Kōppopo n̄an Ro̧o̧ltok eo an Irooj
Kabun̄ eo an Jisōs Kraist im Armej ro Rekwojarjar ilo Raan-ko Āliktata ej Kabun̄ ej jenolo̧k ilo kajoor im maron̄ n̄an kōttōbrak men ko remenin aikuj n̄an m̧aanjabpopo n̄an Itok eo Kein Karuo an Irooj.
Ilo wiik kein ruo, jenaaj kemeeme Ijtō. Jerkakpeje eo ej kam̧ool kōn kwojarjar eo an Jisōs Kraist im m̧ool eo an Anij Jemed. Ļōmņak ko ad rej oktakļo̧k n̄an Rilo̧mo̧o̧r, im jej kōļmenļo̧kjeņ “kōn mour eo An ejej uwaan im kōn katok in in kar pinmuur eo An eļap.”1 Ij kōjatdikdik jej bar ļōmņak kōn an Itok n̄e “Enaj jerbal einwōt Kiin̄ in Kiin̄ ran im Iroij in … Iroij ran.”2
Jet tōre remootļo̧k ilo Buenos Aires, Argentina, iaar bōk kūņaaō ilo juon kweilo̧k ippān ritōl jen kajjo kabun̄ ko. Iakwe eo aer n̄an ro m̧ōttaer ejjeļo̧k kalijōkļo̧k kake. Raar kōņaan kōjem̧ļo̧k en̄taan im jipan̄ armej walōn̄tak jān kōmakoko im jerm̧ōļ. Iaar kōļmenļo̧kjeņ kōn jon̄an kein jipan̄ ko Kabun̄ in ej kōm̧m̧ani, ekoba ko būroojāāk ko ippān doon kaki jen doulul in ko tōmak kar kwaļo̧ki ilo kweilo̧k in. Iaar en̄jake eļap kam̧m̧oolol n̄an membōr ro an Kabun̄ eo an Jisōs Kraist im Armej ro Rekwojarjar ilo Raan-ko Āliktata bwe en kōm̧m̧an jerbal in jipan̄ āinwōt Kraist.
Ilo tōre eo, Jetōb Kwojarjar eo eaar kapen ruo men ko n̄an eō. Juon, jerbal in karejar n̄an menin aikuj ko ilo kanniōk eaorōk im eaikuj in wōnm̧aanļo̧k wōt. Kein karuo kar jab kōtmene, ak ekajoor im ealikkar. Ekar en̄in: ilo aolep jerbal in jipan̄, elukkuun in aorōk n̄an kōpooj laļ in n̄an Itok eo Kein Karuo an Irooj Jisōs Kraist.
N̄e Enaaj itok, jum̧ae im bōd in kien reban dikļo̧k ļo̧k wōt; ak renaaj jako:
“Im kidu oļip barāinwōt enaaj jokwe ippān lamb eo, im kidu leopard enaaj babu ippān kunen goat; im kunen kau im kunen ļaioon im kau kōmatōke ippān doon; im juon ajri enaaj tōl er. …
“Rej jamin naaj kōmetak ak ko̧kkure ilo aolepān toļ eo Aō ekwōjarjar; bwe laļ enaaj obrak kōn jeļā kōn Irooj āinwōt dān ko rej kalibobo lo̧jet.”3
Jeram̧ōļ im en̄taan reban mājkun wōt; ak renaaj jako:
“Re jāmin bar kwōle, re jāmin bar maro, im aļ ej e jāmin bar kōjeek er, ak ejjeļo̧k bwiļ.
“Bwe Lamb eo Ej eoļōpan tūroon Enaaj naajdik kōj, im Enaaj tōl kōj n̄an unin dān ko dān in mour; im Anij enaaj kōm̧ōrāik dānnin kōmjaaļaļ jān mejād.”4
Em̧ool metak im būrom̧ōj an mej enaaj jako.
