Iakwe Eļap n̄an Ajri ro Nejin Jemedwōj
Iakwe ej m̧wil im kadkad eo aorōktata n̄an jibadbad ko ilo kar kappeik kōj n̄an bōk eddo in jān rikanaan eo an ejitōn bōro.
Ro jeiū im jatū jitōn bōro, en̄in ej juon iien ejej uwaan im aorōk ilo bwebwenato. Jej jeraam̧m̧an n̄an mour ilo tōreen in bōk eddo in āliktata m̧okta jān Itok eo Kein Karuo an Rilo̧mo̧o̧r. Epaakeļo̧k jinoin tōreen bōk eddo in, ilo 1892 eo, iiō eo m̧okta jān an Kabun̄ in kar lukkuun ejaak, juon revelesōn eaorōk kar bōke kean̄ bwe “juon jerbal ekabwilōn̄lōn̄” ekar “epojak in kar wōnm̧aantak.” Revelesōn in kar kile bwe ro me raar ikdeelel n̄an jerbal n̄an Anij ren karbōb n̄an kain jerbal in kōn “tōmak, kōjatdikdik, iakwe-em̧ool im iakwe, ippān erreļo̧k eo wōt n̄an aiboojoj eo an Anij.”1 Iakwe-em̧ool, eo ej “iakwe eo erreo an Kraist,”2 ekoba iakwe indeeo eo an Anij n̄an aolep ajri ro nejin.3
Jibadbad eo aō kiiō jibbon̄ ej n̄an kōmejajaik jerbal eo eaorōk an kain iakwe jab in ilo jerbal in mijenede, jerbal in tampeļ im menmenbwij an baam̧le, im kautiej ilo kabun̄ an baam̧el an pedped ilo m̧weo rejtak an Kabun̄. Iakwe n̄an Rilo̧mo̧o̧r eo im iakwe n̄an em̧m̧aan im kōrā ro m̧ōttad4 ej m̧wil eo im ellowetak eo eļaptata n̄an jerbal in karejar im jibadbad ko ilo jetōb5 kar kajjitōk ippād jān rikanaan eo ad ejitōn bōro, Būreejtōn Russell M. Nelson, ilo kar kōjjeļļā in okoktak ko ilo 2018 eo.
Kijejeto an Mijenede n̄an Aiintok Ejjepelōklōk an Israel
Ekar wōr aō en̄jake kōn kōtaan eo ikōtaan jerbal in mijenede im iakwe ilo tōre ko m̧okta ilo mour e aō. Ke ekar 11 iiō detta, iaar bōk kōjeraam̧m̧an in petriak eo jān juon petriak me eaar barāinwōt jim̧m̧aō.6 Jidik in kōjeraam̧m̧an eo ekar ba, “Ij kōjeram̧m̧an eok kōn iakwe eļap n̄an armej ro m̧ōttam̧, bwe naaj kūr eok n̄an bōkļo̧k gospel eo n̄an laļ in … n̄an kareel jetōb ko n̄an itok n̄an Kraist.”7
Em̧ool iaar meļeļe ilo iiō ko im̧aan bwe kwaļo̧k gospel eo eaar pedped ioon juon iakwe eļap n̄an aolep ajri ro nejin Jemedwōj Ilan̄.
Āinwōt juon Riutiej an Kabun̄ kar jitōn̄ n̄an jerbale Preach My Gospel 15 iiō ko remootļo̧k, kōm kar kōjjem̧ļo̧ke bwe piktok in iakwe eo eaar aorōk n̄an jerbal in mijenede ilo tōre in ad, ejja āinwōt an kar ilo iien otemjej. Jebta 6, kōn piktok ko āinwōt an Kraist, ekoba iakwe-em̧ool im iakwe, ekar iien otemjej jebta eo eļap tata an bun̄bun̄ ilubwilijin mijenede ro.
Ilo jerbal eo aer āinwōt rikwoj meļan ro an Rilo̧mo̧o̧r eo, elōn̄ wōt mijenede ro rej en̄jake kain iakwe in, im n̄e rej en̄jake, kijejeto ko aer rej jeraam̧m̧an. N̄e membōr ro rej bōk juon meļeļe kōn kain iakwe in, ej aorōk ilo jipan̄ Irooj ilo jibadbad eo An, jerbal eo an Irooj enaaj tōprak.
