J. Anette Dennis

Fesoasoani Muamua i le Au Peresitene Aoao o le Aualofa

Ina ua mavae le faaaluina o lona olaga faateineitiiti i nofoaga eseese i le Iunaite Setete atoa, sa manatu Sister Jeannie Anette Dennis ua taunuu ana miti ina ua siitia atu lona aiga i Cottonwood Heights, Iuta.

“Sa ou manatu o tagata uma i Iuta o se tagata o le Ekalesia ma o le a avea ma se lagi iinei,” o lana tala lea.

I ona aso muamua i le vasega iva, sa fiafia lava o ia i se valaaulia i se pati. Ae o se teineitiiti na avea ma ana uo mamae na lapataia o ia o tagata i le pati o le a faaaogaina fualaau faasaina.

“Sa vave ona ou aoaoina o loo i ai le lalolagi i soo se mea,” o lana tala lea. Peitai, o lana molimau ma se aiga e faatotonugalemu i le talalelei, sa faamalosia ai o ia i le aoga maualuga atoa.

Sa soifua mai i Provo, Iuta, ia Iuni 1960, o Jeannie Anette Herrin o le ulumatua o le fanau e toafitu a Curtis Lamar ma Patricia Joanne Herrin. O le galuega a lona tama na ave ai le aiga i Misisipi, Tennessee, Iowa, Nebraska, ma Iuta.

Sa ia suesue i aoaoga tulagalua i le Iunivesite o Polika Iaga ae faalona lua ana suesuega i le faaSipaniolo. I le taimi o se malaga a le vasega i Mekisiko, sa ia feiloai ai ia Jorge Dennis, ma sa amata ona fesootai le toalua lea.

Ina ua siitia atu o ia (Jorge Dennis) i le Aai o Sate Leki i se tausaga mulimuli ane e suesue le gagana Peretania, sa amata ona la tafafao faamasani. I totonu o ni nai masina, sa fai ai le la faamau. Sa la faaipoipo i le Malumalu o Sate Leki i le aso 4 Setema, 1980. E toalima o laua alo ma fanau a fanau e toaiva. E nonofo i la’ua i Bountiful, Iuta.

O Sister Dennis, na lagolagoina i le aso 2 Aperila, o le a amata ona auauna atu o se Fesoasoani Muamua i le Au Peresitene Aoao o le Aualofa i le aso 1 Aokuso. O loo galue o ia i le aufono faufautua aoao a le Peraimeri ma faatasi ai ma lona toalua i le aufono o fesootaiga a le Itumalo o Davis.

Mai le 2013 i le 2016 sa ia auauna atu ai ma lona toalua a o ia pulefaamalumalu ai i le Misiona a Ecuador Guayaquil Sisifo. Sa ia auauna atu foi o se fesoasoani i le faatina o le Malumalu o Guayaquil Ecuador, failautusi o le Aualofa a le siteki, peresitene o le Peraimeri a le uarota, fesoasoani i le au peresitene o le Aualofa ma Tamaitai Talavou a le uarota, faiaoga o le Aualofa, ma se tagata fai sauniga o le malumalu.