E Maofa ia Keriso ma Lana Talalelei
Tau ina ia manatua mea na vaaia e o tatou mata ma lagonaina e o tatou loto le faateleina o lo tatou maofa i le taulaga togiola a le Faaola.
E i ai sa‘u uo pele o se polofesa matagofie o le iunivesite ua litaea, o se tusitala, ma e sili i mea uma o se soo tuuto o Iesu Keriso. Sa ia asiasi atu i le Nuu Paia i le tele o taimi e auai i konafesi, faatautaia suesuega faaakatemia, ma taitai malaga maimoa. E tusa ai ma lana tala, o taimi uma e asiasi ai i le laueleele na femaliua’i ai Iesu, e maofa lava o ia ona e le taumate lava lona aoaoina o se mea fou, e ofo ai, ma e maoae e uiga i le Faaola, o Lana misiona i la le tino, ma Lona nuu pele. O le maofa e faaalia e la’u uo pe a ia talanoa e uiga i mea uma na te aoaoina mai i le Nuu Paia e pipisi, ma o lea tulaga maofa na avea ma itu taua tele i mea tetele na ia ausia ma tulimataiga faaakatemia i lona olaga.
A o ou faalogologo i ona aafiaga ma lagonaina lona naunautai, sa ou tomanatu i le tele o le ofoofogia faaleagaga, pe a, e faapea e mafai ona tatou ootia mo le talalelei a Iesu Keriso ma le eseesega e mafai ona faia ai i lo tatou avea ai ma so’o ma i la tatou malaga i le ola e faavavau. O le matagofie o loo ou talanoa i ai o le feti’i a’e o lagona malolosi, maofa, po o le segia o le mauli ua masani ai tagata uma o e faaogatotonuina ma le loto atoa o latou olaga i le Faaola ma Ana aoaoga ma faailoaina ma le lotomaualalo Lona i ai i o latou olaga. O na lagona o le matagofie, e musuia e le Agaga Paia, e faaosofia ai le naunau e ola fiafia i aoaoga faavae autu a Keriso.1
O loo i ai i tusitusiga paia le tele o faataitaiga o le ala e mafai ai ona faailoa mai lenei lagona feti’i a’e. Mo se faataitaiga, sa faaalia e le perofeta o Isaia le loloto o lona lotofaafetai mo le Alii e ala i lona olioli ia te Ia.2 O i latou na faalogo o aoao atu Iesu i totonu o le sunako i Kapanaumi sa maofa i Lana mataupu ma le malosiaga na Ia aoao atu ai.3 O le lagona foi lava lea na tuia ai neura uma o le fatu o Iosefa Samita a o ia faitauina mai le Tusi Paia le mataupu muamua o Iakopo, lea na ala ai ona ia sailia le poto o le Atua.4
O’u uso e ma tuafafine, a oo ina tatou maofa moni ia Iesu Keriso ma Lana talalelei, e sili atu lo tatou fiafia, e tele atu lo tatou naunautaiga mo le galuega a le Atua, ma e tatou te faailoaina le aao o le Alii i mea uma. E le gata i lea, ua atili anoa a tatou suesuega o afioga a le Atua; ua atili faia ai ma le loto a tatou tatalo; ua atili migao ai a tatou tapuaiga; ma atili filiga ai la tatou auaunaga i le malo o le Atua. O nei mea uma o ni mea moni e saofaga i le atili tasoo ai o auaunaga a le Agaga Paia i o tatou olaga.5 O lea la, o le a faamalolosia a tatou molimau i le Faaola ma Lana talalelei, o le a tumau ai lo tatou faaolaolaina o Keriso i totonu ia i tatou,6 ma o le a tatou ola i o tatou olaga “ua maua’a ma atiina ae ia te ia, ma faatumauina i le faatuatua, … ia faatele i ai ma le faafetai.”7 A tatou ola faapea, o le a faateleina lo tatou malolosi faaleagaga e maufetuunai ai ma puipuia mai le pauu atu i le mailei o le faatūtūgatā faaleagaga.
