O Le Galuega Faafaifeautalai Ua Faamanuiaina ai Lo’u Olaga e Faavavau
Ou te tatalo o le a vaai outou alii talavou ma tamaitai talavou ma o outou matua ma iloa le ala o le a faamanuiaina ai e faavavau lou olaga i le galuega faafaifeautalai.
Faafetai, Peresitene Nelson, mo le toe faasoa mai foi o lena fautuaga e tusa ai ma le galuega faafaifeautalai.
Uso e ma tuafafine, i ni nai tausaga ua mavae, a o ou lauga atu i le konafesi aoao, sa faafuasei ona le lelei la’u vaai i lo’u mata tauagavale ona o se mea e ta’ua o se faama’i mata e ono faaleagaina ai le vaaiga taula’i, lea e iu ina leaga tele ma sa tuua ai a’u ua le aoga le vaaiga o lena mata.
A o ou feagai ma lena luitau, ou te matua faafetai lava mo isi ituaiga o vaaiga, e aofia ai se vaaiga fou i mea na tutupu i le tuanai. Pe a ou toe tepa i tua i lo’u olaga, ua mafai ona ou vaai i ni aafiaga patino sa faia ai se eseesega tele. O se tasi o na aafiaga o le ala na faamanuiaina ai lo’u olaga ma faatonutonuina lo’u taunuuga faaleagaga e la’u auaunaga faafaifeautalai o se alii talavou i Egelani.
Sa ou toe tomanatu i le ala na tata’i atu ai e luitau faaletamaoaiga na fesootai ma le Pa’u Tele o le Tamaoaiga i le vaitau o le 1930, i le i ai i se itu lē manuia mo o’u matua ma lo matou aiga. Na matuai nopia’i lo’u tama i le faasaoina o lana pisinisi tautaavale ma le lagolagoina o se aiga i lenei vaitau faigata, ma sa le toe o ai o’u matua i le lotu mo se taimi umi.
E ui matou te lei auai i sauniga lotu o se aiga, ae e lei taofia ai au mai lo matou o i le lotu ma a’u uo i nisi taimi.
I na ona po, o le alu i se misiona o se mea sa ou manao ai, ae e le o se mea sa matou talanoa ai ma o’u matua.
A o ou aoga i le kolisi, e toatele i matou ma a’u uo sa tonu e o e faamisiona. I le talanoa ai ma lo’u epikopo, sa ou faatumuina la’u talosaga faafaifeautalai a o malaga o’u matua. Ina ua toe taliu mai o’u matua, sa ou faateia i la’ua i le talafou ua valaauina au e faamisiona i Peretania Tele. Ou te faafetai mo la la’ua lagolago naunautai i lenei faaiuga ma mo ni uo lelei sa fesoasoani ia te au e fai se tonu e auauna atu.
O la’u galuega faafaifeautalai na saunia ai au ia avea o se tane ma se tamā sili atu, ma ia faamanuiaina i tulaga faapisinisi. Na saunia ai foi au, mo se auaunaga i le olaga atoa i le Alii i Lana Ekalesia.
I le konafesi aoao ia Aperila 1985, sa tofia ai au e lauga i le sauniga a le au perisitua. Sa taulai a’u faamatalaga i alii talavou. Sa ou talanoa e uiga i le sauniuni e auauna atu o se faifeautalai. Sa ou fai atu, “Mai aoaoga faamasani uma na ou maua i o’u tofiga i le Ekalesia e leai ma se mea na sili ona taua ia te a’u nai lo aoaoga faamasani sa ou maua o se toeaina e sefuluiva tausaga le matua na auauna atu i se misiona talai.”1
E silafia oe e le Alii. Pe a e auauna atu i lau misiona, o le a e maua aafiaga o le a fesoasoani e te iloa lelei atili ai o Ia. O le a e tuputupu ae faaleagaga i le auauna atu ia te Ia. I Lona suafa, o le a auina atu ai oe i feau e auauna ai i isi. O le a Ia tuu atu ia te oe le poto masani i uunaiga mai le Agaga Paia. O le a faatagaina oe e le Alii e aoao atu i Lona suafa. E mafai ona e faaali atu ia te Ia e mafai ona Ia faatuatuaina oe ma e mafai ona faalagolago ia te oe.