“Ilo raan en nin̄nin̄ eo ej jamin mej m̧ae an rūtto; im mour eo an enaaj āinwōt dettan an juon wōjke;
“Im n̄e ej mej enaaj ban kiki, āinwōt ba ilo laļ in, a enaaj oktak ilo būkkinkwōle ilo rom, im enaaj weaak lōn̄ļo̧k, im an kakkije enaaj aiboojoj.”5
Kōn menin, jen aolep kōm̧m̧ane ijo jemaron̄e kiiō n̄an jipan̄ ro rej en̄taan im būrom̧ōj, im jen wūjļepļo̧k kōj ilo tiljek n̄an kōppopo ko aikuji n̄an raan eo n̄e metak im nana rej jem̧ļo̧k kitier, n̄e “Kraist [enaaj] irooj make ioon laļ; im … bwe laļ enaaj kōkāāl im bōk aiboojoj in paredaise eo an.”6 Enaaj juon raan in lo̧mo̧o̧r im ekajet. Kar Anglican Bisop eo an Burham, Dr. N. T. Wright, eaar kōmeļeļeik aorōkin pinmuur eo an Kraist, Jerkakpepe eo, im Ekajet n̄an anjo̧ ioon bōd im kajim̧we aolep men otemjeļo̧k.
Eaar ba: “Anij eaar kālet juon raan eo me enaaj ekajete laļ in jen em̧m̧aan eo eaar kālet e—im eaar letok aenōm̧m̧an n̄an aolep ilo an kar kajerkak ļein jān mej. M̧ool eo kōn Jisōs RiNazareth, im eļaptata kōn jerkakpeje eo An jān mej, rej pedped in kaeno̧m̧m̧an eo an ke lal in ejjab kar jide. Ejjab juon menin kakure; bwe n̄e jej kōm̧m̧an jim̧we kiiō jejjab pād ilo marok, kajjieon̄ in kalōk juon em̧ me eaar wōtļo̧k, ak kōm̧m̧ane juon wa eo me eban jerbal. Ke Anij eaar kōjerkak Jisōs jān mej, eaar jab men jidikdik eo me jerbal in ekajet eļap ekar pād ie juon kōmeļeļe, ine [eo] … kōjatdikdik ejjeļo̧k jem̧ļo̧kin. Anij eaar kwaļo̧k, ilo juon wāween eo ekajoor, bwe Jisōs RiNazareth eaar lukkuun Messaia eo. … Ilo bwebwenato in eļap, [Jisōs] make eaar en̄taan im bōk ekajete, itok n̄an juon jikin kōn kōkkāļļe n̄an ineek aolep en̄taan im bōd in kien ilo bwebwenato, n̄an ineek eddodo eo, marok eo, me eken̄taanan, me ebōd ekiene, kōn emake, im kōn an kajoor.”7
Ke iaar pād ilo kweilo̧k eo ilo Buenos Aires me iaar ba ļo̧k m̧okta, Jetōb eaar kalikkar n̄an n̄a bwe Kabun̄ eo an Jisōs Kraist im Armej ro Rekwojarjar ejenoļo̧k ilo jerbal n̄an kadedeļo̧k kōppopo eo eaorōk n̄an Itok Kein Karuo an Irooj; ilo m̧ool, em̧ōj an jepļaaktok n̄an jibadbad in. Kwomaron̄ ke lo jabdewōt jikin armej ro rej dāpij jerbal eo kiiō āinwōt kar kanaan kake “jerbal an iien ko re jejjet,” kōn jibadbad eo an Anij n̄an “kobaik men ko otemjej ilo Kraist”?8 Eļan̄n̄e kwojjab lo juon jukjukinpād n̄an lukkuun kadedeļo̧k ta ko aikuji n̄an kōm̧m̧ani jim̧or n̄an ro remour im ro remej n̄an pojak n̄an raan eo, eļan̄n̄e kwojjab lo ijin juon doulul eo ekōņaan leļo̧k iien im jāān n̄an aiin im keppopo n̄an armej in bujen ro repojak n̄an bōk Irooj, kwoban loe jabdewōt jabdewōt jikin.
