O Mamoe ma lo Latou Leoleo Mamoe

Saunia e Elder Vern P. Stanfill

O Le Korama o Fitugafulu

Mai se faatalanoaga ma Christina Crosland.

“O le Alii o lou leoleo mamoe” (Salamo 23:1).

Sa ou ola a’e i se faatoaga o lafu manu i Monatana, ISA. Sa i ai foi a matou mamoe e tusa ma le 300 i le faatoaga. Sa faatauina mai e lou tina o se auala mo i matou e maua ai se tupe mo a matou misiona.

O lau galuega o le tausia lea o tamai mamoe ia e leai ni tina e tausia i latou. Afai ua i ai se mamoe e sili atu i le tasi le pepe, o nisi o taimi e le popole o ia e tausi uma tamai mamoe. O tamai mamoe la na sa ou tausia. E tusa o le 5 i le 10 nei tamai mamoe i le tausaga.

I aso taitasi, ou te alu atu ai i le faatoaga i le matou taavale lanumoana laitiiti, e tau o le Volkswagen Beetle, ma faaee le pu. Ona ou tatala lea o faitotoa o le taavale. E o mai na tamai mamoe mai soo se vaega lava o le fanua na latou i ai. Sa latou iloa le leo o lena Volkswagen tuai. Latou te feosofi i tua o le taavale, ma ou ave atu i latou i le fale o manu ma fafaga ia te i latou.

E faapei i tatou o na tamai mamoe laiti. Tatou te nonofo i nofoaga eseese ma luitau eseese i o tatou olaga. Ae o Iesu o loo aapa mai ia i tatou taitoatasi. E mafai ona tatou aoao e faalogo i Lona siufofoga. E mafai ona tatou liliu atu ia te Ia mo le mafanafana ma le saogalemu. E mafai ona tatou lagonaina le alofa mai ia te ia ma le Tama Faalelagi.

A o ou vaavaai agai atu ia Iesu o le Leoleo Mamoe i lou olaga, ua suia ai lou olaga. Pe a tatou tuu atu o tatou ola i aao o le Faaola, o le a tatou lagonaina Lona alofa ma aoao e faalagolago ia te ia. ●