O Le Alofa Paia i le Fuafuaga a le Tama
O le faamoemoega o le aoaoga faavae ma aiaiga faavae a lenei Ekalesia toefuataiina o le sauniaina lea o fanau a le Atua mo le faaolataga i le malo selesitila ma mo le faaeaga i ona mamalu sili ona maualuga.
O le fuafuaga o le talalelei ua faaalia ai le alofa o lo tatou Tama Faalelagi mo Ana fanau uma. Ina ia malamalama i lenei mea, e tatau ona tatou saili ia malamalama i Lana fuafuaga ma Ana poloaiga. E alofa tele o Ia i Lana fanau na Ia auina mai ai Lona Alo e Toatasi na fanaua, o Iesu Keriso, e avea ma o tatou Faaola ma Togiola, ia puapuagatia ma maliu mo i tatou. I totonu o le Ekalesia toefuataiina a Iesu Keriso o le Au Paia o Aso e Gata Ai, ua ia i tatou se malamalamaaga uigaese e uiga i le fuafuaga a lo tatou Tama Faalelagi. O lenei mea ua tatou maua ai se isi ala ese e tagai ai i le faamoemoega o le olaga faaletino, le faamasinoga faalelagi o loo mulimuli mai, ma le taunuuga mamalu faaiu o fanau uma a le Atua.
Ou te alofa ia te outou, o’u uso e ma tuafafine. Ou te alofa i fanau uma a le Atua. Ina ua fesiligia Iesu, “O le fea poloaiga o i le tulafono ua sili?” Sa Ia aoao mai ia alofa i le Atua ma alofa i o tatou tuaoi o poloaiga muamua ia o poloaiga sili a le Atua.1 O na poloaiga e muamua ona la te valaaulia i tatou ia tuputupu a’e faaleagaga e ala i le suesue ia faataitai i le alofa o le Atua mo i tatou. Ou te moomoo ua tofu i tatou uma ma se malamalama sili atu o le aoaoga faavae alofa ma aiaiga faavae ua faavaeina e lo tatou Tama Faalelagi ma Lona Alo, o Iesu Keriso i totonu O Le Ekalesia a Iesu Keriso ole Au Paia o Aso e Gata Ai. O le mea lea ou te fai atu ai i i o loo saili e faamanino le auala e faamatala ai e le alofa o le Atua lena aoaoga faavae ma aiaiga faavae musuia a le Ekalesia.
I.
O se malamalamaaga sese taatele o le faamasinoga lea e mulimuli mai i le olaga faaletino e faapea o tagata lelei e o i se nofoaga ua ta’ua o le lagi ae o tagata leaga e o i se nofoaga faavavau ua ta’ua o seoli. O lenei manatu lē sa’o e na o le lua taunuuga faaiu faapea o i latou e le mafai ona tausia uma poloaiga e manaomia mo le lagi o le a mautinoa lava e faavavau le taunuuga i seoli.