O lena faatūtūgatā e afua mai i le faifaimalie atu o lo tatou naunau e punouai atoatoa i le talalelei a le Alii. E masani lava ona amata pe a tatou lagonaina ua uma ona tatou mauaina uma le malamalama ma faamanuiaga e tatau ai mo lo tatou fiafia i lenei olaga. O lea faamalieina, pe a, e afua ai ona tatou faatauagafau i meaalofa o le talalelei, ma tatou oo atu ai i le tulaga matautia o le faatuatuana’i o lo tatou punouai i mea taua o le talalelei a Iesu Keriso8 ma feagaiga na tatou osia. O le mea lea, tatou te faasolosolo taumamao ai i tatou lava mai le Alii, ua faavaivaia lo tatou tomai e “faalogo ia te Ia,”9 ma oo ai ina tatou faaleano ma lē lagonaina le maoae i Lana galuega. O le masalosalo e tusa ai ma le moni o a tatou molimau ua i ai e tuia ai o tatou mafaufau ma loto, tatou te ganagofie ai i faaosoosoga a le tiapolo.10
Na tusia e Pastor Aiden Wilson Tozer, o se tusitala maualuga ma se Kerisiano lototoa, “O le faasea o se fili matautia o le tuputupu ae faaleagaga uma.”11 Pe le o le mea tonu ea lea na tupu i le nuu o Nifae ina ua faatoa mavae le soifua mai o Keriso? Na “amata ona galo i tagata ia faailoga ma mea ofoofogia mai le lagi, … [ua le talitonu] i mea uma sa latou faalogo ma vaai i ai.” Ma o lea “sa faatauasoina [ai e Satani] o latou mata ma taitai ese i latou ia talitonu o le mataupu faavae a Keriso o se mea valea ma se mea ua le aoga.”12
O’u uso e ma tuafafine pele, i Lona alofa atoatoa e le i’u ma le silafia ai o lo tatou natura faaletagata soifua,13na faavaeina ai e le Faaola le ala mo i tatou e aloese ai mai le pauu atu i le mailei o le faatūtūgatā faaleagaga. O le valaaulia a le Faaola ua tatou maua ai se vaaiga lautele, aemaise le mafaufau atu i le lalolagi lavelave o loo tatou ola ai: “Aoao mai ia te au, ma faalogo mai i a’u upu; savali i le agamalu o lo’u Agaga, ma o le a e maua ai le filemu ia te a’u.”14 A tatou talia lenei valaaulia mai le Faaola, ua tatou faaali atu lo tatou lotomaualalo, lo tatou naunau e aoao, ma lo tatou faamoemoe e avea atili e faapei o Ia.15 O lenei valaaulia e aofia ai foi le auauna atu ia te Ia ma le auauna atu i fanau a le Atua “ma o tatou loto atoa, mafaufau atoa, manatu atoa, ma le malosi atoa.”16 Ma e moni, o le ute o a tatou taumafaiga i lenei malaga, o poloaiga sili e lua: ia alofa i le Alii lo tatou Atua ma alolofa i o tatou tuaoi e pei o i tatou lava.17
O le vaega lenei o le uiga paia o Iesu ma sa tumatila mai i mea uma sa Ia faia i le taimi o Lana misiona i le lalolagi.18 O le mea lea, pe a tatou tuuto moni atu i tatou lava ma le loto i ai e vaavaai atu ia te Ia ma aoao mai Lana faataitaiga atoatoa,19 tatou te iloa lelei ai o Ia. Tatou te tuputupu ae i le naunautaiga ma le manao e faaaofia ai i o tatou olaga le ‘anava laualuga o le ala e ao ona tatou ola ai, le faataitaiga e ao ona tatou faatuina, ma poloaiga e ao ona tatou mulimulita’ia. Tatou te maua foi se malamalama faaopoopo, poto, uiga faaleatua, ma le alofa tunoa i le Atua ma o tatou tuaoi.20 E mafai ona ou faamautinoa atu ia te outou o le a faalolotoina lo tatou gafatia e lagonaina ai le tosinaga ma le alofa o le Faaola i o tatou olaga, faalauteleina lo tatou faatuatua, lo tatou manao e faatino le amiotonu, ma faaosofia e auauna atu ia te ia ma isi.21 E le gata i lea, o le a faamausaliina lo tatou lotofaafetai mo faamanuiaga ma luitau tatou te feagai i le olaga nei, ma avea ai o se vaega o la tatou tapuaiga moni.22
A’u uo pele, o nei mea uma e faamalosia ai lo tatou maofa faaleagaga e faatatau i le talalelei ma faagae’e ai i tatou e tausia ma le fiafia ia feagaiga tatou te osia ma le Alii—e oo lava i le totonugalemu o faigata ma luitau tatou te oo i ai. Ioe, ina ia tutupu nei taunuuga e manaomia ona tatou faatofuina i tatou lava ma le faamoemoega moni i aoaoga a le Faaola,23 taulai atoatoa ia te Ia ma taumafai malosi e faaaofia ai Ona uiga faaleatua i le ala tatou te ola ai.24 E le gata i lea, e manaomia ona tatou faalatalata atili ia te Ia e ala i lo tatou salamo,25sailia Lana faamagaloga ma Lona mana togiola i o tatou olaga ma tausi Ana poloaiga. Na folafola mai e le Alii lava Ia e faapea o le a Ia taitai i o tatou ala pe afai tatou te faalagolago ia te Ia ma o tatou loto atoa, faailoa o Ia i o tatou ala uma ae le o le faalagolago i lo tatou lava atamai.26
O se alii sa ou feiloai i ai talu ai nei, o lona igoa o Uesi ma o loo auai i le konafesi i le asō, sa taliaina le valaaulia a Keriso e aoao ia te Ia ma Lana talalelei ma sa amata ona ia iloa le maofa o Lona alofa i le mavae ai o le 27 tausaga o lona faataumamaoina o ia lava mai le ala o feagaiga. Na ia fai mai ia te a’u, sa i ai se aso na faafesootai mai ai o ia i le Apiofoliga e se faifeautalai, o Elder Jones, o le sa tofia mo se taimi le tumau i le eria a Uesi, a o lei alu i lana misiona na uluai tofia i ai i Panama. Ina ua tau atu Elder Jones i le atatosi o Uesi, e aunoa ma lona mua’i iloaina ua avea o ia ma tagata o le Ekalesia, sa ia lagonaina le taitaiga a le Agaga Paia ma sa ia iloa ai e tatau ona ia faafesootaia loa lava ia Uesi. Sa vave ona gaoioi o ia i lea uunaiga. Sa maofa Uesi i lenei fesootaiga e lei fuafuaina ma sa amata ai ona ia iloa sa silafia o ia e le Alii e ui ina ua mamao ese mai le ala o feagaiga.
