Eria Lidasip Mesej
Wokbaot long Laet blong Kraes
Sikis manis blong yia ia i pas finis. ?Olsem wanem nao yu bin tekpat long 2020 Eria Fokas? Mi hop se yu stap enjoem Eria Fokas blong yia mo stap filim se yu yu stap wokbaot long Kraes truaot long taem ia.
Eria Fokas blong yia ia i moa simpol long lukluk bitim ol yia we i bin pas mo i lukluk moa long Jisas Kraes mo kaonsel ia blong “Wokbaot long Laet blong Kraes.” From se Jisas Kraes i invaetem yumi blong stap wan wetem Hem, yumi mas wokbaot long laet blong Hem.
Wokbaot long Laet.
Mifala i leftemap tingting blong yu blong oltaem folem Jisas Kraes. No wokbaot long tudak.
Sam yia i pas, taem mi stap laef long Yuta, mi bin tekem wan klas blong ski long naet. Blong mekem ol skil blong mi i kam moa gud, oltaem mi folem tija blong mifala, mo stap ski stret biaen long hem. Be, long wan naet, mi no bin folem gud hem mo, mi bin jusum wan defren rod we mi no bin tingting long hem. I no bin gat ol laet blong helpem mi blong lukluk. Kwiktaem, mi flae antap long ea, mo afta mi foldaon strong mo bangem fes blong mi strong long sno. Mi stap ting se mi oraet nomo mo mi stanap kwiktaem mo stat blong ski blong joenem tija mo ol nara studen. Taem mifala i go insaed, tija blong mi i invaetem mi blong lukluk miwan long mira. Taem mi bin luk miwan, mi luksave se kala blong skin blong mi i bin jenis. Tija i givim sam wom tawel mo talem se bae i moa gud blong mi stap insaed nomo. Mi luksave se kolkol blong sno i stat blong kakae soa blong mi. Long naet ia, mi bin wokbaot mo safa from ol risal blong joes blong mi.
Ol dia brata mo sista, letem yumi jusum blong wokbaot long laet.
Fo Wei blong Wokbaot long Laet blong Kraes:
-
Ona long sabat dei
-
Lukaotem ol blesing blong tempol
-
Kam blong dipen long yuwan long saed blong spirit mo bodi
-
Givim seves tru long wok blong givhan mo karem Isrel i kam tugeta
Mifala i biliv se wanwan memba mo famli insaed long Pasifik Eria i save setemap ol gol blong wanwan long olgeta mo famli we i stap insaed long 2020 Eria Fokas.
Faswan: Wokbaot long laet blong Kraes taem yumi stap ona long sabat dei.
Olsem wan risal blong stap longlongwe long yumi tru long ol problem blong KOVID-19, yumi gat ol janis we i kam moa bigwan blong eksperiensem glad blong stap laef folem gospel long hom olsem senta. Mifala i biliv se ol testemoni oli bin kam moa strong tru long ol eksperiens ia.
I no gat man i save hamas taem bae i tekem blong KOVID-19 mo paoa blong hem blong i afektem yumi evriwan. Be, letem yumi gohed blong eksperiensem glad long ol gospel stadi blong yumi long hom olsem senta mo wosip long saed blong spirit long ol hom blong yumi. Taem KOVID-19 i finis, letem yumi go long Jos eni taem we yumi save go mo enjoem blong mit wetem ol narawan. Letem yumi invaetem ol fren mo ol neba blong ‘kam mo luk’ ol Sandei miting blong yumi. Letem yumi enjoem ol naet tu, long hom long ples we yumi stadi tugeta long Kam Folem Mi—blong Wanwan Man, Woman mo Famli; iven sapos hem i blong faef o ten minit nomo.
Nambatu: Wokbaot long laet blong Kraes taem yumi stap lukaotem ol blesing blong tempol.
?Yu holem wan tempol rekomen we i laef? Nomata we sam long yufala i no save go long tempol oltaem, yumi nid blong holem wan tempol rekomen we i laef oltaem. Yumi nid blong soem hamas yumi klin inaf long God. Ol Yang Man mo Yang Woman, yu tu, yu save holem wan tempol rekomen. Sapos yu go long bisop blong yu mo talem “Bisop, mi wantem holem wan tempol rekomen,” bae hem i helpem yu wetem bigfala glad.
Sapos yu no save olsem wanem blong faenem mo rekodem famli histri wok blong yu, askem wod o branj tempol mo famli lida o ol advaesa. Bae oli hapi tumas blong helpem yu.
Nambatri: Wokbaot long laet blong Kraes taem yumi stap laef folem gospel long hom.
