Fatu Gamanga

Itumalo i Sasaʼe, Sierra Leone

E ala i le polokalama o le tusitusi ma le faitautusi a le talalelei, e le gata ina aoao e Fatu e faitau ma tusitusi, ae na ia aoao foi e uiga i le talalelei a Iesu Keriso. A o lei auai i le Ekalesia, sa tauivi Fatu e tausi lona aiga. O lea ua ia atiinaeina ni tomai o le ola tutoatasi ma pulea lana ia lava pisinisi e faia ma faatau atu ai solovae mananaia gaosilima. Sa ia auauna atu foi o le Peresitene o le Aualofa i lana paranesi.

Christina Smith, pue ata

Sa ou laitiiti lava ina ua maliu lou tama. Sa faigata le leai o se tama. Sa taumafai lou tina e tausi lona aiga, ae sa lei lava sana tupe e faaaoga ai au. Sa ou lotovaivai ona sa faamuta lou aoaoina ma ou te lei aoao lava e faitautusi. Sa ma taumafai ma lou tina e fai mea e tele i lo matou nuu, e pei o le galuega o le faatoaga, e lagolago ai i matou lava. Mo tausaga, sa matou tauivi faatasi.

Mulimuli ane, sa ou faaipoipo ma maua se fanau. Ina ua tuanai ni nai tausaga, na maliu lou toalua, ma e sa faigata le avea ai o se matua nofo toatasi e tausi i lau fanau.

Na oo mai ia te au au ni uo ma fai mai, “Ua leai sou toalua. O lea ua e mafatia. Matou te mananao e valaaulia oe i la matou Ekalesia e vaai po o le a se mea e mafai ona faia e Iesu mo oe.” Sa ou mulimuli atu i au uo i la latou ekalesia. Sa ou alu foi i isi lotu.

I se tasi aso, na sau ai ia te au se tamaitai ua na o ni nai fale le mamao ma faapea mai, “e i ai sau ekalesia. E mafai ona e sau?”

“Leai,” sa ou fai atu ai, “sa ou taumafai i lea ekalesia ma lea ekalesia.”

“Faamolemole,” sa fai mai ai le tamaitai, “ou te manao e valaaulia oe i lau ekalesia.”

“O le a le igoa o lau ekalesia?” Sa ou fesili ai.

“O laʼu ekalesia o Le Ekalesia a Iesu Keriso o le Au Paia o Aso e Gata Ai.”

Sa ia faatalitonuina au e aoao atili i ai. Sa ia valaaulia faifeautalai e asiasi mai ia te au. O le aso muamua na oo mai ai faifeautalai, sa ou valaau faatasi ai lou aiga. Sa nonofo i lalo faifeautalai ma amata ona aoao i matou.

O le taimi muamua sa ou alu ai i le lotu, sa ou nofo ai i autafa o se tamaitai sa pese mai i se tusipese. Sa ou taumafai e gauai atu, ae sa ou le iloa pe faapefea ona faitau. Sa ou le malamalama lava i lana pese. Sa ou lagona le lotovaivai. “Ou te le toe alu i lenei ekalesia,” sa ou faapea ifo ai ia te au lava.

Sa ou tau atu i faifeautalai ou te le toe alu lava i le lotu. Na fai mai se tasi o faifeautalai, “O le a ou le faamalosia oe e avea ma se tagata o lenei Ekalesia, ae o le a ou tau atu ia te oe le upumoni. Afai e te manao e te talitonu e moni lenei Ekalesia, faitau le tusi lenei.” Sa ia tuuina mai ia te au le Tusi a Mamona.

“E le mafai ona e tuuina mai ia te au lenei tusi,” sa ou fai atu ai. “E le o au o se tagata aoaoina. Ou te le iloa lava pe faapefea ona faitauina. Ou te le manaomia lau tusi.”

Sa tau mai e faifeautalai ia te au, “O loo aoaoina lau fanau e faitautusi. O le a latou faitau lenei tusi mo oe, ma o le a e malamalama i ai.”

“O le a ou taumafai,” o lau tala lea.

Na amata e lau tama teine ona faitauina mai le Tusi a Mamona ia te au, ma e sa ou toe alu i le lotu. Na oo mai ia te au se tuafafine i le lotu ma tau mai ia te au e uiga i se vasega mo i latou o e e le mafai ona faitautusi ma tusitusi. Sa ia fai mai o le vasega o le tusitusi ma le faitautusi o le talalelei.