Kōnono n̄an Kabun̄ in ilo 1831; Irooj eaar ba:
“Ki ko an aelōn̄ in Anij em̧ōj liļo̧k n̄an armej ioon laļ, im jān ijin gospel eo enaaj jabwilbwil m̧aanļo̧k n̄an jem̧ļo̧k ko an laļ. …
“Kūr ioon Irooj, bwe aelōn̄ eo An en maron̄ wōnm̧aanļo̧k ioon laļ, bwe ro rej pād ie ren maron̄ bōk e, im pojak n̄an raan ko rej itok, ko me ilo er eo Nejin Armej enaaj wanlaļtak ilo lan̄, kōpālpel ilo meram in aiboojoj eo An, n̄an ioon aelōn̄ eo an Anij eo em̧ōj kar kajutake ioon laļ.”9
Kiiō ta eo jemaron̄ kōm̧m̧ane n̄an kōppopo n̄an raan eo? Jemaron̄ kōpooj kōj make āinwōt juon armej, jemaron̄ aiintok armej in bujen ro an Irooj, im jemaron̄ jipan̄ lo̧mo̧o̧ren kallim̧ur eo kōn lo̧mo̧o̧r “kar kōm̧m̧ani n̄an ro jemeer,”ro ro jibūd im jim̧aad remej.10 Aolepen men kein raikuj in kōm̧m̧an ilo jon̄an m̧okta jen an bar itok Irooj.
Moktata, aorōktata n̄an ro̧o̧ltok eo an Irooj ej pād eo an armej ro repojak ioon laļ in n̄an bōk E ilo An itok. Eaar ba bwe ro rej pād wōt ioon laļ in ilo raan eo, “jān eo ediktata n̄an [eo] erūttotata, … im naaj obrak kōn jeļāļo̧kjeņ kōn Irooj, im naaj lo māj n̄an māj, im naaj kotakļo̧k ainikier, im kōn ainikien eo ippān doon al al kāāl, im ba: Irooj eaar bar bōktok Zaion. … Irooj eaar aiintok aolep men ko ilo juon wōt. Irooj eaar bōklaļtak Zaion jān ijo ilan̄. Irooj eaar bōklōn̄tak Zaion jān ijo ilaļ.”11
Ilo tōre ko etto, Anij eaar bōk Zaion ekwojarjar n̄an E make.12 N̄an keidi, ilo raan ko āliktata juon Zaion ekāāl enaaj bōk Irooj ilo An ro̧o̧ltok.13 Zaion ej eo erreeo ilo bōro, armej ro rej juon bōro im juon wōt ļōmņak, kuk ilo wānōk ilo ejjeļo̧k jeram̧ōļ ilubwiljier.14 Rikanaan Josep Smith eaar ba,“Jej aikuj kalōk Zaion āinwōt jibadbad eo ad eļap.”15 Jej kalōk Zaion ilo m̧oko im̧ōd, ward ko, branch ko, im stake ko kōn juon wōt, ilo em̧m̧an, im iakwe em̧ool.16
Lo, idenoņe em̧ōkaj an itok ioon aolep ro rej pād ilaļ, juon raan in libabne—“juon raan in kattil, juon raan in kōlo̧urō, in jan̄, in būrom̧ōj, im in liaajlo̧ļ; im āinwōt juon aire enaaj itok ioon aolepān mejān laļ, Irooj ej ba.”17 Aaet, aiintok stake ko n̄an “juon jikin jojomar, juon jikin likōjejn̄ak jān lan̄ eo, im jān libabne n̄e naaj lutōk leplepļo̧k ilo ejjeļo̧k kāre ioon aolepān laļ.”18
