O Feagaiga ma le Atua e Faamalolosia, Puipuia, ma Saunia ai i Tatou mo le Mamalu e Faavavau
A o tatou filifili e osia feagaiga ma tausia, o le a faamanuiaina i tatou i le fiafia sili atu i lenei olaga ma se ola e faavavau mamalu i le lalolagi a sau.
Uso e, se fiafiaga ina a maeu le faapotopoto i se usoga a tamaitai i le lalolagi atoa! I le avea ai ma tamaitai o e osia ma tausia feagaiga ma le Atua, tatou te fefaasoai i ni sootaga faaleagaga e fesoasoani ia i tatou e faafetaiaia ai luitau o o tatou aso ma saunia ai i tatou mo le Afio Mai Faalua o Iesu Keriso. Ma o le tausia o na feagaiga e mafai ai e i tatou ona avea ma tamaitai o faatosinaga o e e mafai ona tosina mai isi i le Faaola.
O i latou o e ua papatisoina ua osifeagaiga i lena aso e lē mafaagaloina ina ia ave i o latou luga le suafa o Iesu Keriso, ia manatua pea o Ia, tausi Ana poloaiga, ma auauna atu ia te Ia e oo i le iuga. A tatou faia nei mea, ua folafola mai le Tama Faalelagi e faamagalo a tatou agasala ma tuuina mai ia i tatou le mafutaga a le Agaga Paia. O nei faamanuiaga e amata ai i tatou i luga o le ala, pe afai tatou te faaauau pea ona fetaomi atu i luma ma tumau e oo i le iuga, o le a mafai ona tatou nonofo faatasi ma Ia ma Lona Alo, i le malo selesitila. O tagatauma ua papatisoina ua i ai le folafolaga o nei faamanuiaga ma avanoa pe afai na te tausia le feagaiga na latou osia i lena aso faapitoa.
O i latou o e osia nisi feagaiga i le malumalu e maua folafolaga mamana e faalagolago i le faamaoni o le tagata lava ia. Tatou te folafola atu ma le faamaoni e usitai i poloaiga a le Atua, ola i le talalelei a Iesu Keriso, ia mama a‘ia’i, ma tuuto atu o tatou taimi ma taleni i le Alii. Ae ua folafola mai ai e le Atua, ia faamanuiaga i lenei olaga ma le avanoa e toe foi atu ai ia te Ia.1 I lena faagasologa, ua tuuina mai ia i tatou, pe faaeeina i ai, le mana e iloatino ai le mea moni ma le sese, i le va o le sa‘o ma le sese, i le tele o leo fenumiai ma lē lelei lea e osofaia ai i tatou. Se meaalofa ina a mamana!
I sauniuniga mo la‘u malaga muamua i le malumalu, sa fesoasoani ai lo‘u tina ma uso o le Aualofa ua i ai le tomai, ia te a’u e filifili mea o le a ou manaomia, e aofia ai laei matagofie o sauniga. Ae o le sauniuniga aupito sili ona taua na oo mai a o lei iloa le mea e ofuina. Ina ua uma ona faatalanoaina a‘u e fuafua pe sa ou agavaa, sa faamalamalama mai e lo’u epikopo ia feagaiga o le a ou osia. O lana faamalamalamaga faaeteete na tuuina mai ai ia te au le avanoa e mafaufau ai ma saunia e osia na feagaiga.
Ina ua oo mai le aso, sa ou auai ma se lagona o le lotofaafetai ma le filemu. E ui lava ou te lei malamalama i le taua atoatoa o feagaiga na ou osia, ae sa ou iloa sa noatia a’u i le Atua e ala i na feagaiga ma sa folafola mai ia te a’u faamanuiaga e tau le mafai ona ou malamalama i ai pe afai ou te tausia feagaiga. Talu mai lena uluai aafiaga, sa faaauau pea ona ou mautinoa o le tausia o feagaiga tatou te osia ma le Atua e mafai ai ona tatou utuvai mai i le mana o le Faaola, lea e faamalolosia ai i tatou i o tatou tofotofoga e le maalofia, e maua ai le puipuiga mai faatosinaga a le fili, ma saunia ai i tatou mo se mamalu e faavavau.
