Para sa mga Magulang

Sakramento at Musika

Ang Huling Hapunan, ni Carl Heinrich Bloch; larawan ng dalagitang nagdarasal na kuha ni Angela Suitter; Panalangin sa Getsemani, ni Del Parson; Na Lagi Ninyo Akong Aalalahanin, ni Gary L. Kapp, hindi maaaring kopyahin

Minamahal naming mga Magulang,

Ang mga magasin ng Simbahan ay ginagawa habang iniisip kayo at ang inyong pamilya. Sa buwang ito, nakatuon ang mga magasin sa mga temang tulad ng sakramento, nagbibigay-inspirasyong musika, papel ng kababaihan sa Pagpapanumbalik, Pasko ng Pagkabuhay, at paghahanda para sa pangkalahatang kumperensya. Tingnan sa ibaba ang mga ideya kung paano ninyo mapakikinabangan nang husto ang mga isyu sa buwang ito para mapalakas ang pananalig ng inyong pamilya kay Cristo gayundin ang sarili mong pananampalataya.

Mga Talakayan Tungkol sa Ebanghelyo

Ang Pagsikat ng Simbahan

Basahin ang artikulo ni Elder de Hoyos sa pahina 36 at talakayin ang mga pagpapalang natatanggap ninyo sa pagiging bahagi ng Simbahan ni Cristo, tulad ng pagkakaroon ng mga buhay na propeta, tunay na doktrina, at mga ordenansa ng priesthood.

Ang Kahalagahan ng Musika

Bakit espesyal ang musika sa Panginoon? Pakinggan, kantahin, o patugtugin ang bagong pagsasaayos ng awiting “Isinugo, Kanyang Anak” sa pahina 34; pagkatapos ay ibahagi ang iyong mga ideya tungkol sa musika o mga titik. Para sa iba pa tungkol sa kahalagahan at mga pagpapala ng musika, basahin ang artikulo sa pahina 30.

Ang Papel na Ginagampanan ng Kababaihan sa Pagpapanumbalik

 Mababasa sa pahina 25 kung paano masigasig na pinangalagaan ni Emma Smith ang Aklat ni Mormon. Paano napagpala ng kababaihan ang Simbahan, at paano nila patuloy na pinagpapala ito? Maaari din ninyong basahin ang mensahe ni Pangulong Ballard sa pahina 8, at pasalamatan ang mabubuting kababaihan sa inyong buhay sa isang nakasulat na liham o mabuting gawa.

Gawing Espesyal ang Sakramento

Basahin ang kuwento tungkol sa isang pamilya sa Vietnam sa pahina 18 at isipin kung paano magiging mas espesyal ang sakramento sa inyong pamilya. Maaaring ibilang sa mga ideya ang pakikinig o pagkanta ng mga himno habang papunta sa Simbahan, pag-alaala sa mga banal na kasulatan na naglalarawan sa pagkatao ni Cristo habang iniisip ninyo Siya sa oras ng sakramento, o pinagninilayan ang mga salita ng mga panalangin ng sakramento.

Magagamit din ninyo ang pahina 6 para ituro sa inyong mga anak ang tungkol sa sakramento.

Suporta sa Pumarito Ka, Sumunod Ka sa Akin

Tingnan sa pahina 26 ang isang pakay-aralin para sa pamilya, scripture chain, at iba pang materyal upang masuportahan ang inyong lingguhang pag-aaral ng Pumarito Ka, Sumunod Ka sa Akin.

Masayang Pag-aaral ng Pamilya

Magagandang Nilikha ng Diyos

Doktrina at mga Tipan 20:17–19

Basahin sa Doktrina at mga Tipan 20:17–19 ang tungkol sa kung paano nilikha ng Diyos ang “langit at lupa, at ang lahat ng bagay na naroon sa mga yaon.”

1. Mag-ukol ng ilang sandali para dumungaw sa isang bintana o maglakad-lakad.

2. Ituro ang mga nilikha ng Diyos na nakikita ninyo.

3. Sinasabi sa atin ng talata 18 na “nilikha [ng Diyos] ang tao, lalaki at babae, ayon sa kanyang sariling larawan at sa kanyang sariling wangis, nilikha niya sila.” Kabilang din tayo sa mga nilikha ng Diyos! Mag-ukol ng ilang sandali para hangaan ang lahat ng bagay na magagawa ng iyong katawan. Ano ang iyong mga talento?

