Soo Se Tasi Lava Ae Le o Ia!
Ata na tusia e Phil, ata o le i2i
Ina ua ou faalogo e uiga i le “Faamalamalama le Lalolagi” o le ta’imua o le Kerisimasi a le Ekalesia ma le aso o auaunaga i le lalolagi aoao, sa ou mafaufau, “O se manatu manaia. O le a ou alu e fai.”
I aso e lua a o lumanai le aso o auaunaga i le lalolagi aoao i le aso 1 o Tesema, na oso mai se manatu i lou mafaufau po o ai lea sa ou manaomia e fesoasoani i ai. O le taimi lava lena, sa ou mafaufau ai, “Soo se tasi lava ae le o ia!” O lenei tagata sa faatiga pea ia te au i le tele o tausaga, ae o le tele o le faatauanau mai o lona igoa ia te au, o le tele foi lea o lou iloa o le manatu e sau mai le Agaga.
Sa ou tau atu i lou toalua le mea sa ou mafaufau i ai, ma sa ia fai mai o le auauna atu i lenei alii o le a lelei mo au. Ae, sa ou lagonaina le popole tele lava i le manatu e fesoasoani ia te ia. Na ou iloa sa le mafai ona ou faia lenei mea na’o au, o lea sa ou tatalo ai mo se malosi ma mo se tasi ma te o faatasi. Mulimuli ane, sa ou valaau i faifeautalai tamaitai, ma na la malilie e o faatasi ma aʼu.
Na oo mai le aso 1 o Tesema, ma sa ou popole lava ma lagona le gatete a o ou aveina le taavale. Sa matou tatalo faatasi ina ua matou taunuu i le fale mautotogi. Sa ou manava loloto ma tuitui i le faitotoa. Sa tatala mai e le tamaloa le faitotoa, ae e foliga mai na te le maitauina au. Sa ou fesili pe na te iloaina po o ai au. Sa ia manatu o au o se tasi o faifeautalai tamaitai. Ina ua ou tau atu ia te ia e uiga ia te au, sa tei ae na fiafia ua ou sau e vaai o ia. Sa tulai mai se taimi o le le mautonu ina ua ou fai atu ia te ia o se aso i le lalolagi atoa o le auauna atu, ma sa matou mananao e fesoasoani ia te ia i soo se auala e mafai ai.
Sa ou faamatuu atu galuega i faifeautalai, ma sa matou galulue e faamamaina lona fale mautotogi. Ina ua tuanai ni itula se lua, sa maea ma matou o ese loa. Sa faatoa tupu ina ua ou aveina atu le taavale i le fale, na ou iloa ai sa ou ata ma fiafia. Ona oo mai lea e faapei ua taia au e se faaputuga piliki: Ua aveesea e le Tama Faalelagi ou manua, tiga, ita, ma faanoanoaga uma. Ua aluese! Ma sa ou saoloto mai mafatiaga uma sa ou tauaveina mo le tele o tausaga. Sa faamanuiaina au e le Tama Faalelagi i le malosi e faamagalo atu ai loa i lenei tagata. Sa matagofie le lagona ua faamamaina lou loto.
Ou te matua faafetai sa ou mulimuli i le uunaiga e fesoasoani ai i lenei alii. Na silafia e lou Tama Faalelagi alofa ou te manaomia ia maua lenei aafiaga ina ia mafai ai ona ou alualu i luma ma avea atili o le tagata e finagalo i ai o Ia.