Ua i ai i se Tama Faalelagi alofa se fuafuaga mo Ana fanau. O le aoaoga faavae ua faaalia o le Ekalesia toefuataiina a Iesu Keriso ua aoao mai e faapea o fanau uma a le Atua—faatasi ma ni tuusaunoaga e matua faatapulaa le iloiloina iinei—o le a iu ina ea ae i se malo o le mamalu.2 “E tele mea e nonofo ai i le maota o lo’u Tama,”3 sa aoao mai ai Iesu. Mai faaaliga o aso nei ua tatou iloa ai o na maota o loo i totonu o ni malo eseese e tolu o le mamalu. O le faamasinoga mulimuli o le a faamasinoina ai i tatou taitoatasi e tusa ma a tatou galuega ma manaoga o o tatou loto.4 A o lumanai lena mea, o le a manaomia ona tatou puapuagatia mo a tatou agasala e lei salamo ai. Ua manino lava tusitusiga paia i lena mea.5 Ona faamatuu mai lea e lo tatou Faamasino amiotonu ia i tatou o le mea e nofo ai i se tasi o na malo o le mamalu. O lea, e pei ona tatou iloa mai faaaliga o aso nei, o tagata uma “o le a faamasinoina … , ma o le a maua e tagata taitoatasi e tusa ma ana lava galuega, lana lava puleʼaga, i maota ua saunia.”6
Ua filifilia e le Alii e faaali mai nai mea laiti e uiga i malo e lua o nei malo o le mamalu. I se faatusatusaga, ua faaali mai e le Alii le tele o mea e uiga i le malo aupito maualuga o le mamalu, lea e faamatalaina e le Tusi Paia o le “pupula o le la.”7
I le mamalu “selesitila”8 o loo i ai ni lagi po o ni tikeri se tolu.9 O le tikeri sili ona maualuga o nei malo o le faaeaga i le malo selesitila, lea e mafai ai ona tatou avea e faapei o lo tatou Tama ma Lona Alo, o Iesu Keriso. Ina ia fesoasoani ia i tatou ia atiae uiga faaleatua atoa ma le suiga i le natura e talafeagai ia iloa ai lo tatou gafatia paia, ua faaali mai ai e le Alii aoaoga faavae ma faavaeina poloaiga e fua i le tulafono e faavavau. O le mea lenei tatou te aoaoina i Le Ekalesia a Iesu Keriso o le Au Paia o Aso e Gata Ai ona o le faamoemoega o le aoaoga faavae ma aiaiga faavae o lenei Ekalesia toefuataiina, o le saunia lea o fanau a le Atua mo le faaolataga i le mamalu selesitila, ma le mea sili ona patino, mo le faaeaga i lona tikeri sili ona maualuga.
O feagaiga osia ma faamanuiaga folafolaina i ē faatuatua i totonu o malumalu o le Atua, o le ki lea. Ua faamalamalama mai ai i lenei mea lo tatou fausiaina o malumalu i le lalolagi atoa, lea na lagiina ai ma le matagofie tele e le aufaipese. O nisi ua matuā nenefu lava i lenei faamamafa, e le malamalama o feagaiga ma sauniga o le malumalu e taitaia i tatou agai atu i le ausiaina o le faaeaga. E na o le anotusi o le upumoni faaalia o tikeri e tolu o le mamalu e mafai ona malamalama ai i lenei mea. Ona o le alofa tele o lo tatou Tama Faalelagi mo Ana fanau uma, ua Ia saunia ai isi malo o le mamalu—e pei ona faamatalaina e Elder Quentin L. Cook ananafi—ia e sili atu foi lo latou matagofie nai lo mea e mafai ona tatou malamalama i ai.10
O le Togiola a Iesu Keriso ua mafai ai nei mea uma. Ua Ia faaali mai Na te “faamamaluina le Tama, ma laveai galuega uma a ona aao.”11 O lena faaolataga e tuu atu i malo eseese o le mamalu. Ua tatou iloa mai faaaliga o aso nei e faapea “o malo uma ua i ai se tulafono ua tuu atu i ai.”12 O le mea taua lava:
“O ia o lē e lē mafai ona ola i le tulafono o se malo selesitila e lē mafai ona ia gafatia se mamalu selesitila.
“Ma o ia o lē e lē mafai ona ola i le tulafono o se malo terasitila e lē mafai ona ia gafatia se mamalu terasitila.
“Ma o ia o lē e lē mafai ona ola i le tulafono o se malo telesitila e lē mafai ona ia gafatia se mamalu telesitila.”13
I nisi upu, o le malo o le mamalu tatou te mauaina i le Faamasinoga Mulimuli e fua i tulafono tatou te filifili e tausia i le fuafuaga alofa a lo tatou Tama Faalelagi. I lalo o lena fuafuaga o loo i ai ni malo se tele ina ia mafai ona tofia i ai Ana fanau uma i se malo e mafai ona latou “aumau ai.”
II.
O aoaoga ma aiaiga faavae o le Ekalesia toefuataiina a le Alii e faatatau i ai nei upumoni e faavavau i se ala e na o le anotusi o le fuafuaga alofa a lo tatou Tama Faalelagi mo Ana fanau uma e mafai ona malamalama atoatoa i ai.
