2019
Doulul eo: Juon Jikin Jej Aikuj Pād Ie
Māe 2019
2:3

Doulul eo: Juon Jikin Jej Aikuj Pād Ie

Jān Elder Carl B. Cook

Jān Būreejtōnji eo an Jiljilimjuonn̄oul

Irooj enaaj ejaake juon am̧ doulul ekajoor. Ilo An aiintok ajri ro Nejin, er rej aikuji juon jikin n̄an pād ie im eddōkļo̧k.

Ilo 2010, Andre Sebako ekar juon likao ekar pukot m̧ool eo. Men̄e ejjan̄in kar kōm̧m̧ane juon jar kōn bōro m̧okta, ekar pepe bwe en kajjieon̄. Jidik iien tokālik ekar ioon mijenede ro. Rekar leļo̧k n̄an e juon kaat ewōr ie juon pija in Bok in Mormon. Andre ekar en̄jake juon men im kar kajjitōk eļan̄n̄e mijenede ro rej kōņaan wia kake bok eo n̄an e. Rekar ba emaron̄ bōk bok eo ilo ejjeļo̧k wōņāān eļan̄n̄e enaaj itok im jar.1

Andre ekar etal make iaan n̄an Mochudi Branch eo ej kab m̧ōj ejaake ilo Botswana, Africa, make iaan. Ak branch in ekar juon eo em̧m̧an, juon kurub eļap ippān doon ie ewōr tarrin 40 ro uwaan Kabun̄.2 Rekar karuwaineneik Andre ilo wāween jemjerā. Ekar bōk katak ko an mijenede ro im kar peptaij. Ekar lukkuun em̧m̧an!

Innām ta? Ewi wāween kōm̧m̧an bwe Andre en niknik wōt? Wōn enaaj jipan̄ e eddōkļo̧k ilo iaļen bujen eo? Juon uwaak n̄an kajjitōk jab in ej doulul in priesthood eo an!3

Aolep rikabwijer priesthood ro, jekdo̧o̧n jekjek rot eo ippān, rej jeraam̧m̧an jān juon doulul ekajoor. Likao ro jatū rejitōn bōro rej kabwijer Aaronic Priesthood eo, Irooj enaaj kōm̧m̧an bwe kwōn ejaake juon doulul ekajoor, juon jikin armej ro rej aikuji kajjojo im aolep likao ro, juon jikin ijo me Jetōb eo an Irooj ej pād ie, juon jikin ijo aolep ro uwaan doulul eo rej ruwainene im aorōk. Ilo an Irooj aiintok ajri ro Nejin, er rej aikuji juon jikin n̄an pād ie im eddōkļo̧k.

Kajjojo ro uwaan būreejtōnji eo ami ej bōk m̧aan ilo am̧ kappukōt im̧weo4 im ejaake iakwe im jem̧doon ilubwilijin aolep ro uwaan doulul eo. Kwoj leļo̧k am̧ iien n̄an ro rej uwaan Kabun̄ in rekāāl ro rej janiknik, ak ro ewōr aer aikuj ko rejeno̧lok.5 Kōn kajoor eo an priesthood, kwoj kalōk juon doulul ekajoor.6 Im juon doulul ekajoor, doulul eo ebōro kuk ippān doon ej kōm̧m̧an aolep oktak ilo mour an juon likao.

Ke Kabun̄ in ekar kōjjeļļāik juon jibadbad ekāāl pedped wōt ilo m̧weo ilo ekkatak gospel eo,7 jet rekar ļōmņak kōn membōr ro āinwōt Andre im kajjitōk, “Ak ekōjkan jodikdik ro me rej itok jān jekjek an baam̧le ijo rejjab ekkatak gospel eo ie im ijo ejjeļo̧k juon mejatoto in ekkatak im mour kōn gospel eo ilo m̧weo? Renaaj ke pād make iaer?”

