RONGORONGO NI KAIRIIRI MAN TE AONO
Nakonako n Otan Kristo
Onoua namwakaina n te ririki aei a tia n nako. E kanga aron kabaeakim ma Ana Taratara te Aono ibukin 2020? Ara kantaninga, bwa ko kukurei n Ana Taratara te Aono n te ririki aei ao n namakinna ae ko nakonako inanon otan Kristo.
Ana Taratara te Aono n te ririki aei e a taraa ni bebete riki nakon te ririki ae nako ao ni kaineta riki te taratara iaon Iesu Kristo ao n reirei “Nakonako n Otan Kristo.” Bukina bwa e kaoira Iesu Kristo bwa ti na riki n teuana ma Ngaia, ti riai n nakonako n Otana.
Nakonako n te Ota.
Ti kaungai ngkami bwa kam na ira Iesu Kristo n taainako. Tai nakonako n te roo.
N ririki aika nako, ngke I maeka i Utah, I iira te kiraati iaon te tikii n te tairiki. Ni kanakoraoa rabakau, I ririmwiin ara tia reirei n tainako, n tikii i akuuna. E ngae n anne, n te tairiki teuana, I aki iria raoi, n tiaki nanou, I toua te kawai ae kaokoro. Akea te taura are e na buokai n nora kawaiu. N te tai ae waekoa, I kakibarakeaki nakon te eea, ao ni bwaka n unika ubu n ae korakora nako aon te tino. N iangoana ae kanga akea au kaangaanga I waekoa n teirake ao n tikii n rimwiin te tia reirei ao ataein te reirei ake tabeman. Ngke I mena inanon te auti e kaoai te tia reirei bwa n na taraai n te tirotaam. Ngke I taraa tamneiu, I noora karan kuniu bwa e a bitaki. E anganai te tia reirei tabeua taara aika mwau ao n tuangai bwa n na tiku n te auti. I tuai n ataia ae te ikoaki man te mwaitoro e a tia n reke. N te tairiki anne I nakonako n te roo ao n reke n te kaangaanga imwiina.
Tariu ao mwaneu aika kam tangiraki ti a rineia bwa ti na nakonako n te ota.
Aua Kawai n Nakonako n Otan Kristo:
-
Karinea te bong ae te tabati
-
Ukoukora ana kakabwaia te tembora
-
Riki n toronibwai n te maiu n tamnei ao n rabwata
-
Beku rinanon ikotan Iteraera ao te ibuobuoki
Ti kakoauaa bwa membwa ao utu n Aonon te Betebeke a kona ni katei aia kouru ibon irouia ao n te utu inanon Ana Taratara te Aono 2020.
Te Moan: Nakonako n Otan Kristo rinanon karinean te bong ae te tabati.
Imwiin ae kamwa tia n raroa nako ma te kaangaanga n te COVID-19 n te ririki aei, ti a tia ni karekea rakan taai n rinanon kukurei inanon reiakinan te euangkerio inanon te mweenga. Ti kakoauai bwa a tia koaua ni kakorakoraaki rinanon kakaraoan aikai.
Akea ae ataia bwa ana maanra te COVID-19 ao korakorana ae na rotiira ni kabane. E ngae n anne, ti a reitanako te kimwareirei inanon ara kamatebwai n te euangkerio inanon mweengara ao ara taromauri inanon mweengara. Ngkana e toki butanakon te COVID-19, ti a bane n nako n taromauri n aron ae ti kona ao ni kukurei ni kaitibo ma tabeman. Ti a kaoia raoraora ao kaain rarikira bwa a na ‘nakomai ao n noora’ ara botaki n taromauri n te Tabati. Ti a bane ni kakukureira n te tairiki ni mweengara are ti bane ni kamatebwai iai man Nakomai, Iriirai—Ibukiia n Tatabemaniia ao Utu; e ngae ngkana ibukin nimaua ke tebwina te miniti.
Te Kauoua: Nakonako n Otan Kristo rinanon ukoukoran kakabwaia n te tembora.
Iai am beeba ni kariaia nakon te tembora ae tuai bane taina? E ngae ngke tabeman mai ibuakomi aki kona n nakon te tembora n tainako, ti kainnanoa karekean ara beeba ni kariaia nakon te tembora ae tuai bane taina n tainako. Ti riai ni kaotia bwa ti tau nakon te Atua. Ataeinimwaane ao Ataeinnaine, ngkami naba kam kona ni karekea ami beeba ni kariaia nakon te tembora. Ngkana ko nakon am bitiobi ao ni kangai “Bitiobi, I tangiria ni karekea au beeba ni kariaia nakon te tembora,” e na buokiko ma te kimwareirei ae korakora.
Ngkana ko aki ataia bwa ko na kanga ni kakaeia ao taui mwiin rongorongoia am utu, tuanga am tia kairiiri n te uoote ke n te tabo n te tembora ao n te utu ke te consultants. A na rang ni kukurei riki ni buokiko.
Te Kateniua: Nakonako n Otan Kristo rinanon maiuakinan te euangkerio n te mweenga.
