Mataupu 5

Ua Mamafatū Ua Pei Ai a Ou Oti

I le tautotogo o le 1847, na malaga ai Sieni Manning James i sisifo faatasi ma lona toalua, o Isaako, ma o la atalii e toalua o Silivesa ma Sila, i se vaega toatele o le Au Paia e tusa ma le 1,500. O Aposetolo o Parley Pratt ma Ioane Teila sa taitaia le vaega toatele faatasi ai ma le fesoasoani a nisi o kapeteni o e na vaaia vaega pe tusa e tai 150 i le 200 o le Au Paia. Sa faatulagaina e Parley ma Ioane le vaega toatele i le faaiuiuga o le tautotogo ina ua tonu e toe faaleleia le uluai fuafuaga a le Korama a le Toasefululua mo le malaga.

Sa tuua e le aumalaga toatele ia Uinita Kuata i le ogatotonu o Iuni, e tusa ma le lua masina mulimuli ane talu ona o ese atu le vaega na muamua.¹ E ui ina sa na’o le luasefulu ma ona tupu lona matua, ae sa masani Sieni i malaga uumi i luga o le eleele. Ina ua mavae le teenaina e malaga i se vaa i alavai i le 1843, atonu ona o le lanu o lona pa’u, o lea na savavali ai o ia ma se vaega toaitiiti o tagata uli o le Au Paia o Aso e Gata Ai i le toetoe a valu selau maila mai Niu Ioka i sisifo e tau atu i Navu. Mulimuli ane, na savavali ai Sieni ma Isaako i laufanua palapala o Aioua faatasi ai ma le Tolauapiga a Isaraelu. Mo le tele o lena taimi, na mamafa ai Sieni i lana tama tama o Sila, o le sa fanau i le ala.²

O le malaga i le eleele sa seāseā malie. O aso sa uumi ma faavaivai tagata. O le faataatiaga o laufanua sa masani ona faalemanaia, seiiloga e vaaia se faatulagaga e le masani ai o alā po o se lafu pafalo. I se tasi o taimi, a o faimalaga ai i le auvai o le Vaitafe o Platte i Matu, sa faateia ai Sieni ina ua taufetuli atu se lafu pafalo ia i latou. Sa faapotopoto e le vaega a latou taavale solofanua ma lafu povi ao feei atu tamaloloa ma tasasa atu sasa i le lolofi mai o pafalo. A o le’i solia le vaega, sa tavavae lelei lava i le ogatotonu le lafu, o isi pafalo na o i le itu taumatau, ae o isi na o i le itu tauagavale. I le iuga na leai se tasi na afaina ai.³

Sa na’o Sieni, Isaako ma le la fanau ia tagata uli o le Au Paia i le latou vaega o le toetoe 190 o tagata. Ae sa i ai isi tagata uli o le Au Paia o loo nonofo i uarota ma paranesi i le Ekalesia atoa. O Elia Apelu, o se fitugafulu sa auauna atu i se misiona i Niu Ioka ma Kanata, sa auai faatasi ma lona toalua o Mele Ane i se paranesi i sisifo tutotonu. O se isi tamalii, o Walker Lewis, lea na faamatalaina e Polika Iaga o se “tasi o toeaina sili ona lelei” i le Ekalesia, sa auai ma lona aiga i se paranesi i le Talafatai i Sasae.⁴

E toatele tagata o le Ekalesia sa tetee i le faiga o pologa, ma sa alu Iosefa Samita i le palota mo le peresitene o le Iunaite Setete i luga o se tulaga lea na aofia ai se fuafuaga e faamuta ai lea faiga masani. Peitai, o taumafaiga faamisiona a le Ekalesia, na taitai atu ai i papatisoga o nisi o e na i ai ni pologa ma nisi o pologa. Sa i ai i le Au Paia na faapologaina ia tagata e toatolu o le vaega na muamua o—Green Flake, Hark Lay, ma Oscar Crosby.⁵

I le 1833, na fetalai mai ai le Alii e faapea, “e le tatau i soo se tagata ona nofo pologa i se tasi tagata.” Ae ina ua uma ona tutuli ese le Au Paia mai le Itumalo o Jackson, Misuri, o se vaega o le mafuaaga ona o nisi o i latou sa tetee i le fai o pologa ma faaalia ai le agalelei mo tagata uli saoloto, na lapataia ai e taitai o le Ekalesia ia faifeautalai e faasaga i le faatupuina o feteenaiga i le va o tagata faapologaina ma tagata e fai a latou pologa. O le nofo pologa o se tasi o faafitauli na aupito malosi le finauina i le Iunaite Setete i lea vaitaimi, ma mo le tele o tausaga na vaeluaina ai ekalesia faapea foi ma le atunuu.⁶

