Lokol Pej
Bon long Ol Gudfala Papa mo Mama
Aot long evri lesen we papa mo mama blong mi i bin tijim long hem truaot long laef blong mi, eksampol blong tufala nao i wanem i bin tijim mi moa.
Mama blong mi, Linda Obeketang, i wan strong mo waes woman mo i lidim famli blong mifala long stret mo gud fasin.
Blong plante yia, mama blong mi i mekem sua se famli blong mifala i kam tugeta evri moning mo evri naet blong famli prea. Blong stap tekpat long devosen ia long God evri dei i bin tijim mi blong tanem mi i go long Hem long evri samting, from se hemia i wanem mifala i bin mekem oltaem. I bin tijim mi se Hem i stap lisin mo Hem i lavem mi. Ol prea blong mifala evri dei i invaetem Spirit long hom blong mifala mo helpem mifala blong gat wan gud dei.
Tangkyu long fet blong mama blong mi we i stap oltaem, prea i no wan samting we mi nidim blong rimaenem miwan blong mekem, hem i wan stret mo gud fasin blong mi blong evri dei we bae mi karem wetem mi i go long adalt laef blong mi mo mi talem tangkyu tumas long hem from hemia.
Praemeri singsing ia, ‘A Childs Prayer’ i kam long maen blong mi taem mi tingbaot mama blong mi.
‘Prea, Hem i stap. Toktok, Hem i stap lisin’.
Hemia i wan simpol doktrin we mi save se i tru. Mama blong mi i bin tijim mifala abaot prea wetem ol toktok blong hem, be i bin ol aksen blong hem we i mekem mifala i tingbaot ol lesen ia.
Papa blong mi, Hirobo Obeketang, oltaem i bin laekem tumas blong givim seves. Evri ples we i go long hem, hem i stap lukaotem ol pipol long nid mo stap helpem olgeta kwiktaem.
Long betdei blong hem las yia, hem i disaed blong givim ol presen be i no blong kasem olgeta. Hem i disaed blong givim ol presen long ol man we oli no gat hom mo stap laef long rod nomo. Long naet ia, mifala i bin go long wan restoron blong dina. Afta we mifala i kakae long restoron, hem i luk tu olfala man we tufala i stap kakae long we mo i haed nomo mo pem bil blong kakae blong tufala. Mi stap luk hem i stap mekem ol kaen samting olsem oltaem.
Olsem wan man we i stap semsem mo traehad blong toktok long ol man we hem i no save, eksampol blong papa blong mi i soem ol fasfala frut blong glad we i kam long ol seves we i no tingbaot miwan. Bae i no inaf blong talem simpol nomo long mi we mi stap semsem blong givim seves; mi nidim blong oli soem long mi tru long eksampol mo eksperiensem mo hemia i wanem papa blong mi i mekem.
Hym ia, ‘Have I Done Any Good?’ i mekem mi tingting long papa blong mi, speseli las laen,
‘Blong mekem gud i wan gud filing, wan glad we i bigwan tumas, wan blesing . . .’
Papa blong mi i no strong long Jos naoia, be evri taem hem i givim mo no tingbaot hemwan, mi luk laet insaed long hem. Mi save se hem i stap filim Spirit; mi save luk long fes blong hem. Mi luk bigfala lav we hem i gat long ol pipol raon long hem mo mi save se lav ia, mo spirit we hem i filim taem hem i givim seves, bae long en, bae i lidim hem i gobak long gospel.
Taem yumi folem eksampol blong Sevya mo mekem olsem we Hem i bin mekem, Spirit bae i save testifae moa long yumi long trutok blong hem. Mi talem tangkyu tumas long wan mama mo papa we.