O le mea lea, tatou te faamamaluina ai le faitalia o le tagata. E toatele ua silafiaina taumafaiga maoae a lenei Ekalesia e faalauiloa atu le saolotoga o tapuaiga. O nei taumafaiga e lagolago ai le fuafuaga a lo tatou Tama Faalelagi. Tatou te saili atu e fesoasoani i tagata uma o Ana fanau—e le na o o tatou lava tagata o le ekalesia—e olioli i le saolotoga taua e filifili ai.
E faapena foi, o nisi taimi e fesiligia ai i tatou pe aisea tatou te auina atu ai faifeautalai i le tele o malo, e oo lava i nuu o Tagata Kerisiano. E fesiligia foi i tatou pe aisea tatou te foai atu ai fesoasoaniga alofa tetele i tagata e le o ni tagata o la tatou Ekalesia e aunoa ma le faafesootaia o lenei fesoasoaniga i a tatou taumafaiga faafaifeautalai. Tatou te faia lenei mea ona ua aoao i tatou e le Alii ia tatou mafaufau i tagata uma o Ana fanau o o tatou uso ma tuafafine, ma e tatou te mananao e faasoa atu o tatou faamanuiaga faaleagaga ma faaletino i tagata uma.
O le aoaoga faavae e faavavau ua maua ai foi se malamalama tulagaese e uiga i fanau. E ala i lenei malamalama tatou te vaai ai i le fanauina ma le faafaileleina o fanau o se vaega o le fuafuaga paia. O se tiute fiafia ma le paia o i latou ua tuuina i ai le mana e auai ai i lea mea. O le mea lea, ua poloaiina ai i tatou e aoao atu ma puipuia mataupu faavae ma faiga masani ia e maua ai tulaga silisili mo le atinaega ma le fiafia o fanau i lalo o le fuafuaga a le Atua.
III.
Ma le mea mulimuli, O Le Ekalesia a Iesu Keriso o le Au Paia o Aso e Gata Ai ua lauiloa lelei o se Ekalesia e faatotonugalemu-i-le-aiga. Ae o le mea e le o malamalama lelei i ai o le tulaga moni e faapea, o lo tatou totonugalemu i aiga e le faatapulaaina i mafutaga faaleolaga nei. O mafutaga e faavavau e taua tele foi i lo tatou faatuatuaga. O le misiona a le Ekalesia toefuataiina o le fesoasoani lea i fanau uma a le Atua ia agavaa mo mea e finagalo le Atua e fai ma o latou taunuuga faaiu. E ala i le faaolataga ua saunia e ala i le Togiola a Keriso, e mafai e tagata uma ona maua le ola e faavavau (faaeaga i le malo selesitila), lea na tautino mai e le Tina ia Eva “ua tuu mai e le Atua ia i latou uma o e e usiusitai.”14 E sili atu lenei nai lo le faaolataga. Ua faamanatu mai e Peresitene Russell M. Nelson ia i tatou faapea “i le fuafuaga e faavavau a le Atua, o le faaolataga o se mataupu faaletagata lava ia; [ae] o le faaeaga o se mataupu faaleaiga.”15
E taua tele ia i tatou le faaaliga a le Atua e faapea o le faaeaga e na o le faamaoni lava i feagaiga o se faaipoipoga e faavavau i le va o se tane ma se fafine e mafai ona maua ai.16 O lena aoaoga faavae faalelagi o le mafuaaga lea tatou te aoao atu ai e faapea “o le tulaga tane po o le fafine [o le tagata] o se vaega taua lea o le muai olaga, olaga faitino, ma le faasinomaga e faavavau ma le faamoemoega.”17
O le mafuaaga foi lea e manaomia ai e le Alii Lana Ekalesia ia tetee atu i uunaiga faaleagafesootai ma faaletulafono ia o ese mai Lana aoaoga faavae o le faaipoipoga i le va o le tane ma le fafine ia tetee atu i suiga lea e faaitupa tutusa ai e pei e leai se eseesega i le va o le tane ma le fafine po o le fenumiai ai pe suia le itupa.