O le ola ai i lona olaga atoa i le Iunaite Setete i matu, lea sa faatagaina ai le fai o pologa, sa le’i nofo pologa ai lava Sieni. Sa faigaluega o ia i aiga o Iosefa Samita ma Polika Iaga ma iloa ai o tagata papae o le Au Paia na masani ona taliaina tagata uli i totonu o le lafu.⁷ Ae peitai, e pei o isi vaega o tagata Kerisiano i lea taimi, e toatele tagata papae o le Au Paia na sese o latou manatu e uiga i tagata uli e faapea e faatauvaa, ma talitonu o le pa’u uliuli o le taunuuga lea o le fetuu a le Atua i tagata o le tusi paia o Kaino ma Hamo.⁸ Sa iu ina amata aoao atu e ni isi le manatu sese e faapea, o le pa’u uliuli sa o se faamaoniga o amioga amioletonu o se tagata i le muai olaga.⁹

Sa faasoa atu e Polika Iaga nisi o nei manatu, ae a’o lei tuua Uinita Kuata, sa ia ta’u atu foi i le Au Paia e totolua e faapea, na tutusa tagata uma i le Atua. Na saunoa o ia, “Na faia e le Atua tagata uma i le toto e tasi.” “Tatou te le popole i le lanu.”¹⁰

O le faatuina o Siona i tua atu o Mauga Papa na tuuina atu ai i le Au Paia se avanoa e fatufatu ai se nuu fou lea sa mafai ai e Sieni, lona aiga, ma isi e pei o i latou ona taliaina o ni uso a tagatanuu faapea foi o ni Au Paia.¹¹ Peitai, sa loloto lava le i ai o le faailoga tagata, ma sa foliga mai e le ono oo mai ni suiga i se taimi lata mai i le lumanai.

---

I le aso 26 o Aokuso, na tietie atu ai Uilifoti Uitilafi i lana solofanua i totonu o ni laina sana ma pateta e agai atu i auvae mauga e vaavaai atu agai i lalo o le Vanu o Sate Leki. Mai iina na mafai ona ia vaaia ai le amataga o se nofoaga maoae. I totonu o se masina, na amata fausia ai e ia ma le vaega na muamua le fauga o se ‘olo malosi, totoina ni eka o fatu laau, ma tusia ni fuafuaga mo le nofoaga fou e faapotopoto i ai. I le ogatotonu o le nofoaga, i le tulaga lea na sunu’i ai e Polika lona tootoo i le palapala, sa i ai se vaega faatafafā o le eleele ua latou ta’ua i le taimi lenei o le “poloka o le malumalu.”¹²

O aso muamua lava o Uilifoti i le vanu sa tumu i mea ofoofogia. Sa aai se lafu anetelope i le itu i sisifo o le vanu. Sa taaalo se lafu ‘oti aivao i luga o maupuepue. Sa maua e Uilifoti ma isi paionia ni puna vevela e latalata i le Ensign Peak. I le Vai Masima Tele, sa faaopeopea ma taavavale solo ai tamaloloa e pei o ni ogalaau i le vai mafanafana sualua, i le taumafai malosi ia magoto i lalo o le vai.¹³

O le fa o aso talu ona taunuu atu i le vanu, sa tietie toatasi ai Uilifoti i ni maila mai le tolauapiga ae ona vaaia loa ni Initia Amerika e toaluasefulu i luga o se tuasivi sa i ona luma atu. I le omaiga i sisifo, sa iloa e le Au Paia o le a latou fetaiai ma tagata Moni i le auala ma i totonu o le Faaofuofu Tele. Ae sa latou faamoemoe ia maua atu le Vanu o Sate Leki o matele lava ina le aināina. O le mea moni, o le au Shoshones, o le au Utes, ma nai isi ituaiga sa masani ona o mai i le vanu e tutuli ma ao atu ni meaai.

Sa liliu ma le faaeteete lana solofanua, ma toe amata ona tietie lemu atu Uilifoti i le tolauapiga. Sa tietie ane se tasi o Initia i ona tua, ma ina ua na’o ni nai iata na valavala ai i laua, sa faatu loa e Uilifoti lana solofanua, faliu e faasaga atu i le tagata tietie solofanua, ma taumafai e talanoa atu i le gagana faifaailoga taufatufatu. Sa agalelei le alii, ma na iloa ai e Uilifoti o ia o se tagata Ute o lē na manao i le filemu ma fefaatauai ma le Au Paia. Talu mai lena taimi, na faia ai e le Au Paia ni fesootaiga faaopoopo ma Initia, e aofia ai le au Shoshones mai matu.¹⁴

O lenei la, faatasi ai ma le taumalulu lea sa na’o ni nai vaiaso le mamao, sa fuafua ai e Uilifoti, Polika, Heber Kimball, ma isi tagata o le vaega na muamua e toe foi atu i o latou aiga i Uinita Kuata ma aumai i latou i sisifo i le tautotogo. Sa faapea mai Heber, “O o’u talotaloga i le Atua, maimau pe ana le tatau ona tatou toe foi.” “O le parataiso lenei ia te a’u. O se tasi o nofoaga aupito sili ona matagofie ua ou vaai i ai.”¹⁵

