Pojak n̄an Bōk Aolep Menin Aikuj Otemjeļo̧k
Kōjeraam̧m̧an ko renaaj itok ilo ad kajjieon̄ in kakūrm̧ool eddo eo ad make n̄an ekkatak im iakwe gospel in an Jisōs Kraist.
Būrookram̧ im m̧akūtkūt ko an Kabun̄ eo an Jisōs Kraist im Armej ro Rekwojarjar ilo Raan-ko Āliktata rej jino ļapļo̧k ekkatak eo ej pedped ilo mweo̧ im kabun̄ ej rie, āinwōt kar kwaļo̧k ilo jejjo ennaan ko kōjjeļā kaki ilo kweilo̧k eo eļap iien eo ļo̧k. Būreejtōn Russell M. Nelson eaar kapilōk kōj: “Ekanooj lōn̄ men ko rej itok. … Mōn̄ā m̧ōn̄ā ko rōōne. Bōk eļap iien kakije. Enaaj kanooj kalimomo.”1
Ij jar im karuwaineeneik jipan̄ eo an Jetōb Kwojarjar ilo ad ļōmņak ippān doon kōn jet iaan tōprak in oktak ko ilo Kabun̄ in an Irooj em̧ōj an jepļaaktok.
Ekkatak eo ej Pedped ilo Mweo̧ im Kabun̄ ej Rie
Elder Craig C. Christensen im n̄a kar m̧ōttā ilo juon kar kweilo̧k an aolep ritōl an priesthood, im ekar kōjerbal ruo kajjitōk ko repidodo n̄an kalikkar pedped eo n̄an kōļapļo̧k ekkatak eo ej pedped ilo mweo̧ im Kabun̄ ej rie. Eaar ba bwe ijeļo̧kin ro̧o̧l n̄an kapijuknen ko ad ālkin kweilo̧k ko an Kabun̄ in ilo Jabōt im kajjitōk, “Ta eo kwaar ekkatak kōn Rilo̧mo̧o̧r im gospel eo An rainin ilo im̧ōnjar?” jej aikuj in kajjitōk ilo kweilo̧k ko ad ilo Kabun̄, “Ta eo kwaar ekkatak kōn Rilo̧mo̧o̧r im gospel eo An ilo wiik in ilo kapijuknen eo am̧?” Lukkuun kōjparok raan in Jabōt, kein katakin eo ekāāl, oktak in jikejuuļ in kweilo̧k ko aolep rejipan̄ kōj ekkatak gospel in jim̧or ilo kapijuknen ko ad ak ilo kabun̄ in.
Kajjojo membōr ro an Kabun̄ eo an Jisōs Kraist im Armej ro Rekwojarjar ilo Raan-ko Āliktata ewōr juon aer make eddo n̄an ekkatak n̄an mour kake katak ko an Irooj im n̄an būki kain̄i ko kōn mālim eo ejejjet kōn lo̧mo̧o̧r n̄an mour ijo eutiejtata. Jejjab aikuj kōtļo̧k bwe Kabun̄ in āinwōt juon doulul en katakin ak jiron̄ kōj aolep men otemjeļo̧k jej aikuj jeļā n̄an kōm̧m̧ani n̄an erom̧ rijilōk ro rej wūjļepļo̧k im niknik n̄an jem̧ļo̧kin.2 Ijoke, eddo eo ad make ej n̄an ekkatak ta jej aikuj in ekkatak, n̄an mour ilo ad jeļā mour, im n̄an erom̧ wōn eo Maajta ekōņaan bwe jen erom̧. Im kapijuknen ko ad rej jikin ekkatak, mour, im erom̧.
