Meaalofa e Fa mai le Faaola

Saunia e Peresitene Russell M. Nelson

Mai le Faigalotu o le Kerisimasi a le Au Peresitene Sili 2018.

O’u uso e ma tuafafine pele, e maeu lenei vaitau ofoofogia! Se’i o tatou mafaufau faatasi i faamanuiaga ia e oo mai ia i tatou a o tatou taulai atu i le olaga, misiona, aoaoga faavae, ma le Togiola a le Alii o Iesu Keriso.

I lenei vaitau ou te valaaulia outou ia mafaufau i o outou lava manaoga. E te manao moni lava e avea atili pea e pei o Iesu Keriso? E te manao moni lava e ola faatasi ma le Tama Faalelagi ma faatasi ma lou aiga e faavavau ma ola e pei ona soifua ai o Ia? Afai o lea, e manaomia la ona e taliaina le tele o meaalofa ua ofoina mai e le Alii e fesoasoani ia te oe i le taimi o lou olaga faataitai i la le tino. Se’i o tatou taulai atu i meaalofa e fa o meaalofa na foai mai e Iesu Keriso i tagata uma o e naunau e talia i latou (tagai Mataupu Faavae ma Feagaiga 88:33).

Muamua, Na Ia foai mai ia te oe ma a’u se gafatia e le faatapulaaina e alofa atu. Ua aofia ai le gafatia e alofa atu ai i e e le alofaina ma i latou e le gata ina e le alolofa ia te outou ae o loo sauaina ma tuuaifuaina outou (tagai Mataio 5:44–45).

Faatasi ai ma le fesoasoani a le Faaola, e mafai ai ona tatou aoao e alolofa atu e pei ona sa Ia alofa mai. E ono manaomia ai se suiga o le loto—aemaise lava le faamalūlūina o o tatou loto—e pei ona aoao mai ai e le Faaola le auala e tausia moni ai lava e le tasi le isi. O’u uso e ma tuafafine pele, e mafai moni lava ona tatou auauna atu i le ala a le Alii pe a tatou taliaina Lana meaalofa o le alofa.

O le lona lua o meaalofa ua ofo mai e le Faaola ia te oe o le gafatia e faamagalo atu ai. E ala i Lana Togiola le i’u, e mafai ai ona e faamagalo atu ia i latou o ē faatiga ia te oe ma ē atonu latou te lē taliaina lava le tiutetauave mo lo latou agaleaga ia te oe. Ae o le a faamatuu atu e le Faaola ia te oe le gafatia e faamagalo atu i soo se tasi na agaleaga ia te oe i soo se auala.

O le lona tolu o meaalofa mai le Faaola o le salamo. Ua valaaulia i tatou e le Alii ia suia o tatou mafaufau, lo tatou malamalama, o tatou agaga, e oo lava i la tatou mānāva. Mo se faataitaiga, pe a tatou salamo, tatou te manava ma le lotofaafetai i le Atua, o le e tuu mai ia i tatou le manava mai lea aso i lea aso (tagai Mosaea 2:21). Ma tatou te mananao foi ia faaaoga lena manava e auauna atu ai ia te Ia ma Ana fanau. O le salamo o se meaalofa ofoofogia. O se faagasologa e le tatau ona matatau i ai. O se meaalofa mo i tatou ia maua ma le olioli ma ia faaaoga—ia taliaina—i lea aso ma lea aso a o tatou saili atu ia avea atili e faapei o lo tatou Faaola.

O le lona fa o meaalofa mai lo tatou Faaola o se folafolaga moni lava—o se folafolaga o le ola e faavavau. O le a toetutu tagata uma ma maua le tino ola pea. Ae o le ola e faavavau e matua silisili atu nai lo o le atofaina o se taimi. O le ola e faavavau o le ituaiga ma le tulaga silisili o le olaga o loo soifua ai le Tama Faalelagi ma Lona Alo Pele. Pe a ofoina mai e le Tama ia i tatou le ola e faavavau, o loo Ia fetalai mai i le aano atoa, “Afai tou te filifili e mulimuli i lo’u Atalii—afai o lou manao o le avea moni e faapei o Ia—ona oo mai lea o le taimi tou te ola ai e faapei ona ma ola ai ma pule faamalumalu i lalolagi ma malo e pei ona ma faia.”

O nei meaalofa tulaga ese e fa o le a aumaia atili ia i tatou le olioli sili pe a tatou taliaina ia meaalofa. Na mafai ona maua ia meaalofa ona sa afio ifo Ieova i le lalolagi e avea ma Iesu le pepe. Na soifua mai o Ia i se Tama tino ola pea ma se tina faalelalolagi nei. Na soifua mai o Ia i Peteleema i lalo o tulaga sili ona faatauvaa o tulaga uma. O Iesu Keriso o le meaalofa le mafaatusalia lea a le Atua—o le meaalofa a le Tama i Ana fanau uma (tagai Ioane 3:16).

Faatasi ma o tatou mafaufauga ma lagona e matua taulai atu i le Faaola o le lalolagi, o le a la le mea e manaomia ona tatou faia e maua ai nei meaalofa ua ofo mai ia i tatou ma le loto naunau e Iesu Keriso? O le a le ki i le alofa e pei ona Ia alofa mai, faamagalo atu e pei ona Ia faamagalo mai, salamo ia avea atili e faapei o Ia, ma le ola ai mulimuli ane faatasi ma Ia ma lo tatou Tama Faalelagi?

O le ki o le osia ma le tausia o feagaiga paia. Tatou te filifili e ola ma alualu i luma i luga o le ala o feagaiga a le Alii ma tumau ai iina. E le o se auala faigata. O le auala lea i le olioli moni i lenei olaga ma le ola e faavavau i tala atu.

Ou uso e ma tuafafine pele, o o’u manaoga sili ona loloto e mo fanau uma a le Tama Faalelagi ia maua le avanoa e faalogo ai i le talalelei a Iesu Keriso ma gauai i Ana aoaoga. Ma ou te naunau o le a tatou talitonu ma mauaina le alofa o le Faaola mo i tatou taitoatasi. O Lona alofa le i’u ma le atoatoa na uunaia o Ia e togiola mo oe ma a’u. O lena meaalofa—Lana Togiola—e faatagaina ai isi Ana meaalofa uma e avea ma a tatou.