E Faamaloloina e Keriso Mea ua Gauia

Saunia e Amy A. Wright

Fesoasoani Lua i le Au Peresitene Aoao o le Peraimeri

E mafai ona Ia faamaloloina sootaga ua gauia ma le Atua, sootaga ua gauia ma isi, ma vaega o i tatou ua gauia.

I ni nai tausaga ua mavae, i se potopotoga faaleaiga, sa fesili si o’u tei o Viliamu e valu tausaga le matua i le ma atalii matua, o Briton, pe manao la te taaalo. Sa tali fiafia atu Briton, “Ioe!” Ou te fiafia i ai!” I le mavae ai ona la taaalo mo sina taimi, sa mamulu le polo mai ia Briton, ma faafuasei ona ta’e ai se tasi o omea tuulaau a matua o lona tina.

Sa matuā lē lelei lagona o Briton. A o amata ona ia pikia i luga nutigamea, sa savali atu Viliamu i lona tausoga ma popo ma le alofa o ia i lona papatua. Ona ia faamafanafana atu lea, “Aua e te popole, Briton. Sa ta’e foi ia a’u se mea i le fale o Tamamatua ma Tinamatua, ma sa tuu e Tinamatua lona lima i lo’u ua ma fai mai, “E lē afaina Viliamu. E na o le lima ou tausaga.’”

Lea na tali atu i ai Briton, “Ae, Viliamu, ua ou 23!”

E tele mea e mafai ona tatou aoao mai tusitusiga paia i le ala o le a fesoasoani ai lo tatou Faaola, o Iesu Keriso, e faatautaia ma le manuia ia mea i o tatou olaga e ta’ei pe gauia, tusa lava po o le a lo tatou matutua. E mafai ona Ia faamaloloina sootaga ua gauia ma le Atua, sootaga ua gauia ma isi, ma vaega o i tatou ua gauia.

Sootaga ua Gauia ma le Atua

A o aoao atu le Faaola i totonu o le malumalu, sa aumaia ia te Ia e le au tusiupu ma le au Faresaio se fafine. Tatou te le iloa lona tala atoa, ae pau lava faapea na “molia o ia i le mulilua.”¹ E tele taimi, e tuu mai ai e tusitusiga paia na o si vaega itiiti o le olaga o se tagata, ma e faavae i lena vaega, o nisi taimi tatou te faaviivii ai pe ta’usalaina lena tagata. E le mafai ona malamalama i le olaga o se tagata i se taimi maoae se tasi po o se taimi le manuia se tasi e faamaasiasia faalautele ai. O le faamoemoega o nei tala faatusi paia o le fesoasoani lea ia tatou vaai ai o Iesu Keriso o le tali i lena taimi, ma o Ia foi o le tali i le taimi nei. Na te silafia lo tatou tala atoa ma le mea tonu o tatou mafatia ai, faapea foi o tatou gafatia ma vaivaiga.

O le tali a Keriso i lenei afafine faapelepele o le Atua o le “Ou te le faasala foi ia te oe; alu ia oe, aua e te toe agasala.”² O se isi auala e fai atu ai, “alu ia oe, aua e te toe agasala” o le “agai i luma ma ia suia.” Sa valaaulia e le Faaola o ia ia salamo: ia suia lana amio, ana faigapaaga, le ala sa ia manatu ai ia te ia lava, lona loto.

Ona o Keriso, o la tatou faaiuga e “agai i luma ma suia” e mafai foi ona tatou “agai i luma ma faamaloloina,” aua o Ia o le pogai o le faamaloloina o mea uma ua gauia i o tatou olaga. I le avea ai ma Puluvaga sili ma Fautua i le Tama, ua faapaiaina ai e Keriso ma toefuatai sootaga gauia—e sili ona taua, o la tatou sootaga ma le Atua.

Ua faamanino mai i le Faaliliuga a Iosefa Samita faapea o le fafine sa mulimuli i le fautuaga a le Faaola ma suia lona olaga: “Ma sa vivii atu le fafine i le Atua mai lava i lena itula, ma talitonu i lona suafa.”³ O le mea e leaga ai, latou te le iloa lona igoa po o isi faamatalaga e uiga i lona olaga i le mavae ai o le taimi lea, aua e ono manaomia ai se naunautaiga tele, lotomaualalo, ma le faatuatua ia Iesu Keriso mo ia ia salamo ai ma suia. O le mea ua tatou iloa o ia o se fafine sa “talitonu i lona suafa” ma le malamalama faapea sa le’i i tua atu o ia mai le mana o Lana taulaga e le i’u ma le faavavau.