Āinwōt juon ajri, Josep Smith eaar ekkatak kōn Anij ippān baam̧le eo an. Kijejeto ko an n̄an jeļā ankilaan Anij kōn e ekōm̧m̧an bwe Josep en pukot m̧ool eo ilubwiļjin elōn̄ oktak in kabun̄ ko, lukkuun kōļmenļo̧kjeņ kōn jeje ko rekwojarjar, im lukkuun jar n̄an Anij. Ke Josep Smith eo edik eaar jepļaak n̄an kapijuknen eo an jān Bukwōn in Wōjke eo ālkin wōt an Jemed im Nejin waļo̧k, eaar m̧oktata kōnono n̄an jinen. Im ke “eaar atrak ilo jikin kijeek in kōmāāņāņ eo, [jinen] eaar kajjitōk ta eo ewōjake. [Josep] eaar uwaake, ‘Āinwōt juon, aolep men rem̧m̧an—N̄a ebwe aō pād.’ Innām [eaar] ba n̄an [jinen], ‘em̧ōj aō jeļā kōn n̄a make.’”3 En̄jake eo an Josep make eaar letok juon jon̄ak eo ekajoor kōn ekkatak bwe jen aolep ļoore. Jej aikuj bar ekkatak ilo kōj make.
Jibadbad eo eļap ilo karōk eo an Jemedwōj Ilan̄ ej bwe ro Nejin ren erom̧ āinwōt E. Kōn menin, Eaar letok n̄an kōj jerbal ko raorōk n̄an eddōkļo̧k im wōnm̧aanļo̧k. Kallim̧ur eo ad n̄an ekkatak im mour ekkar n̄an m̧ool in eļapļo̧k an aorōk ilo juon lal me “eļōkapokpok”4 im eļapļo̧k an nana. Jeban baj itok wōt n̄an kweilo̧k ko an Kabun̄ in im bōk kūņaad ilo būrookram̧ ko innām būki aolep im̧we im kōjparok ko an Jetōb me enaaj kōmaron̄ kōj “n̄an jutak ilo raan eo enana.”5
“Ro jinen im jemen ewōr aer eddo n̄an kōkaajririik ro nejier ilo iakwe im jim̧we.”6 Ritōl ro reim̧we an Kabun̄ in, rūkaki ro, im m̧akūtkūt ko rejipan̄ kijejeto ko an kajjojo im an baam̧le eddōkļo̧k ilo jetōb. Men̄e jej aolep aikuj jipan̄ wōnm̧aanļo̧k ilo iaļen bujen in, jerbal eo ad eļaptata n̄an kōļapļo̧k mour in jetōb im niknik epād iood kajojo.
Keememej ke Nipai, nejin rikanaan Liai, kar ikdeleel n̄an lo, ron̄, im jeļā jān e make kōn kajoor eo an Jetōb Kwojarjar men ko jemen eaar jeļā ilo visōn eo kōn wōjke in mour. Nipai eaar lukkuun aikuji im eaar jeraam̧m̧an ke ej jodikdik kōn waanjon̄ok im katak ko jen ro “jinen im jemen rem̧m̧an.”7 Aaet, āinwōt Josep Smith, eaar kijōrjōr in ekkatak n̄an jeļā n̄an e make.
Eļan̄n̄e kom̧ aolep ak n̄a jeļā kōn Jisōs Kraist im gospel eo An em̧ōj an jepļaaktok kōn wōt ta eo armej ro jet rej katakin ak jiron̄ kōj, innām pedped in naan in kam̧ool eo ad kōn E im jerbal eo An raan-ko āliktata ej ekkal ioon bok.8 Jen jab lukkuun pedped ioon ak baroik meram in gospel in im jeļā eo jen armej ro jet—men̄e jet ro jej iakwe im leke er.