Sa le o tagata uma na ioe ma ia e uiga i le vanu. E ui lava i ona auvai ma laufanua mutiā, o le nofoaga fou sa matutu atu ma sili atu ona tuufua nai lo se isi lava nofoaga na faapotopoto i ai le Au Paia. Mai le taimi sa ia taunuu ai, na augani atu ai Sam Brannan ia Polika ia faaauau ona o atu i laufanua lanulauava ma eleele lafulemu o le gataifale o Kalefonia.¹⁶

Sa ta’u atu e Polika ia Sam, “O le a ou nofo lelei lava ii. O le a ou fausia se aai iinei. O le a ou fausia se malumalu iinei.” Na ia silafia sa finagalo le Alii ia nonofo le Au Paia i le Vanu o Sate Leki, e mamao ese mai isi nofoaga o le I.S i sisifo, lea sa ia mautinoa lava o le a le umi ae nofoia e isi tagata malaga fai mai. Peitai, sa tofia e Polika ia Sam e auauna o se peresitene i le Ekalesia i Kalefonia, ma toe auina atu o ia i le Vaifagaloa i San Francisco ma se tusi mo le Au Paia.¹⁷

“Afai tou te filifili e nonofo i le mea ua outou i ai, e pule lava outou i le mea e fai,” sa tusi atu ai Polika i lana tusi. Ae sa ia valaaulia i latou e auai atu ma le Au Paia i atumauga. Sa ia ta’u atu ia i latou, “matou te mananao e faamalosi lenei itu, o se vaega e faapotopoto ai, o se nofoaga e sili atu ona vave e faatasitasi ai nai lo se isi lava nofoaga,” O Kalefonia i le isi itu, o le a avea ma nofoaga mo le Au Paia na agai atu i le vanu.¹⁸

I lona manatu, sa le’i vaai lava Uilifoti i se nofoaga ua lelei atu mo se aai nai lo le Vanu o Sate Leki, ma sa naunau lava o ia ia taunuu atu i ai nisi tagata e toatele o le Au Paia. Sa faaalu e i latou ma le Toasefululua le taumalulu atoa i le fuafuaina o se malaga faatulagaina lelei o tagata fai atu—o se fuafuaga na tuuina atu ai se auala mo le Au Paia uma, e tusa lava po o a tulaga po o le tamaoaiga, ia oo atu ai le vanu. Na oo mai nei le taimi e faailoa atu ai le fuafuaga mo le manuia o Siona.¹⁹

---

Ina ua tuua e Addison Pratt ia Tahiti ia Mati 1847, sa faamoemoe o ia e maua atu lona aiga i Kalefonia faatasi ma isi tagata uma o le Au Paia. Ae i le le maua ai o se upu mai ia i latou—po o se tasi i le Ekalesia—i le tausaga ua tuanai, sa le iloa ai e ia pe o le a i ai moni i latou iina. Sa ia tusi i lana apitalaaga, “O le mafaufau e faapea, ua ou alu atu nei ia i latou o se manatu matagofie lea.” “Ae o le isi manatu na oso a’e o le: O fea o i ai i latou? Po o le, o fea o le a ou maua i ai i latou?”²⁰

Sa taunuu atu Addison i le Vaifagaloa o San Francisco ia Iuni. O iina sa ia maua atu i ai le Au Paia o le [malaga a le] Brooklyn o faatalitali ai mo le toe foi mai o Sam Brannan ma le taunuu mai o le tino autu o le Ekalesia. O le talitonu ai e faapea, ua o atu Luisa ma le la fanau i le talafatai, sa ofo atu ai Addison e o atu i le nofoaga o le Au Paia, o le Faamoemoe Fou, ma isi tamalii e toafa e selesele le saito a le Ekalesia.

Sa le’i umi ae malaga ese atu loa le vaega i se vaa. O le Faamoemoe Fou sa taoto i le silia ma le selau maila i gauta o se vaitafe laitiiti ifo na tafe atu i le Vaitafe o San Joaquin. Mo aso, sa folau atu ai ia alii i vaipapa’u o nuu maotua faapea ma vao uumi i ‘autu i talane o le auvai o le vaitafe. I le taulalata atu i le nofoaga, sa malo le palapala, ma latou savavali ai i le vaega o le auala na totoe i luga o laufanua vaoa.