Sootaga ua Gauia ma Isi

I le Luka mataupu 15 tatou te faitauina ai se faataoto i se alii e toalua ona atalii. Sa fesili le atalii laitiiti i lona tama mo lona tofi, ma alu malaga ai i le nuu mamao, ua faataapeape ai ana mea i lea nuu, ua soona ulavale.⁴

“Ua uma atu ana mea, ona oge tele ai lea o lea nuu; ona faatoa mativa ai lea o ia.

“Ua alu ia ua nofo i le tasi tagata o lea nuu; ua ia auina foi o ia i ona fanua e fafaga ai puaa.

“Ua tupu lona manao i atigi mea e ‘aina e puaa ia ma’ona ai o ia: e leai lava se tasi ua avane sina mea ia te ia.

“Ona atamai ai lea o ia, ua faapea ane, E le toatele ea o auauna a lo’u tama ua faulai a latou areto ua totoe, a o au ou te matelaina!

“O le a ou tulai ma alu i lou tama, ou te fai atu ia te ia, lo’u Tamā e, ua ou agasala i Lē o i le lagi, atoa ma ou luma,

“Ua ou le toe aoga ona ta’ua o lou atalii: ia e avea a’u ia pei o se tasi o au auauna.

“Ona tulai lea o ia ua alu i lona tamā. Ua iloa mamao atu foi o ia e lona tamā, ona mutimuti vale lea o lona alofa, ua momo’e atu ia, ua fusi ia te ia, ma sogi atu ia te ia.”⁵

O le mea moni faapea na momo’e atu le tamā i lona atalii, ou te talitonu, e maoae. O le tiga patino na tuuina e le atalii i lona tamā sa matuai loloto ma ogaoga. E faapena foi, atonu na faamaasiasia moni lenei tamā i faatinoga a lona atalii.

O le mea lea, aisea na le faatalitali ai le tamā mo lona atalii ina ia faatoese? Aisea na ia le faatalitali ai mo se taulaga o le toefuataiga ma le toefaaleleia a o lei tuuina atu le faamagaloga ma le alofa? O se mea lea e tele ina ou mafaufau loloto i ai.

Ua aoao mai i tatou e le Alii e faapea o le faamagalo atu o se poloaiga masani lautele: “O Aʼu, o le Alii, Ou te faamagalo i lē o le a Ou faamagaloina, ae o outou ua poloaiina ia faamagalo atu i tagata uma.”⁶ O le ofoina atu o le faamagaloga e mafai ona moomi ai se lototele ma le lotomaualalo tele. E mafai foi ona alu ai se taimi. E moomia ai ona tatou tuu lo tatou faatuatua ma le faalagolago i le Alii a o tatou tauaveina foi le tiutetauave mo lagona o o tatou loto. O iina o loo taoto ai le taua ma le mana o lo tatou faitalia.

O le atavaaia o lenei tamā i le faataoto i le atalii faamaumau’oa, sa faamamafaina ai e le Faaola e faapea o le faamagaloga o se tasi o meaalofa aupito tamaalii, e mafai ona tatou avatu i le tasi ma le isi ma e aupito patino o i tatou lava. O le tuumāmāina o o tatou loto e ala i le faamagaloga e le faigofie i taimi uma, ae e ala i le mana e mafai ai o Iesu Keriso, e mafai.

O Vaega ua Gauia o i Tatou Lava

I le Galuega mataupu 3 ua tatou aoao ai e uiga i se alii patino na fanau mai o pipili ma e “latou te tuuina ifo o ia i aso fai soo i le faitotoa o le malumalu ua igoa o Matagofie, e faatoga atu i se mea alofa i e ulu atu i le malumalu.”⁷

O le tagata ‘aisi pipili sa 40 tausaga le matua⁸ ma sa faaaluina lona olaga atoa i se tulaga e foliga e le uma le manao ma le faatalitali, aua sa faalagolago o ia i le fesoasoani mai ma le agalelei o isi.

