O Le Sailiga mo le Fiafia

Tesema 2019

O Le Sailia o le Fiafia

Saunia e David Dickson

Mekasini a le Ekalesia

Sa ou ola i le talalelei. Aisea lava e le mautonu ai pea le fiafia?

Ata

blocks

Ata pue mai le Getty Images

O le vaeluaga o le po. Sa faafuasei ona pupula ou mata ma vave faamuta ai lau malologa. “Oi leai,” o lau tatalo lea. “Ua toe tupu foi.”

Ae sa vave lava ona amata le atuatuvale. I se gatete faafuasei taufaamatau le mautonu ma le masani ai ona e faataumaoi, na amata loa ona oso lou tino atoa i luga ma lalo e peiseai o se mai maliu. Ua mu oʼu lima ma oʼu vae i le vevela mai se puna e le vaaia. Ua tei mai i luga lou toalua ma fusi mau ia te au, ma faamautinoa mai ia te au lona faatasi filemu mai.

O le fiafia, sa ou manatu o sou tulaga e masani ai ua le iloa atu lava.

Afai sa i ai sau fesili se tasi i lena po pogisa—e ese mai i le tei po o le a le mea ua tupu faaletino (lea sa ou aoaoina mulimuli ane)—e faapea e fesiligia ai pe aisea sa ou lagonaina ai le le fiafia a o ou taumafai e ola i le talalelei a Iesu Keriso.

E tele mea e ono fai ma toatuga i le fiafia. O le amioleaga e mautinoa lava o se tasi o ia mea (tagai i le Alema 41: 10). Ae e oo lava foi mo e faamaoni, e mafai ona faigata ona maua le fiafia i nisi o taimi.

E tofu lava i tatou uma ma taimi tatou te manaomia ai ona faalogo atu e faapea o taimi o le fiafia sili o loo i luma atu. Atonu o loo e ola ai faapea i le taimi nei. Afai o lea, faamolemole tuu mai au ou te fai atu ma le faamaoni lava o aso e sili ona fiafia ua agai mai lava ia te outou. Ou te faamoemoe o le a outou naunau e tumau ma au mo sina umi laitiiti a o lei faateaeseina lenei manatu e faapea e valea pe lē uiga.

Ou te matua talitonu, e tusa lava po o le a le tulaga o loo feagai ma oe, o lena fiafiaga sili e mafai ona fai mo oe.

Faamolemole faataga a’u sei ou faamalamalamaina le mafuaaga.

O Le A le Fiafia?

O le a lava le fiafia? Pe o se lagona ea e te maua pe a tuu faalilolilo e se tagata se mea suamalie e te fiafia i ai i le pusa o i ai lau meaai o le aoauli? Pe o se siitaga i le galuega? Faaipoipo atu i lau soa e faavavau? Lagonaina o le faamamaina mai agasala e ala i le mana o le Togiola a Iesu Keriso?

Pe o tali uma o loo i luga?

O lenei talanoaga o le a vaavaai ai i mea taitasi e aoao mai ai i tatou e le talalelei, faapea ma faasaienisi o le mafaufau, e uiga i le fiafia. I le itulau e 18 o le lomiga lenei, ua aoao mai ai e Elder David A. Bednar o le Korama a Aposetolo e Toasefululua ia i tatou le taua moni e faapea o le olioli moni o se olaga e taulai atu ia Iesu Keriso.

E faapena foi, ona aoao mai ai Elder Jeffrey R. Holland o le Korama a Aposetolo e Toasefululua: “O le fiafia tupito, o le filemu moni, ma soo se mea e tau latalata atu i le olioli faatusitusiga paia o loo maua muamua, taulamua, ma le faavavau i le ola ai i le talalelei a Iesu Keriso. E tele isi filosofia ma faiga o talitonuga ua faataitaia. E moni lava, e foliga mai e saogalemu le faapea, e toetoe lava o isi filosofia ma faiga ua faataitaia talu mai lava seneturi o le talafaasolopito.”¹

Afai ua taitasi ona faataitaia isi filosofia uma, e le mafai ona aofia ai i se lisi atoa. E oo lava i lea, sei o tatou mafaufau i ni nai tala faaleaganuu e faatatau i le auala e maua ai le fiafia.