Men eo eaorōktata, Rikanaan Josep Smith eaar katakin bwe kajjojo Armej ro Rekwojarjar ilo Raan-ko Āliktata reaikuj in meļeļe kōn e make “kōn jekjek im jibadbad ko an Anij ilo ad itok n̄an laļ in.”9
Men̄e jemaron̄ riiti im keidi aolep men kar je jān raan ko an Adam, kōn jemdoon eo an armej n̄an Anij im enjeļ ro ilo juon laļ tokālik, jej aikuj lukkuun jeļā jidik wōt kake. Riit en̄jake ko an ro jet, ak revelesōn eo leļo̧k n̄an er, emaron̄ jab letok n̄an kōj juon jeļā eo eļap kōn jekjek in jemdoon eo ad em̧ool n̄an Anij. Jeļāļo̧kjen kōn men kein maron̄ in būki wōt jen en̄jake eo ilo kain̄i ko an Anij karōki n̄an kōttōbar in.”10
Kōttōbrak kōttōbar in kōjeraam̧m̧an eo an Jetōb n̄an kōj make im baam̧le ko ej juon unin pedped in būrookram̧ im m̧akūtkūt ko an Kabun̄ eo an Jisōs Kraist im Armej ro Rekwojarjar ilo Raan-ko Āliktata rej erom̧ ekkatak eo ej pedped ilo m̧weo im Kabun̄ ej rie ilo iien tarlep in gospel in ilo raan kein āliktata.
Tōprak ko an Ekkatak eo Ejelet M̧weo̧ im Kabun̄ ej Rie
Kōtļo̧k bwe in kōmeļeļeik jidik pedped ko rejelet n̄an an ļapļo̧k ekatak eo ejelet m̧weo̧ im Kabun̄ in ej rie .
Jikin ekkatak eo an mijenede eļap ej pād m̧weo̧; Jikin ekkatak eo an mijenede kein karuo rej pād ilo Provo, Manila, Mexico City, im jikin ko jet. Jabōt Jikuuļ kūlaaj ko ad reaikuj in jikin ekkatak eo an juon make im baam̧le ko ad; ejipan̄ ak Jabōt Jikuuļ kūlaaj ko kein karuo rej kōm̧m̧an ilo im̧ōnjar ko ad.
Jentōr ko an Menmenbwij rej kiiō ilo kapijuknen ko ad. Kakkobaba n̄an rie jerbal in menmenbwij eo ad ebarāinwōt pād ilo im̧ōnjar ko ad.
Kūlaaj in kōppopo eo eaorōk n̄an tam̧peļ ej bōk jikin ilo kapijuknen ko ad; ak kūlaaj in kōppopo eo eaorōk n̄an tempeļ emaron̄ bar emakijkij kōm̧m̧ane ilo im̧ōnjar ko ad.
Kōm̧m̧an bwe kapijuknen ko ad ren ijo jemaron̄ “jutak ilo jikin ko rekwojarjar”11 eaorōk ilo raan kein āliktata. Im āinwōt an aorōk āinwōt ekkatak eo pedped ilo m̧weo im Kabun̄ ej rie ej n̄an kajoor eo ad ilo jetōb im kōjparok rainin, enaaj ļapļo̧k an aorōk ilju im jeklaj.
Ekkatak eo Ejelet M̧weo im Kabun̄ ej Rie im Kōpopo n̄an Tam̧peļ
Jouj ļōmņak elmen an pedped in katak in “ekkatak eo ejelet m̧weo im Kabun̄ ej rie” jerbal n̄an ad make keppopo im erreeo n̄an būki kain̄i ko rekwojarjar im bujen ko ilo m̧weo im̧ōn Irooj.
Ilo m̧ool, kōppopo n̄an tam̧peļ ej lukkuun bōk jikin ilo kapijuknen ko ad. Ak elōn̄ membōr in Kabun̄ in rejjab jeļā kōn ta eo ekkar im ejekkar kwaļo̧ke ikijeen men ko rej waļo̧k ilo tampeļ itulikin tampeļ eo.
