Mark L. Pace

Būreejtōn eo Eutiej an Jabōt Jikuuļ

Kōn juon intōrpiu karōke n̄an ta eo enaaj kar juon kūr n̄an jerbal āinwōt Būreejtōn eo ekāāl an Jabōt Jikuuļ an Kabun̄ in, Brother Mark L. Pace ekar kōm̧m̧ane juon kallim̧ur ilo jar.

“Jemedwōj Ilan̄, jabdewōt ta eo Kwoj kōņaan bwe in kōm̧m̧ane, Ij m̧ōņōņō in kōm̧m̧ane,” ekar jar. “Jeļā bwe ij wūjlepļo̧k aolepān aō.”

Brother Pace ej ba ikdeleel eo an eļap tata ilo kūr eo an ekāāl ej n̄an kōjeram̧m̧an, rie, im kōketak membōr ro an Kabun̄ in. “Kōm kōņaan leļo̧k aolep men ko ewōr ippām,” ekar ba kōn Būreejtōnji eo Eutiej an Jabōt Jikuuļ.

Mark Leonard Pace ekar ļotak ilo Janwōde 1, 1957 eo, ilo Buenos Aires, Argentina, n̄an Nelson im Marylynn Haymore Pace. Ilo iien eo, jemān Brother Pace ekar tōl Argentina Mijen eo.

Brother Pace ekar ioon kōrā eo naaj kar pāleen, Anne Marie Langeland, ke rein ruo raar rijikuuļ ippān doon ilo kūlaaj-ruo ilo Salt Lake City, Utah, USA. Tokālik, ke kar etal n̄an high school ko roktak ilo jikin kweilo̧k eo, raar bar ioon doon ilo juon kobain m̧akūtkūt an jemenede. Rekar jeje n̄an doon ium̧win jet iiō ko tok ke ekar ilo̧k ippān baam̧le eo an n̄an Norway, ijo jemān ekar tōl Norway Oslo Mijen eo, im ilo an kar Brother Pace kar jerbal ilo Spain Madrid Mijen eo. Rekar m̧are ilo Salt Lake Tampeļ ilo Nobōmba 21, 1978 eo, im rej jinen im jemān jiljilimjuon ajri ro.

Brother Pace ekar kadiwōjļo̧k kōn juon bachelor degree ilo economics jān University of Utah ilo 1980 eo im kōn juon master degree ilo pejnej administration jān Harvard Business School ilo 1982 eo. Ālikin jidik iien an jerbal ippān Price Waterhouse ilo New York City, ekar kobaļo̧k ippān Boyer Company ilo Salt Lake City, jerbal ilo commercial real estate development jān 1984 n̄an 2012 eo. Ālkin ijjitōn̄ eo jilu iiō āinwōt būreejtōn eo an Spain Barcelona Mijen eo, ekar kobaļo̧k ippān Gardner Company ilo 2015 eo, kōm̧m̧an jerbal in ekkal em̧.

Ilo iien eo ke ej bōk kūr in ekāāl an, Brother Pace ekar jerbal āinwōt juon Eria Jiljilimjuonn̄oul. Kūr ko an m̧oktaļo̧k ilo Kabun̄ in ekoba rikakpilōklōk ilo juon stake būreejtōnji, high ko̧o̧njeļ, bisop, rikakpilōklōk ilojuon bisoprik, būreejtōn an doulul eo an elder ro, būreejtōn an Doulul eo an Likaro ro an ward, im Scoutmaster.