O le vaaiga mo le Faamoemoe Fou sa matagofie, ae o se taimi na le’i mamao atu na pa ai se vaitafe lata ane, lea na tafefea ai nisi o saito a le Au Paia, ma tuua ai ni vaivai o vai lepa. I le po, a o taoto Addison e moe, sa osofaia e le anoano o namu le nofoaga. Sa taumafai Addison ma isi e tutuli ese pe faa’asu ia o ese ai, ae sa le’i faamanuiaina. Ma o le mea na atili ai le leaga, na uio ma fetagisi ia luko ma lulu i le po atoa seia oo i le tafa o ata, ma faoa ai le filemu o tagata lelavava na nonofo ai.²¹

O le taeao na sosoo ai na amata ai le seleselega o le saito. Ae e oo ane i le aoauli ua matuai fiamoe lava Addison ona o le leai o se moe i le po, o lea sa fai ai loa sina ana miti i lalo o le paolo o se laau. Sa oo ina avea lea mea ma mea masani ona o namu ma le pisa o manu aivao na le mafai ai ona moe o ia i lea po ma lea po. Ina ua uma le seleselega, sa fiafia Addison o le a alu.

Sa ia tusia i lana apitalaaga, “Ana leai le namu, semanu ou te fiafia ai lava iina.”²²

I le toe taliu atu i le Vaifagaloa o San Francisco, sa amata tapena ai e Addison se fale mo lona aiga. E oo ane i le taimi lea, ua taunuu atu nisi o tagata o le Autau a Mamona i Kalefonia ma maua ai se faamalologa faamamaluina. Sa toe foi foi Sam Brannan i le vaifagaloa, ma sa talitonu lava pea, sa faavalevalea Polika ma le nofo ai i le Vanu o Sate Leki. “E lava loa lona taumafai e nofo ai iina,” sa ia fai atu ai i nisi o le au matutua o le autau, “ona ia iloa ai lea, sa sa’o au ae sese o ia.”

Peitai, sa momoli atu e Sam le tusi a Polika i le Au Paia i Kalefonia, ma o le toatele o i latou o e na folau mai i le Brooklyn pe na savavali faatasi ma le Autau a Mamona sa filifili e malaga atu i le Vanu o Sate Leki i le tautotogo. Sa i ai foi ia Sam se tusi mo Addison mai ia Luisa. Sa i ai lava o ia i Uinita Kuata, ae sa fuafua foi o ia e sau i le vanu i le tautotogo ma nonofo faatasi ai ma le tino o le Au Paia.

Sa sui ai lava i le taimi lea fuafuaga a Addison. E oo mai loa le tautotogo, o le a alu atu o ia i sasae faatasi ma le Au Paia e o ese atu ma feiloai ai ma lona aiga.²³

---

Sa lagona lava pea e Polika Iaga le faama’ima’i i le faaiuga o Aokuso i le taimi na tuua ai e ia ma le vaega na toe foi le Vanu o Sate Leki mo le latou malaga toe foi atu i Uinita Kuata. I le isi tolu aso na sosoo ai, sa malaga faanatinati ai le vaega toalaiti e ui atu i vanu pefua ma luga ae o auala tāfatō o Mauga Papa.²⁴ Ina ua latou taunuu i le isi itu, sa fiafia Polika i le iloa sa na’o ni nai selau maila le mamao o le solo tele o le Au Paia a Parley Pratt ma Ioane Teila.

Peitai, sa mou ese i se taimi e le’i mamao ane, le olioli o Polika, ina ua ia iloaina o le solo tele e faselau taavale solofanua na toatele ai nai lo le mea sa ia fuafuaina. Na faaalu e le Toasefululua le taumalulu atoa e faatulaga ai le Au Paia i vaega e tusa ai ma le finagalo na faaalia mai o le Alii. Ae o lea ua foliga mai na le amanaia e Parley ma Ioane lena faaaliga ae fai lava le mea na la loto i ai.²⁵

I ni nai aso mulimuli ane, sa feiloai ai loa Polika ma le vaega na foi atu ma le solo tele. O Parley sa i ai i se tasi o vaega taitai, o lea na vave taloina ai e Polika se fono ma taitai o le Ekalesia e fesiligia ai o ia pe aisea na la le usitaia ai ma Ioane ia faatonuga a le korama.²⁶

“Afai ua ou faia se mea sese, ua ou naunau e toe faasa’oina,” sa fai atu ai Parley i le aufono. Ae sa maua’i lava o ia na la galulue ma Ioane i totonu o le la pule o ni aposetolo. E faitau selau le Au Paia na maliliu i lena tausaga i Uinita Kuata, ma isi nofoaga i luga ae o le Vaitafe o Misiuri. Ma e toatele aiga na matuai naunau lava ia tuua le eria ao le’i oo mai se isi vaitau matautia. Talu ai o nisi o le Au Paia i vaega ia na faatulagaina e le Toasefululua sa le’i saunia i le taimi lena e o ese mai, sa filifili ai i la’ua ma Ioane e faia ni vaega fou e faaofi ai i latou o e na saunia.²⁷