Būreejtōn Ezra Taft Benson eaar kōmeļeļeik etke ej wōr jamelele rōt in:
“Tampeļ ej juon jikin ekwojarjar, im bwe kain̄i ko ilo tampeļ rekwojarjar. Kōn kwojarjar eo aer jet iien jej abin kwaļo̧k jabdewōt kōn tampeļ n̄an ajri ro nejin im jibwiid.
“Āinwōt juon bōklekōt, elōn̄ rejjab ejaake juon ikdeelel n̄an etal n̄an tampeļ, ak rej etal, rej kōm̧m̧ane menin ilo ejjeļo̧k pedped in kōpooj er n̄an jerbal ko im bujen ko rej deļo̧n̄i.
“Ij tōmak juon meļeļe eo ekkar ak pedped enaaj lukkuun jipan̄ kepooj jodikdik ro nejid n̄an tampeļ … [im] enaaj im̧we er kōn juon ikideleel n̄an pukot kōjeraam̧m̧an ko an priesthood āinwōt an kar Ebream kar pukote.”12
Ruo unin tōl ko repidodo remaron̄ jipan̄ kōj bōk meļeļe eo ekkar Būreejtōn Benson kar kwaļo̧ki.
Unin tōl #1. Kōnke jej iakwe Irooj, jej kōnono iien otemjej kōn m̧weo Im̧ōn ekwojarjar ilo kautiej. Jejjab aikuj kōnono ak kōmeļeļeik kōkaļļe ko rej iokļo̧k bujen ko jej būki ilo tampeļ ko rekwojarjar. Barāinwōt jejjab aikuj kōnono kōn meļeļe eo ekwojarjar me jaar kallim̧ur ilo tampeļ eo n̄an jab kōnono kake.
Unin tōl #2. Tampeļ eo ej m̧weo im̧ōn Irooj. Aolep men ilo tampeļ eo rej tōl ļo̧k kōj n̄an ad Rilo̧mo̧o̧r, Jisōs Kraist. Jemaron̄ kōnono kōn jibadbad ko repidodo im katak eo im pedped in katak ko rej iokļo̧k kain̄i im bujen ko an tampeļ.
Būreejtōn Howard W. Hunter eaar kapilōk: “Jen kwaļo̧k ippān ajri ro nejid en̄jake ko an jetōb jaar būki ilo tampeļ eo. Im jān ļapļo̧k ad m̧ool ad katakin er im ļapļo̧k ad aenōm̧m̧an ilo men ko emaron̄ jejjet ad ba kōn kōttōbar ko an im̧weo̧ im̧ōn Irooj.”13
Jān epepen ko jān Rikanaan Josep Smith n̄an Būreejtōn Russell M. Nelson, pedped in katak ko kōn kain̄i im bujen ko an tampeļ kar jejjōt an Ritōl ro an Kabun̄ in kwaļo̧ki.14 Aolep kein jipan̄ kein repād ilo jeje, naan, pija, im jekjek ko jet n̄an jipan̄ kōj ekkatak kōn kain̄i ko, menin letok kwojarjar eo an tampeļ, m̧are, im liāp in kain̄i ko jet.15 Ebarāinwōt pād meļeļe ko n̄an ļoor Rilo̧mo̧o̧r ilo ad būki im kōjparok bujen ko im kautiej kien eo pokake, kien wūjļepļo̧k, kien gospel in, kien erreeo, im kien kwojarjar.16 Aolep membōr ro an Kabun̄ in reaikuj lukkuun meļeļe kein katak ko me repād ilo temples.ChurchofJesusChrist.org.
