Ana iteraniba te aono
Bungiaki irouia Karo aika Raoiroi
N reirei ni kabane ake a tia au karo n reireinai iai inanon maiu, bon aia banna ni katooto are e reireinai riki.
Tinau, Linda Obeketang, bon te aine ae korakora ao ni wanawana ao e kaira ara utu inanon te raoiroi.
Inanon ririki aika mwaiti e a tia tinau ni kakoaua bwa ti ikotaki ni katoa ingabong ao ni katoa tairiki ibukin te tataro n utu. Karaoakin te taromauri aei ni katoabong nakon te Atua e a tia n reireinai bwa n na rairaki nako Ina ni bwaai ni kabane, bukina bwa anne ae ti kakaraoia n tainako. E a tia n reireinai ae E kakauongo ao E tangiriira. Ara tataro ni katoa bong e kaoa te Tamnei nakon mweengara ao ni buokiira ni katamaroa ara bong.
I kakaitau nakon tinau ibukin teimatoana ao n ana onimaki, te tataro tiaki te bwai ae I kainnanoia ae na kauringai bwa e na kauringai ni karaoia, bon te katei ae Raoiroi ae n na karaoia inanon ikawaiu ao I rangin ni kakaitau nakoina ibukin anne.
Te anene n te moanrinan, ‘A Childs Prayer’ e roko n au iango ngke I iangoa tinau.
‘Tataro, E mena ikekei. Taetae, E kakauongo’.
Anne te reirei ae bebete ae I ataia bwa e koaua. E reireiniira naba tinara aron te tataro ma ana taeka, ma bon ana mwakuri ae karikii reirei bwa ti na aki mwaninga.
Au karo, Hirobo Obeketang, e bane nanona n te ibuobuoki. Te tabo are e nako iai e na kakaeia aomata aika a kainnanoa buokaia ao ni buokiia n te tai ae waekoa.
N ana koron ririki n te ririki ae nako, e baireia bwa e na anga bwaintangira irarikin are e na karekei. E baireia bwa e na anga bwaintangira nakoia tabeman mwaane aika akea mweengaia ake a maeka n te kawai. N te tairiki anne ti nakon te tabo n amarake ibukin te katairiki. Imwiin amwarakera n te tabo n amarake, e noria mwaane aika a kara n amwarake naba ikekei ao n te aro ae raba e nako ni kabwaka boon kanaia. I noria ni karaoa te mwakuri aei n tainako.
Ngkai ngaia te aomata ae mamaama ao ni kaangaanga n taetae nakoia aika E aki kinaia, e a tia ana banna ni katooto tamau ni kaota reken te kukurei o man te mwakuri n aki ti taraiko. N tuangaki bwa ko na ibuobuoki e na aki tau ibukin te aomata ae mamaama n arou; I kainnanoia bwa e na kaotaki n te katooto ao te taneiai ao anne ae karaoia au Karo.
Te anene, ‘Have I Done Any Good?’ e karika uringakin Tamau irou, riki n te kabanea n rain,
‘Karaoan ae Raoiroi bon te bwai ae kakukurei, te kimwareirei ae raka iaon ae kantaningaki, te kakabwaia…’
Tamau e aki kakaonimaki n te Ekaretia n te tai aei ma n tainako ngkana I noria n angaanga n aki tabeakinna, I nora otana n otanako. I ataia ae e namakina te Tamnei; I kona ni kakoaua n ubuna. I nora te tangira ae korakora Ibukiia aomata aika irarikina ao I ataia bwa te tangira anne, ao te tamnei ae e namakinna ngkana e mwakuri, e na kairia ni kaokia nakon te euangkerio.
Ngkana ti ira ana banna ni katooto te Tia Kamaiu ao ni karaoa ae E karaoia, te Tamnei e na kona ni kakoaua nakoira koauan te bwai anne. I kakaitau nakon te tina ao te karo ake a tia n reireinai n tataro ao n ibuobuoki rinanon aia banna ni katooto.