekdo̧o̧n n̄e rej ettoļo̧k jān doon.”
Katakin Ukweļo̧k Ilo Iien Eo Emōkajtata
Kōnke ejjeļo̧k iaad eweppān im en̄jake epidodo aer metak, baam̧le ko remaron̄ erom jikin kone ko rekwojarjar wōt ilo an em̧m̧ōkaj ad ukweļo̧k im m̧ool. Ro jinen im jemen remaron̄ kōm̧m̧ane juon waanjon̄ak. Naan ko relej ak ļōmņak ko rejjab jouj maron̄ m̧ōkaj im m̧ool ukweļo̧k jāni. Juon “Joļo̧k aō bōd” eļem waan emaron̄ kemour kinej ko im kūrtok jim̧or jeorļo̧k bōd im iakwe.
Rikanaan Josep Smith eaar juon waanjon̄ak n̄an kōj ke eaar ņa mejļan elōn̄ lukwo̧rko̧r ko, ippān rikinaakļo̧k ro, im men̄e jab errā ko ilo baam̧le eo an. Eaar m̧ōkaj an jeorļo̧k aer bōd, men̄e eaar jeļā kajjien ro rej lukwo̧rko̧re maron̄ kar bar lukwo̧rko̧re. Kar kajjitōk ippān kōn jeorļo̧k bōd, im eaar lelo̧k ilo ejjeļo̧k kabbōjrak.5
Ejake Jetōb in Mijenede eo
Ļōm̧aro nejin Mosaia raar kije n̄an leļo̧k gospel eo n̄an aolep. Ikdeelel in eaar itok jān en̄jake eo aer make kōn ukweļo̧k. Remaron̄ kar jab kwaļo̧k ļōmņak an jabdewōt armej ej en̄taan jān kilaan ko an jerawiwi āinwōt aer kar. Kōn menin raar jeļame iiō in kowaan ko, apan̄, im kauwōtata n̄an leļo̧k gospel eo an Jisōs Kraist n̄an rikejdāt ro aer. Ilo jekjek eo, raar lo lan̄lōn̄ eo ilo elōn̄ ro raar ukweļo̧k im en̄jake lan̄lōn̄ eo an jeorļo̧k bōd kōn Pinmuur eo an Jisōs Kraist.
Ro uwaan baam̧le ko ad renaaj eddōkļo̧k ilo ikdeelel eo aer n̄an kwaļo̧k gospel eo n̄e rej en̄jake lan̄lōn̄ eo an jeorļo̧k bōd. Lan̄lōn̄ eo an jeorļo̧k bōd emaron̄ itok em̧ool n̄e rej bar kōkāāl bujen ko n̄e rej bōk m̧ōttan kwojkwoj eo. Jetōb in mijenede eo enaaj eddōkļo̧k ilo im̧ōko im̧ōd n̄e ajri ro im ro jinen im jemen rej en̄jake lan̄lōn̄ eo an jeorļo̧k bōd ilo iien kwojkwoj eo. Jān waanjon̄ak in kautiej eo aer, jim̧or ro jinen im jemen im ajri ro remaron̄ jipan̄ kajjojo en̄jake lan̄lōn̄ eo. Lan̄lōn̄ eo emaron̄ kanooj jipan̄ ilo ukōt im̧ōko im̧ōd n̄an jikin kaminene ko an mijenede. Ajri ro remaron̄ jab jerbali mijen ko, bōtaab aolep renaaj en̄jake ikdeelel eo n̄an kwaļo̧k gospel eo, eo ekar bōktok er n̄an en̄jake jeorļo̧k bōd im aenōm̧man. Im jekdo̧o̧n eļan̄n̄e kiiō jerbal aolep raan ak jaab, aolep remaron̄ en̄jake lan̄lōn̄ eo ilo leļo̧k gospel eo n̄an ro jet.
Loļo̧k Tampeļ eo
N̄an jim̧or ro jinen im jemen im ajri ro, tampeļ eo ej iien eo em̧m̧an tata n̄an bōk juon en̄jake n̄an im iakwe an jikin ko rekwojarjar. Menin em̧ool eļap tata n̄e ajri ro rej iddik. Ajri ro rej ļotak kōn meram eo an Kraist. Em̧ool juon nin̄nin̄ emaron̄ en̄jake bwe tampeļ ekwojarjar. Kōnke ro jinen im jemen rej iakwe ajri ro reddik, tampeļ eo ej jutak n̄an er kōjatdikdik eo me remaron̄ kōm̧m̧an bwe ajri ro nejier ren iakwe ilo baam̧le eo aer indeeo—n̄an indeeo.
