O Le Upu Mulimuli
O Le Misiona a Iesu Keriso e Faaali Ai le Alofa o le Atua
Saunia e Elder Jeffrey R. Holland
O Le Korama a Aposetolo e Toasefululua
Mai se lauga o le konafesi aoao ia Oketopa 2003.
O le tele o faamoemoega maoae na ausia i le soifuaga ma le galuega a le Alii o Iesu Keriso, o se tasi o vaega tele o lena misiona e masani ona le amanaiaina. Sa lei malamalama atoatoa i ai e na mulimuli ia te Ia i lena taimi, ma o le toatele o le Au Kerisiano o ona po nei ua latou le maua lava, ae o le Faaola lava Ia na fetalai ai pea lava pea ma le malosi. O le upumoni silisili i mea uma na afio mai Iesu e fetalai i ai ma faataunuu, e aofia ai aemaise lava i Lana taulaga togiola ma le puapuaga, sa Ia faaali mai ai ia i tatou le uiga o le Atua lo tatou Tama Faavavau, faapea le atoatoa o Lona gauai atu i Lana fanau i soo se augatupulaga ma soo se atunuu. Sa taumafai Iesu e ala i upu ma galuega e faaali ma faapatino mai ia i tatou le natura moni o Lona Tama, lo tatou Tama o i le Lagi.
Na afio mai Iesu e fautua i tagata ina ia alolofa i lo latou Tama Faalelagi e faapei ona sa Ia alofa ma o le a alofa pea lava ia i latou. O le fuafuaga a le Atua, le mana o le Atua, le paia o le Atua, ioe, e oo lava i le toasa ma le faamasinoga a le Atua o nisi taimi e malamalama ai. Ae o le alofa o le Atua, le loloto maoae o Lona faamaoni i Ana fanau, sa latou lei iloaina atoatoa—seia afio mai Keriso.
O le fafagaina la o e sa fia aai, faamalolo i e mamai, aoaiina tagata pepelo, ole atu mo le faatuatua—o Keriso lena o loo faaali mai ia i tatou le ala o le Tama, o Le e “alofa tunoa ma alofa mutimutivale, e telegese lona toasa, e onosai ma tumu i le agalelei.”1 I Lona soifuaga ae maise lava i Lona maliu, na faailoa mai ai e Keriso, “O le alofa lenei o le Atua ua ou faaali atu ia te outou, e faapena foi ia te au.”
Ou te tuuina atu le molimau patino i se Atua soifua, Na te silafia o tatou igoa, e faafofoga ma tali mai i talosaga, ma e faapelepele ia i tatou e faavavau o fanau a Lona agaga. Ou te molimau atu e ui i le lotolotoi o le faigata naua o galuega ua i ai i le lalolagi, e saili e Ia lo tatou fiafia taitasi ma le saogalemu e sili atu i isi atugaluga uma faaleatua.
I le agaga o le tofi paia faaaposetolo, ou te faapea atu ai e faapei foi o se tasi na umia lenei tofi anamua: “O le alofa lenei [i lena taimi], e le ona ua tatou alolofa i le Atua, ae ua alofa mai o Ia ia i tatou, ma ua Ia auina mai foi lona Alo e fai ma togiola mo a tatou agasala. Le au pele, afai ua alofa mai pea le Atua ia i tatou, e ao foi ona tatou alolofa o le tasi i le isi” (1 Ioane 4:10–11)—ma alolofa ia te Ia e faavavau.