E Faapefea Ona Tatou Maua le Olioli ma le Fiafia?

Mo au ma le toatele o isi, e i ai i nisi o taimi se fenumiai faaopoopo pe a oo mai lagona olioli po o le fiafia—e ui ina ua uma ona filifili e ola amiotonu. Ou te manatunatu i nisi o taimi, “Afai o loo ou tausia poloaiga, aisea ua faigata ai ia te au ona lagonaina le fiafia?”

E tele mafuaaga e mafai ai ona liua o tatou lagona fiafia po o le soifua manuia, e pei o le leai o se galuega, o le maliu o se tasi ua pele, po o toatuga o le soifua maloloina faaletino ma/po o le mafaufau. Peitai, ua ou talitonu e faapea po o le a lava le vanu o loo e tau setusetu ai, e i ai aso lelei sili o loo i luma atu! I la’u tusiga, “O Le Sailia o le Fiafia,” i le itulau e 24, ua ou faasoa atu ai le talitonuga o le talalelei faatasi ai ma sailiiliga faasaienisi ma le sini o le tuliloaina o le fiafia, ae maise lava pe a lagona ua faigata ona ausia.

I le tusiga a Elder David A. Bednar i le itulau e 18, “Iesu Keriso: O le Puna o le Olioli Tumau,” o loo aoao mai ai i tatou e uiga i le olioli tumau moni. E tumu i le malamalamaaga mai tusitusiga paia ma perofeta, ua faatumulia lana tusiga i faatonuga taua e aoga i lo tatou manuia e faavavau faapea foi le mauaina o le olioli i le olaga nei.

“Na pa’ū Atamu ina ia i ai tagata;” ua taua i tusitusiga paia, “ma ua i ai tagata, ina ia latou maua le olioli” (2 Nifae 2:25). Pe a mavae po e sili ona pogisa, e toe susulu mai lava le malamalama i le taeao.

David Dickson

Mekasini a le Ekalesia