Sa toe faapea atu Polika, “Sa atoatoa lava ona faatulagaina a tatou vaega, ma afai e le mafai ona latou sao mai, o i tatou lava e nafa ma i latou.” Na manino lava ona faatonu mai e le Afioga ma le Finagalo o le Alii ia vaega taitasi e “ave se vaega tutusa” o e matitiva ma auaiga o alii o loo auauna i le Autau a Mamona. Ae ua tuua e Parley ma Ioane le toatele o nei tagata.²⁸

Sa tetee foi Polika i le faapea e mafai e ni aposetolo e toalua ona faaleaogaina le faaiuga a le korama. “Afai e fai e le Korama a le Toasefululua se mea, e leai se malosiaga o le toalua o i latou e talepeina ai,” sa ia fai atu ai. “Ina ua tatou faaminoia le masini, sa le o sau pisinisi le tuu o ou lima i totonu o masini e taofi ai le uili.”²⁹

Sa faapea atu Parley, “Na ou faia le mea sili na ona mafaia.” “Ua e saunoa mai e lelei atu se mea na mafai ona ou faia, ma afai e tuuaia a’u i lenei mea, ma faapea mai ua sese le mea ua ou faia—ua sese le mea ua ou faia. Ua tausalaina a’u i se mea sese ma ou te faamalie atu ai.”

Sa tali atu Polika, “Ua ou faamagalo ia te oe.” Ma faaopoopo atu, “Ma afai e le sa’o le mea ou te faia, ou te manao i tagata uma e faasa’o mai ai pe a ou sese, ina ia ou ola i le fiafia o le talalelei. Ua ou lagona le mamafatū ua pei ai a ou oti i avega a lenei nuu toatele.”³⁰

Sa iloa lelei lava le vaivai o Polika i ona foliga ma lona tino vale. “Ou te mafaufau ia te a’u lava o se tagata vaivai ma le mativa. Sa valaauina a’u e ala i le poto o le Atua e pule faamalumalu,” sa ia fai atu ai. “Ou te manao ta te o sa’o lava ma a’u i le malo selesitila.”

“Ou te fia iloa po o malilie le usoga ia te a’u,” na fai atu ai Parley.

“Ia faamanuia le Atua ia te oe e faavavau faavavau lava,” na fai atu ai Polika. “Aua ne’i toe mafaufau lava i ai.”³¹

---

Sa tolauapi Drusilla Hendricks ma lona aiga i lalo atu o le solo o taavale solofanua i le taimi na taunuu atu ai Polika ma lana vaega. E ui o le toatele o auaiga o tagata o le Autau a Mamona sa i ai pea lava i Uinita Kuata, ae sa lava punaoa na faaputuputu e le auaiga o Hendricks ma isi lava aiga ina ia auai faatasi ai ma i latou na o atu i sisifo. Ua silia ma se tausaga talu ona vaavaai atu Drusilla i lona atalii o Viliamu o savali ese atu faatasi ma le autau, ma sa naunau lava o ia e toe faatasia ma ia i le vanu—po o se taimi e le toe mamao foi.³²

Na fetaia’i i le ala le vaega a Drusilla ma fitafita o le autau na toe foi mai. Sa susulu i le faamoemoe foliga o le toatele o le Au Paia, i le naunau e fia vaai i e pele ia i latou, ina ua latou vaai i le autau. O le mea e faanoanoa ai, sa le’i i ai Viliamu ia i latou.

Sa latou vaai i nisi o fitafita o le autau i se masina mulimuli ane. Sa faafiafia e nei alii le Au Paia i faamatalaga o le Faaofuofu Tele ma faataga i latou e tofo i le masima na latou aumaia mai le Vai Masima Tele. Ae sa le’i i ai foi Viliamu i le vaega lea.³³

I le aluga o nai vaiaso na sosoo ai, sa tauivi ai Drusilla ma lona aiga i auala i luga o mauga, sopoia vaitafe ma alavai, feaei i mauga tāfatō, ma asa solo i vanu. O o latou lima, lauulu ma foliga na lilofia i le pefu ma le palapala. O o latou lavalava, ua aliali filo ma masaesae mai le umi o le malaga, na maua ai sina puipuiga mai le la, timuga, ma le palapala. Ina ua latou taunuu i le vanu i le amataga o Oketopa, sa mama’i pe vaivai tele nisi o le latou vaega mo se patī.³⁴

Na silia ma se vaiaso talu ona taunuu Drusilla ma lona aiga i le vanu, ae latou te le’i maua lava se tala e uiga ia Viliamu. Ina ua taunuu le autau i gataifale o Kalefonia, na nonofo ai nisi o le au matutua e faigaluega ma maua ni tupe ae o isi na agai atu i sasae i le Vanu o Sate Leki po o Uinita Kuata. Na pau le mea na iloa e Drusilla, masalo o se mea o le va o le Vasa Pasefika ma le Vaitafe o Misuri o loo i ai Viliamu.³⁵