N te ririki aei, ti a tia ni kakabwaiaki ni kamatebwaia Ana Boki Moomon ni mweengara ni katoabong man kabonganakin Ana Boki Moomon n te mweenga ni katoabong man kabonganakin Nakomai, Iriirai—ibukiia n Tatabemaniia ao Utu. Ti kaungaia membwa ni kabane n te Aono, bwa a na katea te katei n onimaki ni kamatebwaian Ana Boki Moomon n te mweenga ni katoabong.
Irarikin anne, Ataeinimwaane ao Ataeinnaine, ti kaungai ngkami bwa kam na katabei ngkami n aia Burokuraem Ataei ao Kairake.
Te Kaua: Nakonako n Otan Kristo rinanon te ikoikotaki ao te mwakuri n ibuobuoki.
E kanga arom ni kabongana te kakao “Nakomai ao Noria”, “Nakomai ao Buokia” ao “Nakomai ao ni Kamatebwai ao n Tiku”? Aikai bwai ni mwakuri aika bwabwainaki ao n tataneiai te aba iai ni kaoia tabeman nakon Kristo. Ti rineiko bwa ko na kabonganai kakao aikai, mwakuri n tainako ma mitinare aika bwanin aia tai, ao taan kairiiri te mition n am uoote ao mitinare.
Ataeinimwaane, ti kainnanoa am ibuobuoki! N aron are e taku Beretitenti Russell M. Nelson, ngkami bon kaain ana taanga ni buaka te Uea. Tamnei aika kam rineaki ngkami. Ti kaungai ngkami ni kabane bwa kam na karaoa ami mition ibukin te Uea. A mwaiti raao n aki toki aika a tataningai ngkami bwa kam na buokiia ni kaokiia nakon mweengaia.
Karaoan te mwakuri e moa kakawakina.
Tabeman mai ibuakomi a namakin bwaai aikai bwa a kaangaanga. Ni kakoroi bukin ara kouru, ti a moanna ma bwaai aika uarereke. Ti a ibuobuoki imarenara.
N ana taetae ‘Ukoukora te Rabakau man te Onimaki’, Unimwaane Bednar e nanona te karaki n te O Tetemanti ao n reireiniira te bwai anne:
Karaoan te mwakuri bon kamwakuran te onimaki. Natiia kaain Iteraera a uota te aake n te berita ae tabu. A bane n roko nakon te Karaanga are Ioretan. Te berita bwa a na rinanona iaon aba aika mwau. N ningai are e bwenaua iai te ran? Ngke a mwaimwai waeia. A nakonako nako nanon te karaanga—a mwakuriia. E rimwiina te mwaaka—e bwenaua te ran. (“Ukoukora te Reirei man te Onimaki” [aetureti nakon Ana Reirei te Aro te tia kareirei n te aro, Beberuare. 3, 2006], lds.org/media-library)
Ana Taratara te Aono bon am taratara.
Ana Taratara te Aono n 2020 bon am taratara. Tiaki ti kaain te Beretitentii n te Aono ae a na kabongana. Bukin tera Ana Taratara te Aono?
Ana mwakuri te burabeti n Ebera rimoa bwa e na riki bwa a na tia uarongorongo te Atua ao ni kabutanakoa ana kantaninga te Atua. Amota e kakoaua n ae korakora ngke e kangai, “E na bon aki karaoa te bwai teuana te Uea ae Iehova, ngkana e aki kaota moa nanona ae raba nakoia ana toro aika burabeti” (Amota 3:7).
Burabeti n taai aikai iai naba tabeia ae aekan aei. A taetae nakoira ngkana a kairaki iroun te Tamnei ae Raoiroi ao n tuangiira ana kaantaninga te Atua. Ngkana aki, tera ae ti na karaoia? “Ngkana akea te taetae ni burabeti, ao a rawa aomata n tauaki aroia” (Taeka n Rabakau 29:18). Rinanon aia rongorongo ara burabeti, ti kona n ata te bwai ae kantaningaia te Atua mairoura. A tia te Moan Beretitentii ao Abotoro n te Tengaun ma Uoman n anganiira kaetieti ao te kawai ae boou. A tia n tibwaua aia taetae ni burabeti. Man te kauntira mairouia, ti a tia ni karaoa Ana Taratara te Aono 2020. Ana Taratara te Aono 2020 a kabwarabwarai aia taeka ara burabeti ao bwaai aika moan ni bwai. Ti roko nakon te taratara aei imwiin ukoukoran kairi mai eta, rinanon marooro aika maan, ao rinanon te tataro ae teimatoa.
E a tia Beretitenti Russell M. Nelson ni berita, “Karika te Tia Kamaiu bwa aan am babaire. Titirakiniko n tainako ao n tataro ni butiia Tamam are i Karawa, ‘Tera ae I kona ni karaoia bwa N na kona n riki n aron Iesu Kristo?’ Ngkana ko karaoa aei ni katoa bong, a na riki kakai.” (Te rongorongo ae onoti Ibukiia ataei ao kairake ni moan te marooro ni kaitara ma Unimwaane Gerrit W. Gong—Ataei ao Kairake: Nobembwa 17, 2019)