Jaab! Ejjeļo̧k juon eaikuj pād make iaan! Irooj ej iakwe kajjojo likao im kajjojo jiron̄. Kōj, āinwōt rikabwijer priesthood ro, jej pā ko Pein Irooj. Jej ro rej rie Kabun̄ in n̄an kijejeto ko an jibadbad eo an pedped wōt ilo m̧weo. N̄e ejabwe jipan̄ ilo m̧weo, doulul ko an priesthood im ritōl ro jet im ro m̧ōttād rej emmejrake im jipan̄ kajjojo armej im baam̧le n̄e emenin aikuj.

Ikar loe an menin jerbal. Ikar ioon menin. Ke ikar jiljino, jinō im jema rekar jepel im jema ekar etal jān jinō im ajri ro ļalem reddik. Jinō ekar jino jerbal n̄an kōmour kōm. Ekar aikuji bar juon jerbal ium̧win juon tōre, barāinwōt eļapļo̧k jeļāļo̧kjeņ. Ekar jidik wōt an iien n̄an katakin. Ak bubu im jim̧m̧a ro, ro wulepa, kōrā ro naaj jinō, bisop ro, im rūkaki in loļo̧k mōko ro rekar wōnm̧aantak im jipan̄ jino eo em̧m̧an.

Im ekar wōr juon aō doulul. Ij kam̧m̧oolol kōn ro m̧ōtta—ļaddik ro jeiū im jatū—ro rekar iakwe im jipan̄ eō. Doulul eo aō ekar juon jikin ikar aikuji. Jet remaron̄ ļōmņak imaron̄ kar m̧ōjņo̧ bwe in loe jeraam̧m̧an ilo aō mour kōnke kōn jekjek eo an baam̧le eo aō. Bōlen ikar. Ak doulul ko an priesthood eo rekar ukot men ko repen. Doulul eo aō ekar kabool eō im kar kōjeraam̧m̧an mour eo aō iban bwine.

Elōn̄ m̧ōjņo̧ ko n̄an lo jeraam̧m̧an ko ipeļaakid wōj aolep. Bōlen kōj aolep jej pād ilo juon wāween ak bar juon. Ak kōj kajjojo ijin ewōr juon an doulul, juon jikin eo me jemaron̄ jim̧or bōk kajoor im leļo̧k kajoor. Doulul eo ej “aolep n̄an juon im juon n̄an aolep.”8 Ej juon jikin ijo jej katakin doon, jerbal n̄an doon, im kalōk ippān doon im jemdoon ilo ad jerbal n̄an Anij.9 Ej juon jikin ijo im kabwilōn̄lōn̄ ko rej waļo̧k ie.

Ikōņaan ba n̄an eok kōn jet iaan kabwilōn̄lōn̄ ko rekar waļo̧k ilo doulul eo an Andre ilo Mochudi. Ilo aō kwaļo̧k waanjon̄ak in, lale pedped in katak ko me rej kōkajoorļo̧k aolep doulul an priesthood me ej jerbal n̄an er.

Ālkin an Andre kar peptaij, ekar mije mijenede ro ke rekar katakin emān bar likao ro, ro rekar barāinwōt peptaij. Kiiō ekar ļalem likao ro. Rekar jino kōkajoorļo̧k doon im branch eo.

Likao eo kein kajiljino, Thuso, ekar peptaij. Thuso ekar kwaļo̧k gospel eo ippān jilu m̧ōttan, ejjab etto ekar ratimjuon erean̄.

Rikaļoor ro an Jisōs Kraist emakijkij aer aiin doon ilo wāween in—jet ilo juon iien, āinwōt kar karuwaineneik jān ro m̧ōttāer. Etto, ke Andru ekar lo Rilo̧mo̧o̧r eo, emōkaj an jibadōkļo̧k eo jein Simon im “kar ān̄intok e n̄an Jisōs.”10 Āinļo̧k wōt, jidik iien tokālik Pilip ekar erom̧ rikaļooran Jisōs, ekar karuwaineneik eo m̧ōttan Natanael n̄an “itok im lo e.”11

Ilo Mochudi, kein kajon̄oul likao ekar jab etto ekar kobatok ilo Kabun̄ in. Mijenede ro rekar loe eo kein kajon̄oul juon. Im eo kein kajon̄oulruo ekar peptaij ālkin an loe an gospel eo ukōt ro m̧ōttan.

