Tuuatoatasi ma le Loto Faafetai i le Kerisimasi
Ata na tusia e Daria Kirpach
Mo au a o tuputupu ae, o le Kerisimasi o le taimi aupito maoae o le tausaga—e le ona o meaalofa, ae ona o le Kerisimasi o se taimi e sili ona fefaasoaai faatasi ma i latou o e sa taua i lou olaga, o lou aiga.
O le aiga o lona uiga o mea uma ia te au, ma i le aluga o tausaga, o tu ma aga o le Kerisimasi sa o se faatulagaga lelei o mea malie faaleaiga e tauave ai pea le tele o manatuaga faapelepele mo au.
Ae sa ese le Kerisimasi na tuanai nei. Sa ou maua se galuega fou e manaomia ai lou toesea mai le taulaga i le Kerisimasi. E oo mai i le taimi lenei i lou olaga, sa ou misia le na o le lua Kerisimasi ma lou aiga—a o ou i ai i lau misiona. Ae ou te lei alu i lau malaga faapisinisi, sa ou faanoanoa ma misia lou aiga. I le Aso Kerisimasi atoa sa ou mafaufau, “Ua maumau lava!” E leai se galuega e ono mafai ona taua i lenei!
Sa ou filifili e matamata i se ata tifaga i luga o le TV i lou potu i le faletalimalo. I le ata tifaga, sa faamatala mai e se tasi le taua o le avatu o le faafetai. E le o se vaega taua o le ata tifaga, pe o se vaaiga faapitoa foi e ootia ai, ae leai se mea sa sili ona pai mai ia te au.
I lena taimi, sa ou iloaina ai ou te lei tootuli ifo lava i ou tulivae i le Aso Kerisimasi e faafetai ai i le Tama Faalelagi mo le meaalofa o lona Alo, o Iesu Keriso. I tausaga uma sa ou faamanatuina ai le Kerisimasi, sa ou taulai atu lava na o lou aiga, meaalofa, ma taaloga. E ui lava i taumafaiga sili a ou matua ma matua o ou matua e aoao au, ou te lei talisapaia moni lava le taua o le Faaola i le Kerisimasi. I le avea ai o se aiga, sa matou faitau le tala o Lona soifua mai i tusitusiga paia, ae ou te lei mafaufau atili lava i le taua o Lona soifua mai i le Kerisimasi.
Sa faatumulia ou mata i loimata a o ou tatalo i lou Tama Faalelagi. Ou te faafetai ia te Ia mo le taulaga na Ia faia e ala i le auina mai o Lona Alo Pele e toatasi i le lalolagi ma le soifuaga matagofie o le ositaulaga ma le agalelei o lona Alo. O le mea moni sa ou faanoanoa pea ona ua ou tuuatoatasi ma toesea mai lou aiga i le Kerisimasi, ae o se avanoa sa aoao mai ai e le Tama Faalelagi ia te au se lesona atonu ou te le aoaoina lava a o siosiomia au e lou aiga: o le Faaola o le mafuaaga ua mafai ai ona ou maua se aiga!
Ou te faafetai ai ua avea le tuuatoatasi i le Kerisimasi ua aumaia ai ia te au se malamalama atili i le alofa o le Tama Faalelagi ma le meaalofa e lē iu o Lona Alo.