“Camille N. Johnson,” Liahona, Me 2022.
Camille N. Johnson
Peresitene Aoao o le Aualofa
O Camille N. Johnson na te “lagonaina i taimi uma le i ai i le aiga” i le Aualofa.
“Sa ou maua le usoga faaleuso i tamaitai o e sa ese mai ia te au,” sa ia saunoa ai e uiga i ona aafiaga i le Aualofa, e aofia ai le 30 ma ona tupu tausaga i uarota faaleaiga i le Iunaite Setete ma Peru. “Ou te fiafia i le ola ma le atamai o tamaitai i le Aualofa.”
Ua ia maua ni faufautua ma ni uo i le Aualofa, e aofia ai nisi e matutua atu ma laiti ifo nai lo ia.
“O i tatou uma o uso e i ai se aafiaga fefaasoaai i lo tatou naunau e toe foi atu i lo tatou aiga faalelagi ae faatasi ai ma aafiaga eseese e mafai ona tatou utuvai mai ai e fesoasoani ai le tasi i le isi,” na saunoa ai Sister Johnson.
Sa auauna atu Sister Johnson o se Peresitene Aoao o le Peraimeri mo le tausaga ua tuanai. O le a amata lana auaunaga o se Peresitene Aoao o le Aualofa i le aso 1 o Aokuso.
O se tasi o ona valaauga e sili ona fiafia i ai o le faiaoga lea i le Aualofa.
“Ou te fiafia lava i le avanoa e faaauai ai tamaitai ma aoaoina e le Agaga ma le tasi ma le isi i lena itula paia i le Aualofa. O iina tatou te talanoa ai e uiga ia Keriso ma olioli ia Keriso ma talanoaina mataupu o le loto.”
Sa soifua mai Camille Neddo Johnson ia Setema 1963 ia Hal ma Dorothy Neddo i Pocatello, Idaho, ISA. Na faaipoipo atu ia Douglas R. Johnson i le aso 31 Iulai, 1987, i le Malumalu o Sate Leki. E toatolu o la’ua alo tama ma fanau o fanau e toalima.
Sa faauu o ia mai le Iunivesite o Iuta i le gagana Peretania i le 1985 ma mai le Iunivesite o Iuta S. J. Quinney College o le Tulafono i le 1989. Sa galue o ia mo le silia ma le 30 tausaga o se loia ma sa avea ma peresitene o le kamupani loia a Snow Christensen& Martineau.
Sa avea muamua ma peresitene o Tamaitai Talavou a le uarota, sa auauna atu foi Sister Johnson o se tasi o au peresitene o le Aualofa ma le Peraimeri a le uarota ma se faiaoga o le Aoaoga Faavae o le Talalelei ma le Aualofa. Sa ia auauna atu foi ma lona toalua mai le 2016 i le 2019 a o pulefaamalumalu ai o ia i le Misiona a Peru Arequipa.