Elder Denelson Silva

Fitugafulu o le Pulega Aoao

O le malaga e 4,000 maila (6,400 km) o le alu ma le toe foi mai mai Luanda, Angola, i São Paulo, Pasila, na tuuina atu ai ia Elder Denelson Silva ma lona faletua, o Regina, le taimi e tauivi ai ma se uunaiga. Ina ua uma ona auauna atu o se peresitene o le misiona, sa lagona e Elder Silva e le tatau ona la faatauina ma lona faletua se fale.

Sa la faatauina atu lo la fale a o lei malaga ese atu mo le la misiona. Sa la fuafua e faatau se fale fou i lo la toe foi mai ae sa lagona le uunaiga e faatali. “O fale i Pasila e le o se aseta e te tuu i luga mo le faatauina atu ona faatau atu loa lea,” o le saunoaga lea a Elder Silva. “E mafai ona alu ai ni aso po o ni masina po o ni tausaga.”

Fai mai Sister Silva sa la taulai atu i le mea moni e faapea, sa taialaina i laua e le Tama Faalelagi a o lei faia le la misiona ma o le a Ia toe taitaia foi i laua. “Sa ma filifili faatasi e faatali mo se taimi,” o lana tala lea. Nai lo lena, sa la filifili e mautotogi i se fale.

E pei o le faatauina atu o se fale i Pasila, e lei oo mai le tali i ni aso po o ni masina po o se tausaga foi. Na oo mai le tali i le silia ma le lua tausaga mulimuli ane ina ua maua e Elder Silva se valaauga e auauna atu o se Fitugafulu o le Pulega Aoao.

“E tatau ona i ai lo tatou mafaufau e faapea afai e finagalo o Ia tatou te faia se mea, o la tatou tali o le ioe i taimi uma lava,” o le saunoaga lea a Elder Silva. “Afai o le tali e le o taimi uma o le ‘ioe,’ e tuua ai le avanoa mo le ‘leai’ po o le ‘atonu.’” Peitai, mo le Faaola, ua ia faamalamalama mai, “sa leai se avanoa mo le ‘leai’ po o le ‘atonu’ i Ketesemane.”

Na soifua mai Denelson Urbano da Silva i le aso 4 o Iulai, 1965, i Recife, Pasila, ia Domingos Urbano da Silva ma Maria José de Almeida Silva. Sa soifua ae o ia i Recife ma sa faamauina ia Regina Maria de Carvalho Silva i le Malumalu o São Paulo Pasila ia Me 1987. E toalua o la alo.

E i ai lona faailoga tikeri i pulega faapisinisi (faagasologa o faamatalaga). Sa faigaluega o ia i le pisinisi tau femalagaaiga mo le 30 tausaga.

Mai le 2016 i le 2019, sa auauna atu Elder Silva o se peresitene o le misiona ma lona faletua i le Misiona a Angola Luanda. Sa ia auauna atu foi o se Fitugafulu Eria, peresitene o le siteki, epikopo, fautua maualuga, ma se faifeautalai faamisiona i le Misiona a Pasila Curitiba.