E tusa ai ma le lalolagi, o le fiafia tumau e maua e ala i le:

Ausiaina o le manuia o mea tautupe, aemaise lava pe afai e sili atu nai lo i latou o loo siomia oe.
O le lauiloa.
Ola i se olaga faigofie, avanoa, ma le fiafia.
Malaga soo pea lava pea ma iloa tonu ai lava le tele o le matagofie o le lalolagi.
O le ausiaina o se tulaga o aafiaga maualuga po o le pule i lau galuega, nuu, po o soo se isi lava faatulagaga.
O le suia o lou tino ina ia foliga i se isi vaaiga faapitoa.

O a ni mea e tutusa ai nei auala? Mo se tasi mea, latou te fesootai uma lava i tulaga o le soifuaga. Ae pei ona aoao mai e Peresitene Russell M. Nelson, “O le olioli tatou te lagonaina e itiiti lava se mea e faatatau i tulaga o o tatou olaga a o mea uma o loo faatatau i le taulaiga o o tatou olaga.”²

O lenei foi, o le a le mea e tatau ona tatou taulai i ai ina ia maua lena olioli? Na aoao mai e Peresitene Nelson, “Mo le Au Paia o Aso e Gata Ai, o Iesu Keriso o le olioli!”³

O le olioli e le o se lagona e na ona manaia pe a mafai ona e mauaina. E leai, na faamatala ai e Peresitene Nelson le olioli o “se mataupu faavae ua fai ma ki i lo tatou ola faaleagaga.”⁴

O lea o le olioli ma le fiafia ua manino ai le taua o le tauiviga. Ma o le toatele o i tatou ua naunau e galulue i ai. Aisea, la, e toatele ai—e aofia ai ma e amiotonu—ona faaauau pea ona tauivi?

O le tasi mea, o tauviga taitasi ua fai ma ki o le mafuaaga ua ala ai ona tatou i ai iinei.

Iinei e Tuputupu a’e

O nisi taimi tatou te mafaufau ai o le fiafia o se olaga e aunoa ma se faafitauli po o faigata. Ae ui i lea, o se olaga e aunoa ma se tauiviga o le a le mafai ai ona maua le tuputupu ae lea na tatou o mai ai iinei ina ia mauaina.

Na aoao mai Elder Neal A. Maxwell (1926–2004) o le Korama a Aposetolo e Toasefululua:

“O le olaga o se tagata … e le mafai ona tumu i le faatuatua ma aunoa ma faafitauli.

“… E faapefea e oe ma au ona tatou ola i le soifuaga e pei ua tatou faapea atu ai, ‘Le Alii e, tuu mai ia te au le poto masani, ae le o le faanoanoa, le o le tiga, le o le faafeagai, le o le faalata, ae maise lava ia le tuulafoaiina. Ave ese atu mai ia te au, le Alii e, mea uma na E maua ai le tulaga ua E mauaina! A e ia ou alu atu ma mau faatasi ma Oe, ma maua atoa Lou fiafia!’”⁵

E manino lava lo tatou manaomia o tauiviga i le olaga ina ia mafai ai ona tuputupu ae, ma o le amiotonu foi e le aveesea ai o tatou mafatiaga. Iloilo soifuaga o Iosefa Samita, Iopu, le nuu o Alema, ma ae maise lava o lo tatou Faaola o Iesu Keriso.⁶

E leai, o le ola amiotonu e le faasaoina ai i tatou mai faigata ma tofotofoga uma. E leai se tasi e faasaoina ai. Ae e mafai foi ona e faamoemoe i le fesoasoani ma le faamalologa a le Atua (tagai i le Alema 36:3, 27). Na aoao mai Elder Neil L. Andersen o le Korama a Aposetolo e Toasefululua, “Mo outou, o e amiotonu, o le Fomai o o tatou agaga, i Lona taimi ma Lana ala, o le a faamalolo ai o outou manuaga uma.”⁷

Pe afai ua e lagonaina le faamanualia, o loo latalata mai le faamalologa. O le mea lena e te talitonu ai (tagai i le Mosaea 14:4–5).

