Lokol Pej
Ol Kongregesen blong Vanuatu Oli Welkamem Ol Niu Mitinghaos
Ol memba blong Jos Ia blong Jisas Kraes blong Ol Lata-dei Sent long Port Vila, Vanuatu oli gat ol niu mitinghaos blong mit long hem evri wik. Oli bin flatem tu niu mitinghaos i no longtaem blong givim haos long gro blong ol memba.
Oli bin flatem Erakor mitinghaos blong givim haos long Erakor branj (kongregesen).
Fresh Wota mitinghaos i bin stat blong holem ol seves long Febwari 2020 mo i gat tu kongregesen insaed long hem.
Ol kongregesen ia oli pat blong Port Vila Vanuatu Stek blong Jos Ia blong Jisas Kraes blong Ol Lata-dei Sent, we i bin stap long Vanuatu stat long 1973. Jos i bin stat long Vanuatu wetem sam misinari mo sam memba blong ol famli blong Samoa mo Tonga.
Naoia i gat kolosap long 10,000 memba long Jos long Vanuatu, long 35 kongregesen. Olgeta i pat long wan wol waed membasip blong ova 16 milian.
Ol Lata-dei Sent oli go long jos evri Sandei long ol mitinghaos truaot long wol. Ol lokol kongregesen oli oganaesem olgeta folem jiografi blong karem ol neba mo komuniti i kam moa kolosap tugeta blong givim ol bigfala janis blong givim seves long olgetawan. Olsem wan pikja foto blong wan seves i luk olsem wanem, ol man, woman mo yangfala oli toktok antap long pulpit; singsing ol hym; givim ol prea we oli no ridim o raetem aot; tekpat long sakramen (semmak olsem komuniong); go long ol skripja klas mo tekpat long ol storian; mo serem ol stori blong fet blong olgetawan, o “ol testemoni.”
From se oli pem wan profesenol klak, kongregesen i serem ol responsabiliti mo diuti we i leftemap valiu blong komuniti mo felosip. Fasin blong stap wan blong tekpat long ol samting ia i minim se ol memba wan afta long wan, i prijim ol toktok mo lisin long ol toktok, lidim miusik mo singsing miusik, givim advaes mo kasem advaes.