Aua Ua Faapea Lava Ona Alofa Mai le Atua ia te i Tatou
E matua alofa lava le Atua ia i tatou ua Ia auina mai ai Lona Alo e Toatasi na Fanaua—e le tausalaina ai i tatou, ae ia laveai i tatou.
“Aua na faapea lava ona alofa mai o le Atua i le lalolagi, na Ia aumai ai Lona Atalii e toatasi, ina ia le fano se tasi e faatuatua ia te Ia, a ia maua e ia le ola e faavavau” (Ioane 3:16). O le taimi muamua lava na ou matauina ai lenei fuaiupu, ou te le’i i ai i le lotu po o le afiafi faaleaiga. Sa ou matamata i se taaloga i le televise. Po o le a lava le alaleo sa ou matamata ai, ae po o le a foi se taaloga sa fai, ae sa i ai lava se tagata e toatasi na uuina se faailoilo na faitauina “Ioane 3:16.”
Sa faapena foi ona ou fiafia i le fuaiupu e 17: “Aua e lei auina mai e le Atua lona Atalii i le lalolagi ina ia faasala i le lalolagi, a ia faaolaina le lalolagi ia te ia.”
Na auina mai e le Atua Iesu Keriso, Lona Alo e Toatasi i la le tino, e tuuina mai Lona soifua mo i tatou uma taitoatasi. Na Ia faia lenei mea ona e alofa o Ia ia i tatou ma sa mamanuina se fuafuaga mo i tatou taitoatasi e toe foi atu ai ia te Ia.
Peitai, e le o se fuafuaga lautele faapea o se taimi e manuia o se taimi foi e misi. E patino, ua faatuina e se Tama Faalelagi alofa, o le e silafia o tatou loto, o o tatou igoa, ma mea Na Te manaomia i tatou e fai. Aisea tatou te talitonu ai i lena mea? Aua ua aoao ai i tatou i tusitusiga paia.
Na faalogo faafia Mose i le Tama Faalelagi o tulei mai i upu “Mose e, lo’u atalii” (tagai i le Mose 1:6; tagai foi i fuaiupu e 7, 40). Sa aoaoina e Aperaamo o ia o se atalii o le Atua, na filifilia mo lana misiona a o le’i fanau mai o ia (tagai i le Aperaamo 3:12, 23). O le aao o le Atua, na tuu ai Eseta i se tulaga o le uunaiga e laveai ai lona nuu (tagai i le Eseta 4). Na faatuatuaina foi e le Atua se tamaitai talavou, o se auauna, e molimau atu e uiga i se perofeta soifua ina ia mafai ai ona faamaloloina Naamanu (tagai i le 2 Tupu 5:1–15).
E sili ona ou fiafia i lena alii lelei, e puupuu, o le sa a’e i se laau ia vaai ai ia Iesu. Sa silafia e le Faaola o la e i ai o ia iina, sa tu, tepa a’e i luga i lala o le laau, ma fetalai atu upu nei: “Sakaio e, … ifoifo ia i lalo” (Luka 19:5). Ma e le mafai ona tatou faagaloina le taulealea e 14 tausaga sa alu i se togavao ma sa ia aoaoina ai le patino moni o le fuafuaga: “[Iosefa,] O Lo’u Atalii Pele Lenei. Faalogo ia Te Ia!” (Iosefa Samita—Talafaasolopito 1:17).
Uso e ma tuafafine, o i tatou o le taula’iga o le fuafuaga a lo tatou Tama Faalelagi ma o le mafuaaga foi o le misiona a lo tatou Faaola. O i tatou taitoatasi, maioio, o la La’ua galuega ma lo La’ua mamalu.
Ia te a’u, e leai se tusi o tusitusiga paia o sili ona faapupula manino mai ai nai lo’u suesueina o le Feagaiga Tuai. O lea mataupu ma lea mataupu tatou te maua ai faataitaiga o le ala o loo aofia tonu ai le Tama Faalelagi ma Ieova i o tatou olaga.