Fiafia ma Aga Patino

O se tasi o mataupu e mafaufau i ai i le amataga: ua faaalia mai e suesuega e faapea o se vaega taua o o tatou lagona faavae, soifua faalemafaufau, ma le fiafia e faatatau i tulaga o lea aso ma lea aso e mafai ona aafia e aga patino (genetics).

E le o tagata uma e tutusa ituaiga o o latou tino po o le lanu o lauulu. E faapena foi, e le o tagata uma e tusa pau o latou uiga fiafia masani. Ae na o le tasi lena o vaega o le paso.

Na tusia e Hank Smith le polofesa o le Iunivesite o Polika Iaga, “Ae faapefea pe afai e ia te oe se seti o ni kata leaga i le taaloga o le DNA? O lona uiga ua le aoga oe—o le a e le fiafia lava, ma e leai se mea e mafai ona e faia i ai? E matua leai lava. … Afai ua le galulue vailaau (chemicals) i lou faiai i le ala e tatau ai ona o uiga patino na pasi mai e ou tuaa ia te oe (e pei o le atuatuvale, popole, ma isi mea faapena), ua i ai fualaau ma faatinoga e mafai ona faaleleia ia vailaau i le tulaga o le soifua maloloina.”⁸

Sei o tatou iloiloina nisi o auala e faamoemoeina—o nisi e mai le talalelei, ma isi mai suesuega faasaienisi—lea e mafai ona faateleina ai o tatou avanoa mo le fiafia.

Ata

mother with children

Iva Auala o Tagata Fiafia

Auala 1: Ola i le Talalelei

A’o aoao atu Peresitene Nelson, Elder Holland, Elder Bednar, ma isi, o le fiafia moni e oo mai i le ola i le talalelei. O le talalelei a Iesu Keriso ua taua foi o le “fuafuaga o le fiafia” (tagai i le Alema 42:8). Ua faatumulia tusitusiga paia i fautuaga e uiga i le amiotonu e moomia mo le fiafia moni (tagai 2 Nifae 2:13 ma le Mosaea 2:41 mo faataitaiga e lua i totonu o le tele).

E faigofie, e mamana, ma e faavaea. O le atoatoa o le taliaina ma ola i le talalelei a Iesu Keriso o le laasaga aupito sili ona taua e mafai ona e faia i le sailia o le olioli sili atu ma le fiafia i lenei olaga ma le olaga a sau.

Auala 2: Faaalu Ou Aso i le “Naunautai i se Faamoemoega Lelei” (Mataupu Faavae ma Feagaiga 58:27)

O lou maua o se tofi o se tamaoaiga e maua ai lou avanoa e nofonofo ai i luga o le matafaga e toetoe lava o le a faatamaia ai lou fiafia—e ui lava ina feteenai ma leo faalelalolagi. O le mea moni, e ao ona tatou punouai i se galuega anoa ina ia fiafia ai.

“Na sa’o Franklin D. Roosevelt: ‘O le fiafia o loo taoto i le le na o le mauaina o tupe; o loo i ai i le olioli o le ausia o se mea, i le faagaeetia o le taumafai e fausia ni mea fou.’”⁹

O galuega anoa e faatupulaia ai se faamalieina tatou te le mauaina i se isi lava auala.

