Faatautaia o le Feagai ai ma Suiga

O le amataga o le aoga. Tuua o le Peraimeri. Malaga i le Malumalu. Mauaina o se galuega fou. Faauuina mai le aoga maualuga. Auauna atu i se misiona.

O nisi nei o mea taua e ono fetaiai ma a outou fanau i le olaga nei, ma o le a manaomia e i latou uma ni sauniuniga faapitoa. O suiga e mafai ona taufaamatau, ae e mafai e ni nai meafaigaluega ona fesoasoani e faatautaia i latou ma le manuia. O ni nai motugaafa nei e fesoasoani ia te outou e taitai ai a outou fanau e ala i fesuiaiga o le olaga.

Faalogo i o latou lagona e uiga i le suiga. Fesili atu ia te i latou i mea latou te fiafia i ai ma mea latou te popole ai. Ia faamalosiau, ae ia malamalama i o latou popolega. O nisi taimi o se taliga agaalofa e na’o le pau lava lea o le mea latou te manaomia e lagona ai le toafimalie i suiga e oo mai.
Tuu atu ia i latou le tele o faamatalaga e mafai ai e uiga i mea latou te ono faamoemoe i ai i se mea fou. Mo se faataitaiga, afai o lou alo e alu e fai sui papatisoga i le malumalu mo le taimi muamua lava, tuu atu ia te i latou se vaaiga aoao o le mea o le a tupu pe a i ai i latou i totonu o le malumalu. Afai o loo e siitia atu i se aai fou, saili mea e te mafaia e uiga i a latou aoga fou, uarota, ma tuaoi. Pe a e faaitiitia mea e le iloa, e te aveesea punavai o le atuatuvale. O lo latou malamalamaaga fou e mafai ona fesoasoani ia latou malamalama i le aafiaga fou o le a latou mauaina.
Fatu se fuafuaga e taulima ai tulaga fou. Tulimatai faafitauli e ono tulai mai ma mafaufau i ni auala e taulima ai i latou. Fesoasoani i tamaiti e mafaufau i ni tali i a latou fesili “ae faapefea pe afai”: “Ae faapefea pe afai ua ou oso i luga o le pasi sese?” “Ae faapefea pe afai ua tuua na o a’u i le tolauapiga?” “Ae faapefea pe afai ou te le fiafia i lou faiaoga fou?” Fai se fuafuaga faaleoleo mo faalavelave faafuasei ina ia latou lagona atili ai le toafimalie: “Afai e maua oe i le atuatuvale, valaau mai ia te a’u” ma le “Afai e faigata tele se vasega, e mafai ona tatou talanoa i lou faiaoga.”
Faamalosia i latou e ala i le faamanatu atu ia i latou o mea taua ua mavae atu ma tomai ua latou maua nei e fesoasoani ia i latou ina ia manuia. Faaaoga gagana lelei ma faamalosiau: “Ua e manumalo mai lena mea, e mafai ona e manumalo mai i lenei!” “E mafai ona e faia ni mea faigata!” “Ua ia te oe mea e te manaomia. Ua e saunia.” “Ou te talitonu ia te oe.”
Faamautinoa atu ia i latou o le a manuia mea uma. E toatele tagata ua manumalo mai tauiviga faapena; o le mea moni o le a faapena foi i latou! Faamanatu ia i latou e mafai ona latou tatalo i lo latou Tama Faalelagi mo se fesoasoani i soo se taimi, i soo se nofoaga, i soo se mea.
Fatu se polokalama lagolago ina ia le lagonaina le tuuatoatasi e a outou fanau mai o latou tauiviga. Afai na e aafia ai i se tulaga faapea, tau atu ia i latou lena mea. O a ni ou lagona? Na faapefea ona e fetuutuunai? Taumafai e saili se tasi e avea ma “paga o suiga” a lau tama. E mafai ona latou maua se uo e tumau ai i le latou vasega fou o le Peraimeri? E i ai se tasi e te iloa e mafai ona faufautua ia i latou i a latou galuega po o vasega? O ai o le a latou potu faatasi i le kolisi?
Mulimuli i le vave o lo latou agai i luma. Atonu e manaomia e lou alo se uunaiga i luma po o se lapataiga e faifai lemu, ae taumafai e aua le suia tele lo latou saoasaoa masani. Mulimuli i la latou taitaiga. Afai latou te mananao e feosofi e faamuamua vae, ia mautinoa ua latou maua mea uma latou te manaomia e faia ai. Afai latou te lagona e lei saunia e agai i luma, aua nei faamalosia i latou i le taunuuga loloto. Ia uunaia lemu i latou e taumafai i fafo atu o lo latou sone mafanafana masani, ae ia faatelegese. Fetuunai e tusa ai ma manaoga o lou alo, ma saili le taitaiga mai le Agaga ia iloa le auala sili e fesoasoani ai.