E silia teisi ma le lima masina talu ai, sa matou auai faatasi ma Elder Jeffrey R. Holland ma Elder Quentin L. Cook, o e sa galulue o ni faifeautalai i le Atu Peretania, e talanoa ma tagata o le au paia ma faifeautalai i lena laueleele matagofie. A o i ai iina, sa ou toe tomanatu i mea na ou oo i ai o se faifeautalai talavou. Ou te molimau atu o la’u misiona o le mea lea sa ou iloa ai e silafia ma alolofa lo’u Tama Faalelagi ma lo’u Faaola, o Iesu Keriso, ia te au.
Sa faamanuiaina au i ni peresitene misiona ofoofogia se toalua, o Selvoy J. Boyer ma Stayner Richards, faatasi ma a la soa, o Gladys Boyer ma Jane Richards. O le toe tepa i tua, e mafai ona ou vaai manino ai sa la faatuatuaina au ma sa alolofa ia te au. Sa la aoao mai ia te au le talalelei. E tele mea sa la faamoemoeina mai ia te au. Sa la tuu mai ia te au ni tofiga faigata se tele ma tiutetauave e taitai ai, e fesoasoani ai ia te au ia ou tuputupu ae ma saunia ai mo le olaga o auaunaga.
Sa ou toe tomanatu foi i lo’u valaauina e Peresitene Spencer W. Kimball e pulefaamalumalu i le Misiona a Kanata Toronto, ma si o’u toalua pele o Barbara, ma le ma fanau i o ma autafa. Sa valaauina i ma’ua e Peresitene Kimball e galulue ia Aperila 1974, ae faatoa maea lava lena ona ia tuuina mai lana savali musuia faafaifeautalai sa faaulutalaina “Pe A Liuaina le Lalolagi.”2 I lena savali, sa faamalamalama mai ai e Peresitene Kimball lana vaaiga mamao i le ala o le a avatu ai le talalelei i le lalolagi atoa. Sa ia valaau atu mo nisi mau faifeautalai mai le lalolagi atoa. Sa ia faamanatu mai ia i matou le faamoemoega o le Alii “e tatau i tagata uma ona … sii atu se leo o le lapataiga i tagata o le lalolagi.”3 Na avea le aoaoga a Peresitene Kimball e uiga i le faamoemoega mo alii talavou e auauna atu i se misiona o se autu o talanoaga i aiga i le lalolagi atoa. E lei suia lava lena faamoemoega. Ou te faafetai ona sa toefaamautinoa mai e Peresitene Russell M. Nelson le faamoemoega o le Alii i le taeao nei.
Ua toetoe atoa le 10 tausaga talu ona fofoga mai e Peresitene Thomas S. Monson le tuu i lalo o tausaga o le matutua o faifeautalai mo alii talavou ma tamaitai talavou.4 I lo’u manatu, o se mafuaaga muamua mo lenei suiga o le avatu ai lea i le toatele o o tatou talavou o le avanoa e suia ai olaga e auauna ai o se faifeautalai.
I le avea ai ma se Aposetolo a le Alii o Iesu Keriso, ou te valaau atu nei ia te outou alii talavou—ma na tamaitai talavou o e mananao e auauna atu i se misiona—ia amata nei loa ona talanoa i o outou matua e uiga i le auauna atu i se misiona. Ou te valaaulia foi outou e talanoa ia outou uo e uiga i le auauna atu i se misiona ma afai e le o mautinoa e se tasi o au uo pe alu, fautuaina i latou e talanoa i o latou epikopo.
