Avea ma Soo Lototoa i Aso e Gata Ai
Ia tatou talitonu mautinoa ia, ae le o le taufaatoese, lototoa, aua le matamuli, faamaoni, ae le o le atuatuvale a o tatou tuuina i luga le sulu a le Alii i nei aso e gata ai.
O le saolotoga e iloa ai le mea e tatau ona filifili o se meaalofa taua a le Atua i Ana fanau taitoatasi.1 Ua latou “saoloto e filifili le saolotoga ma le ola e faavavau, e ala i le Puluvaga sili o tagata uma, pe filifili le faatagataotauaina ma le oti, e tusa ma le faatagataotauaina ma le mana o le tiapolo.”2 E le faamalosia e le Atua i tatou e fai le mea lelei, ma e le faamalosia foi e le tiapolo i tatou e fai le mea leaga.3 E ui atonu e manatu nisi faapea o le olaga nei o se tauvaga i le va o le Atua ma le fili, o se upu mai le Faaola “ona faafilemu ai lea ma faatula’i ese Satani. … O lo [tatou] malosi lea o loo tofotofoina—ae le o le Atua.”4
I le iuga lava o le a tatou selesele ai a tatou filifiliga na tatou luluina i le olaga atoa.5 O le a la le tauaofa’iga o o tatou mafaufauga, manaoga, upu, ma galuega e uiga i lo tatou alofa mo le Faaola, o Ana auauna filifilia, ma Lana Ekalesia toefuataiina? E sili atu ea le taua o a tatou feagaiga i le papatisoga, perisitua, ma le malumalu ia i tatou nai lo viiga o le lalolagi po o le aofaiga o “likes” i luga o faasalalauga faaagafesootai? Pe o malosi atu ea lo tatou alolofa mo le Faaola ma Ana poloaiga nai lo tatou alolofa i soo se mea po o se isi i lenei olaga?
E sailia pea e le fili ma ana ’au e faatama’ia galuega a Keriso ma Ana perofeta. O poloaiga a le Faaola, a lē o le faatuatuana’i uma i ai, ua fetuutuunai e le toatele i mea e lē āūga i le lalolagi o ona po nei. O avefeau a le Atua o e aoao atu upumoni “e le faigofie” e tele ina faapasi. E oo lava i le Faaola na lau “o se tagata ’ai tele ma le inu uaina,”6 na tuua’ia i le faamalepeina o le nofofilemu o tagata ma le faatupu vevesi. “Na taupulepule [i latou o e vaivai ma tau’ole’ole] ”pe faapefea ona latou mailei ia te ia i ana upu,”7 a o Ana “au” o uluai Kerisiano “tala eseina … i nuu uma lava.”8
Sa feagai le Faaola ma Ona uluai soo ma tete’e ogaoga i le lotoifale faapea ma fafo atu, ma o le mea foi lena ua tatou feagai. O le taimi nei, e toetoe ina a le mafai ona ola ma le lototetele i lo tatou faatuatuaga e aunoa ma le faasalaveia i lea taimi ma lea taimi i ni nai tusitusilima tino pe faaeletonika mai le lalolagi. O le mulimuli ma le talitonu mautinoa i le Faaola e faamanuiaina, ae e i ai taimi e ono tuliaupū ai i tatou e i latou e fautuaina le filosofia o le “ai, inu, ma fiafia”,9 lea e suitulaga ai le faatuatua ia Keriso, usitai, ma le salamo i se manatu faa’ole’ole faapea e ta’uamiotonuina e le Atua sina agasala laitiiti ona e alofa tele o Ia ia te i tatou.
