O Le Faatusa Ta’e o le Soifua mai o Keriso
Ata na tusia e Rose Datoc Dall
A o avea ai ma se tamaitiiti, sa le mafai ona ou faatali mo le Kerisimasi. Ina ua aumai e Tina i fafo pusa o mea teuteu, sa matou iloa ai ma ou uso e toalima ua amata le Kerisimasi. Matou te faatu pea lava pea le laau faatasi o se aiga. Ou te manatua pea meateuteu gaosilima ma le tele o polo iila tioata felanulanuai.
Ae peitai, o se tasi vaega o teuga, sa faia lava e Tina. Sa faia e lou tinamatua mo Tina i le Kerisimasi se omea paepae matagofie o le soifua mai o le Faaola I tausaga uma lava, e faatu ai e Tina le faatusa o le soifua mai o Iesu i luga o le tulaga tele i le potu malolo. Ou te fiafia e nofonofo ma matamata a o ia tuu faatusa taitasi i o latou tulaga. I lalo o faatusa taitasi, sa ia tuu ai se moli paepae itiiti mai se manoa o moli. Na ia faapipii le tasi itu o moli i le tulaga e faamau ai, ona ia sulu lea i totonu o le palaka i tua o le nofoa i le tulimanu. Ina ua ki moli o le tulaga, o se vaaiga matagofie lava!
I se tasi po, latalata i le Kerisimasi, sa fai sina pisapisao o ou uso. Sa tuli e uso matutua lou uso laitiiti. I le lotolotoi o le tuliga, sa lafi ai o ia i tua o le nofoa e sosoo ma le tulaga. Ina ua maua o ia e ou uso, sa ia faanatinati e sola ese, ae sa lavea lona vae i le manoa o moli i lalo ifo o le faatusa o le soifua mai o Keriso. Sa le gafatia e fasi mea faapipii laiti le malosi o le sei ese o lona vae. Na palasi ifo le faatusa o le soifua mai o Keriso maaleale mai le tulaga i luga o le piliki mumu i lalo ifo, ma nutililii ai.
Na faanatinati atu Tina i le potu malolo. Ina ua ia vaaia le mea na tupu, sa matuai maligi ona loimata ma alu atu i lona potu. Sa ia iloaina e le o se mea sa fuafuaina, ae ua uma ona faaleagaina.
I lena po, ina ua matou momoe uma i moega, sa avane e Tama le salu ma le salupefu ma salu ai ma le faaeteete vaega ua taei. Ona ia ala lea i le po atoa e faapipii faatasi fasi vaega ua taei.
Na iloa pea ni mailaila i le faatusa o le soifua mai o Iesu. O loo misi se taliga o le povi. O loo misi se vaega o foliga o se tasi o le au makoi. O se tasi o leoleo mamoe e sili atu mea faapipii nai lo o le omea i nisi o vaega. Ae, o se vavega lava, sa toe faaleleia faatagata ua taei.
Na ofo mai le Tinamatua e fai se faatusa fou o le soifua mai o Iesu, ae sa teena e Tina. Na ia fai mai o lana faatusa o le soifua mai o Iesu ua sili atu lona uiga ia te ia i le taimi nei. Ua avea o se faatusa o le tuuto o le alofa o lana tane ma o se faamanatu o lo tatou Faaola alofa.
A o tatou taitasi ma taumafai i le lavelave o lenei olaga, atonu e i ai nisi itu e taei ai i tatou. Atonu tatou te lagona foi le luluina ini nutiga e le mafai ona toe faaleleia. Ae o loo i ai so tatou Faaola, ma e mafai ona avea i tatou ma tagata atoatoa e ala i Ona aao alofa.