Elder Isaac K. Morrison

Fitugafulu o le Pulega Aoao

Ua saunoa Elder Isaac K. Morrison sa tau le maua se la moe ma lona faletua talu ona tuuina atu e Peresitene Russell M. Nelson se valaauga ia Elder Morrison e auauna atu o se Fitugafulu o le Pulega Aoao.

“Ua ma iloa o le a avea lenei mea ma se malaga mo i ma’ua,” o lana tala lea. “O le a ma faalagolago i le Alii e faaali mai ia i ma’ua mea e tatau ona ma faia.”

Sa valaauina Elder Morrison o se peresitene o le siteki i le 2014, Fitugafulu Eria i le 2018, ma le peresitene o le Misiona a Kana Cape Coast i le 2020.

“O tofiga uma lava ua oo mai i se taimi na ou tau le mafaufauina ai,” o lana tala lea. “Ae ou te faalagolago i le Alii ae le o o‘u lava tomai.”

E i ai se faailoga o le matuaofaiva faasaienisi o Elder Morrison i pulega faalefuafuaga ma le taitaiga mai le Iunivesite o Kwame Nkrumah o Saienisi ma Tekinolosi i Kana. Sa galue o ia mo le Ekalesia i tulaga eseese talu mai le 2004, talu ai nei lava o se pule lagolago mo taitai ma tagata o le ekalesia mo Aferika i Sisifo.

Sa soifua mai Isaac Kofi Morrison i le aso 25 o Novema, 1977 i Takoradi, Kana, ia Joseph Kojo Morrison ma Mary Efua Obua Sarfo.

A o laitiiti, sa auai Elder Morrison ma lona aiga i sauniga lotu a se isi lotu. Ina ua nofo o ia ma le aiga o le uso o lona tama ina ia auai i le aoga maualuga, sa ia auai i sauniga a le Au Paia o Aso e Gata Ai faatasi ma i latou ona alu ai lea i sauniga a lana lotu. Sa valaaulia o ia e se faiaoga seminare i le vaveao e auai i le seminare, lea na ia feiloai ai ia Hannah Nyarko.

“Sa atamai tele o ia [Hannah] ma na te tuuina mai ni manatu maoae,” na ia fai mai ai. “Na ou maua moni ai le uunaiga e manao ai e suesue atili.” Ina ua uma ona suesueina le Tusi a Mamona i lena tausaga, sa ia fai mai, “Sa ou saunia mo le papatisoga.”

I le aso 18 o Tesema, 2004, sa la faaipoipo ai ma Hannah i Takoradi ma faamauina i le tolu aso mulimuli ane i le Malumalu o Accra Ghana. E toatolu o la alo tama.

E faaopoopo atu i isi ana valaauga, sa auauna atu Elder Morrison o se fesoasoani i le au peresitene o le siteki, epikopo, fesoasoani i le au epikopo, peresitene o le korama a toeaina, faiaoga o Aoaoga Faavae o le Talalelei, faiaoga seminare, ma se faifeautalai faamisiona i Nigeria.