Kappukot Jeļāļo̧kjeņ jān Jetōb eo

Elder Mathias Held

Jān Jiljilimjuonn̄oul eo

Jej aikuj ekkatak n̄an kile m̧ool eo ejjab wōt kōn jeļāļo̧kjeņ ko ad make ak barāinwōt kōn ainikien edik im emera an Jetōb eo.

Ro jeiū im jatū rejitōnbōro, Irooj ekar āliji an ba n̄an kōj n̄an “kappukot jeļā, em̧ool jān katak im barāinwōt jān tōmak.”¹ Jemaron̄ bōk meram im meļeļe ejjab wōt kōn jeļāļo̧kjeņ ko ad make ak barāinwōt kōn tōl im im̧we eo an Jetōb Kwojarjar.

Im̧we eo an Jetōb Kwojarjar n̄an bōk jeļāļo̧kjeņ ekar jab aolep iien m̧ōttanļo̧k mour eo aō.

Kōrā eo pāleeō ejitōnbōro, Irene, im n̄a kom̧ro kar kobatok ilo Kabun̄ in 31 iiō ko rem̧ootļo̧k ke kom̧ro ej kab m̧are. Kom̧ro kar jim̧or rūttoļo̧k ilo Colombia, ak jejjo allōn̄ ālkin m̧are eo am̧ro, jerbal eo aō ekar bōk kom̧ro n̄an jokwe ilo Germany. Kōm kar rem̧m̧an ded wōt im ekar lōn̄ kōjatdikdik ko im kōtmene ko am̧ro; ekar juon iien ekalimomo im kam̧ōņōņo̧ n̄an kom̧ro.

Ke ikar lukkuun leļo̧k aō n̄an jerbal eo aō, Irene ekar en̄jake bwe kom̧ro enaaj bōk juon enaan jān lan̄, ilo ejjeļo̧k jeļā ewi wāween ak n̄aat. Kōn menin ekar kōppelļo̧k m̧weo mōmro n̄an armej ro rej wiakaki encyclopedias, vacuum, bok in kōmat, kōbwebweien mōn kuk, im bar jet, im aolep iien ej kōttar tok enaan eo eaorōk.

Juon jota ekar ba n̄an n̄a bwe ruo likao rej ekkaņak suit rekar kōlaļlaļ ilo kōjem eo am im bwe ekar en̄jake juon im̧we elukkuun alikkar im ejeņoļo̧k bwe en kōdelo̧n̄ er. Rekar ba bwe rekōņaan kōnono n̄an e kōn Anij ak renaaj bar ro̧o̧l ļo̧k n̄e n̄a inaaj bar pād ilo m̧weo. Emaron̄ ke kar enaan eo in me ej kōtmene?

Rekar jino lotok kom̧ro, im kōn tōl ko aer, jej riit ilo jeje ko rekwojarjar im jekar jino meļeļe aorōkin Jisōs Kraist āinwōt ad Rilo̧mo̧o̧r im RiPinmuur. Ejjab etto kom̧ro kar būromōj bwe em̧ōj am kar peptaij ke kom̧ro kar nin̄nin̄ wōt, eo me peptaij eo ekar jab juon bujen jejeļā kake. Ijoke, bar peptaij enaaj barāinwōt meļeļein n̄an erom̧ membōr ilo Kabun̄ in ekāāl, kōn menin, men eo jinoin tata kom̧ro kar lukkuun aikuj n̄an meļeļe aolep men kōn Kabun̄ in.

Ak ewi wāween am kar jeļā eļan̄n̄e ta eo mijenede ro rej ba n̄an kom̧ro kōn Bok in Mormon, ak Josep Smith, im kōn karōk in lo̧mo̧o̧r eo rekar ke lukkuun m̧ool? Ekwe, em̧ōj am kar meļeļe jān naan ko an Irooj bwe jemaron̄ “jeļā er jān leen ko aer.”² Kōn menin, ilo juon wāween ejjejet, kom̧ro kar jino etale Kabun̄ in ilo am̧ro kar lale leen ko kōn jeļāļo̧kjeņ eo am̧ro make. Ta eo kom̧ro kar loe? Ekwe, jekar loe:

Armej ro rejouj im rem̧ōņōņō im baam̧le ko rem̧m̧an ro me remeļeļe bwe aolep armej rej aikuj en̄jake lan̄lōn̄ ilo mour in, im jab en̄jake wōt en̄taan im būromōj.
Juon kabun̄ eo me ejjeļo̧k wōnāān ritōl eo ak juon kabun̄ eo me membōr ro make rej bōk kūr im eddo ko.
Juon kabun̄ ijo Jisōs Kraist im baam̧le ko rej ioļapļap in men otemjej, ijo membōr ro rej jitlo̧k juon alen juon allōn̄ im leļo̧k kein jipan̄ n̄an jipan̄ ro rijeramōl im riaikuj, ijo eļap katakin kōn iminene ko n̄an ājmour, katakin kōj n̄an bōjrak jān men ko rej kakkure ānbwinid.