Faatasi ai ma le oo mai o le taumalulu, o Drusilla ma lona aiga na toetoe a leai ni lavalava mafanafana, utiuti meaai, ma leai se mea e fau ai se fale. Sa matuai faaletonu lava lo latou tulaga, ae sa tuu atu lona faatuatuaga i le Atua o le a sologa lelei mea uma. I se tasi o po, sa miti ai Drusilla e uiga i le malumalu o le a fausia e le Au Paia i le vanu, e pei ona sa miti i ai Uilifoti Uitilafi i nai masina na muamua atu. Sa tu ai i luga Iosefa Samita, o ona foliga uma lava ia sa i ai a o soifua. Sa valaau atu Drusilla i lona toalua ma lana fanau e o atu ma faapea atu, “O Iosefa lale.” Sa latou talanoa ma le perofeta, ae felelei ifo i le aiga ni lupe se lua.

O le ala a’e mai lana miti, sa talitonu Drusilla o lupe na faatusa i le Agaga o le Alii, o se faailoga o le faamaoniga faalelagi o faaiuga na faia e ia ma lona aiga. Sa talitonu o ia, e le faapea e le o iloa a latou osigataulaga.

I se taimi mulimuli ane o lena aso, na taunuu atu ai i le vanu se vaega matutua o le autau ua vaivai i le savaliga. O le taimi la lenei, sa i ai Viliamu ma i latou.³⁶

---

A o toe faatasia le auaiga o Hendricks i le Vanu o Sate Leki, sa taumafai atu pea i le auala i sasae ia alii o le vaega a Polika na toe foi. Sa televave la latou o, ma ua vaivai nei ma faasolo ina tau leai ni meaai. Na faasolo foi ina vaivai a latou solofanua ma amata ona solofa i lalo. I taeao, sa manaomia e nisi o manu le fesoasoani e faatutu ai i luga.³⁷

I le aluga o nei faafitauli, sa tumau lava le faasoesa atu ia Polika o ona lagona e uiga i le la feiloaiga ma Parley.³⁸ E ui ina sa ia faamagalo i lona uso a aposetolo ma fai atu ia te ia e faagalo le mea na tupu, ae o le la feeseeseaiga sa faaalia ai se manaomia o se faamaninoga—ma atonu ma ni suiga—i le ala sa taitaia ma faatulagaina ai le Ekalesia i le taimi nei.

I aso o Iosefa, sa pule faamalumalu ai se Au Peresitene Sili i le Ekalesia. Peitai, ina ua maea ai le maliu o le perofeta, ona faataape lea o le Au Peresitene Sili, ma tuua ai le Toasefululua e pule faamalumalu e sui tulaga ai. E tusa ai ma lea faaaliga, na fausia e Aposetolo e Toasefululua se korama e pule tutusa i le Au Peresitene Sili. Ae sa i ai foi so latou tiute paia e auauna o se aufono femalagaa’i ma avatu le talalelei i le lalolagi.³⁹ I le avea ai o se korama, faamata e mafai ona latou faataunuuina lelei lenei poloaiga ao faatinoina foi tiute o le Au Peresitene Sili?

Sa masani ona mafaufau Polika e toe faatulaga le Au Peresietne Sili, ae sa le’i manatu o ia ua sa’o le taimi. Talu lava ona tuua le Vanu o Sate Leki, sa faamalumalu ai lava i ona luga ia fesili e uiga i le lumanai o le taitaiga o le Ekalesia.⁴⁰ Sa manatunatu loloto ma le leoa o ia i le mataupu ao agai atu i Uinita Kuata, ma o lona atili faalogoina foi lea o le uunaiga a le Agaga ia te ia e faagaoioi loa.

I se tasi o aso, a o malolo i autafa o se vaitafe, sa ia faliu atu ia Uilifoti Uitilafi ma fesili atu i ai, pe ua tatau i le Ekalesia ona valaau ni sui o le Toasefululua e faia ai se Au Peresitene Sili fou.

Na mafaufau i ai Uilifoti. O le fetuunaiga o le Korama a le Toasefululua—o se korama na faavaeina e ala i faaaliga—sa o se mataupu taua tele.

Na saunoa atu Uilifoti, “O le a manaomia ai se faaaliga e suia ai le faatulagaga o lena korama.” “O le a lava le mea e musuia ai oe e le Alii e fai i lenei mataupu, ou te au faatasi i ai ma oe.”⁴¹

1. James, Autobiography, [6]; “List of Names of Isaac Haight’s Ten of the 2nd Fifty,” First 100, Second 50, Returns, June 1847, Camp of Israel, Schedules and Reports, CHL; Historical Department, Journal History of the Church, June 15, 1847; Bennett, We’ll Find the Place, 253–55; tagai foi Mataupu Faavae ma Feagaiga 136 (Revelation, Jan. 14, 1847, Revelations Collection, CHL); Historian’s Office, History of the Church, volume 17, Jan. 14–15, 1847, 18–19; Daniel Spencer/Ira Eldredge Company (1847) list; and Daniel Spencer/Perrigrine Sessions Company (1847) list, Pioneer Database, history.ChurchofJesusChrist.org/overlandtravel/companies.