Na aoao mai Elder Ulisses Soares o le Korama a Aposetolo e Toasefululua e faapea “o le ausiaina o le fiafia e masani ona aofia ai se taumafaiga faifaipea mo se mea e sili atu ona taua i le olaga.”¹⁰ O ia galuega anoa e ono faatele i tua atu o se ituaiga o galuega po o se matata. E aofia ai le tausia o fanau, auaunaga i le Ekalesia, po o le ofo fuaina atu o lou taimi ma taleni.

Auala 3: Filifili le Lotofaafetai

O le mana o le filifili e ola i le lotofaafetai ua talafeauga ma le mafaufau o aso uma o lona faatinoga e masani ona taua o se auala e toe “uaeaina ai lou faiai.”

Sei o tatou faamaoni—e tusa lava po o sologa lelei le soifuaga, o le ati o le vaai e mafai ai lava ona iloa se mea e faitio ai. Ae peitai, o le isi itu, e moni foi: e tusa lava po o le a le faigata o mea e oo i ai, e mafai pea ona saili se mea e faafetai ai.

Ma o iina e tupu ai se mea matagofie lava.

O se sailiiliga faigofie ae mamana lenei: taumafai e tausia se api talaaga o le lotofaafetai. I aso uma ia le itiiti ifo ma le tolu vaiaso, tusi i lalo ni mea se tolu e te faafetai ai na tutupu i lena aso. E le gata i lea, saoloto e faaopoopo i ai ni nai mea masani e te faafetai ai e pei o fugalaau, aiga, po o meaai.

E le umi ae e iloa e le gata o le a faigofie ona e matauina ia mea e te faaopoopo i lau lisi, ae ua amata moni lava ona e faamoemoe e mauaina. O le ola ma le agaga faafetai sili e fesoasoani ia te oe e maua ai le olioli i o outou tulaga o i ai nei, lea e i ai se aafiaga taua ma le tuusao i lou fiafia.¹¹

O le Forbes i le lipoti o le mekasini, “O le atiinae o le loto faafetai e leai se tupe e totogi ai ma e mautinoa lava e le manaomia se taimi tele e alu ai, ae o faamanuiaga e tele.”¹²

O le a se mea e te faafetai ai i le aso?

Auala 4: Faaalu se Taimi i Fafo

Ata

man jogging

O le faaaluina o taimi i fafo, ae maise lava i le natura, e ofo atu ai ituaiga faamanuiaga e tele, e pei o le faamaualaloina o le atuatuvale ma le saoasaoa o le fatu, po o le faamamaina o ou mafaufauga.

Na lipotia mai le mekasini o le Taimi i se suesuega e uiga i le tomai o le natura e toe faafouina ai i tatou. E tusa ai ma le suesuega, “E amata e tagata ona lagona le toefuataiina o lagona ina ua maea le na o le 15 minute o le nofonofo ai i fafo i le paka ma le togavao.”¹³

E faigata ona lagona le fiafia pe a tatou lagona pea lava pea le vaivai ma le atuatuvale. Taumafai ina ia i fafo mo se afa itula pe a i le tele o aso o le vaiaso, ia sili atu pe afai e mafai ona e faia. Aisea e le alu ai i fafo ma fiafia itiiti teisi soo?

Auala 5: Faatapulaa Taimi o le Lau

O le tele naua o le taimi i le lau e le lelei mo lo tatou fiafia. O taimi e te faaaluina e faataupupula ai i se lau o le TV, komepiuta, tapeleti, po o se telefoni e faateleina ma e mafai ona i ai se aafiaga leaga i lo tatou soifua maloloina faalemafaufau, aemaise lava pe afai o faasalalauga faaagafesootai. Na faamatala mai e le tusitala sili o tusi e faatau atu o Jean M. Twenge, lea sa suesueina totoa lenei autu mo se taimi umi: “O le tele o taimi e faaaluina e [tagata] e vaavaai ai i le lautusi, o le tele foi lea o le lipotia mai o faailoga o le atuatuvale.”¹⁴

Na saunoa mai Peresitene Nelson, “Afai e tele atu lou gauai i faamatalaga mai faasalalauga faaagafesootai nai lo musumusuga a le Agaga, ua e tuuina oe lava i se tulaga matautia faaleagaga—faapea foi tulaga matautia o le oo i le tuuatoatasi ma le atuatuvale.”¹⁵

O lea la alu i luma, tuu atu ia te oe lava se taimi e aluese ai mai le lautusi. O le a mulimuli ane e faafetai ia te oe lava.