N̄an kōļapļo̧k:

Ekar itok limoimro kōn katak kōn eddōkļo̧k an juon make, ilo jeļāļo̧kjeņ, buuļ jerbal im un̄n̄are peid make.
Jekar ekkatak kōn burokōraam in jipan̄ armej eo me ekabwilōn̄lōn̄.
Im kom̧ro kar bwilōn̄ kōn kweilo̧k ko reļļap, kōn al ko reaibojooj im katak in jetōb ko rekabwilōn̄lōn̄ rekar waļo̧k ijeņ.

Ļōmņak kōn aolep men kein, kom̧ro kar jab lo men ko renana ilo Kabun̄ in. Ilo wāween eo juon, ekar lukkuun itok limoimro kōn men ko kom̧ro kar loi. Mekarta, kom̧ro kar jab kāālet n̄an peptaij kōnke kom̧ro kar kōņaan jeļā aolep men m̧okta jān am̧ro kōm̧m̧ane menin.

Ak, aaet ilo tarpok in kāālet eo am̧ro, Irooj ekar lukkuun kijenmej ilo an kōpooj kom̧ro, Ekar ļōme kom̧ro, im Ekar jipan̄ kom̧ro n̄an lo bwe jej aikuj ekkatak n̄an kile m̧ool ejjab wōt kōn jeļāļo̧kjeņ ko ad make ak barāinwōt kōn ainikien edik im emera an Jetōb eo, eo me ej kōnono eļaptata ilo būruōd.

Ainikien eo im tōprak in en̄jake ekar itok ilo juon jota ālkin 10 allōn̄ in am ekkatak gospel eo, ke kom̧ro kar riiti Mosaia 18, “Āinwōt kom̧ij kōņaan … ineek eddo ko an ro jet, … im kaenōm̧m̧an ro rej pād ilo aikuj in aenōm̧m̧an, … eļan̄n̄e en̄in ej ikdeelel eo an būruōmi, ta ippemi ņae peptaij ilo etan Irooj?”³

Eoon in jān Bok in Mormon ekar lukkuun un̄ūr būruōm ilo jetōb ko am, im ekar mōkaj am̧ro en̄jake im kar jeļā bwe ekar lukkuun ejjeļo̧k unin bwe kom̧ro en jab peptaij. Kom̧ro kar kile bwe ikdeelel ko me rekar ba kaki ilo eoon kein rekar barāinwōt kōņaan ko ilo būruōd im bwe men kein rekar lukkuun ļap tokjāer. Ekar ļapļo̧k aer aorōk jān am meļeļe aolep men kōnke ebwe kadede jeļā eo am. Kom̧ro kar ļap am̧ro kōjatdikdik kōn im̧we in tōl an juon Jemedwōj Ilan̄ eo ej iakwe kōj im kom̧ro kar lōke bwe Enaaj wōnm̧aanļo̧k wōt im tōl kom̧ro.

Kōn menin, ilo ejja raan eo wōt, kom̧ro kar kāālet juon raan n̄an iien peptaij eo am̧ro, im ejjab to kom̧ro kar peptaij, āliktata!

Ta eo kom̧ro ekar ekkatak jān en̄jake in?

Kein kajuon, kom̧ro kar ekkatak bwe jemaron̄ lukkuun lōke Jemedwōj Ilan̄ eo ej iakwe kōj, eo me ejjab jem̧ļo̧k an kajjieon̄ jipan̄ kōj erom̧ armej eo me Ejeļā jemaron̄ erom̧. Kom̧ro kar kam̧ool m̧wūlaļ in m̧ool an naan ko An ke Ekar ba, “Inaaj leļo̧k n̄an ro nejin armej lain im bar lain, naan in kain̄i im bar naan in kain̄i, ijin jidik im ijjuweo jidik; im em̧ōņōņō ro rej eo̧ron̄ naan in kain̄i ko Aō, … bwe renaaj jeļā māļōtlōt; bwe n̄an eo ej bōk Inaaj leļo̧k eļapļo̧k.”⁴

Im kein karuo, kom̧ro kar ekkatak bwe, n̄an kōļapļo̧k jeļāļo̧kjeņ ko ad make, bar juon wāween n̄an bōk jeļāļo̧kjeņ emaron̄ letok n̄an kōj tōl im meļeļe. Ej ainikien eo elur im emera eo An Jetōb Kwojarjar eo ej kōnono ilo būruōd im barāinwōt ilo ļōmņak ko ad.

