O Le Meaalofa Sili e Mafai ona Ou Tuuina Atu
Ina ua amata ona ou auai ma lou aiga i Le Ekalesia a Iesu Keriso o le Au Paia o Aso e Gata Ai, sa ou lagonaina i lou loto o lou tina na taialaina i matou iina.
Na maliu faafuasei Tina i le Aso Kerisimasi i le lua tausaga talu ai. O ia o se soo ofoofogia o Iesu Keriso na matuai faatuatua ma loto maualalo, ae sa lei aoaoina lava o ia e uiga i le talalelei toefuataiina. Ina ua mavae masina e 11 o le aoaoina e uiga i le Ekalesia, sa papatisoina ai i matou ma lou toalua, o Navid, ma lau tama teine, o Katie, i le Aso Kerisimasi. E ui o se aso o le faanoanoa ona o le maliu o lou tina ua avea nei ma se aso o le fiafia mo lo matou aiga ona o lo matou olaga fou i le talalelei.
E toatele tagata na auai atu i la matou papatisoga. Sa ou tei i lou vaai i le sili atu ma le 100 tagata iina i le 10:00 i le taeao o le Kerisimasi! Sa matou lagonaina atili le alofagia.
A o lumanai lo matou papatisoga, na fesoasoani mai le faufautua o le malumalu ma talafaasolopito o aiga a le siteki ia te au e saunia igoa o lou tina ma le igoa o isi tuaa ua maliliu e ave i le malumalu mo le papatisoina.
Ina ua tuanai le lua sefulu-lima o aso mai lo matou papatisoga, i le aso 19 o Ianuari, 2018, o le aso fanau o lou tina, sa matou faia ai la matou malaga muamua i le Malumalu o Newport Beach i Kalefonia. Sa ou popole ma le iloa se mea o faamoemoe i ai, ae ina ua ou savali atu i totonu o le malumalu, sa ou lagonaina le tele o le filemu. Sa peiseai o se mea ou te lei oo lava i ai muamua. Sa faapotopoto la matou vaega i le faatanoa papatiso, lea na faamalamalama mai ai e le Peresitene o le malumalu le taua o le papatisoga mo e ua maliliu, ma faamanuiaga o loo i ai. Sa ou tagi masusu i le olioli ma mafaufau i le ala e mafai ai e nei papatisoga ona faamanuiaina lo matou aiga.
Ina ua uma ona papatisoina Navid mo nisi o alii o lou aiga, sa ia papatisoina aʼu e fai ma sui o nisi o tamaitai o lo matou aiga. O le tagata muamua na ou papatiso e sui ai, o lou tina pele. Ina ua ou faalogo i upu “o le ua maliu,” sa ou tagi. O le faalogo i ai na avea ai lona maliu ma mea moni lava ma e tiga. Ae ona sa ou manatu ai, o le a se meaalofa sili e mafai ona ou tuuina atu mo lou tina i lona aso fanau nai lo le meaalofa o le papatisoga i le malumalu?
Ou te tulimatai i le tele o nisi malaga i le malumalu. Ou te faafetai i le iloa e mafai ona ou fesoasoani e tuuina atu faamanuiaga ia i latou o e ua muamua atu ia te au e ala i sauniga o le malumalu. Oka se meaalofa ofoofogia!