I le ta’ua ai ”i [Lona] lava leo po o le leo o [Ana] auauna,”10 pe le’i fetalai ea le Faaola e uiga i o tatou aso e faapea “e oo i ona po latou te le mafafai ai ona talia o le mataupu e ola ai; ae tusa ma o latou lava tuinanau, latou te faapotopoto ai a’oa’o mo i latou” ma e toatele foi o le a “liliu ese o latou taliga i le upu moni, ae liliu atu i tala o le vavau?”11 Pe le’i tutulu ea o Ia i lo “latou tapuai fua mai ia te a’u, i lo latou fai ma mataupu o poloaiga a tagata”?12 Pe le’i lapata’i ea o Ia e faapea “e tupu mai foi ia te outou lava tagata, e tautala mai i mea faapiopio e fetoso ese ai le au soo e mulimuli ia te i latou”?13 Pe na te le’i mua’i silafia ea e faapea “o [le a ta’ua] le mea leaga e lelei, ae leaga le mea lelei,”14 ma “e fai foi le tagata ma fili o lona aiga”?15
Ae a i tatou? Pe tatau ea ona tatou fetotoa’i pe fefefe? Pe tatau ea ona tatou ola i la tatou tapuaiga i se ala e lē iloa mai e isi? O le mea moni e leai. Faatasi ai ma le faatuatua ia Keriso, e le tatau ona tatou atuatuvale i le faalumaina a tagata pe fefefe ia latou taufaaleaga.16 O le i ai o le Faaola i le foeuli ma perofeta soifua e taitai ma taialaina i tatou, “o ai sē [e] faasagatau mai ia i tatou?”17 Ina tatou talitonu mautinoa ia, ae le o le taufaatoese, lototoa, ae le o le matafefe, faatuatua, ae le o le atuatuvale a o tatou tuuina i luga le sulu a le Alii i nei aso e gata ai.18
Ua faamanino mai e le Faaola e faapea “ai se na te ta’uta’u a’u i luma o tagata, o a’u foi ou te tautau o ia i luma o lo’u Tama. … Ae ai se faafiti foi ia te a’u i luma o tagata, ou te faafitia foi o ia i luma o lo’u Tama o i le Lagi.”19
O le mea lea, e ui atonu e mananao nisi i se Atua e afio mai e aunoa ma ni poloaiga, ae ia tatou molimau atu ma le totoa i upu a Elder D. Todd Christofferson, e faapea “o se Atua e le manaomia ni mea mai Ona tagata e tutusa lava ma se Atua e le o i ai.”20
E ui atonu e mananao nisi e filifili i poloaiga latou te mulimuli ai, ae ia tatou talia ma le fiafia le valaaulia a le Faaola ia “ola i afioga uma e tulei mai le fofoga o le Atua.”21
E ui e toatele e talitonu i le Alii ma Lana Ekalesia ma faaleano i le faia “o soo se mea e mananao i ai [o tatou ] loto,”22 ia tatou lotototoa i le folafola atu faapea e sese le “mulimuli atu i le toatele e fai le amioleaga,”23 aua “e le mafai e tagata e toatele ona faasa’o le mea ua fetalai mai le Atua e sese.”24
“E, ia e manatua, ia e manatua, … le saolele tele o poloaiga a le Atua.”25 O le aoao manino atu o poloaiga e ono foliga i nisi taimi o se faatinoga o le le fiafia. O le mea lea ia tatou faatino atu ma le migao e faapea, e le gata ina mafai ae e tatau ai le alofa i se atalii/afafine o le Atua e taliaina talitonuga eseese mai lo o tatou talitonuga.
E mafai ona tatou talia ma, faaaloalogia isi e aunoa ma le faamaoniga o o latou talitonuga po o taga e le ogatusa ma le finagalo o le Alii. E leai se mea e tatau ona tatou faafitia le mea moni ona o mea ua ioeina e manaoga faaagafesootai.
O Siona ma Papelonia e le matuufaatasia. “E leai se na te mafaia ona auauna i alii e toalua”26; Ia tatou manatua uma le fesili faamomoiloto a le Faaola, “Se a ea le mea e ta’ua ai a’u e outou, Le Alii e, le Alii e, a e tou te le faia mea ou te fai atu ai?”27
Ia tatou faatinoina lo tatou alolofa i le Alii e ala i le usiusitai ma le loto atoa, i lo tatou loto malie.
Afai e te manatu ua utia oe i le va o le avea ai o oe ma soo ma le lalolagi, faamolemole ia manatua lou Faaola alofa na ia “auina mai se valaaulia … , ona ua faaloaloa mai ia te [oe] aao o le alofa mutimutivale, ma ua ia fetalai: Ia salamo, ona ou talia lea o outou.”28
Na aoao mai e Peresitene Russell M. Nelson e faapea o Iesu Keriso, “o le a faatinoina nisi o Ana galuega mamana i le va o le taimi nei ma le taimi e toe afio mai ai o Ia.”29 Ae na Ia aoao mai foi e faapea “o i latou e filifilia le ala o le Alii o le a ono onosaia sauaga.”30 O le “tauaogaina ina ia faaleagaina ona o lona suafa”31 e ono i ai taimi tatou te feagai ai foi pe a tatou “faatagaina Lona siufofoga ia faamuamua nai lo se isi lava.”32
“E manuia foi se,” na fetalai mai ai le Faaola “e le tausuai mai ia te au.”33 Ua tatou aoao foi i se isi mea e faapea “ua tele le filemu o e naunau i lau tulafono: ae leai foi se mea e tausuai ai i latou.”34‘ E leai se mea! O lea la sei o tatou fesili ifo ia i tatou lava, “Pe o o’u tumau mo sina taimi, peitai a tupu le puapuaga po o le sauaga ona o le upu, ona tausuai loa lea o ia?35 Pe o o’u fausia ea ma le mausali i luga o le papa o Iesu Keriso ma Ana auauna?”