Ro uwaan Kabun̄ in ilo Mochudi Branch eo rekar ļo̧kjeņaer. Likao rein “rekar oktaktok n̄an Irooj, im … bōro kuk n̄an kabun̄ eo.”12

Bok in Mormon eo ekar jerbale juon eddo ekabwilōn̄lōn̄ ilo oktaktok eo aer.13 Thuso ej keememej, “Ikar jino riiti Bok in Mormon eo … aolep iien ejjeļo̧k men eņ ij kōm̧m̧ane, ilo m̧weo, ilo jikuuļ, aolep jikin.”14

Oratile ekar epaakeļo̧k gospel eo kōnke waanjon̄ak eo an ro m̧ōttan. Ej kōmeļeļeiki; “[Er] āinwōt emōkaj aer oktak ium̧win jidik iien. … Ikar ļōmņak ekar … itok wōt jān bok jidikdik eo … rej bōk ippāer aolep jikin … jikuuļ. Ikar maron̄ loe aer erom̧ jet em̧m̧aan ro rem̧m̧an. … [Ikar] kōņaan oktak barāinwōt.”15

Mochudi Branch

Aolep likao rein 12 rekar aiin doon im kar peptaij ilowaan wōt ruo iiō ko jān doon. Kajjojo iaer ekar make wōt uwaan Kabun̄ in ilo baam̧le eo an. Bōtaab rekar bōk jipan̄ jān baam̧le eo aer ilo Kabun̄ in, ekoba Būreejtōn Rakwela,16 branch būreejtōn eo aer; Elder im Sister Taylor,17 ruo ripālele rej mijenede; im ro jet uwaan branch.

Brother Junior,18 juon ritōl an doulul, ekar karuwainene likao rein n̄an m̧weo im̧ōn ilo ālkin rālep in Jabōt ko im katakin er. Likao rein rekar ekkatak jeje ko rekwojarjar ippān doon im kar kōm̧m̧an nokon in jota aolep iien.

Loļo̧k ro uwaan Kabun̄ in

Brother Junior ekar bōk er bwe ren loļo̧k ro uwaan Kabun̄ in, armej ro rekar katak ippān mijenede ro, im jabdewōt eo eaikuj in loļo̧k. Aolep likao rein 12 rekar ekkar ituļo̧kan wa eo waan Brother Junior. Ekar joļo̧k er ilo m̧ōko ilo ruo iaan ļo̧k ruo ak jilu im ektake er tokālik.

Men̄e likao rein rekar baj ekkatak wōt kōn gospel eo im rekar jab en̄jake ke eļap aer jeļā, Brother Junior ekar ba n̄an er n̄an kwaļo̧k juon ak ruo men ko rekar jeļā ippān armej ro rekar loļo̧k. Rikabwijer priesthood rein reddik rekar ekkatak, jar, im jipan̄ emmejrake Kabun̄ in.19 Rekar kakūrm̧ool eddo ko aer im kar en̄jake lan̄lōn̄ eo jān jerbal.

Kumi in Jemjāti ro

Andre ekar ba, “Kōm kar ikkure ippān doon, ettōn̄ ippān doon, jan̄ ippān doon, im erom̧ jem̧doon.”20 Ilo m̧ool, rekar kūr er make “Kurub in Jem̧jāti ro.”

Ippān doon rekar kōm̧m̧ane juon kōttōbar bwe er aolep renaaj kar jerbale mijen ko. Kōnke rekar make wōt uwaan Kabun̄ in ilo baam̧le ko aer, ekar lōn̄ apan̄ ko rekar aikuj in anjo̧ jāni, ak rekar jipan̄ doon jelm̧ai.