“E matou te manaomia se tagata o le vasega,” o lana tala lea.

“Ou te matuai fia iloa lava pe faapefea ona faitautusi ma tusitusi,” sa ou fai atu ai. “Ia o le a ou alu e auai i lena vasega!”

A o ou auai i le vasega, sa ou aoaoina le faitautusi, tusitusi, ma sili atu ma sili atu isi mea e uiga i le talalelei. Sa faitau atili e lau tama teine mai le Tusi a Mamona ia te au. I se tasi aso sa ou fai atu ai, “O le afioga lea a le Atua. E le mafai ona ou faafitia.” Sa tonu ia te a’u ou te papatiso.

E lei umi talu lou papatisoga, na valaauina au e le peresitene o le paranesi ma fai mai, “Sister Gamanga, ua faatonuina au e le Agaga e valaau oe e avea ma peresitene o le Aualofa.”

“Ou te le iloa le mea ua e fai mai ai,” sa ou fai atu ai. “Ou te le iloa pe faapefea ona faitautusi, ou te le iloa pe faapefea ona tusitusi, ae ua manao e valaauina au? O le a le uiga o lena mea?”

Sa ia faamalamalama mai ou te valaaulia tamaitai i le lotu, talanoa ma i latou, ma fesoasoani i ai. “Ona o le Atua, ou te mafai ai ona fai,” sa ou fai atu ai.

Talu mai lena aso, e tele naua mea na tutupu i lou olaga. Sa amata ona ou faitauina upu e lua-mataitusi, sosoo ai ma upu e tolu-mataitusi. Sa ou siitia mai upu e tolu-mataitusi i upu e fa-mataitusi, ona oo atu lea i le lima i le ono mataitusi. Na fesoasoani lenei mea ia te au e aoao atu ai i le Aualofa.

Afai e i ai se mea ou te le malamalama ai, ou te fesili atu mo se fesoasoani. O le sipelaga o upu lou faafitauli. Ou te le iloa pe faapefea ona faaleo atu nisi o sipelaga, ae sa ou maua le fesoasoani ina ia mafai ona ou malamalama i ai. Pe a ou aoao atu, ou te fai atu i se tasi o uso o le Aualofa e fesoasoani mai i soo se upu ou te le iloa. O le auala lena sa ou aoao atu ai i le vasega. O taimi taitasi ou te fesili ai mo se fesoasoani, sa ou aoao atili ai.

Ae ou te lei auai i le Ekalesia, sa ou taumafai e maua ni tupe i le faatauina atu o solovae gaosilima, ae sa leai sau tupe e faatau ai mea e fai ai. Sa masani ona tau atu i tagata, “Pe afai e te manao i se solovae, alu e faatau mai mea e fai ai ona aumai lea ia te aʼu; ona ou faia lea mo oe. E mafai ona e totogi mai au pe a maea ona fai.”

O lea ua ou i ai iinei i Le Ekalesia a Iesu Keriso o le Au Paia o Aso e Gata Ai, ua ou aoaoina e uiga i le ola tutoatasi. Ua tuuina mai e le Ekalesia ia te au le onosai sili e aoao ai e faitautusi, tusitusi, tautala, ma taumafai e faia se mea mo au lava ina ia ola tutoatasi ai. O lenei ou te alu i le faleoloa suisui ma fesili mo tipiga ieie ua totoe ma taatitia i luga o le fola. Ou te faatau mai toega ie mo se tau laitiiti ona faaaoga lea e fai ai au solovae. O lea ua sili atu solovae ua ou faatauina atu nai lo se isi lava taimi muamua.

Talu ona ou auai i le Ekalesia, ua suia lou olaga. Ua ou sau mai le selo i le toa! Ou te mitamita e uiga ia Iesu Keriso ma mitamita i Lana Ekalesia. Ou te matua faafetai lava mo Le Ekalesia a Iesu Keriso o le Au Paia o Aso e Gata Ai.

Fatu reading to others — O faamanuiaga o le iloa tusitusi ma faitautusi ma ola tutoatasi ua maua ai e Fatu le avanoa e aapa atu ma faasoa atu mea na ia aoaoina ma isi.