Iaar utiej n̄an aō kōm̧m̧ane juon jerbal edik ilo waanjon̄ak eo ekabwilōn̄lōn̄ an kain iakwe in. Ke iaar jerbal āinwōt Būreejtōn an Pacific Islands Eria eo, iaar bōk juon kūr jān Būreejtōn R. Wayen Shute. Ke eaar juon likao, eaar jerbale juon mijen ilo Samoa. Tokālik, eaar jepļaakļo̧k n̄an Samoa āinwōt juon mijen būreejtōn.8 Ke eaar kūrtok eō, eaar Tampeļ būreejtōn eo an Apia Samoa. Juon iaan mijenede ro an reddik, ke ekar juon mijen būreejtōn, ekar Elder O. Vincent Haleck, eo ej kiiō Eria Būreejtōn ilo Pacific. Būreejtōn Shute eaar wōr juon an iakwe eļap im kautiej n̄an Vince im aolepān Haleck baam̧le eo. Elōn̄ wōt iaan baam̧le eo raar membōr in Kabun̄ in, bōtaab jemen Vince, Otto Haleck, em̧m̧aan eo erūtto tata ilo baam̧le eo (jān bwijjin Rijāmne im Risamoa), eaar jab juon membōr. Būreejtōn Shute eaar jeļā iaar pād ilo juon kweiļok eļap an stake im kweilo̧k ko jet ilo American Samoa, im eaar kajjitōk ippa eļan̄n̄e inaaj kar ļōmņak in jokwe ilo m̧weo im̧ōn Otto Haleck kōn kōttōbar eo n̄an kwaļo̧k gospel eo ippān.
Lio Pāleō, Mary, im n̄a kar jokwe ippān Otto im lio pāleen, Dorothy, ilo em̧ aiboojojo eo im̧weer. Ilo iien m̧abun̄ eo iaar kwaļo̧k juon ennaan an gospel eo im karuwaineneik Otto n̄an ioon mijenede ro. Eaar jouj, bōtaab dim, ilo m̧akoko kōn kajjitōk eo aō. Eaar ba eaar m̧ōņōņō bwe elōn̄ membōr ro an baam̧le eo an raar Armej ro Rekwojarjar ilo Raan-ko Āliktata. Bōtaab eaar kajoor an kwaļo̧k bwe jet iaan rūtto in kōrā in Samoa ro jinen raar rūkaki in Rūkirijin ro m̧oktata ilo Samoa, im eaar en̄jake kauteej n̄an imminene in tōmak in Rūkirijin eo aer.9 Ijowōt ke, kōm kar jepeļļo̧k āinwōt m̧ōttā rem̧m̧an.
Tokālkin, ke Būreejtōn Gordon B. Hinckley eaar m̧aanjabpopo n̄an aje Suva Fiji Tampeļ eo, eaar kōm̧m̧an bwe rijeje eo an make, Brother Don H. Staheli,10 ej kūrtok eō ilo New Zealand n̄an kōm̧m̧ani karōk ko. Būreejtōn Hinckley eaar kōņaan kelo̧k jān Fiji n̄an American Samoa n̄an ioon Armej ro Rekwojarjar. Jet hotel ko kar kōjerbali ilo loļo̧k ko im̧aanļo̧k kar elmakoti. Iaar kajjitōk eļān̄n̄e imaron̄ kar kōm̧m̧an oktak ilo karōk ko. Brother Staheli eaar ba, “Kwoj Eria Būreejtōn eo; enaaj em̧m̧an.”
Iaar m̧ōkaj in kūrļo̧k Būreejtōn Shute im jiron̄ e bwe bōlen ebar wōr am iien ilo kōjeraam̧m̧an ilo jetōb eo m̧ōttam Otto Haleck. Ilo iien in mijenede eo enaaj kar Būreejtōn Gordon B. Hinckley. Iaar kajjitōk eļan̄n̄e eaar ļōmņak enaaj kar ekkar n̄an an Haleck ro bōk eddo in kōm aolep ilo kumi in itok itak eo an Būreejtōn Hinckley.11 Būreejtōn im Sister Hinckley, ļeddik eo nejier, Jane, im Elder im Sister Jeffrey R. Holland raar barāinwōt m̧ōttan kumi in itok itak eo. Būreejtōn Shute, jerbal ippān baam̧le eo, kar kōm̧m̧ane aolep karōk ko.12
Ke kōm kar itaakļo̧k jān Fiji ālkin aje eo an tampeļ eo, kar jouj im iak-iakwe kōm.13 Kōm kar ekōnono joteen eo n̄an taujin membōr ro in Samoa ro innām etal wōt n̄an ijo jikin Haleck baam̧le eo. Ke kōm kar aiin doon n̄an iien m̧abun̄ eo jibbon̄ōn eo juon, Būreejtōn Hinckley im Otto Haleck em̧ōj kadede aer erom m̧ōttā ro rem̧m̧an. Ekar kaitoktok limo n̄an eō bwe raar bwebwenato enan̄in ejja kōn bwebwenato eo wōt iaar kōm̧m̧ane ippān Otta eļapļo̧k jān juon iiō m̧oktaļo̧k. Ke Otta eaar kwaļo̧k an nōbar Kabun̄ eo ad bōtaab bar kapene kallim̧ur eo an kōn m̧ōnjar eo an, Būreejtōn Hinckley ej likūt pein ioon aeran Otta im kar ba, “Otta, ejjab bwe; kwoj aikuj in erom̧ juon membōr in Kabun̄ in. En̄in ej Kabun̄ eo an Irooj.” Ilo m̧ool komaron̄ lo an jum̧ae bōk gospel eo jān Otto kōn juon m̧ōņōņō in bōk ta eo Būreejtōn Hinckley eaar ba.