Juon ilo̧k juon, likao rein rekar bōk mijen kūr ko aer. Ro rekar etal m̧okta rekar jeje leta n̄an m̧weo n̄an ro rekar m̧aanjabpopo wōt, kwaļo̧k en̄jake ko im rōjan̄ er n̄an jerbal. Jon̄oul juon iaan likao rein rekar jerbale mijen ko aer.

Likao rein rekar kwaļo̧k gospel eo ippān baam̧le ko aer. M̧am̧a ro, leddik ro, ļaddik ro jeier im jatier, ro m̧ōttāer, barāinwōt armej ro rekar katakin er ilo mijen ko aer, raar oktak im peptaij. Kabwilōn̄lōn̄ ko rekar waļo̧k im mour ko an elōn̄ armej rekar jeraam̧m̧an.

Imaron̄ ron̄ an jet iami ļōmņak bwe bōlen juon kabwilōn̄lōn̄ emaron̄ kar waļo̧k wōt ilo juon jikin āinwōt Africa, jikin eo armej ro rej m̧ōņōņō in ron̄jake ijo ej kōmōkajļo̧k aiintok Israel. Ijoke, ij kam̧ool bwe pedped in katak ko kar kōjerbali ilo Mochudi Branch eo rej m̧ool aolep jikin. Jekdo̧o̧n ia kom̧ij pād ie, doulul eo am̧ emaron̄ eddōkļo̧k kōn jerbal in kōro̧o̧ltok ro uwaan Kabun̄ in im kwaļo̧k gospel eo. Jekdo̧o̧n n̄e juon rikaļoor ej pukōtļo̧k juon m̧ōttan, juon emaron̄ in erom ruo. Ruo emaron̄ erom emān. Emān emaron̄ erom ralitōk. Im ralitōk emaron̄ erom jon̄oulruo. Branch ko rekar erom̧ ward ko.

Mochudi Ward

Rilo̧mo̧o̧r eo ekar katakin, “Ijo ruo ak jilu rej koba ippān doon ilo Eta, … lo, Inaaj barāinwōt pād ilubwiljier—em̧ool āinwōt Ij pād ilubwiljimiro.”21 Jemedwōj Ilan̄ ej kōpooje ļōmņak im būruwōn armej ro ipeļaakid. Jemaron̄ ļoor im̧we ko, leļo̧k juon pein jem̧jerā, kwaļo̧k m̧ool, karuwaineneik ro jet n̄an riiti Bok in Mormon eo, im iakwe im jipan̄ er ilo aer itok n̄an jeļā Rilo̧mo̧o̧r eo ad.

Enan̄in 10 iiō jān iien eo me Kumi in Brother rein jān Mochudi rekar jino iaļen ito itak in aer ippān doon, im rekab de juon kumi in jemjān jemjati ro.

Katlego ekar ba, “Kōm maron̄ ejjeplōklōk ilo jikin ko rettoļo̧k ak kōmij wōt pād wōt ijeņ n̄an jipan̄ doon.”22

Ej aō jar bwe jenaaj bōk kajjitōk in an Irooj n̄an juon wōt Ippān ilo doulul ko an priesthood eo ad bwe kajjojo doulul en maron̄ erom juon jikin jej aikuji, juon jikin aiintok doon, juon jikin me ej eddōkļo̧k.

Jisōs Kraist ej ad Rilo̧mo̧o̧r, im en̄in ej jerbal eo An. Ij lukkuun kam̧ool ilo etan Jisōs Kraist, amen.

Kakeememej ko

  1. Lale Mark and Shirley Taylor, comp., The Band of Brothers (Mochudi Branch conversion stories and testimonies, 2012–2013), 4, Church History Library, Salt Lake City.

  2. Personal correspondence, Letanang Andre Sebako, Band of Brothers resource files, 2011–19, Church History Library, Salt Lake City.

  3. Būreejtōn Boyd K. Packer ekar ba: “N̄e juon em̧m̧aan ej kabwijer priesthood eo, aikuji e n̄an juon men eo ekilepļo̧k jān e make. Ej juon men eo ej pād itulikin make n̄an an maron̄ kōm̧m̧ane juon an kallim̧ur elikio” (“The Circle of Sisters,” Ensign, Nov. 1980, 109–10).

