O Le Ala o Feagaiga: O Le Ala i le Ola e Faavavau
O le ala i le atoatoaga o le ala o feagaiga, ma o Iesu Keriso o le totonugalemu o sauniga uma ma feagaiga.
Sa manao se tupu malosi i lona atalii e pulea se tasi o ona malo. Sa tatau i le pelenise ona aoao ma ia tupu i le poto e nofo ai i le nofoalii. I se tasi aso, sa feiloai ai le tupu ma le pelenise ma faasoa atu i ai lana fuafuaga. Sa la ioe o le a alu le pelenise i se isi taulaga ma ia maua ai le poto masani. O le a feagai o ia ma luitau ma fiafia ai i le tele o mea lelei iina. Ona auina atu lea o ia e le tupu i le taulaga, lea sa faamoemoe e faamaonia ai le faamaoni o le pelenise i le tupu ma faaalia ai ua talafeagai lona mauaina o avanoa ma tiutetauave ua teuina e le tupu mo ia. Sa tuu atu i le pelenise le saolotoga e filifili ai ia maua nei avanoa ma tiutetauave pe leai, e fuafua lava i ona manaoga ma lona faamaoni. Ou te talitonu tou te fia iloa le mea na tupu i le pelenise. Pe na toe foi mai o ia e fai mona tofi le malo?
Uso e ma tuafafine pele, o i tatou taitoatasi o se pelenise po o se purinisese. Na auina mai i tatou i le olaga nei e se Tama Faalelagi alofa ia olioli i faamanuiaga o se tino o le a avea ma tino ola pea e ala i le Togiola ma le Toetu o Iesu Keriso. Ua faamoemoeina i tatou e sauniuni e toefoi atu i le afioaga o le Atua e ala i le faamaonia atu o le a tatou “faia mea uma o soo se mea e poloaiina ai i [tatou] e le Alii lo [tatou] Atua” (Aperaamo 3:25).
Ina ia fesoasoani ia i tatou, na afio mai le Faaola e togiola i tatou ma faasino mai le ala e toefoi atu ai i le Atua. Ua valaaulia fanau a le Atua e o mai i le Faaola ma ia faaatoatoaina ia te Ia. I tusitusiga paia, tatou te maua ai le valaaulia mo i tatou e o mai i le Alii, e silia ma le faa-90, ma e silia ma le ‘afa o nei valaaulia o ni valaaulia patino mai le Alii lava Ia. O le taliaina o le valaaulia a le Faaola, o lona uiga o le maua o Ana sauniga ma tausia a tatou feagaiga ma Ia. O Iesu Keriso “o le ala, le upumoni, ma le ola” (Ioane 14:6), ma ua Ia valaaulia i tatou “uma ia o mai ia te ia ma taumamafa i lona agalelei; ma e lē teena e ia se tasi e sau ia te ia” (2 Nifae 26:33).
O lo tatou aoaoina ma le aoao atu e faalolotoina ai lo tatou liua i le Tama Faalelagi ma Iesu Keriso, ma fesoasoani ai ia tatou avea atili ai e faapei o i La’ua. E ui e lei faaalia uma mai mea e faatatau “i le taimi tonu ma le ala [o le a] faaee mai ai faamanuiaga o le faaeaga,” ae ua faamautinoa mai ia i tatou (M. Russell Ballard, “Faamoemoe ia Keriso,” Liahona, May 2021, 55).
O Alema le faitaulaga sili, o loo aoao atu i le nuu o Saraemila, na faamatalaina se valaaulia loloto a Iesu Keriso:
“Faauta, ua ia auina mai se valaaulia i tagata uma ona ua faaloaloa mai ia te i latou aao o le alofamutimutivale ma ua ia fetalai: Ia salamo, ona ou talia lea o outou.
“Ioe, ua fetalai mai o ia: O mai ia ia te a’u ma o le a outou aai ai i le fua o le laau o le ola” (Alema 5:33–34).