Ikōņaan keidi katak in n̄an wāween ad kalimjōk juon men im meļeļe. Jemedwōj Ilan̄ ekar letok n̄an kōj ejjab juon wōt ak ruo mejād ilo kanniōk. Jemaron̄ lo an jabwe kōn juon wōt mej, ak kōn mej eo kein karuo ej letok n̄an kōj bar juon meļeļe. Kōn meļeļe kein jimor rej ippān doon ilo kōmlij ko ad, rej kwaļo̧k dipio in juon pija kōn peļaakid.

Āinwōt in, em̧ōj letok n̄an kōj ruo kein jipan̄ n̄an meļeļe, jān maron̄ ko ad ilo kanniōk im ilo jetōb. Kōļmenļo̧kjeņ ko ad rej letok juon meļeļe jān en̄jake ko ad im jān ļōmņak ko ad. Ak kōn mennin letok eo an Jetōb Kwojarjar, Jemed em̧ōj an barāinwōt letok n̄an kōj meļeļe eo kein karuo, eo me elukkuun ļap an aorōk im em̧ool kōnke ej kajju itok jān E. Ak kōn wōt unoojdikdik ko an Jetōb ekkā an lukkuun lur, elōn̄ armej rejjab lukkuun jeļā kōn kein jipan̄ in juon.

N̄e meļeļe kein ruo rej ippān doon ilo jetōb ko ad, juon pija edipio ej kwaļo̧k m̧ool in men ko ilo lukkuun wāweer. Ilo m̧ool, kōn bar juon meļeļe an Jetōb Kwojarjar, jet “m̧ool ko,” me ekkar wōt n̄an meļeļe ko ad make, emaron̄ alikkar ilo kalimjōkļo̧k āinwōt m̧oņ ak lukkuun bōd. Keememej naan ko an Moronai: “Im jān kajoor eo an Jetōb Kwojarjar jemaron̄ jeļā m̧ool eo an men ko otemjeļo̧k.”⁵

Ilo 31 iiō in aō membōr in Kabun̄ in, em̧ōj aō en̄jake elōn̄ alen bwe eļan̄n̄e jej pedped wōt kōn jeļāļo̧kjeņ ko ad make im kōjekdoon ak kajej tokjen meļeļe an jetōb eo me jemaron̄ bōk jān unoojdikdik im im̧we eo an Jetōb Kwojarjar, ej āinwōt n̄e jekar mour kōn juon wōt mej. Ak kōnono kōn waanjon̄ak in, em̧ōj lukkuun letok n̄an kōj ruo mejād. Kobain meļeļe kein jim̧or wōt emaron̄ letok n̄an kōj m̧ool im pija eo ilo dipio in kōn aolepān m̧ool ko im kōn aolep men jej en̄jaki ilo mour ko ad, barāinwōt ilo dipio in im m̧wūlaļ in meļeļe ko ad kōn lukkuun kadkadid im kōttōbar āinwōt ajri ro nejin Jemedwōj Ilan̄ eo emour.

Ij keememej ta eo Būreejtōn Russell M. Nelson ekar katakin kōj juon iiō em̧ootļo̧k ke ekar ba bwe “ilo raan ko rej itok, enaaj pen ad maron̄ mour ilo jetōb ilo an ejjeļo̧k tōl, kaenōm̧m̧an im im̧we ejjeļo̧k jem̧ļo̧kin eo an Jetōb Kwojarjar.”⁶

Em̧ōj aō jeļā kōn juon jeļā edipio bwe:

Ewōr juon Jemedwōj Ilan̄ eo ej iakwe kōj, im kōj aolep jaar errā n̄an itok n̄an laļ in āinwōt m̧ōttanļo̧k juon karōk ekwojarjar.
Jisōs ej Kraist eo; Emour im ej aō Rilo̧mo̧o̧r im RiPinmuur.
Josep, juon ļaddik ettā, kar kūr e im kar erom̧ juon rikanaan ekajoor eo im ekar jinoe epepen eo an tarlep in tōre ko, kōn aolepān an kii, kajoor, im mālim eo an priesthood eo ekwojarjar an Anij.
Bok in Mormon ej juon kam̧ool kein karuo kōn Jisōs Kraist, im baam̧le ko kar karōke n̄an mour ippān doon n̄an indeeo.
Ad Irooj, Jisōs Kraist, ej tōl Kabun̄ in, me em̧ōj an jepļaaktok, jān Rikanaan eo ad emour, Būreejtōn Russell M. Nelson, rainin.

Men kein im elōn̄ m̧ool ko jet raorōk rej erom̧ katak ko raorōk an jetōb kōn ta eo Anij ej jipan̄ n̄a n̄an erom̧. Im ij reim̧aanļo̧k n̄an elōn̄ katak ko rekāāl bwe Ej kōņaan wōt bwe n̄a—im kwe—n̄an bōk ilo ad pād im mour ilo mour in im “ekkatak … em̧ool kōn katak im barāinwōt kōn tōmak.”

Ijeļā bwe men kein rej m̧ool im ij kam̧ool kaki ilo etan Jisōs Kraist, amen.