O aafiaga o le olaga e mafai ona eseese mai le malie i le tiga o le loto, mai le matautia i le mamalu. O aafiaga taitasi e fesoasoani tatou te malamalama atili ai e uiga i le alofa o lo tatou Tama ma lo tatou gafatia e suia e ala i le meaalofa o le alofatunoa o le Faaola. O le tausia o a tatou feagaiga e mafai ai e le mana o le Faaola ona faamamaina i tatou a o tatou aoao e ala i aafiaga—pe o se amioga sese itiiti po o se toilalo tele. O loo i ai iina lo tatou Togiola e sapo i tatou pe a tatou pauu pe afai tatou te liliu atu ia te Ia.
Pe na i ai se taimi na e tu ai i luga o se mato maualuga ma ou tamatamaivae i lona si’ui ma lou papatua i le nimonimo i lalō? O le faapa’ū ifo i se mauga, e ui lava e te iloa o loo e fesootai ma le saogalemu i se faiga o maea malolosi ma masini e mafai ona avatu saogalemu ai oe, o le tu ai i le si’ui o loo i ai pea se aafiaga e tatavale ai le fatu. O le laa i tua mai le mato ma le sasau i le ea manifinifi e manaomia ai le faalagolago i se taula e malupuipuia i se mea faitino e le masii ese. E manaomia ai le faatuatuaina o le tagata o le a faaaogaina le mata’itu o le maea a o e alu ifo. Ma e ui o masini e te maua ai sina tomai e faafoefoe ai le taimi o lou faaifoifo, ae e tatau lava ona e talitonu mautinoa o le a le faatagaina oe e lau soa e pa’ū.
Ou te manatuaina ma le manino lo matou faapauu ifo i se mauga ma se vaega o tamaitai talavou. O a’u le tagata muamua o le vaega e alu. A o ou laa agai i tua o le tofē, sa faafuasei ona amata ona ou pa’ū e aunoa ma le taofiofia. O le mea e faafetai ai, sa milo faafuasei le maea ma taofia ai le saoasaoa o lo’u faaifoifo i lalo. A o ou tautau i le afa o le maa i lalo o le pupū papa maamaai, sa ou tatalo faatauanau po o ai lava po o le a foi le mea sa taofia ai a’u mai le palasi ifo i luga o papa.
Mulimuli ane, sa ou iloa ai e le’i seti mauina le nati o le taula, ma o le taimi lava na ou laa ese ai mai le si’ui, sa ausa’a faatopetope le tagata na ma sosoo i lona tua ma toso vave atu agai i le si’ui o le mato. I se isi itu, sa vave ona ia faaūtia ona vae i ni maa. O le faamautu ai i lena tulaga, sa mafai ai ona ia galue malosi e tuutuu ifo a’u i lalo, ua u’umau lima, ma le maea. E ui ina sa le mafai ona ou vaai ia te ia, ae sa ou iloaina sa galue o ia ma lona malosi atoa e laveai a’u. Sa i ai se isi uo i le pito i lalo o le mato, sa sauni e sapo a’u pe afai ua le mau le maea. Ina ua ou oo atu i ai, sa ia pu’eina la‘u fusi ma tuutuu ifo ai a‘u i le eleele.