Long yia ia, yumi bin gat blesing blong stadi long Buk blong Momon long hom evri dei mo yusum Kam Folem Mi—blong Wanwan Man, Woman mo Famli. Mifala i leftemap tingting blong evri memba long evri ples long Eria, blong bildim wan fetful kalja blong stap stadi long Buk blong Momon long hom evri dei.
Antap long hemia, Ol Yang Man mo Yang Woman, mifala i leftemap tingting blong yufala blong tekpat long niufala program blong Ol Pikinini mo Ol Yut.
Nambafo: Wokbaot long laet blong Kraes taem yumi stap givhan mo karem Isrel i kam tugeta.
?Olsem wanem nao yu bin yusum ol invitesen ia blong “Kam mo Luk”, “Kam mo Help” mo “Kam mo Stap”? Hemia i ol nomol mo simpol tul blong invaetem ol narawan blong kam long Kraes. Mifala i askem yufala blong yusum ol invitesen ia, oltaem wok wetem ol fultaem misinari, mo ol wod misin lida mo misinari blong yufala.
Ol Yang Man, !mifala i nidim help blong yufala! Olsem Presiden Russell M. Nelson i talem, yufala i bigfala ami blong Lod. Oli jusum ol sol blong yufala. Mifala i leftemap tingting blong evriwan long yufala blong go long ol misin blong Lod. Plante fren we i blong oltaem i stap wet long yufala blong helpem olgeta blong kam hom.
Tekem aksen faswan.
Maet sam long yufala i filim se ol samting ia i had. Blong winim ol gol blong yumi, letem yumi stat wetem ol isi samting. Letem yumi helhelpem wanwan long yumi.
Long toktok blong hem ‘Seek Learning by Faith’, Elda Bednar i tokbaot wan stori long Ol Testemen we i tijim yumi se:
“Blong tekem aksen, i blong eksasaesem fet. Ol pikinini blong Isrel oli stap karem bokis ia we i saen blong promes. Oli kamdaon long Reva Jodan. Promes i we, bae oli krosem reva long drae graon. ?Wetaem nao wota i seraot? Taem ol leg blong olgeta i wetwet. Oli wokbaot i go insaed long reva—oli tekem aksen. Paoa i folem—mo wota i seraot.” (“Seek Learning by Faith” [address to Church Educational System religious educators, Feb. 3, 2006], lds.org/media-library)
Eria Fokas i fokas blong yu.
2020 Eria Fokas i fokas blong yu. Hem i no blong Eria Presidensi blong yusum. ?From wanem yumi gat wan Eria Fokas?
Wok blong wan olfala Hibrus profet i blong stap olsem mesenja blong God mo blong mekem ol man i save tingting blong God. Amos i bin testifae strong taem hem i talem, “Ol profet oli man blong wok blong hem, mo oltaem, sipos hem i wantem mekem wan samting, hem i stap soemaot ol plan blong hem fastaem long olgeta” (Amos 3:7).
Ol profet blong tedei oli gat semmak responsabiliti ia. Oli toktok long yumi taem oli kasem insperesen tru long Tabu Spirit mo letem yumi save tingting blong God. Sapos oli no mekem, ?wanem nao bae yumi mekem? “Taem ol man blong wan kantri oli no gat tok blong Hae God blong lidim olgeta, oli no save folem ol stret fasin” (Ol Proveb 29:18). Tru long ol mesej blong ol profet blong yumi, yumi save save, wanem God i wantem long yumi. Fas Presidensi mo Ol Twelef Aposol oli bin givim niu instraksen long yumi mo wan niu daereksen. Oli bin serem visen blong olgeta. Folem kaonsel blong olgeta, mifala i bin krietem 2020 Eria Fokas. 2020 Eria Fokas i soemaot gud visen mo ol praeoriti blong ol profet blong yumi. Mifala i kam long fokas ia afta we mifala i lukaotem insperesen, tru long wan longfala storian mo toktok raon, mo tru long ol tru prea blong hat.
Presiden Russell M. Nelson i bin promesem se, “Kipim Sevya long medel blong ol plan blong yufala. Oltaem askem yuwan mo wetem prea, askem Papa blong yu long Heven, ‘?Wanem mi save mekem blong kam moa olsem Jisas Kraes?’ Taem yu mekem hemia evri dei, ol merikel bae i hapen.” (Wan spesel mesej blong ol pikinini mo yut long stat blong wan Fes tu Fes taem wetem Elda Gerrit W. Gong, Ol Pikinini mo Ol Yut: 17 Novemba, 2019)