Peitai Sa Matou Lē Amanaiaina i Latou
O feagaiga ma sauniga e faasinoa i tatou i, ma fesoasoani e le aunoa tatou te manatua ai lo tatou sootaga ma le Alii o Iesu Keriso a o tatou agaigai i luma i le ala o feagaiga.
O lo’u toalua, o Susan, o o ma atalii e toatolu ma o latou taitoalua, o fanau uma a le ma fanau, ma Elder Quentin L. Cook, o le ua toeitiiti atoa le 15 tausaga o ma nonofo faatasi i le Korama a le Toasefululua, o le a vave ioe uma i le mea moni e le lelei sa’u pese. Peitai e ui i le leai o sa’u taleni pese, ou te fiafia lava i viiga o le Toefuataiga. O le tuufaatasiga o upu musuia ma fati ofoofogia e fesoasoani ia te a’u e aoao ai mataupu faavae e tatau ai o le talalelei ma faagaeetia ai lo’u agaga.
O se tasi viiga ua faamanuiaina ai lo’u olaga i ni ala maoae o le “Faamalosi Ia i le Galuega Nei.” Talu ai nei, sa ou manatunatu loloto ai ma aoao e uiga i se fasifuaitau patino i se laina usu faafia o lena viiga. “Ia le tuu i le fili faifai mai, o le Alii usita’i i ai.”1
Ia le tu’u i ai.
A ou usuina le “Faamalosi ia i le Galuega Nei,” e tele ina ou mafaufau i tagata o i le faaaliga ia Liae o fetuleni atu i luma i luga o le ala e tau atu i le laau o le ola, o e sa na ona “fepiiti i le2 ae sa “piimau pea i le ai u’amea, seia oo ina latou o mai i luma ma faapauu i lalo ma aai i le fua o le laau.”3 Sa faamatala e Liae le motu o tagata sa i le fale tele ma le ateatea, sa tusitusi “mai tamatamailima o le faatauemu ia te [ia] ma i latou] … na aai i le fua.”4 O lana tali atu i tagata taufaifai ma faatiga e ofoofogia ma e manatua pea: “Peitai sa matou lē amanaiaina i latou.”5
Ou te tatalo ia faamanuiaina ma faamalamalamaina e le Agaga Paia i tatou taitoatasi a o tatou mafaufau faatasi pe mafai faapefea ona faamalolosia i tatou ia “lē amanaiaina” tosinaga faatiapolo ma leo faatauemu a le lalolagi faitifiga o tatou nonofo ai.
Lē Amanaiaina
O le upu amanaiaina e fautuaina mai ai le matau po o le gauai atu i se tasi po o se mea. O lea la, o upu o le viiga “Faamalosi ia i le Galuega Nei” ua apoapoai mai ai i tatou e faia se faaiuga tonu e fai atu leai i “mea e fai mai ai le fili.” Ma ua tuuina mai e Liae ma tagata na faatasi ma ia, o e sa aai i le fua o le laau, se faataitaiga malosi o le lē ua’i atu i le au tauemu ma le au taufaifai lea e tele ina sau mai le fale tele ma le ateatea.
O le aoaoga faavae autu a Keriso o loo tusia “i le Agaga o le Atua soifua … i papatusi aano o [tatou loto]”6 e faateleina ai lo tatou gafatia ia “lē amanaiaina” le tele o faalavefau, o faatosinaga ma fesuiaiga i lo tatou lalolagi pau. Mo se faataitaiga, o le faatuatua e taulai i ai ma i lo tatou Alii o Iesu Keriso e lagolagoina ai i tatou i le malosiaga faaleagaga. O le faatuatua i le Faaola o se mataupu faavae o le faatinoga ma le mana. A tatou faatino e tusa ai ma upumoni o Lana talalelei, e faamanuiaina i tatou i le gafatia faaleagaga e fetuleni atu ai i luma e ui atu i luitau o le olaga nei, a o taulai atu i olioliga ua ofo mai e le Faaola ia i tatou. E moni, “A tatou fai mea tonu, tatou te le fefe ai, aua o le Alii o le a Ia fesoasoani mai.”7
O Se Sootaga Patino e ala i Feagaiga
O le ulu atu i feagaiga paia ma maua ma le agavaa ia sauniga o le perisitua, e fusia faatasi ai i tatou i le Alii o Iesu Keriso ma le Tama Faalelagi.8 O lona uiga ua tatou faatuatuaina le Faaola o lo tatou Fautua9 ma le Puluvaga10 ma faalagolago i Lona mana, alofamutimutivale, ma le alofa tunoa11 i le faigamalaga i le olaga. A o tatou mausali e o mai ia Keriso, ma ua fusia faatasi ma Ia, tatou te mauaina faamanuiaga o le faamamaaga, faamalologa, ma le faamalosiauga o Lana Togiola le i’u ma faavavau.12
O le ola ma fiafia i tautinoga o feagaiga e fatuina ai se sootaga ma le Alii lea e patino loloto ma mamana faaleagaga. A o tatou faamamaluina tuutuuga o feagaiga paia ma sauniga, e faifaimalie lava ma auauai ona tatou latalata atili ia te Ia13 ma iloa ai le aafiaga o Lona paia ma le moni o loo soifua i o tatou olaga. Ona matuai sili atu ai lea ona avea Iesu ma tagata tupito i tala o tusitusiga paia; e tosina e Ana faataitaiga ma aoaoga o tatou manao uma, mafaufauga, ma faatinoga.