O le avea o Iesu Keriso ma o tatou taula ma se paaga atoatoa, ua faamautinoa mai ia i tatou Lona malosiaga alofa i taimi o tofotofoga ma le laveaiina mulimuli ane e ala ia te Ia. E pei ona aoao mai Peresitene M. Russell Ballard: “O le faatuatua i le Atua ma lona Alo, o le Alii o Iesu Keriso, o le … taula e tatau ona i ai i o tatou olaga e taofi mau ai i tatou i taimi o faigata faaagafesootai ma le amioleaga. … O lo tatou faatuatua … e tatau ona faatotonugalemu ia Iesu Keriso, lona soifua ma lana togiola, ma i le toefuataiga o lana talalelei.”2
O masini faaleagaga e taofia i tatou mai le gauia i luga o papa o faigata, o la tatou molimau lea ia Iesu Keriso ma feagaiga tatou te osia. E mafai ona tatou faalagolago i nei lagolago e taiala ma aveina i tatou i le saogalemu. I le avea ai ma a tatou paaga naunautai, o le a le faatagaina i tatou e le Faaola ia pauu i se mea e le oo i ai Lona mana. E oo lava i o tatou taimi o puapuaga ma faanoanoaga, o loo i ai o Ia iina e siitia ma faamalosiau ia i tatou. E fesoasoani Lona mana ia i tatou e toe faaleleia ai mai aafiaga e masani ona faataumaoia ai filifiliga a isi. Peitai, e tatau ia i tatou ona fai o tatou fusi ma ia mautinoa o loo mau lelei ona nonoa. E tatau ona tatou filifili ina ia taula i le Faaola, ina ia noatia ia te Ia e ala i a tatou feagaiga.3
E faapefea ona tatou faamalosia lena taula? Tatou te tatalo ma se loto sailiili ma le lotomaualalo, suesue ma mafaufau loloto i tusitusiga paia, taumamafa i le faamanatuga ma se agaga o le salamo ma le migao, tauivi e tausi poloaiga, ma mulimuli i fautuaga a le perofeta. Ma a o tatou faataunuuina a tatou galuega i aso uma i auala e “maualuga atu ma paia atu”4 o le a sili atu ona tatou fesootai i le Faaola ma, i le taimi lava e tasi, fesoasoani i isi ia o mai ia te Ia.
O a foliga o lena “ala maualuga atu ma paia atu”? Tatou te taumafai e ola i le talalelei i a tatou fegalegaleaiga uma. Tatou te tausia i latou e le tagolima e ala i le auauna moni atu, faaalia o le alofa e ala i auaunaga faigofie. Tatou te faasoa atu le tala fiafia o le talalelei ia i latou o e manaomia le filemu ma le malosi ma “iloa le mea e maua ai.”5 Tatou te galulue e tuufaatasia aiga mo le faavavau i itu uma e lua o le veli. Ma mo i latou o e ua osia feagaiga i le maota o le Alii, e pei ona faamalamalama mai e Peresitene Russell M. Nelson, “O tagata matutua taitoatasi e ulu atu i le malumalu o le a ofuina ofu paia o le perisitua, [lea] … faamanatu mai ia i tatou … ia savavali i luga o le ala o feagaiga i aso taitasi i se ala maualuga atu ma paia atu.”6 O nei faatinoga ua le na o ni nai taimi e fai ai, ae e tatau ai mo lo tatou fiafia i aso taitasi—ma le olioli e faavavau.
E leai se isi mea e sili atu ona taua mo lo tatou alualu i luma e faavavau nai lo le tausia o a tatou feagaiga ma le Atua. A tatou usitaia a tatou feagaiga o le malumalu, e mafai ona tatou faalagolago i se toefaatasiga fiafia ma e pele i le isi itu o le veli. O lena tamaitiiti po o se matua po o se toalua ua tuua le olaga faitino, o loo faamoemoe ma lona loto atoa o le a e faamaoni i feagaiga ua fusia faatasi ai oulua. Afai tatou te le amanaiaina pe manatu mama i a tatou feagaiga ma le Atua, ua tatou tuuina na sootaga e faavavau i se tulaga matautia. O le taimi lenei e salamo ai, toe faaleleia, ma toe taumafai.