2. James, Autobiography, [1]–[3], [6]; Au Paia, voluma 1, mataupu 41; Sessions, Diary, June 10, 1846. Autu: Jane Elizabeth Manning James

3. James, Autobiography, [7]; Diana E. Smoot, Autobiography, 1912, [2]–[5], e maua i le Pioneer Database, history.ChurchofJesusChrist.org/overlandtravel.

4. “Able, Elijah,” Biographical Entry, Joseph Smith Papers website, josephsmithpapers.org; Daniel Spencer/Ira Eldredge Company (1847) list, Pioneer Database, history.ChurchofJesusChrist.org/overlandtravel/companies; Historian’s Office, General Church Minutes, Mar. 26, 1847. Autu: Elijah Able

5. Amasa Lyman, Journal, Apr. 8, 1847; Clayton, Diary, Apr. 16, 1847; Brown, Autobiography of Pioneer John Brown, 73; Bullock, Journal, Apr. 23, 1847, 17; Brigham Young Vanguard Company (1847) list, Pioneer Database, history.ChurchofJesusChrist.org/overlandtravel/companies; Saints, volume 1, chapter 42. Mo se faataitaiga o le umia o pologa i le Au Paia o Aso e Gata Ai, tagai Cummings, Reminiscences and Diary, June 14, 1847.

6. Mataupu Faavae ma Feagaiga 101:79 (Revelation, Dec. 16–17, 1833, i le josephsmithpapers.org); Au Paia, voluma 1, chapter 16; “Free People of Color,” The Evening and the Morning Star, July 1833, [5]; “To His Excellency, Daniel Dunklin,” The Evening and the Morning Star, Dec. 1833, [2]; Joseph Smith to Oliver Cowdery, circa Apr. 9, 1836, in “For the Messenger and Advocate,” Latter Day Saints’ Messenger and Advocate, Apr. 1836, 2:[1]–[3]; Historical Introduction to Letter to Oliver Cowdery, circa Apr. 9, 1836, in JSP, D5:231–36; Staker, Hearken, O Ye People, 180–88; tagai foi “Race and the Priesthood,” Gospel Topics, topics.ChurchofJesusChrist.org.

7. James, Autobiography, [1], [3]–[7].

8. “A Short Chapter on a Long Subject,” Times and Seasons, Apr. 1, 1845, 6:857; Historian’s Office, General Church Minutes, Apr. 25, 1847, [3]; tagai foi Reeve, Religion of a Different Color, 22–23, 125–26, 145–46; Hudson, Real Native Genius, 71, 137, 187; Haynes, Noah’s Curse, 6–8; Council of Fifty, “Record,” Mar. 22, 1845, in JSP, CFM:360; The Evening and the Morning Star, Extra, July 16, 1833; Appleby, Autobiography and Journal, May 19, 1847; ma le Parley P. Pratt, Autobiography, 191.

9. Council of Fifty, “Record,” Mar. 22, 1845, in JSP, CFM:359–60; Woodruff, Journal, Dec. 25, 1869.

10. Historian’s Office, General Church Minutes, Mar. 26, 1847. Na talia e Polika Iaga le manatu e faapea o le pa’u uliuli sa o se faailoga o le fetuu a le Atua ae teena le manatu e faapea o le pa’u uliuli sa o se faamaoniga o ni amioga amioletonu a se tagata i le muai olaga. (Woodruff, Journal, Dec. 25, 1869.) Autu: Slavery and Abolition [Pologa ma le Faaumatiaga]

11. James, Autobiography, [6]–[8]; “Race and the Priesthood,” Gospel Topics, topics.ChurchofJesusChrist.org.

12. Woodruff, Journal, July 27–28 and Aug. 25–26, 1847; tagai foi Whitney, History of Utah, 1:351.

13. Woodruff, Journal, July 26–30, 1847.

14. Woodruff, Journal, July 28, 1847; tagai foi Farmer, On Zion’s Mount, 50; Clayton, Diary, July 31 ma Aug. 11, 1847; ma le Woodruff, Journal, July 31 ma Aug. 6, 1847.

15. Woodruff, Journal, Aug. 25, 1847; Historian’s Office, General Church Minutes, Aug. 22, 1847.

16. Woodruff, Journal, June 30–July 1, 1847; Wilford Woodruff, i le Collected Discourses, Aug. 29, 1897, 5:315.

17. Brigham Young, in Journal of Discourses, Sept. 13, 1857, 5:231; Brown, “Evidence of Inspiration,” 269; Wilford Woodruff, i le Collected Discourses, Aug. 29, 1897, 5:315; Brigham Young to “the Saints in California,” Aug. 7, 1847, draft, Brigham Young Office Files, CHL.