Menin eaar juon ijjino in dam̧oļo̧k an katakin an mijenede im juon ettā ilo jetōb me eaar kōtļo̧k an Otto Haleck peptaij im kapene jidik iiō tokālik. Juon iiō ālkin iien eo, Haleck baam̧le eo kar liāp āinwōt juon baam̧le indeeo ilo tampeļ.14
Ta eo eaar un̄ūr būruwō ilo aolepān en̄jake in ejej uwaan eaar tōr jān jon̄an eo an iakwe in jerbal in karejar eo kar kwaļo̧ke jān Būreejtōn Wayne Shute n̄an kar mijenede eo an, Elder Vince Haleck, im ikdeelel eo an n̄an lo aolepān Haleck baam̧le eo ippān doon āinwōt juon baam̧le indeeo.15
N̄e ej itok n̄an aiintok Israel, jej aikuj in lale bwe jej en̄jake kain iakwe in im ilo̧k jān en̄jake ko wōt bwe jej kōm̧m̧ane bwe ej ad eddo n̄an kōm̧m̧ane16 ak ajļo̧k n̄an en̄jake ko an iakwe im bōk kuņaad ilo ippān doon eo ekwojarjar an kwaļo̧k ennaan eo an Rilo̧mo̧o̧r eo, jerbal in karejar, im mijen eo ippān laļ in.17
Āinwōt membōr ro jemaron̄ kwaļo̧k ad iakwe n̄an Rilo̧mo̧o̧r eo im ro jeid im jatid ilo aolepān laļ in kōn kōm̧m̧ane kūr ko reļem waan. Jikejuuļ eo an Jabōt ekāāl ej jutak kōn juon iien em̧m̧an n̄an membōr ro n̄an tōprak im ilo iakwe karuwaineneik ro jeraer im m̧ōttaer n̄an itok im lo im en̄jake Kabun̄ in.18 Juon kweilo̧k in kwojkwoj ilo jetōb, kōjatdikdik an ekwojarjar wōt ta eo Elder Jeffrey R. Holland ekar kōmeļeļeik inne, naaj itok ālkin 50 minit kweilo̧k eo pedped ioon Kallim̧ur Ekāāl im Rilo̧mo̧o̧r eo ak iookļo̧k ekōnono ko an kweilo̧k eo eļap barāinwōt pedped ioon Rilo̧mo̧o̧r eo im katak eo An.
Jet sister an Doulul eo an Kōrā ro kar ļōmņak etke kar leļo̧k n̄an er juon eddo kōn “aiintok doon” ippānļo̧k membōr ro an doulul eo an priesthood eo. Ewōr un ko kōn menin, im Būreejtōn Nelson eaar kwaļo̧k elōn̄ iaer ilo kweilo̧k eo eļap ej jem̧ļo̧kļo̧k. Eaar kōjem̧ļo̧ke, “Kōmij jab maron̄ aiintok Israel n̄e kojako.”19 Ilo tōre in ad jej jeraam̧m̧an bwe enan̄in 30 bōkjāān in mijenede ro ad rej jerbal aolep raan rej sister ro. Menin ej letok dam̧oļo̧k in ellowetak eo n̄an kōrā ro ilo Doulul eo an Kōrā ro n̄an kwaļo̧k gospel eo ilo iakwe. Ta eo ej aikuji ej juon kallim̧ur ilo iakwe, meanwōd, jetōb jān kajjojo iaad—em̧m̧aan ro, kōrā ro, jodikdik ro, im ajri ro—n̄an kwaļo̧k gospel eo an Jisōs Kraist. Eļan̄n̄e jej kwaļo̧k iakwe, jouj, im ettā, elōn̄ renaaj bōk kūr eo ad. Ro me rej kāālet n̄an jab bōk kūr eo ad renaaj m̧ōttad wōt.
