Agai Faatasi i Luma

Saunia e Eric B. Murdock ma Richard M. Romney

Mekasini a le Ekalesia

Ua faamanuiaina le auuso o Clarkson e ala i le auauna atu i a la korama o le perisitua ma le faitauina o le Tusi a Mamona.

Ata

three brothers

Ata na pueina e Richard M. Romney

E tele suiga matagofie ua oo mai i le Ekalesia e faafetai ai i musumusuga ua maua e Peresitene Russell M. Nelson. O le lua o nei suiga e i ai aafiaga patino i le auuso o Clarkson mai Kalefonia, ISA:

Ua mafai nei ona faauuina alii talavou i se tofi talafeagai o le perisitua ia Ianuari o le tausaga e atoa i ai lo latou 12, 14, 16 tausaga.
Ua agavaa le autalavou e maua se pepa faataga o le malumalu e faatapulaa lona faaaogaina e amata mai ia Ianuari o le tausaga e atoa i ai le 12 tausaga.

E mo uso o Mataio (15), Anetelea (13), ma Isaako (11), o nei suiga ua auala mai ai ni avanoa fou e auauna atu ai ma le alualu i luma i le talalelei a Iesu Keriso—ae le na o le tagata lava ia ae faatasi.

O se Aso o Uluai Mea Tutupu

Ia Ianuari 2019, na aafia uma ai Mataio, Anetelea ma Isaako i se aso o uluai mea e tutupu. Na faapea mai Anetelea: “Na avea Mataio ma ositaulaga, na avea au ma se aoao, ae fai Isaako ma tiakono i le taimi lava e tasi. E leai se tasi o i matou na i le tausaga talafeagai e siitia ai le perisitua.”

“I lou aso muamua o se ositaulaga,” o le tala lea a Mataio, “Sa ou tofitofi le areto mo le faamanatuga ma faamanuiaina. Sa ou tau popole. Sa gatete teisi ou lima ina ua ou faia le tatalo, ae sa matua ofoofogia lava.”

O lona fouai i le Perisitua Arona, ua i ai nei le avanoa o Isaako e aoao mai i ona uso matutua. “Sa manaia aua sa ou i ai faatasi ma oʼu uso, ma nisi o a laua uo,” o le tala lea a Isaako. “Sa ou lagonaina le Agaga ina ua ou tufaina atu le faamanatuga mo le taimi muamua.”

“Sa ou Papatisoina Lou Uso!”

Faatasi ai ma le mauaina o le Perisitua Arona ma le tufaina o le faamanatuga, na auai foi Isaako i le malumalu e faataunuu papatisoga. Sa papatiso muamua o ia e lona tama, ae ona oo mai lea o se mea e tei ai:

“Sa ou papatisoina lo’u uso!” Ua fai mai ai Mataio.

“Ou te lei mafaufauina e papatiso au e Mataio,” ua fai mai ai Isaako. “Ae o ia o se ositaulaga i le taimi nei, e mafai ai ona ia faia. Sa avea o se aafiaga lelei tele. Sa ou lagonaina le Agaga Paia.”

I Taeao Taitasi a o lei faia le Seminare

E le na o Mataio, Anetelea ma Isaako le auuso i le aiga o Clarkson. O loo i ai isi e toafa: Levi (9), Eli (7), Sam (4), ma Tito (2), ma se pepe o le a fanau mai.

Ina ua valaaulia e Peresitene Nelson tamaitai o le Ekalesia i le konafesi aoao ia Oketopa 2018 e faitau le Tusi a Mamona a o lei oo i le faaiuga o le tausaga, sa filifili Mataio, Anetelea, ma Isaako, faatasi ma lo latou tama ma uso laiti, e ofo atu ia tina la latou lagolago. “O le a matou faitau faatasi ma oe!” sa latou fai mai ai. I taeao taitasi a o lei faia le seminare, na latou feala i luga e faitau faatasi.

O Se Luitau e Suia ai le Olaga

“Ina ua matou faia lenei luitau, sa ou manatu o le a manaomia ai le tele o taimi,” ua fai mai ai Anetelea. “Sa ou popole o le a ou le maua lava se taimi e faia ai mea uma sa ou manao e fai, e pei o le taina o le kitara po o le tafafao ma au uo. Ae sa ou iloaina e le faapena lona faataunuuina. O le tele o lou faitauina o le Tusi a Mamona, o le tele foi lea o le taimi na foliga mai na ou maua. Sa ou iloaina e faapea afai ou te tausia pea le faitauina o tusitusiga paia i le tele e mafai ai, ua paleni lou olaga. Sa faateleina ou taimi i le aso.”

Sa oo Mataio i se taimi faigata ina ua amata e le aiga ona faitau i taeao uma. Na ia fai mai, “Sa ou le lelei i le aoga. Sa ou tauivi ai ma au suesuega patino o tusitusiga paia ma lou sootaga ma le Tama Faalelagi, ae sa ou taofi mea uma ia te au lava. Ou te lei talanoa e uiga i ai faatasi ma ou matua.”

Ae ui i lea, a o faaaluina e Mataio se taimi tele i le faitauina o le Tusi a Mamona, sa amata ona faamuamua le talalelei i lona olaga. Sa tele foi lona taumafai i le aoga. Sa ia galue malosi ma e sa maualuluga ona togi.

“Ou te iloa foi le tele o le alofa o le Tama Faalelagi ma ou matua ia te au ma le tele o mea e fesoasoani ai ia te au. Ma e i ai sau molimau maoa’e ia Iesu Keriso. Na Ia fesoasoani ia te au e faatoilaloina mausa leaga ma fesoasoani ia te au e faatonutonu lou olaga i le auala tonu. Ua ou matua fiafia lava sa matou faaaogaina le lui a Peresitene Nelson o se aiga. Na suia ai lo’u olaga.”

“Ioe, e Matua Tele Naua!”

O le taliaina o le valaaulia a Peresitene Nelson na faamalosia ai foi le molimau a Isaako. “Sa matou lio upu Atua, Alii, Togiola, Faaola, ma Keriso i taimi uma lava matou te maua ai,” ua ia fai mai ai. “I le aso na maea ai, na ou faasolosolo ai loa i le Tusi a Mamona ma vaai i upu uma sa ou li’oina. Sa ou mafaufau, “Ioe, e matua tele naua!’ Na ou le iloaina lava pe fia le aofai. Sa ou lagonaina tele le faaleagaga i le faitauina o le Tusi a Mamona. Ua ou fiafia sa matou faia.”

O le Olaga Ua Sili Atu Lona Lelei

Ua ofo Mataio, Anetelea, ma Isaako ua faamaea e lo latou aiga le Tusi a Mamona i le na o le lua o masina. “E masani lava e atoa le tausaga,” o le tala lea a Isaako. Na latou mauaina faatasi faamanuiaga o le mulimuli i le valaaulia a le perofeta.

“Afai e te faia le mea e tatau ona e faia,” na fai mai ai Anetelea, “e pei o le fausiaina o se sootaga ma le Tama Faalelagi e ala i le tatalo, suesueina o tusitusiga paia, ma tumau malolosi atoatoa i le Ekalesia, o le olaga o le a sili atu le lelei.”

O nei uso e toatolu na fesoasoani le tasi i le isi e alualu i luma i le talalelei. Latou te mulimuli i le perofeta, o le ua valaau mai i tagata ina “ia faateleina lo latou faatuatua i lo tatou Alii o Iesu Keriso ma Lana Togiola, e … [faia] ma [tausia] a latou feagaiga ma le Atua, ma ia faamalosia … o latou aiga.”¹