Aoaoina Atu o le Ola-Tutoatasi i Tamaiti ma le Autalavou
Ia tatou mulimuli i lo tatou Faaola, o Iesu Keriso, ma Lana talalelei e ala i le ola-tutoatasi i o tatou olaga atoa ma aoao atu lenei mea i a tatou tamaiti ma le autalavou.
O le a ou talanoa atu e uiga i le ola-tutoatasi ma le auala e mafai ona aoao atu ai i tamaiti ma i le autalavou. O le ola-tutoatasi e ono vaai i ai o se mataupu mo na o tagata matutua. Ua ou iloa e mafai ona lelei silisili tagata matutua i luga o le ala agai atu i le ola-tutoatasi pe afai e aoaoina i latou i le talalelei a Iesu Keriso ma latou faatinoina ona aoaoga faavae ma mataupu faavae talu mai lo latou tamaitiiti faapea ai ma lo latou talavou i le aiga.
O le faataitaiga sili lava, o se faataitaiga moni sili mai le olaga. O Wilfried Vanie, o ona tei e toafitu, ma lona tina sa auai i le Ekalesia i Abidjan, Ivory Coast, ina ua ono ona tausaga. Sa papatisoina o ia i le valu o ona tausaga. O si ona tamā, le tagata autu sa tausia le aiga, na maliu ina ua sefulutasi tausaga o Wilfried.
E ui sa faanoanoa i tulaga faaleaiga, ae sa tonu ia Wilfried e faaauau le a’oga ma le faamalosi’auga a lona tina ma le lagolagosua a le Ekalesia. Sa faauu o ia mai le a’oga tulagalua ma auauna atu i se misiona faafaifeautalai i le Misiona a Ghana Cape Coast, lea na ia aoao ai le FaaPeretania. I le mavae o lana misiona, sa ia faaauau atu i le iunivesite ma maua ai se tipiloma i le tausitusi ma meatautupe. E ui sa faigata ona maua se galuega i lenei matata, ae sa ia maua se galuega i le vaega o turisi ma talimalo.
Sa ia amata o se tautu uaina ma meaai i se faletalimalo lima-fetu, ae o lona faanaunauga ia faaleleia na uunaia ai o ia e aoao atili seia oo ina avea ma se talimalo mo gagana e lua iina. Ina ua tatala se faletalimalo fou, sa faafaigaluegaina o ia o se suetusi i le po. Mulimuli ane, sa lesitala o ia i le BYU–Pathway Worldwide, ma o loo suesueina i le taimi nei se kosi ina ia maua ai se tusi faamaonia i pulega faatalimalo ma le turisi. O lona manao ia avea ma se pule o se faletalimalo lauiloa i se aso. Ua mafai e Wilfried ona tausi lana soa e faavavau ma le fanau e toalua, faapea ai ma le fesoasoani atu i lona tina ma ona tei. O loo ia auauna atu nei i le Ekalesia o se uso o le au fautua maualuga i le siteki.
O le ola-tutoatasi ua faauigaina “o le tomai, tautinoga, ma le taumafaiga e saunia mea faaleagaga ma faaletino e manaomia o le olaga mo le tagata lava ia ma le aiga.”1 O le taumafai ia ola tutoatasi o se vaega o la tatou galuega i luga o le ala o feagaiga e taitai atu ai i le Tama Faalelagi ma Lona Alo, o Iesu Keriso. O le a faamalosia ai lo tatou faatuatua ia Iesu Keriso ma fusia fiafia ai i tatou ia te Ia e ala i feagaiga ma sauniga o le faaolataga ma le faaeaga. O le ola-tutoatasi o se aoaoga faavae o le talalelei a Iesu Keriso, ae e le o se polokalama. O se faagasologa tumau mo le olaga atoa, ae le o se mea e faa-tasi ona tupu.