O le mea moni e leai so’u tomai e lava ai ona ou faamatalaina le natura ma’oti ma le mana o sootaga o a tatou feagaiga ma le Alo toetu soifua o le Atua. Ae ua ou molimauina ia sootaga ma Ia ma le Tama Faalelagi, e moni ma o pogai sili ia o le mautinoa, filemu, olioli, ma le malosi faaleagaga lea e mafai ai ona tatou “le popole ai, i le fili e faifai mai.”14 I le avea ai ma soo osi-feagaiga ma tausi-feagaiga o Iesu Keriso, e mafai ona faamanuiaina i tatou e “lotototoa , aua ua ‘au i tatou ma le Alii”15 ma lē ua’i atu ai i tosinaga faatiapolo ma tauemuga a le lalolagi.
A o ou asiasi atu i tagata o le Ekalesia i le salafa o le lalolagi, e tele ina ou fai atu ia i latou le fesili lea: o le a se mea o fesoasoani ia te oe e te “lē amanaiaina” ai tosinaga, tauemuga, ma le taufaifai mai o le lalolagi? E fesoasoani tele a latou tali.
E tele ina faamamafa mai e tagata totoa o le au paia le taua o le valaaulia o le mana o le Agaga Paia i o latou olaga e ala i le suesue ma le ‘anoa o tusitusiga paia, tatalo faatauanau, ma tapenaga tatau e auai i le sauniga o le faamanatuga. E tele foi ina ta’ua le lagolago faaleagaga a tagata faamaoni o aiga ma uo faatuatuaina, o lesona taua e aoaoina e ala i auaunaga ma le galulue i le Ekalesia toefuataiina, ma le gafatia e iloatino ai le gaogao ‘i’ī o se mea e sau i totonu pe sau mai le fale tele ma le ateatea.
Ua ou matauina i tali a nei au paia se mamanu faapitoa e faapitoa lona taua. O le mea muamua ma le aupito sili, o le i ai lea i nei soo o ni molimau mausali i le fuafuaga o le fiafia a le Tama Faalelagi ma le matafaioi a Iesu Keriso o lo tatou Togiola ma lo tatou Faaola. Ma le lona lua, o lo latou silafia faaleagaga ma le talitonuga maumaututu e a le tagata lava ia, e patino, ma e maioio; e le āoāo tetele ma faimanatu. Ou te faalogologo i nei tagata tuuto o talanoa e uiga i feagaiga e maua ai le malosiaga e faatoilalo ai le fili ma o latou sootaga ma le Alii soifua e lagolago ai i latou i taimi lelei ma taimi leaga. O nei tagata, e moni lava o Iesu Keriso o se Faaola totino.
O feagaiga ma sauniga o le talalelei e faatino i o tatou olaga e pei lava foi o se tapasa. O le tapasa o se masini e faaaoga e ta’u mai ai itu tupito o matu, saute, sasae, ma sisifo mo faamoemoega o le faatautaiga ma le faasinoga faalefaafanua. I se ala foi faapena, o a tatou feagaiga ma sauniga e faasinoa i tatou i, ma fesoasoani e le aunoa tatou te manatua ai lo tatou sootaga ma le Alii o Iesu Keriso a o tatou agaigai i luma i le ala o feagaiga.