Āinwōt kar tōre ko etto, jej “kwelo̧k emmakijkij, n̄an jitlo̧k im n̄an jar, im n̄an kōnono ippān doon kōn em̧m̧anļo̧k eo an jetōb ko [ad]. Im … bōk m̧ōttan pilawā im [dān], n̄an keememej Irooj Jisōs.”19 Āinwōt an kar Būreejtōn Russell M. Nelson kōmeļeļeiki ilo Oktoba kweilo̧k eo eļap, “Jibadbad in kar an Kabun̄ in ium̧win juon iien eaitok ej n̄an jipan̄ aolep membōr ro kōļapļo̧k tōmak eo aer ilo ad Irooj Jisōs Kraist im ilo Pinmuur eo An, n̄an jipan̄ er ilo kōm̧m̧an im kōjparok bujen ko aer ippān Anij, im n̄an kōkajoorļo̧k im liāpe baam̧le ko aer.”20 Men eo ekkar, eaar kwaļo̧k aorōk eo kōn bujen ko an tampeļ, ekōm̧m̧an bwe Raan in Jabōt, im kwojkwoj ioon gospel in ilo kapijuknen im rie jen kein ekkatak ko ilo Kabun̄ in. Jej kōņaan jeļā kōn Irooj, im jej kōņaan jeļā kajjien Irooj.21
Jibadbadd eo n̄an kalōk Zaion ej n̄an aiintok armej in bujen ro an Irooj.22 “Kōmij tōmak ilo lukkuun kuktok eo an Israel im ilo jepļaaktok eo an Bwij ko Jon̄oul.”23 Aolep ro renaaj ukweļo̧k, tōmak ilo Kraist, im peptaij rej armej in bujen ro An.24 Irooj Make eaar kanaan bwe m̧okta jen An ro̧o̧ltok, gospel eo eaan kwaļo̧k n̄an aolepen laļ25 “n̄an bōk armej ro [An], ro jen m̧weo im̧ōn Israel,”26 “innām enaaj itok jem̧ļo̧k eo.”27 Kanaan eo an Jeremaia eaar kūrm̧ool:
“Kōn men in, lo, raan ko rej itok, Jeova ej ba, im [re] ban bar [ba], Jeova emour, ear kadiwōjļo̧k ro nejin Israel jān āne in Ijipt;
“Ak, Jeova ej mour, eaar kadiwōjļo̧k ro nejin Israel jān āne eo wo ean̄ im jān aolep āne ko Ear joļo̧k er: im Inaaj kajepļaak er n̄an āne eo aer eo Iar leļo̧k n̄an ro jim̧m̧aer.”28
Būreejtōn Nelson eaar bar ālijji katak in bwe “aiintok [Israel] ej men eo eaorōktata ej bōk jikin ioon laļ in rainin. Ejjeļo̧k men maron̄ keidi kake, ejjeļo̧k men eaorōk keidi kake, ejjeļo̧k bar jabdwōt men eaorōkļo̧k jene. Im eļan̄n̄e kwoj kālet kake, … komaron̄ in juon eo eļap kūņaan ie.”29 Armej ro Rekwojarjar ilo Raan-ko Āliktata rej aolep iien armej in mijenede. Bukwi taujin ro em̧ōj aer bōk kūr ko jen kar jinoin Jepļaaktok eo, jon̄oul taujin ro kiiō rej jerbal. Im, āinwōt an Elder Quentin L. Cook kar kwaļo̧k, kōj wōj aolep maron̄ bōk kūnaad ilo wāween ko repidodo im rekkar, ilo iakwe, kūrtok ro jet n̄an kobatok ippān ilo jar, itok n̄an m̧oko im̧ōd, im erom̧ m̧ōttad. Jeje eo an Bok in Mormon ekar juon kōkaļļe bwe aiintok in eaar jinoe.30 Bok in Mormon make ej juon kein jerbal in aiintok im oktak.
