Fesili & Tali

E faapefea ona ou filifili pe auauna atu i se misiona?

Ia Naunau e Fesili ma le Faamaoni

O le misiona e le mo tagata uma, ae mo tagata uma ia faamaoni e saili pe o se misiona e mo oe! O nisi taimi tatou te le mananao ai e o, o lea tatou te le fesili ai lava, pe ua tatou fesili foi e aunoa ma le tuuina atu o le avanoa i le Agaga e tali moni mai ai lava. E tatau ona tatou fesili ma le faamaoni! Afai e maua lau tali e ala i le saili ma le faamaoni, o le a e maua le filemu ma le mautinoa i soo lava se mea e tau mai e le Alii e te faia—e nofo pe alu.

Ali B., 22 tausaga, Iuta, ISA

Salamo

O se tasi o mea na fesoasoani ia te au e filifili ai e auauna atu i se misiona o le aoao ma ia iloa le salamo moni. A o ou suesue e uiga i le Togiola a le Faaola ma faaaogaina mea sa ou aoaoina i lou olaga, sa ou lagona le filemu e le mafaamatalaina. A o ou lagonaina lenei mea, sa ou manao i isi ina ia lagonaina le filemu lava lea e tasi.

Elder Berdejo, 21 tausaga, Arequipa, Peru

Fesootai Atu Pea ma le Alii

E mafai e le Tama Faalelagi ona tuuina atu ia te oe lau tali e ala i tusitusiga paia, o se savali a se tasi o le Pulega Aoao, po o le maua mai foi i se molimau a se isi. O lea e mafai ona e maua musumusuga mai le na o le fesootai atu pea ma le Alii.

Samuelu H. 14 tausaga, Iuta, ISA

Ia Manatua o le a Ia Tali mai ia te Oe

Ae ou te lei sau i le misiona, sa ou tauivi ia iloa pe tatau ona ou alu. Na iu lava ina ou filifili e fesili atu i le Tama Faalelagi, o le e silafia moni mea uma lava tatou te oo i ai ma silafia pe manaomia ona tatou auauna atu i se misiona. E ala i le tatalo sa ou maua ai se faamautinoaga e tatau ona ou alu. Ou te iloa e tali mai le Tama Faalelagi i tatalo. Alu atu ia te ia ma au fesili, ma o le a Ia tali mai ia te oe e tusa ai ma lou faatuatua ma Lona finagalo ma Lana taimi.

Sister Terpend, 21 tausaga, Misiona a Jamaica Kingston

Vaai atu i Lou Aiga ma le Faamanuiaga Faapeteriaka

Na fesoasoani lou aiga ma lou faamanuiaga faapeteriaka i lau filifiliga. O loʼu uso o loo auauna atu faamisiona, ma o lana faataitaiga ma le molimau o le galuega faafaifeautalai ua musuia ai au. O lou naunautaiga e auauna atu na faamalosia foi ina ua maua lou faamanuiaga faapeteriaka, na faapea mai o le a mafai ona ou faasoa atu le talalelei i isi.

Juliana P., 16 tausaga, Nevada, ISA

O tali ua faamoemoe e mo se fesoasoani ma ni manatu ae e le o se faalauiloaina aloaia o aoaoga faavae o le Ekalesia.

“Matou te faamautu atu o le galuega faafaifeautalai o se tiute faaleperisitua—ma e matou te uunaia alii talavou uma o e ua agavaa ma gafatia i le tino ma le mafaufau, ina ia tali atu i le valaau e auauna atu. E toatele tamaitai talavou o loo auauna atu foi, ae e le o noatia i latou i lalo o le poloaiga lea e tasi e auauna atu e pei o alii talavou. Matou te faamautinoa atu i tuafafine talavou o le Ekalesia, e faapea, latou te faia se saofaga taua i le avea ai o ni faifeautalai.”

Peresitene Thomas S. Monson (1927–2018), “Susu Mai i le Konafesi,” Liahona, Nov. 2012, 5.

O Le A Sou Manatu?

“E i ai nisi o au uo e le o ni aafiaga lelei, ae matou te vavalalata ma ou te manao pea e avea ma ni uo ia i latou. O le a se mea e tatau ona ou faia?”

Auina mai lau tali ma, afai e manaomia, o se ata manino lelei a o le’i oo i le aso 15 o Ianuari, 2020, i le liahona.ChurchofJesusChrist.org (kiliki le “Submit an Article or Feedback”).

E ono iloiloina tali mo le uumi po o le manino.

• O le a se mea e mafai ona fesoasoani ia te au ou te malamalama ai i le tusi o Faaaliga?