Kijejeto eo an Tampeļ im Menmenbwij an Baam̧le n̄an Aiintok Israel
Iakwe ej barāinwōt pād ilo ioļapļap in kijejeto eo ad an tampeļ im menmenbwij an baam̧le n̄an aiintok Israel ilo turājet eo juon an rōn̄ōl eo. N̄e jej ekkatak kōn mālijjon̄ ko im apan̄ ko rūtto ro ad raar jelm̧ai, ad iakwe im kam̧m̧oolol kōn er ej kabwilōn̄lōn̄. Kijejeto eo ad an tampeļ im menmenbwij an baam̧le kar kōkajoorļo̧k n̄an juon jon̄an eo ekabwilōn̄lōn̄ jān oktak ko rekāāl ilo jim̧or jikejuuļ in kweilo̧k in Jabōt im wōnm̧aanļo̧k eo an jodikdik ro ilo kūlaaj im doulul ko. Oktak kein rej letok juon kea eo em̧ōkaj im eļapļo̧k an kajoor n̄an ekkatak kōn rūtto ro ad im aiintok Israel ilo turejet in eo juon in rōn̄ōl eo. Jim̧or jerbal in tampeļ im menmenbwij an baam̧le rej lukkuun em̧m̧anļo̧k.
Internet ej juon kein jerbal ekajoor; m̧weo ej kiiō jikin eo eaorōk an menmenbwij an baam̧le. Membōr ro ad reddik rej lukkuun kapeel eo ilo kappukōt menmenbwij an baam̧le im rej ellowetak ilo jetōb n̄an kōm̧m̧ani peptaij ko n̄an rūtto ro aer, ro raar ekkatak n̄an iakwe im kam̧m̧oolol kōn er. Jān ke oktak eo ej kōtļo̧k elōn̄ ro 11 iiō rūttoier n̄an kōm̧m̧ani peptaij ko kōn ro remej, tampeļ būreejtōn ro ilo aolepān laļ in rej kwaļo̧k ļapļo̧k eo ekilep in etal n̄an tampeļ. Juon tampeļ būreejtōn ej karon̄ kōm bwe “ekar wōr juon ļapļo̧k eo ejej uwaan ilo ro rej peptaij … im lapļo̧k in ro 11 iiō dettaer rej bōktok elōn̄ļo̧k baam̧le ko. … Jekdo̧o̧n ilo iiō ko [reddik] aer, rej kwaļo̧k jeļā kautiej eo im jibadbad eo an kain̄i eo rej kōm̧m̧ane. Ej aiboojoj n̄an mijōke!”20
Ijeļā ritōl ro an Būraimere eo ad im jodikdik ro rej im naaj wōnm̧aanļo̧k wōt n̄an kōm̧m̧an bwe jerbal in menmenbwij an baam̧le im tampeļ ej juon kijejeto eļap. Kōrā ro ilo Doulul eo an Kōrā ro im priesthood ro jeid im jatid renaaj ilo iakwe jipan̄ kakūrm̧ool eddo eo aer kajjojo an tampeļ im menmenbwij an baam̧le im barāinwōt kōn jipan̄ im im̧we ajri ro im jodikdik ro aiintok Israel ilo turājet eo juon an rōn̄ōl eo. Menin elukkuun in aorōk ilo m̧weo im ilo Jabōt. Ij kallim̧ur bwe kōm̧m̧ani kain̄i ko kōn iakwe n̄an rūtto ro ad naaj kōkajoorļo̧k im kōjparok jodikdik ro ad im baam̧le ko ilo juon laļ eo me ej jino ļapļo̧k an nana. N̄a make ij kam̧ool bwe Būreejtōn Russell M. Nelson eaar bōk revelesōn ko relukkuun aorōk ikkijine tampeļ ko im jerbal in tampeļ.