Ebarāinwōt n̄an kōppopo n̄an Itok eo Kein Karuo ej jibadbad eo eļap n̄an ro jibūd im jim̧m̧ad. Irooj eaar kalim̧m̧ur n̄an jilkintok Ilaija mokta jān Itok eo Kein Karuo, “raan eo eļap im rekaammijak an Irooj,”31 n̄an “kwaļo̧k … Priesthood eo” im “kalōlō ilo būruōn ro nejier kallim̧ur ko kar kōm̧m̧ani n̄an ro jim̧m̧aer.”32 Ilaija eaar itok āinwōt kar kallim̧ur: Raan eo ekar Eprōļ 3, 1836, jikin eo ilo Kirtland Temple. Ilo jikin in im ilo iien in, em̧ool eaar leļo̧k kallim̧ur in priesthood kii ko n̄an lo̧mo̧o̧ren ro remej im bar ippān doon eo an ļeo im lieo pālele, im aolep epepen in baam̧le ko im indeeo eo ejjeļo̧k jem̧ļo̧kin.33 N̄e ejako men in, jibadbad eo an kōm̧anm̧an en kar waan, im meļeļein bwe, laļ in en kar kaje ak “ejjeļo̧k tokjen.”34
Ilo juon nokin in jota an jodikdik ro ilo iien aje eo an Rom Italy Temple, bukwi jodikdik in likao im jiron̄ ro raar pād raar kwaļo̧k n̄an Būreejtōn Nelson kaat ko raar kōppoji etan ro jibwieer im jim̧m̧aer. Raar pojak in deļo̧n̄e tampeļ eo n̄an kōm̧m̧ani peptaij ko n̄an ro jibwieer im jim̧m̧aer ālkin wōt an peļļo̧k. Eaar juon iien em̧m̧an, ak juon waanjon̄ok in kijejeto n̄an kalōk Zaion n̄an epepen ko raar ilo̧k im̧aanļo̧k.
Ilo ad kajjieon̄ in tiljek n̄an kalōk Zaion, ekoba ad jipan̄ aiintok ro em̧ōj an Irooj kālet n̄an lo̧mo̧o̧ren ro remej, jej aikuj bōjrak jidik im keememej bwe en̄in ej jerbal eo an Irooj im Ej kōm̧m̧ane. E ej Irooj in jikin kallib eo, im jej rijerbal ro An. Ej kajjitōk ippād n̄an jerbal ilo jikin kallib eo kōn ad kajoor ilo “tōrein āliktata” im Ej jerbal ippād.35 Enaaj bōlen em̧m̧an n̄an ba Ej kōtļo̧k ad jerbal Ippān. Āinwōt an Paul kar ba, “I ar kallib, Apollōs ear kamourur, a Anij ear kaddekļo̧k.”36 En̄in ej E eo ej kōm̧akajļo̧k jerbal eo An ilo tōre in.37 Kōjerbal kijejeto ko ad—men “ko ad reddik,”—Irooj ej bōktok men ko reļļap.38
Raan kein āliktata im eļap eaikuj in m̧ōkaj kalōke—Zaion ioon laļ kobain Zaion jān lan̄ ilo ro̧o̧ltok eo eaiboojoj an Rilo̧mo̧o̧r. Kabun̄ eo an Jisōs Kraist ej kien n̄an keppopo—im ej kepooj—laļ in n̄an raan eo. Im kōn menin, Ijtō in, jen keememej Jerkakpeje Jisōs Kraist im aolep otemjeļo̧k ko rej erreijeļo̧k: An jepļaaktok n̄an tōl taujin iiō in aenōm̧m̧an, juon ekajet ejim̧we im kien ejjejet n̄an aolep, jab mour wabanban an aolep ro raar mour ioon laļin, im kallim̧ur kōn mour indeeo. Jerkakpej eo an Kraist ej jeļā eo bwe aolep renaaj kōm̧m̧an jim̧we. Jen kalōt Zaion n̄an kōm̧ōkaj raan eo itok. Ilo etan Jisōs Kraist, Amen.