I se tasi aso sa ia vaai ai ia “Peteru ma Ioane a ulu atu i le malumalu, [ma] sa faatoga atu mo se mea alofa.

“Ona pulatoa lea o Peteru ma Ioane ia te ia, ua faapea atu, Vaai mai ia ia te i maua.

“Ona naunau mai lea o ia ia te i laua, fā’i e maua se mea mai ia te i laua.

“Ona fai atu lea o Peteru, E leai sa’u ario po o sa’u auro; a o le mea ua ia te au, ou te avatu lea ia te oe, O le suafa o Iesu Keriso o le Nasareta, ina tu ai ia i luga, ina savali.

“Ua tago atu foi o ia i lona lima taumatau, ua faatu ia te ia i luga: ona faamalosia loa lea o ona vae ma ponaponāvae.

“Ua oso ia i luga ma tu, ua savali foi, ua ulu faatasi foi ma i laua i le malumalu, o loo savali ia, ma oso, ma vivii atu i le Atua.”⁹

E tele taimi i o tatou olaga e mafai ai ona tatou iloa i tatou lava, faapei o le pipili ‘aisi i le faitotoa o le malumalu, “sa faatalitali ai i le Alii” ma le onosai—po o nisi foi taimi ua le lava le onosai.”¹⁰ Faatalitali ia faamaloloina faaletino pe faalelagona. Faatalitali mo tali e tuia ai le vaega aupito loloto o o tatou loto. Faatalitali mo se vavega.

O le faatalitali i le Alii e mafai ona avea o se nofoaga paia—se nofoaga o le faalauteleina ma le faaatoatoaina, lea e mafai ai ona tatou iloa le Faaola i se ala e matua’i patino lava. Faatalitali i le Alii e mafai foi ona avea o se nofoaga e mafai ai ona tatou maua i tatou lava o fesili, “Le Atua e, o fea ea oe?”¹¹—o se nofoaga e manaomia ai e le faapalepale faaleagaga i tatou e faaaoga ai le faatuatua ia Keriso e ala i le filifilia pea lava pea o Ia ma le loto i ai. Ou te iloa lenei nofoaga, ma ua ou malamalama i lea ituaiga o faatalitali.

Sa ou faaaluina ni itula e le mafaitaulia i se nofoaga o togafitiga o le kanesa, sa faatasia ai i o’u mafatiaga le toatele o isi o e sa naunau ina ia faamaloloina. Sa ola nisi, a o isi e leai. Sa ou aoaoina i se ala maoae e faapea, o le laveaiina mai o tatou tofotofoga e eseese mo i tatou taitoatasi, ma o lea e ao ai ona itiiti la tatou taulai i le ala e laveaiina ai i tatou ae ia tele atu i le Laveai lava Ia. O la tatou faamamafa e tatau lava i taimi uma ona ia Iesu Keriso!

O le faaaoga o le faatuatua ia Keriso o lona uiga o le faalagolago lea e le gata i le finagalo o le Atua ae faapea foi i Lana taimi. Aua Na Te silafia tonu le mea tatou te manaomia ma le taimi tonu tatou te manaomia ai. Pe a tatou faagauai atu i le finagalo o le Alii, o le a le pine ona tatou mauaina mea e tele atu nai lo mea sa tatou mananao ai.

A’u uo pele, e tofu i tatou uma ma se mea i o tatou olaga ua gauia lea e moomia ona fonofono, faaleleia, pe faamaloloina. A o tatou liliu atu i le Faaola, a o tatou faaogatasia o tatou loto ma mafaufau ma Ia, a o tatou salamo, e afio mai o Ia i le mea o tatou i ai “ma le faamalologa i ona apaau,”¹² opo mai i tatou i Ona aao agaalofa, ma faapea mai, “E le afaina. E na o le 5—16, 23, 48, 64, pe 91 ou tausaga. E mafai ona ta faaleleia faatasi!”

Ou te molimau atu ia te oe, e leai se mea e gauia i lou olaga, e le gafataulimaina e le mana e mafai ai ona faamalolo, matogiolaina, ma le gafatia o Iesu Keriso. I le suafa mamalu ma le paia o Ia o lē silisiliese e faamaloloina, o Iesu Keriso, amene.