Jet iaami ewōr ippāer pija ko an tampeļ ko ilo m̧ōko imōmi. Kōnke tampeļ ko rej ekkal aolepān laļ in, epidodo n̄an elōn̄ ro jinen im jemen n̄an loļo̧k meļan ko an tampeļ eo ippān baam̧le ko aer. Ilo m̧ool jet remaron̄ pād ilo iien kōppeļļo̧k ko n̄e tampeļ ko rej ekkal. Ro jinen im jemen remaron̄ kajjitōk ippān ajri ro ekōjkan aer kar en̄jake n̄an pād epaake ak ilowaan tampeļ eo.
Aolep ro jinen im jemen remaron̄ kwaļo̧k naan in kam̧ool eo kōn ta kar meļeļe in tampeļ eo n̄an e. Būreejtōn Ezra Taft Benson, eo eaar iakwe tampeļ, ekar emakijkij an kōnono kōn an lale an jinen kanooj kōmetale nuknuk in tampeļ eo an.6 Eaar kōnono kōn ememļo̧kjeņ eo an āinwōt juon ļaddik lale an baam̧le eo an ke raar ilo̧k jān m̧weo im̧ōn n̄an etal n̄an tampeļ eo.
Ke eaar juon Būreejtōn an Kabun̄ in, eaar etal n̄an tampeļ ilo ejja raan eo wōt kajjojo wiik. Eaar iien otemjej kōm̧m̧an jerbal in tampeļ n̄an rūtto ro an. An iakwe n̄an tampeļ eaar itok eļap tata jān waanjon̄ak eo an ro jinen im jemen.
Aō Naan in Kam̧ool
Kwonaaj lo jet iaan lan̄lōn̄ ko am̧ reļļap tata ilo kijejeto ko am̧ n̄an kōm̧m̧ane m̧weo im̧ōm̧ juon jikin tōmak ilo Irooj Jisōs Kraist im juon jikin me eobrak kōn iakwe, iakwe eo erreo an Kraist. Jepļaaktok eo an gospel eo ekar ijjno kōn juon kajjitōk ettā kar kejekļo̧kjeņ kake ilo juon em̧ ettā, im emaron̄ wōnm̧aanļo̧k wōt ilo kajjojo im̧ōko im̧ōd ilo ad wōnm̧aanļo̧k wōt n̄an ejaake im kamineneik pedped in katak ko an gospel eo ijo. En̄in elakkar kōjatdikdik eo aō im ikdeelel eo em̧wilaļ jān ke iaar juon ļaddik edik. Kom̧ aolep ekar wōr ami ememļo̧kjeņ ekadu kōn kain em̧ rōt in. Elōn̄ iaami kom̧ kar, kōn jipan̄ eo an Irooj, kar ejaaki.
Jet raar kajjieon̄ kōn aolep kijejeto n̄an kōjeraam̧m̧an jab in, aaet kar jan̄in lewaj. Aō kallim̧ur n̄an kom̧ ej juon eo me juon uwaan Doulul eo an Jon̄oulruo Rijilōk ro juon iien kar kōm̧m̧an n̄an eō. Iaar ba n̄an e bwe kōnke kāālet ko jet ilo ro ilo nuku eo an baam̧le eo am kar kōm̧m̧ani, iaar pere bwe kōm maron̄ kar ippān doon ilo laļ eo ej itok. Eaar ba, to̧o̧n wōt aō maron̄ keememej, “Kwoj inepata kōn jorrāān eo ebōd. Kwon baj mour im erreo n̄an am̧ deļo̧n̄ e aelōn̄ in celestial, im karōk ko an baam̧le renaaj ļapļo̧k aer em̧m̧an jān jon̄an eo komaron̄ in ļōmņake.”
Ij tōmak bwe enaaj lewaj kōjatdikdik eo em̧ōņōņō n̄an jabdewōt iaad ilo mour in me raar kōm̧m̧ane aolep ijo jemaron̄ n̄an kōkarbōb kōj make im ro uwaan baam̧le eo ad n̄an mour indeeo. Ijeļā bwe karōk eo an Jemedwōj Ilan̄ ej juon karōk in m̧ōņōņō. Ij kam̧ool bwe karōk eo An ej kapidodoik n̄an kōj kajjojo ro raar kōm̧m̧ane ijo em̧m̧an tata jemaron̄ in kar liāp ilo juon baam̧le indeeo.
Ijeļā bwe kii ko an priesthood eo kar kōjepļaaktok n̄an Josep Smith kar lelaltak ilo juon ļain ejjamin tūm̧ n̄an Būreejtōn Russell M. Nelson. Kii kein rej kapidodoik liāp an baam̧le ko rainin. Ijeļā bwe Jemedwōj Ilan̄ ej iakwe kōj, ajri in jetōb ro Nejin, kōn juon iakwe eweppān. Ijeļā bwe kōn Pinmuur eo an Jisōs Kraist, jemaron̄ ukweļo̧k, erreo, im erom erreo n̄an mour ilo baam̧le ko rej iakwe n̄an indeeo ippān Jemedwōj Ilan̄ im ippān Nejin Jitōnbōro, Jisōs Kraist. Ij lukkuun kam̧ool ilo etan Jisōs Kraist, amen.