O tulaga o le Ekalesia toefuataiina i nei mataupu autu e tele ina faatupu ita i le itu faafeagai. Tatou te malamalama i lena mea. O le fuafuaga a lo tatou Tama Faalelagi ua faatagaina ai le “faafeagai o mea uma,”18 ma o fouvalega aupito sili ona malolosi a Satani e faasaga tonu i soo se mea e silisili ona taua i lena fuafuaga. O le mea lea, ua ia saili ai e tetee atu i le alualu i luma i le faaeaga e ala i le faaleagaina o faaipoipoga, faalotovaivaia le fanauina o fanau, po o le faafenumiai o itupa. Peitai, ua tatou iloa i le taufetuliga umi, o le faamoemoega paia ma le fuafuaga a lo tatou Tama Faalelagi alofa, o le a le suia lava. E ono suia tulaga faaletagata, ma e faamautinoa mai e le fuafuaga a le Atua e faapea i le taufetuliga umi, o ē faamaoni e tausia a latou feagaiga o le a mauaina le avanoa e agavaa ai mo faamanuiaga uma ua folafolaina.19
O se aoaoga taua tulagaese e fesoasoani ia i tatou ia saunia ai mo le ola e faavavau, “le meaalofa silisili o meaalofa uma a le Atua,”20 o le folafolaga i le aiga 1995.21 O le mea moni, o ona folafolaga, e manino lava le eseese ma nisi o tulafono o i ai nei, faiga masani, ma mea ua taliaina e le lalolagi e pei o le nonofo faapouliuli ma faaipoipoga o le itupa e tasi. O i latou e le malamalama atoatoa i le fuafuaga alofa a le Tama mo Ana fanau e ono manatu i lenei folafolaga i le aiga ua na o se faamatalaga o aiaiga faavae e fai ma fesuisuiai. I se eseesega, tatou te faamautu atu o le folafolaga i le aiga, ua faavaeina i luga o aoaoga faavae lēmasuia, ua faauigaina ai le ituaiga o mafutaga faaleaiga lea e mafai ona tupu ai le vaega sili ona taua o lo tatou atinaega e faavavau.
O le anotusi lena mo le aoaoga faavae tulagaese ma aiaiga faavae o le Ekalesia toefuataiina a Iesu Keriso o le Au Paia o Aso e Gata Ai.
IV.
I le tele o mafutaga ma tulaga i le olaga faaletino, e tatau ia i tatou taitoatasi ona ola faatasi ma nei eseesega. I le avea ai ma soo o Keriso o e e tatau ona alolofa atu i o tatou uso a tagata, e tatau ona tatou ola filemu faatasi ma i latou o e e le talitonu e pei ona tatou talitonu. O i tatou uma o fanau a se Tama Faalelagi alofa. Mo i tatou uma lava, ua Ia fuafuaina le olaga pe a mavae le oti ma, mulimuli ane, o se malo o le mamalu. E finagalo le Atua mo i tatou uma ia tinou mo Ana faamanuiaga silisili ona maualuga e mafai ona maua e ala i le tausiga o Ana poloaiga silisili ona maualuga, o feagaiga, ma sauniga, o mea uma ia e tau atu i Ona malumalu paia o loo fausia i le lalolagi atoa. E tatau ona tatou saili e faasoa atu nei upumoni o le faavavau i isi. Ae i le alofa o loo tatou nofoaitalafu ai i o tatou tuaoi, tatou te taliaina ai lava i taimi uma a latou faaiuga. E pei ona aoao mai se perofeta o le Tusi a Mamona, e tatau ona tatou fetaomi atu i luma, ma “se alofa i le Atua ma tagata uma.”22
E pei ona tautino mai e Peresitene Russell M. Nelson i le tatou konafesi talu ai: “E le’i i ai lava se taimi i le talafaasolopito o le lalolagi [i lo le taimi nei] ua sili atu ona taua patino le iloa e uiga i lo tatou Faaola ma le fitoitonu i le agaga o tagata soifua uma. … O le mataupu faavae mamā a Keriso e mamana tele. E suia ai le olaga o tagata uma e malamalama i ai ma saili e faatino i lona olaga.”23
Tau ina ia tatou faatinoina uma lena aoaoga faavae paia i o tatou lava olaga, ou te tatalo ai i le suafa o Iesu Keriso, amene.