18. Brigham Young to “the Saints in California,” Aug. 7, 1847, draft, Brigham Young Office Files, CHL.

19. Woodruff, Journal, July 24, 1847; Aug. 25, 1847; Sept. 4, 1847; Council of the Twelve Apostles to “the Brethren at Winter Quarters,” Apr. 16, 1847, Brigham Young Office Files, CHL; tagai foi Historian’s Office, General Church Minutes, Sept. 4, 1847, [2].

20. Addison Pratt, Journal, Feb. 6, 1847; Mar. 26–27, 1847; Apr. 6, 1847.

21. Addison Pratt, Journal, May 1847–Aug. 1848, [1]–[11].

22. Addison Pratt, Journal, May 1847–Aug. 1848, [11].

23. Addison Pratt, Journal, May 1847–Aug. 1848, [11]–[13]; Brigham Young to Jefferson Hunt and “the Officers and Soldiers of the ‘Mormon Battalion,’” Aug. 7, 1847, Brigham Young Office Files, CHL; Tyler, Concise History of the Mormon Battalion, 315.

24. Kimball, Journal, Aug. 26–29, 1847; Historian’s Office, General Church Minutes, Sept. 4, 1847, 5.

25. Kimball, Journal, Aug. 29, 1847; Woodruff, Journal, Aug. 29 ma le Sept. 4, 1847; John Taylor to Brigham Young, Aug. 18, 1847, Brigham Young Office Files, CHL; Historian’s Office, General Church Minutes, Sept. 3, 1847, [1], [2]; Sept. 4, 1847, [2]–[3].

26. Woodruff, Journal, Sept. 4, 1847; Historian’s Office, General Church Minutes, Sept. 4, 1847. Autu: Parley P. Pratt

27. Historian’s Office, General Church Minutes, Sept. 4, 1847, [1]–[2]; Lee, Journal, Mar. 6 and 21, 1847; Pratt, “Parley P. Pratt in Winter Quarters,” 378–79, 385–88; Historical Department, Office Journal, June 15, 1847; tagai foi Council of the Twelve Apostles to “the Brethren at Winter Quarters,” Apr. 16, 1847, Brigham Young Office Files, CHL.

28. Mataupu Faavae ma Feagaiga 136 (Revelation, Jan. 14, 1847, Revelations Collection, CHL); Historian’s Office, General Church Minutes, Sept. 4, 1847, [1]–[2]; Historical Department, Office Journal, June 15, 1847.

29. Historian’s Office, General Church Minutes, Sept. 4, 1847, [1]–[2]; Historical Department, Office Journal, June 15, 1847. Ua faasa’oina upusii mo le faigofie ona faitauina; “e le o sau pisinisi” i le uluai tusiga ua suia i le “sa le o sau pisinisi.” Autu: Korama a le Toasefululua

30. Historian’s Office, General Church Minutes, Sept. 4, 1847, [2]–[3]. Ua faasa’oina le upusii a Parley Pratt mo le manino; faaopoopo i ai le upu “ave.”

31. Historian’s Office, General Church Minutes, Sept. 4, 1847, 5–6.

32. Eliza R. Snow, Journal, Sept. 8, 1847; Hendricks, Reminiscences, 28; tagai foi “Report of the 1st Fifty 3rd Hundred and 1st Devision Our Organization at the Horne June 19th 1847,” Spring 1847 Emigration Camp, Camp of Israel, Schedules and Reports, CHL.

33. Eliza R. Snow, Journal, Aug. 4 and Sept. 2, 1847; tagai foi Hendricks, Reminiscences, 28.

34. Eliza R. Snow, Journal, Sept. 14–Oct. 2, 1847, ae maise o tusiga mo Oke. 1 ma le 2; Hendricks, Reminiscences, 28.

35. Hendricks, Reminiscences, 28; Tyler, Concise History of the Mormon Battalion, 300–311.

36. Hendricks, Reminiscences, 28–29.

37. Woodruff, Journal, Oct. 1–13, 1847; Historian’s Office, History of the Church, volume 17, Sept. 17 and 26, 1847, 115, 116; Oct. 13, 1847, 119.

38. Tagai Historian’s Office, General Church Minutes, Nov. 16, 1847.

39. Historian’s Office, General Church Minutes, Aug. 8, 1844; Folafolaga a Aposetolo e Toasefululua, 1; Doctrine and Covenants 107:22–24; 124:126–28 (Instruction on Priesthood, between circa Mar. 1 and May 4, 1835; Revelation, Jan. 19, 1841, at josephsmithpapers.org).

40. Historian’s Office, General Church Minutes, Dec. 5, 1847, 8; Apr. 6, 1848, 2; tagai foi Bennett, Mormons at the Missouri, 199–209; ma Arrington, Brigham Young, 153–56.

41. Whitney, Journal, Oct. 12, 1847; Woodruff, Journal, Oct. 12, 1847. Autu: Au Peresitene Sili