Talofa mai Kolomupia!

Talofa, o ma’ua o Margo ma Paolo.

Faatasi mai ma i ma’ua a o ma asiasi i Kolomupia!

O Kolomupia e i le itu i matu o Amerika i Saute. O lenei atunuu e tautatala faa-Sipaniolo e tusa e 49 miliona tagata, ma e tusa ma le 200 afe tagata o le Ekalesia.

O le tau a Kolomupia o le teropika, ma le tele o laau ma manu eseese. O le mea moni, e tele atu ona ituaiga o manulele nai lo se isi lava atunuu! O le tele o nei manulele e le mafai ona maua i se isi lava nofoaga i le lalolagi, e pei o lenei manulele felanulanuai o le tanager.

O lenei teineitiiti o loo aia se arepa, o se keke tofo lelei e fai mai le saga. E masani ona ai e tagata Kolomupia faatasi ma le sisi ma aano o manu.

I Kolomupia, o le aso 7 o Tesema o le el Día de las Velitas (o le aso o Moligao Laiti). E faamalamalama e tagata le alatele i le fia afe o moligao e amata ai le vaitau o le Kerisimasi.

O le masina lenei ua atoa i ai le tausaga talu ona faapaiaina le Malumalu o Barranquilla Kolomupia.

O se ata lenei o le malumalu fou. E i ai foi se isi malumalu a Kolomupia, i le aai o le laumua o Bogota.

Feiloai i ni uo mai Kolomupia!

“Ou te lagona le faamanuiaina ma le fiafia i le i ai o le talalelei i lo’u olaga. Ou te iloa o loo soifua Iesu Keriso ma e alofa ia i tatou ma o le Perofeta o Iosefa Samita na toefuataiina lenei Ekalesia. Ou te faafetai ua ia i tatou se perofeta o taitaia i tatou.”

Camila R., 10 tausaga, Valle del Cauca, Kolomupia

“Ou te iloa ma lou loto atoa, o loo soifua lou Tama Faalelagi ma Iesu Keriso ma e alolofa ia i tatou. Na la tuuina atu ia Iosefa Samita faaaliga e faaliliu ai le Tusi a Mamona ina ia maua ai e tagata uma.”

Luis V., 12 tausaga, Valle del Cauca, Kolomupia

Faafetai mo le asiasi mai i Kolomupia ma i maua. Feiloai i le tausaga fou!