Auala 6: Ia Auai

Afai o oe o se tagata soifua, e tusa e 100 pasene le avanoa ua e fai mai pe faia ai se mea na e faamoemoe sa e lei faia. E foliga mai, e tele ia mea. O se mea tulagaese lava, e faapea, o le tele o taimi e filifili ai e le toatele o tagata ina ia toe ola lena taimi i o latou mafaufau.

O le tusitala o le Au Paia o Aso e Gata Ai o John Bytheway ua tusi e uiga i faafitauli o le nofoai i le taimi ua tuanai: “O tagata faanoanoa e i ai a latou paelo o mea e toe faaaoga e tumu i mea sese mai le tuanai. I aso uma latou te toe mafaufau ai i o latou faanoanoaga ma toe faaaogaina lo latou salamo. E tumu la latou gagana i fasi fuaitau e pei o, ‘Sa tatau ona ou,’ ‘sa mafai ona ou,’ ‘semanu ou te,’ ‘Aisea na ou le?’ ma le ‘ana faapea e.’ Sa lei vaai lava i latou i mea e o i ai aua ua le mafai ona aveese o latou mata mai mea sa latou i ai.”¹⁶

Sa ia tusia foi e uiga i le faafitauli faapitoa o le ola tele i le lumanai: “O tagata pagatia e vaavaai mo se mea e tupu i fafo e faafiafiaina ai i latou. ‘Ou te faauu loa, o le a ou maua le fiafia.’ Ina ua uma ona faauu i latou, ona latou faapea mai lea, ‘Ia, e maua loa sau galuega, o le a ou maua le fiafia.’ Pe a latou maua se galuega, ua latou fai atu, ‘Ua lelei la, ou te faaipoipo loa, o le a ou maua le fiafia.’ … Afai e te naunau e faanoanoa, ona mafaufau lea i le olaga e faapei o se potu faatalitali, ma le fiafia o lau fomai.”¹⁷

E matele lava ina tatou maua le fiafia sili ma manuia pe a tatou ola ai ma taulai i mea o loo tutupu i o tatou olaga i le taimi nei.

I le soifua maloloina o le mafaufau ma le lio o le suesueina ma le togafitia o le gasegase o le mafaufau, o le faaupuga “manatunatu” o se faapuupuuga o le auala e faamatalaina ai le auai atoatoa i le taimi nei.

Ua fautuaina mai e tagata atamamai o le soifua maloloina o le mafaufau, “O le fefe ma le le mautonu e uiga i le taimi ua tuanai ma le lumanai e mafai ai ona faafaigata ona atoatoa le fiafia i le taimi nei.”¹⁸

O nisi nei o nai motugaafa e faataitai ai le ola manatunatu:

Tausi se api talaaga o le loto faafetai (tagai i le auala 3 o loo i luga), aemaise lava o le lisiina o nisi o mea e te faafetai ai mai i lena aso.
Faaalu se taimi e manatunatu loloto ai i aso taitasi. Sue se nofoaga filemu e nofo ai e aunoa ma ni mea faalavefau. Moeiini ou mata, ma faalogo lelei i lau manava. Afai e oo mai ni manatu, faailoa atu, faamatuu atu, ona toe foi lea e taulai atu i lau manava. Atonu e foliga malie lenei mea, ae o se faataitaiga lelei mo le mafaufau le taulai atu i le taimi nei.
Gauai faalatalata atu i galuega e masani ona e faia e aunoa ma le mafaufau i ai, e pei o le fufuluina o ipu, aveina o le taavale, po o le taumafaina o se meaai. Lagona le vai oā i luga o ou lima. Matau laau, tagata, ma fale a o ave le taavale. Tofo le manogi ma le manaia o ū taitasi.
Tatalo e iloa ai tagata o loo manaomia lau fesoasoani i lena aso. Ona silasila totoa lea ma saunia e faatino.
Fesuiai au faiga masani mai lea taimi i lea taimi ma faataitai seisi auala fou moni lava i se fale, o le faatulagaga e le masani ai o se faleoloa ese, po o se suiga i au gaoioiga masani o le afiafi.

