Naan in Ikkilōk ko
Jemaron̄ ke wūjlepeļo̧k im bar wūjlepeļo̧k mour ko ad n̄an jerbal n̄an Anij im ajri ro Nejin—jim̧or ijin im ilo rōn̄ōļ eo.
Ro jeiū im jatū jitōn bōro, ilo ad itok n̄an jem̧ļo̧kin kweilo̧k in, jej kam̧m̧oolol Irooj kōn im̧we im kōjparok eo An. Ennaan ko rekar katakin im kōketak kōj.
Unin kōnono ko rekar jab leļo̧k n̄an rikōnono ro. Er kajjojo rekar jar kōn revelesōn eo an juon make ilo kōpooje ennaan ko aer. N̄an n̄a, eaiboojoj kōn wāween an unin kōnono ko lukkuun jejjet ippān kajjojo. Ilo am̧ katak kaki, pukot n̄an ekkatak ta eo Irooj ej kajjieon̄ katakin eok kōn rikarejar ro An.
Al ko rekar aiboojoj. Jej lukkuun kam̧m̧oolol elōn̄ rikōjan̄jan̄ ro rekar kobaik jeļā ko aer n̄an bōktok Jetōb eo an Irooj n̄an kajjojo m̧wen̄an. Im Ekar kōjeraam̧m̧an jar ko im jarlepju ko ilo aolep m̧wen̄an ko. Em̧ool, kweilo̧k in ekar bar juon alen juon kwojkwoj in jetōb n̄an kōj aolep.
Jej kōjatdikdik im jar bwe kajjojo m̧ōko imōn ro uwaan Kabun̄ in ren erom̧ im̧ōn tōmak, ijo Jetōb eo an Irooj emaron̄ pād ie. Mekarta aitwerōk ko ipeļaakid, m̧weo im̧ōn juon emaron̄ in jikin eo ilan̄, ijo ekkatak, jar, im tōmak maron̄ deļo̧n̄e ippān doon kōn iakwe. Jemaron̄ ilo m̧ool erom̧ rikaļoor ro an Irooj, jutak im kōnono kōn E jabdewōt jikin jej pād ie.
Jibadbad eo an Anij ej jibadbad eo ad. Ekōņaan bwe ajri ro Nejin ren kāālet n̄an ro̧o̧l n̄an Ippān, pojak, karbab, im bōk menin letok kwojarjar eo, liāp, im tiljek n̄an bujen ko kar kōm̧m̧ani ilo tampeļ ko rekwojarjar.
Kiiō ewōr ad 162 tampeļ ko emōj kar aji. Eo jinointata ej jutak āinwōt kōkkaļļe in tōmak im ettōņak eo an paineer ro rejitōn bōro. Kajjojo tampeļ ekar ejaak jān er kōn tōprak in kaarmejet im kijejeto eo aer eļap. Kajjojo iaer rej jutak āinwōt juon dōkā eaorōk ilo tōprakin menin nōbar an paineer ro.
Eo ad ej eddo eo ekwojarjar n̄an kōjparoki. Kōn menin, tampeļ kein rerūtto renaaj bōk iien n̄an kōkāāli im kōkōm̧anm̧ani im, n̄an jet, juon kōkāāl eo eļap. Kijejeto ko renaaj kōm̧m̧an n̄an kōjparok bwebwenato eo eaorōk an kajjojo tampeļ jabdewōt jikin, kōjparoki aer aiboojoj im eltan pā ko rem̧m̧an an epepen ko rekar m̧ootļo̧k.
Meļeļe ko kōn St. George Utah Temple em̧ōj an diwōjtok. Karōk ko n̄an jerbal in kōkāāle eo an Salt Lake Temple, Temple Square, im en̄ļo̧k eo an plaza eo iturin Church Office Building eo naaj kōjeļļā kake ilo Bōļaide, Eprōļ 19, 2019.
Manti im Logan Utah Temple renaaj barāinwōt kōkāāli iiō kane rej itok. N̄e karōk kein repojak, naaj barāinwōt kōjjeļļā kaki.
Jerbal in enaaj aikuj an kajjojo tampeļ kilōk ium̧win juon tōre. Ro uwaan Kabun̄ in maron̄ wōnm̧aanļo̧k im lan̄lōn̄ ilo kabun̄jar ilo tampeļ im jerbal ko ilo tampeļ ko repaake e. N̄e kajjojo būrojāāk ej dedeļo̧k, kajjojo tampeļ renaaj aji.
Ro jeiū im jatū, jej kile juon tampeļ āinwōt men eo ekwojarjar tata ilo Kabun̄ in. Ilo ad kōjjeļļā kōn karōk in ekkāl an juon tampeļ ekāāl, ej erom̧ m̧ōttan eo wōt bwebwenato eo ad. Kiiō, jouj im lukkuun ron̄jake im kautiej. Eļan̄n̄e ij kōjjeļļā kōn juon tampeļ ilo juon jikin menin eaorōk n̄an eok, im imaron̄ in ba bwe komaron̄ in jillo̧k im jar kōn kam̧m̧oolol ilo būruwōm̧. Jejjab kōņaan jabdewōt ainikien bwilōn̄ ko reļļap n̄an aer bōkļo̧k kōj jān kwojarjar eo an kweilo̧k in im tampeļ ko rekwojarjar an Irooj.
Rainin, jej m̧ōņōņō in kōjjeļļā kōn karōk ko n̄an kalōk elōn̄ļo̧k tampeļ ko, n̄an kalōki ilo laajrak in jikin kein:
Pago Pago; American Samoa; Okinawa City; Okinawa; Neiafu, Tonga, Tooele Valley, Utah, Moses Lake, Washington; San Pedro Sula, Honduras; Anfofagasta, Chile; Budapest, Hungary.
Kom̧ em̧m̧ool, ro jeiū im jatū.
Ilo ad kōnono kōn tampeļ ko remo̧r im kāāl, jemaron̄ ke kwaļo̧k kōn kōm̧m̧an ko ad bwe jej rikaļoor ro rem̧ool an Irooj Jisōs Kraist. Jemaron̄ ke kōkāāle mour ko ad kōn tōmak eo ad im lōke ilo E. Jemaron̄ deļo̧n̄e im bōk kajoor in Pinmuur eo An jān ad ukweļo̧k kajjojo raan. Im kōm̧m̧an bwe jen wūjlepeļo̧k im bar wūjlepeļo̧k mour ko ad n̄an jerbal n̄an Anij im ajri ro Nejin—jim̧or ijin im ilo rōn̄ōļ eo.
Ij likūt aō iakwe im kōjeraam̧m̧an ippem̧, kallim̧uri kom̧ bwe revelesōn ej wōnm̧aanļo̧k wōt ilo, Kabun̄ in an Irooj. Enaaj wōnm̧aanļo̧k wōt m̧ae iien “kōttōbar ko an Anij renaaj tōprak, im Jeova Ekajoor Pōtata enaaj ba jerbal eo ejem̧ļo̧k.”1
Ij barāinwōt kōjeraam̧m̧an kom̧ im kwaļo̧k aō naan in kam̧ool bwe Anij ej mour! Jisōs ej RiKraist eo! En̄in ej Kabun̄ eo An. Jej armej ro An. Ilo etan ekwojarjar Jisōs Kraist, amen.