Na tatou suesue talu ai nei e uiga ia Iosefa, le atalii pele o Iakopo. Mai lava i lona talavou, sa matuai alofagia ai Iosefa i le Alii, ae sa o’o o ia i tofotofoga tetele i lima o ona uso. Lua vaiaso talu ai, e toatele i tatou na tuia loto i le ala na faamagalo ai e Iosefa ona uso. I le Sau, Mulimuli Mai ia te A’u ua tatou faitau ai: “E tele auala, na tutusa ai le olaga o Iosefa ma le [soifuaga] o Iesu Keriso. E ui lava o a tatou agasala na mafua ai ona puapuaga tele o Ia, ae na ofoina mai e le Faaola le faamagaloga, ma laveai ai i tatou uma mai se mala e sili atu le leaga nai le oge. Pe tatou te manaomia ona maua le faamagaloga po o le tuuina atu o le faamagaloga—e i ai le taimi tatou te manaomia uma ai mea e lua—o le faataitaiga a Iosefa ua faasino atu ai i tatou i le Faaola, o le afuaga moni lena o le faamalologa ma le faaleleiga.”1
O se lesona ou te fiafia i ai i lena tala e maua mai le uso o Iosefa, o Iuta, o le sa i ai sana vaega i le fuafuaga patino a le Atua mo Iosefa. Ina ua faalataina Iosefa e ona uso, sa faatauanauina e Iuta i latou e aua ne’i fasiotia Iosefa, ae faatau atu o ia e fai ma pologa (tagai Kenese 37:26–27).
Na mavae tausaga e tele mulimuli ane, sa manaomia ai e Iuta ma ona uso ona ave lo latou uso aupito itiiti, o Peniamina, i Aikupito. I le taimi muamua, sa teena e lo latou tama. Ae na faia e Iuta se folafolaga ia Iakopo—o le a ia aumaia Peniamina i le fale.
I Aikupito, sa tofotofoina ai le folafolaga a Iuta. Sa molia sese Peniamina le Itiiti i se solitulafono. O Iuta, i le faamaoni ai i lana folafolaga, na ofo atu ia faafalepuipui o ia e sui ia Peniamina. “Aua,” na ia faapea ai, “ou te mafaia faapefea ona ou alu a’e i lo’u tama, ae le o ia te au le tama?” (tagai i le Kenese 44:33–34). Na filima’oti Iuta e tausi lana folafolaga ma toe faafoi saogalemu atu Peniamina. Pe i ai ea ni ou lagona e uiga i isi e faapei ona lagonaina e Iuta ia Peniamina?
Pe le faapena foi lagona o matua ia latou fanau? Lagona o faifeautalai i tagata latou te auauna i ai? Lagona o taitai o le Peraimeri ma le autalavou ia i latou e faiaoga ma alolofa i ai?
E le afaina pe o ai oe po ou tulaga o i ai nei, e i ai lava se tasi e lagona foi faapena e uiga ia te oe. E i ai se tasi e manao e toefoi faatasi atu ma oe i le Tama Faalelagi.
Ou te faafetai lava ia i latou e le fiu gofie ia i tatou, o e sasaa atu pea o latou agaga i tatalo mo i tatou, ma o faaauau pea ona faiaoga ma fesoasoani ia i tatou ia agavaa e toefoi atu i le aiga i lo tatou Tama i le Lagi.
Talu ai nei, na i ai se uo pele na nofo i le falemai mo le 233 aso ona o le KOVITI-19. I lena taimi, sa asiasi atu ai i ai lona tama ua maliu, ma talosagaina o ia e momoli se feau i fanau a lana fanau. E oo lava i talaatu o le veli, sa manao ai lenei tamamatua lelei e fesoasoani i fanau a ana fanau e toefoi atu i le aiga faalelagi.
Ua faateleina, ona manatua e soo o Keriso ia “Peniamina” i o latou olaga. I le salafa o le lalolagi, ua latou faalogoina le feau manino a le perofeta soifua a le Atua, o Peresitene Russell M. Nelson. O loo punouai alii talavou ma tamaitai talavou i le autau talavou a le Alii. O loo aapa atu tagata taitoatasi ma aiga i se agaga o le auaunaga—alolofa, faasoa atu, ma valaaulia uo ma tuaoi e o mai ia Keriso. O loo manatua e talavou ma le au matutua ma o loo tauivi e tausi a latou feagaiga—faatutumu malumalu o le Atua, sue igoa o tagata o aiga ua maliliu, ma talia sauniga e fai mo latou sui.
Aisea ua aofia ai i le fuafuaga patino a le Tama Faalelagi mo i tatou le fesoasoani i isi e toefoi atu ia te Ia? Aua o le ala lena tatou te avea ai faapei o Iesu Keriso. O le taualuga, o le tala ia Iuta ma Peniamina o loo aoao mai ai i tatou e uiga i le taulaga a le Faaola mo i tatou. E ala i Lana Togiola, na Ia ofoina mai ai Lona soifua e toe avatu ai i tatou. O upu a Iuta o loo momoli mai ai le alofa o le Faaola: “Ou te mafai faapefea ona ou alu a’e i lo’u tama, ae le o ia te au [oe]?” I le avea ai ma ē o faapotopotoina Isaraelu, e mafai foi ona avea na upu ma a tatou upu.
