E Te Le Manao e Avea o se Fetu Faafoliga
O le faatauemu o le ita lava— sei vagana ai i le silafaga a le Alii.
Ata na tusia e David Stoker
E mafai ona e tau mai nisi o faailoga o aso e gata ai? O loo i ai ni nai faailoga e lauiloa: o le Toefuataiga, o le oo mai o le Tusi a Mamona, faalavelave eseese, o le faasalalauina o le talalelei, o le amioleaga faalauaitele. Ia, o se tasi lea o faailoga faapitoa atonu e te lei mafaufau i ai: tauemu.
Na taua e tusitala toalua o le Feagaiga Fou, o le a tauemu i aso amuli (tagai i le 2 Peteru 3:3; Iuta 1:18). O lona uiga, e i ai tagata e tauemu ma taufaifai ia Iesu Keriso, o Ana aoaoga, ma Ona soo. Ae i le avea ai ma Ona soo, ua tau mai ia tei tatou ina ia faapalepale ma onosai (tagai i le 2 Peteru 3:11–15), ma tulimatai atu i Lona afio mai ma le faataunuuina o Ana folafolaga, tumau i lona alofa mutimutivale ma le agaalofa mo isi (tagai i le Iuta 1:22).
O le mea moni, o le tauemu e le o se mea fou, ae e mautinoa e foliga ua pepesi solo. Ma e ui atonu e te le tauemu lava i mea tau i le Atua, o le olaga tauemu e le o se mea mo se soo moni o Iesu Keriso e mulimuli i ai.
Tauemu pea? Leai, Faafetai.
O le faatauemu o lona uiga o le taufaifai, taufaalili, po o le faaosooso. O nisi taimi e aofia ai ma le faataitai valea, e pei o le faataitai i se tasi ma faaaoga ai se leo malie pe faatele taga po o se faatusa. Ua tatou vaai uma lava i ai. Ua i ai i soo se mea. E foliga mai, e fiafia i ai tagata.
Ae le o le Alii.
E leai se mea i tusitusiga paia o talia ai le tauemu. O le mea moni, ua tausalaina lava. Mo se faataitaiga, na aoao mai Alema le Itiiti:
“O i ai ea se tasi i totonu o outou ua faatauemu i lona uso …?
“Oi talofa i se tasi faapena, ona … e ao ai ona salamo o ia, a leai, e le mafai ona faaolaina o ia!” (Alema 5:30–31).
O le faatauemu o se faailoga o le agasala autu o le faamaualuga. Ma o le lagona autu e faamatala ai le faatauemu o le taufaufau—e vaavaai maualalo i isi—o lona uiga, o le vaai i lalo i tagata, ae le na o le feteenai ma mea ua latou fai atu ai pe faia.
E le o le mea lea e finagalo i ai le Alii. Ua Ia fetalai, “Ia taitasi le tagata ma manatu taua i lona uso e pei o ia lava” (Mataupu Faavae ma Feagaiga 38:24). E tusa pau uma lava lo tatou tauaogaina. Na fesili Alema, “O le a outou tausisi pea ea i le manatu faapea ua sili ae lo outou lelei nai lo o se tasi[?]“(Alema 5:54). O le ituaiga manatu lena e taitai atu ai i le tauemuga. O le faatauemu i isi tagata o se tasi o auala ua taumafai ai tagata e faatulaga i latou lava i luga atu o isi.
O le isi mea, e masani e e faatauemu ona taumafai ia o mai isi e aufaatasi ma i latou. O se tasi o faatusa mai le miti a Liae o loo faaalia moni ai lenei mea. O tagata i le fale tele ma le ateatea sa i ai “peiseai o faatauemu ma tusitusi mai o latou tamatamai lima” (1 Nifae 8:27). O le tusitusi o tamatamailima ua tosi ai le laina o tatou-ma-i latou, ma faapea mai, “E sili pe a outou faatasi ma i matou, pe o le a outou maasiasi ma ula i ai tagata.” E faapei o le faanoanoa, e fiafia le faatauemu e faatasi ma isi. O se isi itu i le taele o lenei mea, o e faamaualuluga e tele foi ina matuai le mautonu lava.
Ia Agamalu. Aua le Faatauemu.
I le tele naua o le faatauemu o loo faia, e mafai ona faaosoosoina nisi e auai. E foliga mai o loo fiafia i latou, e sao? Ua fai e tagata uma lava, aemaise lava i luga o le initoneti ma ala o faasalalauga faaagafesootai. Atonu e faaosoosoina foi i tatou e tali atu le afi i le afi—e faaaoga auupega lava a le lalolagi e faasagatau i ai, e tusitusi atu ai ia i latou na tusitusi mai o latou tamatamai lima i le fale tele ma le ateatea e tofo ai i la latou lava vailaau faatauemu.
Ae o lenei foi, e le o le ala lena a le Alii.
“Aua le faifai atu ia te i latou o e faifai mai” (Mataupu Faavae ma Feagaiga 31:9).
“Ia outou alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e ua inoino mai ia te outou, ia outou tatalo foi mo e ua tuuai fua mai ma faasaua mai ia te outou” (Mataio 5:44).
O se tulaga maualuga atu lena nai lo o le tulaga faatonuina a le lalolagi, lea e foliga mai e faapea, “Faatauemu mai i tagata uma ma mea uma lava e ese mai ia te outou i soo se itu.”
E mafai ona faigata ona onosaia faatauemuga a isi, ma le tali atu i le faatauemu, aua o la tatou aganuu na semanu tatou te talitonu o le tauemu o le taufaifai, e aupito sili ona poto ma tiga e manumalo i le tauvaga mo le gauai ma le faaaloalo atu i ai o tagata. Ae e le moni lea. Na aoao mai e le Alii ia i tatou—ma faaali mai ia i tatou—o le alofa, agamalu, onosai, ma le faapalepale o Ona ala ia.
Afai o tatou o ni soo moni o Iesu Keriso, tatou te le faatauemu i o tatou uso ma tuafafine, aua o le a faatumulia o tatou loto i lona alofa mama (tagai i le Moronae 7:47–48).