Tatou te ola-tutoatasi i o tatou olaga atoa e ala i le tuputupu a’e i le malosiaga faaleagaga, faaleleia lo tatou soifua maloloina faaletino ma faalemafaufau, tulituliloaina o a tatou aoaoga ma galuega, ma le sauniaina faaletino.2 Pe muta ea lenei galuega i le gasologa o o tatou olaga? Leai, o se faagasologa o le aoaoina, tuputupu a’e, ma le galue i le olaga atoa. E le taitai muta; o se faagasologa faifai pea i aso taitasi.
E mafai faapefea ona tatou aoao atua le aoaoga faavae ma mataupu faavae o le ola-tutoatasi i o tatou tamaiti ma autalavou? O le tasi ala taua o le faaaogaina soo lea o mataupu faavae o le polokalama a Tamaiti ma le Autalavou. E aoao e matua ma fanau le talalelei a Iesu Keriso, auai i le faatinoga o auaunaga ma gaoioiga, ma galulue faatasi i vaega e fa o le atinaega faaletagata lava ia e tulagaese mo tamaiti taitasi. Ua le o toe avea ma polokalama lava e tasi faatonuina mo tagata uma.
Ua faapea mai le Tusitaiala a Tamaiti: “Ina o i ai Iesu i lou matua, sa aoaoina o Ia ma tuputupu a’e. O loo e aoaoina ma tuputupu a’e foi. Fai mai le mau: ‘Ua tupu le poto ma le tino o Iesu, ua alofagia o ia e le Atua atoa ma tagata’ (Luka 2:52).”3 O loo faasino lenei mau i le tuputupu a’e ma le aoaoina i le vaaiga faaleagaga, alofagia e le Atua; o le vaaiga faaleagafesootai, alofagia e tagata; o le vaaiga faaletino, o le tino; ma le vaaiga faaleatamai, o le poto. O nei vaega o le atinaega e faatatau ia i tatou uma po o le a lava lo tatou matutua. O afea tatou te aoaoina ai i latou? I le Teuterenome 6:6–7 tatou te faitau ai:
“Ia i ai foi i lou loto o upu nei ou te fai atu ai ia te oe i le aso nei:
“Ia e matuā aoao soo ai i lau fanau, ma ia e tautalatala a’i, pe a e nofo i lou fale, pe a e savali foi i le ala, pe a e taoto, pe a e tulai foi.”
Tatou te aoao atu nei mea i tamaiti e ala i a tatou faataitaiga lelei, e ala i le galulue ma auauna faatasi ma i latou, suesueina o tusitusiga paia, ma mulimuli i aoaoga a Iesu Keriso e pei ona aoao mai e perofeta.
Sa ou ta’ua lena mea i le polokalama a Tamaiti ma Autalavou, e filifili e tamaiti ni sini eseese i vaega taitasi o vaega e fa o le atinaega. E taua lo latou fatuina o a latou lava sini i vaega taitasi. E mafai e matua ma taitai ona aoao atu, fautua atu ma lagolago atu.
Mo se faataitaiga, e matuā faaosofia lava Miranda, le afafine o se tasi o le ma fanau, ia tuputupu a’e faaleagaga e ala i le auai i vasega seminare i vaveao taitasi. Sa naunautai o ia ina ua faalogo atu i faamatalaga lelei mai isi tamaiti o le seminare i lana uarota. E le tau fafagua o ia e lona tina mo le vasega. E ala lava o ia i luga ma fesootai atu e ala i le konafesi faavitio i le taimi atofaina o le 6:20 i le taeao ona ua ia atiaeina ni mausa lelei ua fesoasoani ia te ia e faia ai. Sa ta’u mai e o’u lava matua ia te a’u talu ai nei ua talatalanoa lava Miranda pe a asiasi atu ia i la’ua, a o tuputupu a’e o ia i le to’a ma le mautinoa. O lesona nei mo le olaga atoa ma le tuputupu a’e faatasi ma taunuuga e iloagofie.