O le taitaiga tupito mo i tatou uma i le olaga nei o le o mai ma faaatoatoaina ia Keriso.16 E fesoasoani feagaiga paia ma sauniga tatou te taulai atu ai i le Faaola ma taumafai malosi, faatasi ai ma Lona alofa tunoa,17 ia avea atili e faapei o Ia. O le mea sili ona mautinoa, “e fesoasoani mai se mana le vaai i le taua o mea tonu.”18
Pipii Mau i le Āi U’amea
O lo tatou sootaga i feagaiga ma le Atua ma Iesu Keriso o le ala lea e mafai ai ona tatou maua le gafatia ma le malosiaga ia “lē amanaiaina.” Ma e faamalosia foi lenei noataga pe a faaauau pea ona tatou piimau i le āi u’amea. Ae pei ona sa fesili uso o Nifae, “O le a le uiga o le āi u’amea na vaai i ai lo tatou tama … ?
“Ma sa fai atu [Nifae] ia te i latou o le afioga lea a le Atua; ma ai se e faalogo i le afioga a le Atua, ma pipiimau i ai, e lē fano lava i latou; pe mafai foi e faaosoosoga ma ufanafana mu a le fili ona faatoilaloina i latou i le faatauasoina, e taitai ese atu ai i latou i le faafanoga.”19
Faamolemole matau o le tomai e teena ai faaosoosoga ma u fanafana mu a le fili, ua folafola atu ia i latou o e “pipiimau i le” ae le na ona “fepi’iti i le” afioga a le Atua.
E mata’ina, le faamatalaina e le Aposetolo o Ioane o Iesu Keriso o le Upu.20
“Sa i le amataga le Upu, sa i le Atua le Upu ma o le Atua foi le Upu . …
“Na ia faia mea uma lava; e leai foi se mea e tasi na faia e lei faia e ia.”
“Ma o le Upu lava lea sa liu tino tagata, sa mau foi ma i tatou, (ma sa matou vaaia lona mamalu, o le mamalu pei o le Toatasi na Fanaua e le Tamā,) ua tumu i le alofa tunoa ma le upumoni.”21
O le mea lea, o se tasi o suafa o Iesu Keriso o “Le Upu.”22
E le gata i lea, o le mataupu faavae lona valu o le faatuatua o loo faapea mai, “Matou te talitonu o le Tusi Paia o le afioga a le Atua i mea uma ua tonu ona faaliliuina; matou te talitonu foi o le Tusi a Mamona o le afioga ia a le Atua.”23
O le mea lea, o aoaoga a le Faaola, e pei ona tusia i Tusitusiga Paia “o le upu” foi lea.
Se’i ou fautuaina atu faapea o le pipiimau i le afioga a le Atua e aofia ai le (1) manatua, faamamalu, ma le faamalolosia o sootaga patino ma le Faaola ma Lona Tama e ala i feagaiga ma sauniga o le talalelei toefuataiina ma le (2) faaaogaina ma le lototatalo, pulunaunau, e le aunoa o tusitusiga paia ma aoaoga a perofeta soifua ma aposetolo e fai ma pogai mautu o upumoni ua faaalia. A o tatou noatia ma “pipii mau” i le Alii ma suia e ala i le ola ai i Lana mataupu,24 ou te folafola atu o le a faamanuiaina taitoatasi ma faatasi i tatou e “tutu i nofoaga paia, ma o le a lē masii ese.”25 Afai tatou te tumau ia Keriso, o le a tumau foi o Ia ma savavali faatasi ma i tatou.26 E moni lava, “E ‘au o Ia ma le Au Paia i faigata, ia malo ai i mea tonu.”27
Molimau
Fetaomi pea. Pipii mau. Ia lē amanaiaina.
Ou te molimau atu o le faamaoni i feagaiga ma sauniga paia o le talalelei toefuatai a le Faaola e mafai ai ona tatou fetaomi atu i le galuega a le Alii, e pipii mau ia te Ia o le Afioga a le Atua, ma ia lē amanaiaina faatosinaga a le fili. I le taua mo mea tonu, ia taitasi i tatou ma sasau se pelu, “le pelu malosi o mea tonu,”28 i le suafa paia o Iesu Keriso, amene.