Ua tumu le Feagaiga Tuai i vavega ma le alofa mutimutivale ia ua avea ma uiga iloga o le fuafuaga a le Tama Faalelagi. I le 2 Tupu 4, o le fasifuaitau “o le tasi aso” e faatolu ona faaaogaina e faamamafa ai mea taua na tutupu e tusa ai ma le taimi a le Atua, ma e leai se faamatalaga e itiiti tele naua mo Ia.
Ua molimau mai la’u uo fou o Paulo i lenei mea moni. Na ola a’e Paulo i se aiga o nisi taimi e sauaina ma e le fiafia pea lava i lotu. A o auai i se a’oga i le nofoaga o le militeli i Siamani, sa ia matauina ni tuafafine se toalua e foliga mai e i ai se malamalama faaleagaga. Ina ua fesili pe aisea na ese ai i la’ua, na maua ai le tali faapea e auai i la’ua i Le Ekalesia a Iesu Keriso o le Au Paia o Aso e Gata Ai.
E lei pine ae amata ona feiloai Paulo ma faifeautalai ma sa valaaulia o ia i le lotu. O le Aso Sa na sosoo ai, a o oso ese o ia mai le pasi, sa ia vaaia ni alii se toalua e papa’e o la ofutino ma fusiua. Sa ia fesili pe o i la’ua o ni faifeau o le Ekalesia. Sa la tali ane ioe, o lea na mulimuli ai Paulo ia i la’ua.
I le taimi o le sauniga, sa tusi atu se faifeau i tagata i le potopotoga ma valaaulia i latou e faia ni molimau. I le faaiuga o molimau taitasi, sa ta e le ta talipalau se fa’aalo i le talipalau ma sa alalaga atu le potopotoga, “Amene.”
Ina ua tusi atu le lima o le faifeau ia Paulo, sa tu o ia i luga ma faapea atu, “Ou te iloa o Iosefa Samita o se perofeta ma e moni le Tusi a Mamona.” Sa leai se tasi e fa’aalo i le talipalau po o se amene. Sa mulimuli ane iloa e Paulo, e sese le ekalesia lea sa alu i ai. E lei leva, ae maua e Paulo lona ala i le nofoaga sa’o ma sa papatisoina ai.
I le aso o le papatisoga o Paulo, sa fai atu se tagata o le ekalesia na te le iloa, “Ua e faasaoina lo’u ola.” I nai vaiaso na muamua atu, sa tonu ai i lenei tamaloa e sue se isi lotu ma auai i se sauniga e i ai talipalau ma amene. Ina ua faalogo le tamaloa o tuu atu le molimau a Paulo e uiga ia Iosefa Samita ma le Tusi a Mamona, sa ia iloaina ai sa silafia o ia e le Atua, silafia ana tauiviga, ma sa i ai se fuafuaga mo ia. Mo Paulo ma lea tamaloa, e moni lava sa i ai “le tasi aso.”
Ua tatou iloa foi e i ai se fuafuaga patino o le fiafia a le Tama Faalelagi mo i tatou uma. Aua na auina mai e le Atua Lona Alo Pele mo i tatou, o vavega tatou te manaomia o le a “[pauu] tonu i lena lava aso” e tatau ai mo Lana fuafuaga ia faataunuuina.
Ou te molimau atu o le tausaga lenei ua mafai ai ona tatou aoao atili e uiga i le fuafuaga a le Atua mo i tatou i le Feagaiga Tuai. Ua aoao mai e lena voluma paia le matafaioi a perofeta i taimi le mautinoa ma le aao o le Atua i se lalolagi sa fememea’i ma e tele ina fetaua’i. E faatatau foi i le au talitonu lotomaualalo o e sagisagi faamaoni atu i le afio mai o lo tatou Faaola, e faapei ona tatou sagisagi atu ma sauniuni mo Lona Afio Mai Faalua —Lona toe foi mamalu mai ua loa ona valoia.
Seia aulia lena aso, atonu tatou te le vaai i ai, i o tatou mata faalenatura, i le mamanu a le Atua mo itu uma o o tatou olaga (tagai i le Mataupu Faavae ma Feagaiga 58:3). Ae e mafai ona tatou manatua le tali a Nifae ina ua fetaiai ma se mea sa ia le’i malamalama ai: e ui ina sa ia le’i iloaina le uiga o mea uma, ae sa ia iloa e alofa le Atua i Ana fanau (tagai i le 1 Nifae 11:17).
O la’u molimau lea i lenei taeao matagofie o le Sapati. Ia tatou tusia i o tatou loto ma tuu atu ia faatumulia ai o tatou agaga i le filemu, faamoemoe, ma le olioli e faavavau: Aua ua faapea lava ona alofa mai le Atua ia te i tatou ua Ia auina mai ai Lona Alo e Toatasi na Fanaua—e le tausalaina ai i tatou, ae ia laveai i tatou. I le suafa o Iesu Keriso, amene.