Matua, matua matutua, taitai, ma uo, e fesoasoani i le tuputupu a’e ma le atinaega o tamaiti. O uso ma tuafafine o auaunaga e auai atoatoa, faatasi ma taitai perisitua ma faalapotopotoga a le uarota, e tuuina atu le lagolago. Fai mai le “O Le Aiga: O Se Folafolaga i le Lalolagi” e faapea, “I le fuafuaga paia, e tatau ona pulefaamalumalu tamā i o latou aiga i le alofa ma le amiotonu ma o i latou e tuuina atu mea e manaomia o le olaga ma le puipuiga mo o latou aiga. O le uluai matafaioi a tina o le faafaileleina lea o a latou fanau. O nei matafaioi paia, e ao i tamā ma tina ona fesoasoani le tasi i le isi o se paaga tutusa. … E tatau i aiga lautele ona tuuina atu le lagolago pe a manaomia.”4 O le laina mulimuli e faasino i matua matutua, faatasi ai ma isi.
A o ma auauna atu i Aferika i Sisifo, sa faia ai e lo’u toalua, o Nuria se galuega faaleauaunaga ofoofogia ma fesootai pea ma lo matou aiga ma fanau a fanau i atuvasa e tele. Sa ia faia lenei mea i le faaaogaina o tekinolosi. Sa ia faitau atu tusi i fanau laiti a fanau. Na ia aoao atu i fanau teine matutua a le ma fanau ni autu e pei o tala o lo matou aiga, saienisi, le talafaasolopito o Puerto Rico, o Mataupu Faavae o le Faatuatua, ma le talalelei a Iesu Keriso. O le vava mamao i nei aso e le o tapulaaina ai fesootaiga, auai, ma auaunaga, ma le aoaoina o le tupulaga faiae o o tatou aiga. Ou te auai ai foi ma Nuria pe a mafai ai e aoao le ma fanau a fanau faapelepele, ia alofa ia i latou, ma ia faafiafia i latou ma faa’ata i latou.
E tatau ona outou matauina mea talitutusa musuia i le va o le polokama a Tamaiti ma le Autalavou ma le atiaeina o le ola-tutoatasi. O vaega e fa o le atinaega i vaega taitasi e tai tutusa lelei. O le malosiaga faaleagaga i le ola-tutoatasi e fesootai i le vaaiga faaleagaga i Tamaiti ma le Autalavou. O le soifua maloloina faaletino ma faalelagona i le ola-tutoatasi e fesootai ma le vaaiga faaletino ma faaleagafesootai i Tamaiti ma le Autalavou. O le a’otauina, galuega, ma sauniuniga faaletino i le ola-tutoatasi e fesootai ma le vaaiga faaleatamai i le polokalama a Tamaiti ma le Autalavou.
I le faaiuga, ia tatou mulimuli i lo tatou Faaola, o Iesu Keriso, ma Lana talalelei e ala i le ola-tutoatasi i o tatou olaga atoa ma aoao atu lenei mea i a tatou tamaiti ma le autalavou. E mafai ona tatou faia lenei mea i le mea sili e ala i le
-
avea ma faataitaiga lelei o le auauna atu i isi,
-
ola ai ma aoao atu le aoaoga faavae ma mataupu faavae o le ola-tutoatasi, ma le
-
usiusitai i le poloaiga o le atiaeina o le ola-tutoatasi o se vaega o le talalelei a Iesu Keriso.
Mataupu Faavae ma Feagaiga 104:15–16 o loo faapea mai:
“O lo’u faamoemoe o le faia lea o mea mo la’u au paia, aua o mea uma e a a’u.
“Peitai e tatau ona faia i laʼu lava ala; ma faauta o le ala lenei ua folafola e Aʼu, o le Alii, e faia ai mea mo laʼu au paia, e faaea ai e matitiva, i le faamaulaloina o e mauʼoa.
O le Ekalesia lenei a Iesu Keriso. O Lana talalelei ua faamanuiaina ai aiga iinei i le lalolagi ma le faavavau atoa. E taialaina ai i tatou i o tatou olaga a o tatou tauivi ai e avea ma ni aiga e faavavau. Ou te iloa e moni lenei mea. I le suafa o Iesu Keriso, amene.