O le au talitonu e leai ni tulafono e faamasino ai le sa’o ma le sese, latou te faapea o le moni ua na o se fausaga faaagafesootai, e leai ni anavatau e faamasinoina ai le mea tonu. O le mea moni o loo latou fai mai ai, e faapea e leai se agasala,36 “soo se mea [e fai] e le tagata e le o se solitulafono,”37 o se filosofia o loo mitamita ai le fili faapea o ia e ona! O le mea lea ia tatou faaeteete i luko e o mai i ofu faamamoe, o loo sailia pea a latou ’au ma e “[tele ina latou faaaogaina] a latou faaleoleo faaleatamai e punipuni ai o latou [lava] lape faaleamio.”38
A tatou mananao moni ia avea o ni so’o totoa o Keriso, o le a tatou maua lava se auala. A leai, ua ofo mai e le fili nisi auala faatosina. Peitai, o le avea ai ma soo faamaoni, “e le tatau ona tatou faatoese atu mo o tatou talitonuga pe solomuli mai mea ua tatou iloa e moni.”39
I le faaiuga, o se upu e uiga i auauna e to’a 15 a le Atua o loo papa’a’ao i o’u tua. E ui ina fai atu le lalolagi “i tagata vaai, Aua tou te vaai; latou te fai atu foi i perofeta, Aua tou te faaali mai ia i matou mea tonu,”40 a o e faamaoni e “faapaleina i latou i faamanuiaga mai luga, ioe, ma poloaiga a le itiiti, ma faaaliga i o latou taimi.”41
E le o se mea e ofo ai, o nei tamalii e tele ina avea ma metale e miti’ia le uila, mo i latou e le fiafia i le afioga a le Atua a o folafola atu e perofeta. O i latou o e teena perofeta latou te le iloa e “leai se valoaga o i le tusi [e tatau] ona faamatalafuaina” po o le taunuuga o le loto o le tagata, “ae o tagata paia o le Atua [o loo tulei mai nei] a o osofia ai e le Agaga.”42
E faapei o Paulo, o nei tamalii o le Atua e “le … mama i le molimau i lo tatou Alii” ma o i latou “ua noanoatia” ona o Ia43 o lona uiga, o le mataupu o loo latou aoao atu e le o sa latou, ae o Lana o le na valaauina i latou. Faapei o Peteru, latou “te le mafaia ona le tautala i mea ua [latou] vaai i ai ma faalogo i ai.”44 Ou te molimau atu o le Au Peresitene Sili ma le Korama a le Toasefululua, o ni tamalii lelei ma le faamaoni o e alolofa i le Atua ma Ana fanau ma ua alofagia foi i latou e Ia. O a latou upu, e tatau ona tatou taliaina e faapei e mai le fofoga o le Alii lava Ia, “i le onosai ma le faatuatua atoa. Aua o le faia o nei mea o le a le manumalo ai faitotoa o seoli ia i [tatou]; … ma o le a faamataa ese ai e le Alii le Atua mana o le pouliuli mai i o [tatou] luma.”45
“E leai se lima palapala e mafai ona taofia le galuega mai le alualu i luma”;46 o le a telea’i atu i luma ma le manumalo pe ou te i ai, pe leai foi, o le mea lea “ina filifilia ia outou i le aso nei po o ai tou te auauna i ai.”47 Aua nei faavaleaina oe pe taufaamata’u i le tapisa mai o leotetele e manu a’e mai le faletele ma le ateatea. O lo latou soona tapisa fitivale e le faatusalia i le tosinaga toafimalie a le leo itiiti, filemu i luga o loto nutimomoia ma agaga ua salamo.
Ou te molimau atu o loo soifua Keriso, o Ia o lo tatou Faaola ma le Togiola, ma o loo Ia taitaia Lana Ekalesia e ala i le Au Peresitene Sili ma le Korama a Aposetolo e Toasefululua, o lea e mautinoa ai e le o “felafoaiina i tatou e peau, ma feaveaiina e matagi uma lava o mataupu.”48
“O soo moni o Iesu Keriso,” na aoao mai Peresitene Nelson, “ua loto e tutu atu, tautatala atu, ma ia ese mai ai i tagata o le lalolagi. E le fefefe i latou, ae tuuto ma lototetele.”49
Uso e ma tuafafine, o se aso lelei e lelei ai! I le suafa paia o Iesu Keriso, amene.