  4. Būreejtōn Russell M. Nelson ekar kōmeļeļeiki ewi wāween n̄an pukot revelesōn innām kajjitōk, “Ilo am̧ āliji jerbal in raan n̄an raan, allōn̄ n̄an allōn̄, iiō n̄an iiō, kwonaaj “eddōkļo̧k n̄an pedped in revelesōn’” (“Revelation for the Church, Revelation for Our Lives,” Liahona, May 2018, 95; bar lale Teachings of Presidents of the Church: Joseph Smith [2007], 132).

  5. Lale Bok in Bōk Meļeļe 2: Tōl Kabun̄ eo (2010), 8.3.2.

  6. Ro ret rej jipan̄ barāinwōt, ekoba ro uwaan bisoprik eo im rikakpilōklōk ro. Elder Ronald A. Rasband ekar je bwe juon iaan kōjeraam̧m̧an ko n̄an bar karōk doulul ko an Melkisedek Priesthood eo, kar kōjjeļļā kake ilo M̧aaj 31, 2018, ej n̄an “kōtļo̧k an bisop eo kōjekiik eļapļo̧k eddo ko n̄an doulul eo an elder ro im būreejtōn ro an Doulul eo an Kōrā ro bwe bisop eo im rikakpilōklōk ro an ren maron̄ pedped wōt ioon eddo ko aer raorōk—eļaptata tōl ioon jiron̄ ro im likao ro rej kabwijer Aaronic Priesthood eo” (“Lo! Juon Jarin Tariņae an Irooj,” Liaona, May 2018, 59). Enjeļ ro renaaj barāinwōt jipan̄. Rikabwijer Aaronic Priesthood ro rej kabwijer kii ko an jerbal ko an enjeļ raņ (lale Katak im Bujen ko 13:1bar lale Dale G. Renlund and Ruth Lybbert Renlund, The Melchizedek Priesthood [2018], 26). Elder Jeffrey R. Holland ekar ba: “ekkā wōt an [enjeļ rikarejar ro] jab maron̄ lo er. Jet iien rej. Ak loe er ak jab loe er aolep iien rej pād epaak. Jet iien jerbal ko aer reļļap im aorōk n̄an aolepān laļ in. Jet iien ennaan ko eļapļo̧k aer ittiņo̧. Iien otemjej jibadbad eo an enjeļ ej n̄an kakkōļ. Ak aolep iien ekkā an inem̧m̧an, n̄an letok jet wāween ko retūriam̧o̧, tōl ilo iien ko reppen” (“The Ministry of Angels,” Liahona, Nov. 2008, 29). If you desire such help, you can “ask, and ye shall receive” (Jon 16:24).

  7. Lale Russell M. Nelson, “Naan In Kōppeļļo̧k ko,” Liaona, Nob. 2018, 7–8.

  8. Lale Alexandre Dumas, The Three Musketeers (1844).

  9. Lale Bok in Bōk Meļeļe 2, 8.1.2.

  10. Lale Jon 1:40–42.

  11. Lale Jon 1:43–46.

  12. 3 Nipai 28:23.

  13. Lale D. Todd Christofferson, “The Power of the Book of Mormon” (address given at the seminar for new mission presidents, June 27, 2017).

  14. Thuso Molefe, in Taylor, The Band of Brothers, 22.

  15. Oratile Molosankwa, in Taylor, The Band of Brothers, 31–32.

  16. Lucas Rakwela, Mochudi, Botswana.

  17. Mark and Shirley Taylor, Idaho, USA.

  18. Cilvester Junior Kgosiemang, Mochudi, Botswana.

  19. Lale Katak im Bujen ko 20:46–47, 53–54.

  20. Personal correspondence, Letanang Andre Sebako, Band of Brothers resource files.

  21. Katak im Bujen ko 6:32.

  22. Katlego Mongole, in “Band of Brothers 2nd Generation” (unpublished compilation), 21.