Būreejtōn Russell M. Nelson eaar kwaļo̧k aorōk eo kōtaan kwojarjar an tampeļ im meļeļe eo eaorōk kōn tampeļ ko kwaļo̧ki jen Kabun̄ in me ejjejjet, ekkar, im rej waļo̧k n̄an aolep. Eaar ba: “Ij kile bwe membōr ro … ren riit ilo Baibōļ Tikjinede men ko reiokļo̧k tampeļ eo, āinwōt ‘Ekkapit,’ ‘Bujen,’ ‘Wūjļepļo̧k.’ im ‘Tampeļ.’ Juon emmaroñ barāinwōt lūñūri Exodus, jebta 26–29, im Leviticus, jebta 8. Kalim̧ur M̧okta, barāinwōt bok in Moses im Ebream ilo Bōōr eo Eļap Wōņāān, rej kalikar ļo̧k wōt rūtto in jerbal ilo tampeļ im wāween kije in kaiñi ko an.”17
Kōn menin, baj ļōmņak n̄e ļaddik eo ak leddik eo nejum̧ ej kajjitōk, “Juon armej ilo jikuuļ eo eaar ba n̄an eō ke elōn̄ jet kain nuknuk kōjak rej kōņaki ilo tampeļ eo. Em̧ool ke menin?” Juon pija ekadu ej pād ilo temples.churchofjesuschrist.org taitōļ in “Sacred Temple Clothing.” Kein jipan̄ in em̧m̧an ej kōmeļeļeik ke jān tōre ko etto em̧m̧aan im kōrā ro raar ikdeelel ilo al kwojarjar, jekjek in jar ko reoktak, kōkaļļe in nuknuk in jar, kōkaļļe ko, im kōjeraam̧m̧an im en̄jake ko rej kwaļo̧ki n̄an Anij. Ilo m̧ool, Kabun̄ in ej rie ekkatak eo ej pedped ilo m̧weo n̄an keppopo n̄an kōjeraam̧m̧an ko an tampeļ ilo wāween kōmeļeļe ko repidodo im kein jipan̄ ko āinwōt pija in. Ekanooj lōn̄ kein jipan̄ ko repād n̄an kom̧.18
Ilo ad etetal ettā ilo Jetōb eo an Irooj,19 jenaaj jeraam̧m̧an n̄an meļeļe im bōke n̄an kapijuknen ko ad jon̄an eo ekkar kōtaan ta eo ekkar im ta eo ejjab ekkar n̄an kōnono kake kōn kain̄i im bujen ko rekwojarjar an tampeļ.
Kallim̧ur im Naan in Kam̧ool
Ij kile bwe jet iaami remaron̄ ļōmņak eļan̄n̄e ami ekkatak gospel in ej ke lukkuun ekkatak eo pedped ilo m̧weo im Kabun̄ ej rie. Bōlen kwe wōt membōr in Kabun̄ in ilo kapijuknen eo am̧, ak juon eo eo pāleen ejjab jipan̄, ak m̧am̧a ak baba eo emake iaan, ak jokwe make iaan āinwōt juon eo emōj an jepel āinwōt Armej ro Rekwojarjar ilo Raan-ko Āliktata, im emaron̄ wōr am̧ kajjitōk kōn wāween an pedped in katak kein jerbal n̄an eok. Komaron̄ in juon ļeo ak lieo pālele me rej kalimjōk doon im kajjitōk, “Jemaron̄ ke kōm̧m̧ane menin?”
Aaet, komaron̄ kōm̧m̧ane menin! Ij kallim̧ur bwe kōjeraam̧m̧an ko renaaj itok n̄an kōjeraam̧m̧an mour eo am. Kōjem ko renaaj peļļo̧k. Meram enaaj romaak. Naaj ļapļo̧k am̧ kajoor n̄an kijejeto in wōnm̧anļo̧k wōt im kijenmej.
Ij lukkuun kam̧ool bwe kōjeraam̧m̧an ko renaaj itok ilo ad kajjieon̄ in kakūrm̧ool eddo eo ad make n̄an ekkatak im iakwe gospel in an Jisōs Kraist. Jej lukkuun in maron̄ “pojak n̄an bōk aolep menin aikuj otemjeļo̧k.”20 Ij kalim̧m̧ur im kamool ilo āt eo ekwojarjar etan Irooj Jisōs Kraist, amen.