Auala 7: Fesootai ma Isi

I le tulaga o le fiafia ma le aotelega o le soifua maloloina, o le taulai atu i sootaga anoa e taua tele.

Ua tusia e Emma Seppälä, PhD, o le “malosi o fesootaiga faaleagafesootai:

e taitai atu ai i le 50% le tele o le avanoa e umi ai le soifua
e faamalosia le puipuiga o lou tino …
e fesoasoani e toe vave maua ai le malosi mai gasegase.”

Ua ia faaauau, “O tagata e lagona lo latou fesootai soo atu i isi e maualalo le tulaga o le popole ma le atuatuvale.”¹⁹

E tusa ai ma sootaga anoa, o ni nai sootaga loloto laiti masalo e sili atu nai lo le anoanoai o sootaga papau. Tatou te le manaomia le faatumu tele o o tatou taimi avanoa i ni gaoioiga faaleagafesootai faifai pea, ae tatou te matuā manaomia lava fesootaiga faaletagata. E oo lava ia i latou e uiga matamuli, e tele auala e faaloloto ai fesootaiga i totonu o lau lio o uo ma aiga.

E tusa ai ma aiga, na aoao mai Elder Dieter F. Uchtdorf o le Korama a Aposetolo e Toasefululua, “I sootaga faaleaiga o le alofa o lona sipelaga moni o le t-a-i-m-i, taimi.”²⁰

Talu ai ua uma ona e vaneina ese mai se taimi faaopoopo e ala i le faaitiitia o le faaaogaina o le lau (faaiteite, faaiteite), ia mafaufau e faatumu se vaega o lena taimi i fesootaiga faafesagai. Asiasiga auauna atu, taaloga liki, kalapu e aoina mai faailoga tusi … po o soo se mea lava e mafai ai ona e fesootai ma isi e fesoasoani e faateleina ai lou fiafia ma le manuia.

Auala 8: Tausi Lelei Lou Malumalu

O le mauaina e lou tino o se malologa lelei, meaai tatau ma paleni, ma faamalositino talafeagai e mafai ai ona tauia i le fiafia tele. O o tatou lagona e taulai i lo tatou faiai, o lea, e faapei o soo se isi totoga i lou tino, e manuia tele mai faataitaiga alualu i luma faalesoifua maloloina.

O laasaga na e faia e faaleleia atili ai lou soifua maloloina faaletino mulimuli ane e aofia ai le faaleleia atili o lou faiai, o se vaega o lou tino faaletino. E mafai ona fesoasoani lenei mea e vave ai ona e mafaufau manino, taulai saunia lelei, ma faamautu ou lagona.

Faatasi ai ma mausa faalesoifua maloloina, o se tulafono autu lelei o le amata lemu ma faia se suiga se tasi mai lea taimi i lea taimi. Amata i mea laiti e pei o le savali faatele atu po o le faaleleia o au taumafa, pe a mafai. O suiga laiti e iu lava ina tele.

Auala 9: Vaavaai i Fafo Atu

O auala e valu atonu e foliga faigofie nai lo le tasi mulimuli lea, ae o le fiafia e masani ona maua pe a e le taulai tonu i ai.

