O Le Manulele Pepa Mumu
E alala le tusitala i Idaho, ISA.
E pau lava le mea o loo mafaufau i ai Eva o le fiafia uma lava o le a maua e ana uo e aunoa ma ia.
“Na ou ma’i, ona outou asiasia mai lea o au” (Mataio 25:36).
E fiafia Eva i taimi o le Kerisimasi. Sa faaaluina e lana vasega i le aoga le taeao e valivali ai kata ma faalogologo i musika malie.
“O le taimi lenei o le faitautusi,” sa fai mai ai Mrs. Grunig. “Ma afai e maea uma lau faitauga i le aso ma a taeao, o le a leai sau meaaoga i le taimi o aso malolo.”
Sa fiafia uma tamaiti i le vasega a Eva. Ae sa le lagona e Eva se fiafia. Sa gatete laitiiti o ia a o toso ane i fafo lana tusi e faitau. Sa ia lagona lona maalili tele ma le tiga o lona faai. Na lagona le vevela o ona mata a o sioa atu i upu i luga o le itulau o le tusi. Ina ua tuua le aoga, sa lagona e Eva ua mai foi lona manava.
Mulimuli ane sa oo i le taimi e savavali ai i le fale faatasi ma lona tuagane ma lona uso, o Tim ma Wilma. E masani lava ona latou fiafia a o malaga atu i le fale. Latou te taaalo i le taaloga o le pa’i pe faia se faatusa o se tagata i le kiona. Ae o le asō pau lava le mea na manao i ai Eva o le oo i le fale ma taoto i lalo.
Ina ua taunuu Eva i le fale, sa tago Mama i lona muaulu.
“Ua e fiva,” o lana tala lea. “E tatau ona e inu tele le vai ma ia lava se malologa.”
Na oso Eva i le moega ma sa moe loa lava. O le taeao na sosoo ai, na pisi tagata uma o lona aiga e sauni mo le aso. Ae na fai mai Mama sa ma’i tele Eva e alu i le aoga.
Ona manatua lea e Eva o se mea na ia faanoanoa ai. O le aso lenei o le pati o le Kerisimasi a le aoga! Sa tatau ona latou faamaeaina a latou galuega faatino o ata ma usu ni pese, ma ai ni meaai mama. E tatau lava ona alu o ia!
Ae sa lei suia le mafaufau o Mama.
“Ou te faanoanoa o le a e misia le pati, lau pele,” o lana tala lea. “Ae e sili atu ona taua lou soifua maloloina.”
Na amata ona tagi Eva. Na taumafai Mama e fesoasoani ia te ia ina ia lagona ua feololo i le ai o se supo manaia. Ae pau lava le mea na mafaufau i ai Eva o le fiafia tele sa maua e ana uo e aunoa ma ia.
I le aoauli, na taunuu mai ai i le fale Tim ma Wilma mai le aoga. Sa mumu o laua alafau mai le taaalo i le kiona.
“Sa tele le fiafia i le pati a le aoga,” sa fai mai ai Wilma. “Sa matou faia ni manulele pepa mumu e tautau i le fale.”
Na toso ane e Tim se mea mai lana taga.
“Ma vaai—na auina mai maua i le fale e Mrs. Grunig ma se meaalofa faapitoa mo oe. Ina ia mafai ona e faia foi se manulele pepa mumu!”
Sa ataata Eva. “E mafai ona e faasino mai le faiga?”
Sa faaali atu e Tim ma Wilma ia Eva le auala e oti ai i luga o laina tositosi ma gaugau is sa’o. Na la fesoasoani ia te ia e nonoa le manoa i se lio.
“Mama, vaai i le mea sa ou faia!” Sa faapea atu ai Eva, a o faaali atu lana meateuteu fiafia o le Kerisimasi.
Sa mafaufau Eva i le lelei o Mrs. Grunig, i le manatua o ia a o ma’i, ma faapea foi le fesoasoani a Tim ma Wilma ia te ia. O lea o soo se taimi e tilotilo ai Eva i lana manulele pepa mumu, na te lagonaina le tele o le alofa. ●
Ia faia se Manulele Pepa!
-
Oti ese ma faapipii le itulau lenei i se pepa lanu mumu. Ona tipi ese lea o le manulele ma apaau.
-
Oti ma le faaeteete se va i le laina togitogi i luga o le manulele. Momono apaau i totonu o va.
-
Fai se pu i luga a’e o apaau ma momono se fasi manoa e tautau ai i luga.