Ua Na’o Tusiga Faatekinolosi: Talavou Matutua
O Le Auala na Fesoasoani ai se Tamaitiiti ia te A’u ia Malamalama i le Alofa o le Faaola mo A’u
Ona o lo’u tei e lima tausaga, ua ou maua ai nei le talitonuga sili ma le vaaia o le Faaola o siomia a’u i aso taitasi.
E alala le tusitala i Iuta, ISA.
I se tasi o Po o le Vaeluaga o le Tausaga Fou, sa ou asiasi atu ai i le Nofoaga Autu mo Tagata Asiasi mai o le Malumalu o St. George Iuta ma lo’u tuafafine, ma lona toalua ma le fanau. I se tasi o potu, sa i ai vaaiga o Lona soifua mai i le lalolagi atoa. Sa ou maofa i le eseesega o vaaiga taitasi—le lapoa, lanu, anomea na faaaogaina, eseese o foliga vaaia, ma isi mea. Sa mamana ma migao.
Sa manao le tama teine a lo’u tuafafine, o Juliet, ou te siiina o ia, i lona i ai i o’u lima, sa ma savavali ai i le faaaliga. I le filemu o le potu, na amata ai ona fai mai soo Juliet, “O Iesu lena! Ma o Iesu lena! Ma o Iesu lena! O Iesu lena!” ma faaauau ai lava i vaaiga taitasi o le soifua mai o le Faaola na ma pasia. Sa mitamita lona leo ao ia tusi atu ma le fiafia i [faatagata] Iesu tamameamea taitasi. Sa manao o ia ia latalata atu i [faatagata Iesu tamameamea] taitasi. Sa ou taumafai e fai atu ia te ia filemu teisi, ae na le manuia—sa matuai fiafia lava o ia. Sa ia faia ia ou toe taamilo i le amataga i taimi taitasi ma te taunuu ai i le faaiuga o le faaaliga, ma ma toe faia lenei mea mo le tusa ma le 20 minute a o ia faaauau pea ona alaga, “Ma o Iesu lena! Ma o Iesu lena!” E oo ane i le taimi mulimuli na matou tuua ai lena potu, sa tiga lo’u tua ma mamafa o’u lima, ae sa sili atu le māmā o lou loto i lo se isi taimi muamua. O lona fiafia ma le mautinoa e vaai ma iloaina le Faaola sa i ai se aafiaga malosi ia te a’u.
Ou te lei mafaufau tele i lenei aafiaga seia oo ina ou nofo i le lotu i ni nai vaiaso mulimuli ane ae usu e le faapotopotoga le “Ua Ou Iloa Lo’u Faaola” o le viiga faaiu (Viiga, nu. 73). Sa ou usuina lena lava viiga faapitoa i le tele o taimi o lo’u olaga e aunoa ma le mafaufau i ai, ae o le taimi lenei sa manino. A o ou usuina, “O lo’o afio i luga. E fautua mo a’u i le Tama. Ua tu na te fafaga mai. Ua tu e fesoasoani mai,” sa tau le lagona upu. Sa ou le toe pese ae tagi a o o’u faalogologo i fuaiupu na totoe. O upu uma sa lagona le moni ma le mautinoa ia te a’u i lena lava taimi. Sa ou lagona le pei na fusi a’u e le Faaola ma sa ou lagonaina e lei faagaloina lava a’u pe ulagia.
Sa masani ona ou mafaufau o ou faaletonu i nisi taimi na faaitiitia ai lou agavaa mo le alofa o le Faaola. Ae o le molimauina o le faamanatuina o Iesu e ala i le vaaiga a se lima tausaga le matua, o se mea lea sa ou manaomia e aveese ai lou lava masalosalo ma faalagolago atu i le faatuatuaina e moni lava e alofa o Ia ia te au, e ui lava i ou le atoatoa. Sa manaomia lo’u faatuatuaina faapea o loo galue o Ia faatasi ma au i le taimi moni, i aso uma, e faaleleia atili lo’u olaga ma liliu vaivaiga e avea ma malosiaga. Ia talitonu o loo Ia fesoasoani mai e faatoilalo mea o loo ou tauivi ai. Ia talitonu e mafai ona ou saoloto mai noataga faaletagata lava ia o le ita, faitioina o au lava, ma le faanoanoa, ma isi tauiviga o ia te a’u faatasi ai ma Lana fesoasoani, ma tuu i latou i Ona aao—mo le lelei. Talitonu o se faagasologa lenei, o loo tatou faasagatau atu i le natura faaletagata ma le lavelave o le olaga, ma o loo tumau pea ma onosai o Ia i le taimi atoa.
Sa leai se faatuai po o le le mautonu o Juliet i le vaai atu ia Iesu Keriso ma iloaina o Ia o siomiaina o ia—sa ia iloaina. Na oo masani mai ia te ia ma e na te iloa e alofa o Ia ia te ia. Ma o lana ataata sa sili atu nai lo se isi lava faamaoniga ia te au e na te iloa ma alofa ia te Ia. Ua amata ona ou malamalama i le mafuaaga na poloai mai ai le Faaola ia avea i tatou e faapei o tamaiti laiti ina ia mafai ona ulu atu i Lona malo. Ou te fia faapei o Juliet.
Talu mai na aafiaga e lua, ua sili atu se taumafaiga ua ou faia ina ia maua le talitonuga sili atu ma vaai i le Faaola o siomiaina a’u. Ma ua ou faia! Ua ou vaai ia te ia i upu agalelei ma amioga a tagata ese ma uo, i fofoga o i latou ou te talanoa i ai, pe a susulu mai le la ma le taimi ou te faalogo ai i manulele o pepese, ua amata ona ou lagonaina le itiiti o le mamafatu ma le tele o le faamoemoe. Ua amata ona ou fai ifo ia te au lava, “O Iesu lena, ma o Iesu lena.” Ou te fia ola i lou olaga atoa i lena auala. O loo i ai o Ia i soo se mea ma e ao ona tatou filifili e vaai ia te Ia, i mea laiti ma mea tetele. O Ia o le meaalofa silisili.