O meataalo e Fiafia i ai Matini
“Foai pei o Iesu; ia foai uma tatou” (Tusipese a Tamaiti, 116).
Na lagona e Matini le faanoanoa ina ua tau atu e ona matua ia te ia o le a o ese atu lo latou aiga i se isi aai i Kolomupia. Sa lei manao o ia e tuua ana uo, lona aiga, ma le nofoaga sa ia ola ae ai. Nai lo le ea malu o mauga, o le a ola nei Matini e latalata i le sami e vevela, ma susu le ea i le tausaga atoa. O le a ia fesuiai le supo vevela mo meainu malulu, ma peleue mo ni ofuvae vae pupuu. E faaopoopo atu i ai ma se aoga fou, o se uarota fou, ma se vasega fou o le Peraimeri. E foliga uma mai e taufaamatau.
I se tasi aso na fesili atu ai Tina ma Tama ia Matini po o le a sona lagona e uiga i le siitia ese atu.
“Ou te le fiafia i ai,” o le tala lea a Matini. “Ou te le manao e suia mea uma.”
“Ou te iloa o le siitia ese atu atonu e faigata,” o le tala lea a Tama. “E tele mea o le a suia, ae le o mea uma. O le a matou i ai pea ma oe!”
“E sao lena,” na fai atu ai Matini.
“Ma o le a i ai pea au mea,” o le tala lea a Tina.
Sa mafaufau Matini i lena mea mo se minute. O le a i ai pea ia te ia ona ofu, o ona seevae, ma isi mea sa masani ai i lona fale tuai—aemaise lava o ana meataalo. Sa fiafia Matini o le a mafai ona ia ave ana meataalo e fiafia i ai. Sa ia teu ese ia mea ma le faaeteete lava ina ua latou siitia ese atu.
Ina ua mavae sina taimi, sa amata ona masani Matini i lona fale fou ma le aai fou. Sa fiafia o ia o le siitia ese atu sa le i faigata tele pe taufaamatau e pei ona sa ia manatu ai.
I se tasi Aso Sa, ina ua o atu lona aiga i le lotu, sa matauina e Matini le toatele o tagata sa lei vaai lava i ai muamua. Sa tumu le Peraimeri i tamaiti fou. Na ia mafaufau pe o fea latou te o mai ai. Sa ia faalogo i tagata na te iloa o talanoa e uiga i le foai atu o meaai, lavalava, ma seevae. Ina ua tuua le lotu, na fesili Matini ia Tina e uiga i tagata fou uma lava.
“Sa latou tuua lo latou atunuu,” o le tala lea a Tina. “O le toatele o i latou sa tuua mea uma lava, ma o lea ua leai ni a latou mea.”
“O le mafuaaga lena ua mananao ai tagata uma e fesoasoani ia i latou?” Na fesili ai Matini.
“E sa’o lena. Ua aoaoina i tatou e Iesu e tatau ona tatou fesoasoani i tagata o loo manaomia le fesoasoani. E mafai ona tatou mulimuli i Lana faataitaiga ma faasoa atu mea ua tatou maua.”
Na manatu Matini o se mea lelei lena e fai.
Ona faapea mai lea o Tina, “O le toatele o tamaiti o le Peraimeri ua i ai na o mea lava sa mafai ona ofi i se ato faafafa. Sa latou tuua a latou meataalo. E te manatu e i ai ni au meataalo e mafai ona e foai atu?”
“Leai! O au mea taalo na!” O le tala lea a Matini. Sa ia faliu ma tamoe i lona potu.
Sa tilotilo solo Matini i lona potu ma loimata i ona mata. Sa ia lei manao e foai atu ana meataalo. Sa ia aumaia i latou mai lava i lona fale tuai!
Sa alu atu o ia i lana pusa meataalo ma tilotilo i totonu. Sa ia vaai i lana loli meataalo, o lana yo-yo, o lana moa (moa taavili), o lana taga mapu sili, ma le tele o isi ana meataalo e fiafia i ai. Sa fiafia o ia i nei mea uma. Sa ia le mafai ona foai atu soo se tasi o i latou!
Ona mafaufau lea o Matini, “ae faapefea pe afai sa ou tuua lou aiga ma au meataalo ou te fiafia i ai?”
I ni nai minute mulimuli ane, sa alu ae o ia ia Tina ma ona lima ua tumu i meataalo—e le na o soo se meataalo tuai—ae o meataalo e masani ona taalo ai.
Sa foliga te’i Tina. “E te le tau foai atu au meataalo e te fiafia i ai.”
Sa tuu e Matini meataalo i luga o le fola. “O isi tamaiti sa i ai foi meataalo latou te fiafia i ai,” o lana tala lea. “Ou te manao ia ave ma latou au meataalo, ina ia maua ai e i latou sina fiafia sili atu.”
Sa fusi e Tina ia Matini. “Ua ou mitamita lava ia oe.”
Sa i ai i totonu o Matini se lagona mafanafana. Sa ia iloa o le foai atu i isi o se mea e faia e Iesu, ma o lea na maua ai e ia le fiafia. ●