E gaogao ‘i’ī le fiafia pe afai tatou te faafesuia’ia faamanuiaga o le olioli e faavavau ia faigofie mo na o sina taimi. Po o le a lava lo tatou matutua, o le upumoni moni lava lena: o le ki i le fiafia tumau o le ola lea i le talalelei a Iesu Keriso ma le tausia o a tatou feagaiga. Na faamautinoa mai e lo tatou perofeta, o Peresitene Nelson e faapea “o lo tatou puipuiga silisili lava ma le fiafiaga tumau e tasi, o loo taoto lea i le pipiimau i le āi u’amea o le talalelei a Iesu Keriso, ua atoatoa i ona feagaiga ma sauniga. A tatou faia faapea, e mafai ona tatou feoa’i ma le saogalemu i ogasami sousou ona ua tatou mauaina le mana o le Atua.”7
O le toatele o i tatou o loo aafia i ogasami souā. A o felafoaiina i tatou e galu o puapuaga ma o nisi taimi e faatauasoina i uaga o loimata e oo mai i na faigata, atonu tatou te le iloa po o le fea itu e alo i ai le vaa o lo tatou olaga. Atonu foi tatou te le mafaufau ua ia i tatou le malosiaga e oo atu ai i le apitaogalu. O le manatuaina pe o ai oe—o se atalii/afafine faapelepele o le Atua—pe aisea ua e i ai i le lalolagi, ma o lau sini o le ola faatasi ma le Atua ma e pele ia te oe e mafai ona faamanino ai lau vaaiga mamao ma faasino oe i le itu sa‘o. E oo lava i le lotolotoi o le afa, o loo i ai se malamalama susulu e faasino mai le ala. “O au o le malamalama e susulu i le pouliuli,” na fetalai mai ai Iesu.8 E faamautinoa mai ia i tatou le saogalemu pe a tatou vaai atu i Lona malamalama ma faatumauina le amiosa‘o o a tatou feagaiga.
O se faamanuiaga le feiloai atu i tamaitai o vaitausaga uma o loo ola i ni tulaga eseese o loo tausia a latou feagaiga. O aso taitasi, latou te vaavaai atu ai i le Alii ma Lana perofeta mo se taitaiga, nai lo ala taatele o faasalalauga. E ui lava i o latou luitau taitoatasi ma filosofia faataumaoi o le lalolagi o loo taumafai e faalotovaivaia i latou mai le tausia o a latou feagaiga, ae ua latou naunau lava e tumau i luga o le ala o feagaiga. Latou te faalagolago i le folafolaga o “mea uma ua i ai i le Tama.”9 Ma po o le a lava lo outou matutua, o outou tamaitai taitoatasi ua osifeagaiga ma le Atua ua i ai le tomai e tuu ai i luga le malamalama o le Alii ma taitai atu ai isi ia te Ia.10 E ala i le tausia o au feagaiga, o le a Ia faamanuiaina oe i Lona mana o le perisitua ma mafai ai ona e maua se faatosinaga loloto i tagata uma o e tou te fegalegaleai. E pei ona folafola mai e Peresitene Nelson, o outou o tamaitai o e o le a faataunuuina valoaga ua valoia mai!11
Uso pele, e sili atu i lo isi mea uma, ia tumau i luga o le ala o feagaiga ia Iesu Keriso! Ua faamanuiaina i tatou e o mai i le lalolagi i se taimi ua tele ai malumalu i le kelope. O le osia ma le tausia o feagaiga o le malumalu ua avanoa mo tagata agavaa uma o le Ekalesia. Talavou matutua, tou te lē tau faatali seia faaipoipo pe auauna atu i se misiona e osia ai na feagaiga paia. E mafai ona e saunia o se tamaitai talavou ina ia maua le puipuiga ma le malosi o feagaiga o le malumalu e tuuina atu i se taimi vave pe a mavae le 18 tausaga a o e sauniuni ma lagonaina se manao ia faamamaluina na feagaiga o le malumalu.12 O outou o e ua uma ona mauaina faamanuiaga o le malumalu, ‘aua nei faatagaina tagata faalavefau po o mea faalavefau e tosoina ese oe mai nei upumoni e faavavau. Suesue ma ole atu i punavai faatuatuaina mo se malamalamaaga sili atu i le taua paia o feagaiga ua e osia. Alu soo i le malumalu i le tele e te mafaia ai ma faalogo i le Agaga. O le a e lagonaina le faamautinoaga matagofie o loo e i ai i luga o le ala a le Alii. O le a e maua le lototele e faaauau ai faapea foi ma le aumaia o isi faatasi ma oe.
Ou te molimau atu a o tatou filifili e osia feagaiga ma le Tama Faalelagi ma maua le mana o le Faaola e tausia ai, o le a faamanuiaina i tatou i le fiafia sili atu i lenei olaga nai lo le mea ua mafai nei ona tatou mafaufauina ma se ola e faavavau mamalu i le lalolagi a sau.13 I le suafa o Iesu Keriso, amene.