Tuuto atu outou lava ma i la outou Tama Faalelagi o le a outou auauna atu i se misiona ma mai i lenei taimi ma agai atu i luma, o le a outou taumafai malosi e tausisia le mama ma le agavaa o outou loto, lima ma mafaufau. Ou te valaaulia outou ia maua se molimau mautu i le talalelei toefuataiina a Iesu Keriso.
Tama ma tina o nei talavou ofoofogia, ua ia te outou se matafaioi taua i lenei faagasologa o tapenaga. Amata i le aso ona talanoa ia outou fanau e uiga i le galuega faafaifeautalai. Ua tatou iloa o le aiga o le tosinaga aupito maoae lea i le fesoasoani atu i o tatou alii talavou ma tamaitai talavou e saunia.
Afai o lena lava e te i ai i le vaitau o tausaga mo le galuega faafaifeautalai ae e te lei auauna atu lava ona o le faama’i oti po o nisi mafuaaga, ou te valaaulia oe e auauna atu nei loa. Talanoa i lou epikopo, ma sauni e auauna atu i le Alii.
Ou te fautuaina outou epikopo, ia fesoasoani i alii talavou uma ma tamaitai talavou o e ua latalata i le vaitausaga o faifeautalai, e sauniuni e auauna atu, ma ou te fautuaina foi outou epikopo ia faailoa i latou ua lava le matutua ae e le’i avea lava o ni faifeautalai. Valaaulia alii talavou taitoatasi ia avea o se faifeautalai, faapea foi tamaitai talavou o e mananao e auauna atu.
I faifeautalai o loo auauna atu i le taimi nei, matou te faafetai atu. Ua e faamisiona i le taimi o se faama’i oti i le lalolagi atoa. O le taunuuga, e le pei aafiaga o lau misiona o aafiaga o la’u misiona po o aafiaga o soo se faifeautalai na galulue a o le i oo i le 2020. Ou te iloa e le’i faigofie. Ae e ui lava i nei taimi faigata, ae sa i ai lava i le Alii se galuega mo oe e fai, ma ua matuai lelei ona e faia. Mo se faataitaga, ua outou faaaogaina tekinolosi i ni ala fou e sue ai i latou o e ua saunia e aoao e uiga i le Toefuataiga o le talalelei a Iesu Keriso. A o outou auauna atu ma le maelega ma tusa ai ma lo outou gafatia, ou te iloa ua faamalieina le Alii ia outou taumafaiga. Ou te iloa o lou auauna atu o le a faamanuiaina ai lou olaga.
Pe a oo ina faamaloloina mai oe mai lau misiona, manatua e le o faamaloloina oe mai lou toaga i le Lotu. Fausia i luga o mausa lelei sa e aoaoina i lau misiona, faaauau e faamalosi lau molimau, galue malosi, tatalo, ma ia usiusitai i le Alii. Faamamalu i feagaiga ua uma ona e osia. Faaauau e faamanuia ma auauna atu ai i isi.
Ou te tatalo o le a vaai outou alii talavou ma tamaitai talavou ma o outou matua ma iloa le ala o le a faamanuiaina ai e faavavau lou olaga i le galuega faafaifeautalai. Ia outou iloa i o outou mafaufau ma lagonaina i o outou loto le mana o le valaaulia na tuuina atu e le Alii i atalii faifeautalai maoae o Mosaea. Na Ia fetalai atu, “Ia outou o atu … ma faatu la’u upu; peitai ia outou onosai i le tali-tiga ma puapuaga, ina ia mafai ona outou faaali atu faataitaiga lelei ia te i latou e ala atu ia te au, ma o le a ou faia outou o se mea faigaluega i oʼu lima mo le olataga o agaga e toatele.”5
Ia faamanuia le Atua i le autalavou o le Ekalesia ia mananao e saunia ma auauna atu ia te Ia o la‘u tatalo faamaualalo lea, lea ou te ofoina atu i lenei taeao i le suafa paia o le Alii o Iesu Keriso, amene.