Mai lava i lena taimi, sa amata ai ona fesootai soo ia Uesi ma faifeautalai. Sa saunia e Elder Jones ma lana soa ni galuega faalevaiaso o le auauna atu ma savali faaleagaga ia na fesoasoani ia Wes e toe maua ai lona maofa i le Faaola ma Lana talalelei. Na toe faamumu ai le mumu o lana molimau i le upumoni ma le alofa o le Faaola mo ia. Sa lagonaina e Uesi le filemu lea e maua mai le Faamafanafanaga ma maua ai le malosiaga sa ia manaomia e toe foi mai ai i le lafu. Sa ia fai mai ia te a’u o le aafiaga lea na toe aumaia ai o ia faaleagaga ma faalelagona i le ola ma sa fesoasoani ia te ia e aveesea ai lagona o le inoino na faaputuputu i le tele o tausaga ona o aafiaga faigata sa ia tauasaina.
E pei ona sa matauina e la’u uo lelei ma se faiaoga magafagafa na ta’ua i luga, e i ai pea lava se mea matagofie ma le ofoofogia e aoao mai e uiga ia Iesu Keriso ma Lana talalelei.27 Na faia e le Alii ni folafolaga matagofie ma ua tuuina mai ia i latou uma e aofia ai ma i tatou, o e saili e aoao ia te Ia ma faaaofia ai Ana afioga i o latou olaga. Na Ia fetalai atu ia Enoka, “Faauta [o le a] i ou luga loʼu Agaga, o le mea lea o au upu uma o le a Ou taʼutonuina; ma o le a sosola ese mauga i ou luma, ma o le a liliu vaitafe mai i o latou alātafe; ma o le a mau oe ia te aʼu, ma aʼu ia te oe.”28 Na Ia folafola atu foi e Ia i le Tupu o Peniamina, “O le a taʼua ai outou o le fanau a Keriso, o ona atalii, ma ona afafine; ona faauta, o le asō ua fanauina ai e ia outou faaleagaga; ona ua outou fai mai ua liua o outou loto e ala i le faatuatua i lona suafa; o lea, ua fanauina ai outou e ia ma ua avea ai outou ma ona atalii ma ona afafine.”29
O le mea lea, a o tatou tauivi pea ma le faamaoni e aoao e uiga i le Faaola ma mulimuli i Ana faataitaiga, ou te folafola atu ia te outou, i Lona suafa, o le a tusia ona uiga paia faaleatua i o tatou mafaufau ma loto,30 o le a tatou avea atili e faapei o Ia, ma o le a tatou savavali faatasi ma Ia.31
O’u uso e ma tuafafine pele, ou te tatalo ia tatou tutu atu ma le maofa ia Iesu Keriso ma Lona alofa mae’ae’a, e le uma, ma le atoatoa. Ia avea le manatua o mea e vaaia e o tatou mata, ma mea na lagona e o tatou loto e faateleina ai lo tatou maofa i le taulaga togiola a le Faaola, lea e mafai ona faamaloloina ai i tatou mai o tatou manu’aga faaleagaga ma faalelagona, ma fesoasoani ai ia tatou latalata atili ia te Ia. Inā tatou maofa ia i folafolaga sili ua i ai i le Tama i Ona aao ma ua Ia saunia mo i latou o e faamaoni.
“O le malo ua ia outou ma o ona faamanuiaga ua ia outou, ma o ‘oa o le faavavau ua ia outou ia.
Ma o ia o lē e taliaina mea uma ma le faafetai o le a faamamaluina.”32
O Iesu o le Togiola o le lalolagi, ma o Lana Ekalesia lenei. Ou te molimau atu ai i nei upumoni i le suafa-e maofa i le paia, ma le mamalu, le suafa o Iesu Keriso, amene.