4. Sa talata 19 inutusan tayong “[mahalin at paglingkuran siya], ang tanging buhay at tunay na Diyos.” Paano mo magagamit ang iyong mga talento para mapaglingkuran Siya?

Talakayan: Paano natin sasambahin ang Diyos?

Ideyang iniambag nina Brenda Slade at Lisa Thomas

Bago at Pagkatapos

Doktrina at mga Tipan 20:11, 21–29 (Pebrero)

Sa Doktrina at mga Tipan 20, mababasa natin kung paano binigyang-inspirasyon ng Diyos si Joseph Smith na itatag ang Simbahan ni Jesucristo sa lupa. Sinasabi sa atin ng Doktrina at mga Tipan 20:11 na “ang Diyos ay humihikayat ng mga tao at tinatawag sila para sa kanyang banal na gawain sa panahon at salinlahing ito, maging sa mga sinaunang salinlahi.”

1. Idispley ang isang larawan ni Cristo.

2. Hatiin ang pamilya sa isang “bago” na grupo at isang “pagkatapos” na grupo.

3. Ang mga miyembro ng pamilya sa bawat grupo ay makakakita ng mga salita ng isang propeta na nagpatotoo tungkol kay Cristo bago ang Kanyang buhay sa lupa o pagkatapos nito.

4. Maghalinhinan sa pagbabahagi ng inyong napag-alaman. Huhulaan ito ng iba kung ito ay nabibilang sa grupong “bago” o “pagkatapos”.

5. Matapos magbahagi, ang mga tao sa “bago” na grupo ay tatayo sa kaliwa ng larawan ni Cristo. Ang “pagkatapos” na mga tao ay tatayo sa kanan.

6. Ipaliwanag na ang dalawang grupo ay kapwa mahalaga.

Talakayan: Basahin ang Doktrina at mga Tipan 20:21–29. Paano nakakatulong sa atin ang makabagong patotoong ito kay Cristo na madama na mas malapit tayo sa Kanya? Anong iba pang mga patotoo kay Cristo ang matatagpuan sa mga bahagi 20–29 ng Doktrina at mga Tipan?

Ideya na iniambag ng Mitzi Schoneman

Sa Magasing Para sa Lakas ng mga Kabataan sa Buwang Ito

Ang Sentro ng Pasko ng Pagkabuhay—ang Buhay na Cristo

Kausapin ang inyong mga tinedyer tungkol sa mensaheng ito mula kay Elder Gerrit W. Gong na ipinagdiriwang kung paanong buhay si Cristo para sa ating lahat.

Notebook ng Kumperensya

Magandang paraan ito para makapaghanda at magsulat ng mga sipi sa pangkalahatang kumperensya!

Tulad ng Isang Bintana sa Iyong Kaluluwa

Ibahagi ang kuwentong ito tungkol sa kung paano inantig ng isang interfaith music group sa Florida, USA, ang maraming buhay.

Paano Palaging Mapapasaiyo ang Espiritu

Nagbahagi ng magagandang payo si Elder Pieper kung paano aanyayahan ang Espiritu na makasama natin sa bawat araw.

Ngayong Buwan sa Magasin na Kaibigan

Suporta sa Ligtas na Media

Basahin ang tungkol sa isang batang babae na nalaman kung ano ang ibig sabihin ng matalinong paggamit ng teknolohiya. Maghanap din ng isang bonus na pahina na may mga tip at ideya para matulungan ang inyong mga anak na gamitin ang media sa ligtas at positibong paraan.

Alamin Pa ang Doktrina at mga Tipan

Gumamit ng isang activity page para matulungan ang inyong mga anak na malaman kung ano ang Doktrina at mga Tipan at kung saan ito nagmula.

Pasko ng Pagkabuhay sa Russia

Basahin kung paano ipinagdiriwang ng isang pamilya ang Pagkabuhay na Mag-uli ng Tagapagligtas sa panahon ng Pasko ng Pagkabuhay.

Masayang Oras para sa Pag-aaral ng mga Banal

Maghanap ng mga lingguhang aktibidad para matulungan ang inyong pamilya na pag-aralan ang Pumarito Ka, Sumunod Ka sa Akin, kasama ang isang bahagi na may mga ideya para sa nakababatang mga bata.

Umasa kay Cristo

Basahin ang isang mensahe sa Pasko ng Pagkabuhay mula kay Pangulong Henry B. Eyring at gumawa ng isang aktibidad na nagkukuwento tungkol sa Pasko ng Pagkabuhay.