Autalavou Matutua
E Lē Tuuatoatasi Oe—Talitonu Mai ia te Au
Ata pue o se tamaitai mai le Getty Images
I le taimi na avea ai au ma se talavou matua, sa ou manatu ua ou iloa lelei le tuuatoatasi. Sa ou siitia solo lava a o tuputupu a’e, o lea sa tele ai ou aafiaga e tuua ai lou tulaga mafanafana ina ia faia ni uo. Ma ina ua ou faaipoipo atu i le alii e sili ona lelei, sa ou iloa ou te le toe lagonaina lava le tuuatoatasi, e sa’o?
Sese.
O le tuuatoatasi i le olaga o se talavou matua e tele lava ina le maalofia, e tusa lava pe mo sina taimi itiiti. Ua lofituina i tatou i le mau mea e fai ua tatou tamomoe saoasaoa ai. Ua tatou tauaveina ni matafaioi fou: tagata aoga, toalua, tagata faigaluega, po o se matua. Ua tatou agai ese mai le aiga ma le auaiga. Ua osofaia i tatou i le tele—e oo lava ina tulagaese—faaiuga. Ma le isi, o loo tatou faamatuu atu pea i tofotofoga o aso uma pe le o aso uma foi o le olaga. O nei mea uma e faaopoopo pea ma avea ai le tuuatoatasi o se tasi o lagona aupito sili ona taatele i le autalavou matutua i aso nei. O le mea e laki ai, o loo i ai auala e faafetauia ai lenei lagona o le tuuatoatasi, ma o le atoaga lena o lenei vaega.
I le itulau e 44, ua faasoa mai ai e Shaila pe faapefea e lona auai i le Ekalesia mulimuli ane ona fesoasoani ia te ia e faatoilaloina ai ona lagona o le tuuatoatasi. I le itulau e 48, ua aoao mai e Mindy ia i tatou le ala e mafai ona tatou maua ma faatauaina ai faauoga e pei ona sa faia e Keriso. Ma i tusiga i luga o le initoneti, ua otooto mai ai e Bella aafiaga e mafai ona maua mai ni faauoga lelei ia i tatou, ma e ou te tuu atu ni nai motugaafa se lua mo i latou o tuuatoatasi a o toesea mai e pele ia i latou i le vaitau o le Kerisimasi.
E i ai auala e foia ai le tuuatoatasi—pe o le alu atu ma faia ni uo fou, faia o ni fesootaiga faamaoni i aso uma, po o le atiinaeina o se sootaga vavalalata ma le Faaola. Pe a tatou iloa o Iesu Keriso e i ai pea ma i tatou, pe a tatou vaai tatou te le o tuuatoatasi lava, o le tatou maua le malosi e alu ai i fafo atu o i tatou lava, fausia ni sootaga lelei, ma faamanuia ai olaga o i latou o siomia i tatou.
Mai se tasi e talitonu ia te oe,
Alexandra Palmer