“Susan H. Porter,” Liahona, Me 2022.
Susan H. Porter
Peresitene Aoao o le Peraimeri
“O se tasi o mea na faagaeetia i o tatou mafaufau i le tausaga ua tuanai o le, e mafai faapefea ona tatou faamalosia fanau i le faaleagaga?” na saunoa ai Sister Susan H. Porter. “Pe a tatou talanoa e uiga i le faamalolosia o le faatuatua o le tupulaga faiae, e tatau ona amata i le Peraimeri.”
Ua vaai Sister Porter i faamanuiaga e oo mai i fanau ua papatisoina a o latou auai o ni tagata o le feagaiga o le Ekalesia.
“E masani lava o le faia ma le auauna atu e faatupulaia ai a tatou molimau,” sa ia faamalamalama mai ai. “E mafai e tamaiti ona aoao e saili musumusuga mai le lagi.”
A o lei valaauina o ia o se Peresitene Aoao o le Peraimeri, sa auauna atu Peresitene Porter o se Fesoasoani Muamua i le Au Peresitene Aoao o le Peraimeri mo se tausaga.
Sa ia fai mai e toatele tamaiti e le mafai ona auai i le Peraimeri i le taimi o le faama‘i pipisi o le KOVITI-19. Sa ia vaaia foi, ma iloa, luitau na feagai ma tamaitai nofofua. O lona toalua, o Elder Bruce D. Porter o le Fitugafulu, na maliu i le 2016.
“Sa tele ni Aso Sa sa ou le maua ai le faamanatuga,” o lana tala lea.
A o ia faasoa mai ona aafiaga, na tau atu e isi tamaitai ia te ia, “O le mea moni o lou auauna atu i le Ekalesia ua ou maua ai se vaaiga mamao sili atu e manaomia foi au e le Ekalesia.”
Na soifua mai Susan Elizabeth Holland Porter i le aso 31 Iulai, 1955, i le Aai o Ponca, Oklahoma, ISA, ia Hans J. ma Charlene Coleman Holland ma sa soifua ae i Niu Ioka, ISA.
Sa faaipoipo o ia ia Elder Porter i le aso 2 Fepuari, 1977 i le Malumalu o Uosigitone D.C. Sa la tausia le la fanau e toafa i le itu i sasae o le Iunaite Setete, Siamani, ma Iuta ma faataunuuina tofiga o le Ekalesia i le Eria o Europa Sasae.
Sa faauu mai Sister Porter ma se tikeri i le kemisi, mai le Iunivesite o Polika Iaga. Sa galue o ia o se fesoasoani i le fale suesue mo le Inisitituti o Tekinolosi a Massachusetts ma o se faiaoga o le matematika. Sa volenitia foi o ia faatasi ma faalapotopotoga eseese faalenuu ma faalemalo.
Sa galue Sister Porter i le aufono faufautua aoao a le Aualofa, ma o isi ona valaauga talu ai e aofia ai le fesoasoani i le au peresitene o le Aualofa a le siteki, peresitene o le Aualofa ma Tamaitai Talavou a le uarota, faiaoga o Aoaoga Faavae o le Talalelei, ma le taitai musika o le Peraimeri.