Ua aoao mai e Elder Holland: “E le faigofie ona maua le fiafia pe a tamoe sao atu i ai. E masani lava ona maua gata, puupuu, ma maaleale tele. Afai e te lei aoaoina muamua, o le a e iloa i tausaga o lumanai, o le tele lava o taimi, e oo mai le fiafia ia i tatou ae tatou te lei mafaufauina, pe a o tatou pisi i le faiga o se isi mea. O le fiafia e toetoe lava o taimi uma o se taunuuga o se isi taumafaiga.”²¹

O lea lava, ia faia mea uma e mafai e atiina ae ai fuafuaga ma mausa mo le fiafia. Pe a uma ona faia mea uma tatou te mafaia, e ui i lea, o le taimi lea e liliu atu ai i fafo atu e saili e le fiafia i tatou a o tatou saili e fesoasoani atu i isi.

Fiafia ma Gasegase Faalemafaufau

Pe a oo i tulaga faalesoifua maloloina e pei o le atuatuvale ma le popole, e avea le fiafia ma se meaola sili atu ona lavelave. O le gatete i le tuneva o le po sa ou taua muamua na avea o ni faailoga o le popole na aumaia e le ma’i o le atuatuvale ua faamaonia.

I lo’u olaga, pe a ou i ai i le loloto atoa o le pogisa ma le le mautonu o le atuatuvale ua faamaonia lena, sa le mafai lava ona ou toe “filifili e lagona le fiafia” nai lo le filifili o lou maualuga po o le lanu o mata.

O mea e mafai pea ona ou filifilia, ae ui i lea, o le faasagatau agai atu i le pogisa. E mafai ona ou aapa atu i le Atua. Ou te mafai ona faaaoga meafaigaluega uma i loʼu malosi, mai le faatuatua ma le tatalo e oo lava i vailaau faaona po nei.

Mo au, o le manuia aliae mai i le faasologa o tulaga faanoanoa i le tele o tausaga e aofia ai se faiga e tele ona vaega felavasai. E ao ona ou vaavaai i lou soifua maloloina faaletino (faamalositino, meaai paleni, moe), lou soifua maloloina faafomai (fualaau, vaitamini, fautuaga mai fomai), lou soifua maloloina faalelagona (fautuaina, fesootaiga ma isi), ma lou soifua maloloina faaleagaga (tatalo, suesue i tusitusiga paia, auauna atu i le Ekalesia, taimi i le malumalu) i tulaga o le paleni.

E ui lava o nisi o tiga maualalo sa ou oo i ai i le faasologa o tausaga mai le faanoanoaga, ua faamanuiaina au e maua le fiafia ma le tulaga lelei i le tele o taimi! E loloto ou lagona mo outou o e e sili ona tigaina ma tumau i aafiaga o le mai o le mafaufau nai lo au, ae mo oe foi, ua ou talitonu atoatoa o le Aloalii o le Filemu o le a faamalolo i o outou faanoanoaga uma (tagai i le Ioane 14:27).

E faamatala e le atuatuvale ni pepelo se tele pe a oo mai i le fiafia. E tau mai ai e le faaleleia lava ia mea. O se tasi o vaifofo malosi mo lenei pepelo faapitoa—ia te au lava ia—o loo maua i lau pese ou te fiafia i ai, “Ia Filemu, lou Agaga.”

Ia filemu, lo’u agaga: O loo tautai lou Atua
E taiala le lumanai e pei ona ia faia i le tuanai.
Lou faamoemoe, lou talitonuga ia le maluelue;
O nei mealilo o le a pupula mai lava.22

O upumoni matagofie, a ea? A o ou toe tepa i tua i lou olaga, e leai sou masalosalo o le Atua ua faamanuiaina, faamalosia, ma taialaina ai au i le gasologa o le ala. O lea la, ou te iloa o le a i ai o Ia iina mo au i le lumanai, e pei lava ona ou iloa o le a taialaina oe e le Atua i lau savaliga i aso fiafia sili.

E ala mai ia te Ia, o le a faaatoatoaina i se aso lou fiafia.