Kōpooj Baam̧le ko Indeeo im Kajjojo Armej n̄an Mour ippān Anij
Kalikkar eo ekāāl kōn pedped ilo m̧weo ekkatak gospel eo im mour kake im kein jipan̄ ko me rej litok jān Kabun̄ in rej juon iien ekanooj em̧m̧an n̄an kōpooj baam̧el ko indeeo im kajjojo armej ilo iakwe n̄an ioon im mour ippān Anij.21
N̄e juon em̧m̧aan im juon kōrā rej liāp ilo tampeļ, rej deļo̧n̄e kōlaajrak in m̧are eo ekwojarjar ilo bujen eo ekāāl im indeeo, kōlaajrak an priesthood eo.22 Ippān doon rej bōke im bōk kōjeraam̧m̧an ko an priesthood eo im kajoor eo n̄an tōl jerbal ko an baam̧le eo aer. Kōrā ro im em̧m̧aan ro ewōr aer jerbal ko rejej uwaer āinwōt kar kōlaajraki ilo “Baam̧le Eo: Juon Naan in Kean̄ n̄an Laļ in,”23 bōtaab jerbal ko aer rej jokkun wōt juon ilo tokjān im aorōk.24 Kajoor eo aer ej jokkun wōt juon n̄an bōk revelesōn n̄an baam̧le eo aer. N̄e rej jerbal ippān doon ilo iakwe im jim̧we, jokāālet ko aer rej kōjeraam̧m̧an an lan̄.
Ro rej kappukōt n̄an jeļā ankilan Irooj āinwōt kajjojo armej im n̄an baam̧le ko aer rej aikuj kajjieon̄ in jim̧we, ettā, jouj, im iakwe. Ettā bōro im iakwe rej kōkaļļe in m̧wil ko an ro me rej kappukōt ankilan Irooj, eļap tata n̄an baam̧le ko aer.
Koweppānļo̧k kōj make, kōkarbōb kōj make n̄an kōjeraam̧m̧an ko an bujen ko, im m̧aanjabpopo n̄an ioon Anij rej eddo ko an kajjojo armej. Jej aikuj in erom un̄are peid make im kanooj m̧ōņōņō ilo kōm̧m̧an bwe m̧weo im̧ōd en juon jikin likōpejn̄ak jān lan̄ ko me rej jepooļ kōj25 im “juon jikin kone an tōmak.”26 Ro jinen im jemem ewōr juon aer eddo n̄an katakin ilo iakwe ajri ro nejier. Im̧ōko kar kobrak kōn iakwe rej lan̄lōn̄, lo̧udin̄din̄, lukkuun lan̄ ioon laļ in.27
Al in jar eo em̧m̧an tata ippān m̧am̧a eaar “Ewōr Aibujuij Ibelakin.”28 Jabdewōt iien ekar ron̄ naan ko m̧oktata, “N̄e wōr yokwe lo m̧weo imōd ewōr aibujuij ,” ekkā an alikkar an m̧weiur im kemjaaļaļ. Āinwōt ajri ro kōm kar jeļā bwe kōm kar mour ilo kain m̧weo me, eaar juon iaan menin aorōk ko an ilōn̄ tata.29
Ilo kakobaba n̄an kōketak juon mejatoto eo em̧m̧an ilo m̧weo, Būreejtōn Nelson eaar pedped ioon kōm̧m̧an jon̄an kōjerbal media ko me rej kabōjrak jibadbad ko ad raorōk tata.30 Juon oktak me enaaj kōjeraam̧m̧an enan̄in jabdewōt baam̧le ej n̄an kōm̧m̧ane bwe internet, social media, im alooj tipi en juon rikōm̧akoko ijello̧kin juon rikōm̧ad ak, em̧ool nanaļo̧k, juon irooj. Tariņae eo n̄an jetōb ko an aolep, ak eļap tata ajri ro, ej emakijkij ilo m̧weo. Āinwōt ro jinen im jemen jej aikuj kanooj lale bwe kobban media koren em̧man iien otemjej, jetjet n̄an iiō eo, im jokkun wōt juon ippān mejatoto eo em̧m̧an jej kajjieon̄ ejake.
Katakin ilo m̧ōko im̧ōd ej aikuj in alikkar im kaitoktok limo31 bōtaab barāinwōt kajoor ilo jetōb, lan̄lōn̄, im obrak kōn iakwe.
Ij kallim̧ur bwe ilo ad pedpede iakwe eo ad n̄an Rilo̧mo̧o̧r eo im Pinmuur eo An, kōm̧m̧an bwe En dipelen kijejeto ko ad n̄an aiintok Israel ilo turājet eo juon an rōn̄ōl eo, jerbal in karejar n̄an ro jet, im kōpooj armej kajjojo n̄an ioon Anij, kareel eo an rikapo eo enaaj mājkunļo̧k im lan̄lōn̄ eo, lo̧udin̄din̄ eo, im aenōm̧m̧an eo an gospel eo enaaj kōļapļo̧k im̧ōko im̧ōd kōn iakwe eo āinwōt eo an Kraist.32 Ij kam̧ool kōn kallim̧ur in katak kein im kwaļo̧k juon kam̧ool em̧ool kōn Jisōs Kraist im en̄taan in pinmuur eo An ilo etad, ilo etan Jisōs Kraist, amen.