Ua valaaulia e le Faaola lava Ia i tatou e o mai ia te Ia ma tauave i o tatou luga Lana amo ina ia tatou maua se malologa i lenei lalolagi vevesi (tagai i le Mataio 11:28–29). Tatou te o mai ia Keriso e ala i le “faatinoina o le faatuatua ia te Ia], salamo i aso taitasi, osia o feagaiga ma le Atua pe a tatou maua sauniga o le faaolataga ma le faaeaga, ma tumau e oo i le iuga e ala i le tausia o na feagaiga” (Tusitaulima Aoao: Auauna atu i Le Ekalesia a Iesu Keriso o le Au Paia o Aso e Gata Ai, 1.2.1, ChurchofJesusChrist.org). O le ala i le atoatoaga o le ala o feagaiga, ma o Iesu Keriso o le totonugalemu o sauniga uma ma feagaiga.
Na aoao mai e le Tupu o Peniamina e faapea ona o feagaiga tatou te osia, e avea ai i tatou ma atalii ma afafine o Keriso, o le na fanauina faaleagaga i tatou, ma o lalo o Lona ao ua faasa’oloto ai i tatou aua “ua leai se isi lava suafa ua tuuina mai e mafai ona oo mai ai le olataga” (tagai i le Mosaea 5:7–8). E faasaoina i tatou pe a tatou tumau e oo i le iuga e ala i le “mulimuli lea i le faataitaiga a le Alo o le Atua soifua” (2 Nifae 31:16). Na fautua mai Nifae e faapea e le uma ona fai mea uma i le na o le o mai i le ala sa’o ma le vaaapiapi; e tatau ona tatou “fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma” (tagai i le 2 Nifae 31:19–20).
E fesoasoani le mataupu a Keriso ia i tatou ia maua ma tumau ai i luga o le ala o feagaiga, ma ua faatulagaina le talalelei ina ia maua ai faamanuiaga folafolaina a le Alii e ala i sauniga paia ma feagaiga. Na apoapaoai mai le perofeta o le Atua, o Peresitene Russell M. Nelson ia i tatou i lana faasalalauga i le aso 16 o Ianuari, 2018 e “tumau i le ala o feagaiga. “O lo outou tuuto e mulimuli i le Faaola e ala i le osia o feagaiga ma Ia ona tausia lea o na feagaiga, o le a matala ai le faitotoa i faamanuiaga uma faaleagaga ma avanoa e maua e alii, tamaitai, ma fanau i soo se mea. … I le taunuuga lea tatou te tauivi uma i ai ina ia faaeeina i le mana i totonu o se maota o le Alii, faamauina o ni aiga, faamaoni i feagaiga e osia i totonu o se malumalu lea e agavaa ai i tatou mo le meaalofa silisili a le Atua, le ola e faavavau” (“A’o Tatou Agai Faatasi Atu i Luma,” Liahona, Ape. 2018, 7).
O le a le lafoaia e le Atua Lana sootaga ma, pe taofia Ana faamanuiaga folafolaina o le ola e faavavau mai, soo se tausi feagaiga faamaoni. Ma a o tatou faamamaluina feagaiga paia, ua tatou latalata atili atu i le Faaola. Na aoaoina i tatou e Elder David A. Bednar ananafi e faapea o feagaiga ma sauniga o le talalelei e faagaoioia i o tatou olaga e pei o se tapasa e tuuina mai ai ia i tatou le taitaiga e o mai ai ia Keriso ma avea atili ai e faapei o Ia.
O feagaiga e faailoga ai le ala e toe foi atu ai i le Atua. O sauniga o le papatisoga ma le mauaina o le meaalofa o le Agaga Paia, faauuga i le perisitua, ma le faamanatuga, e taitai atu ai i tatou i le malumalu o le Alii e talisua i Ana sauniga o le faaeaga.
Ou te fia ta’ua ni mea se lua na faamamafa mai e lo tatou Faaola e fesoasoani tatou te tausia ai ma le faamaoni ia feagaiga.
-
E mafai e le Agaga Paia ona aoao i tatou, faamanatu ia i tatou ia aoaoga a le Faaola, ma faatasi ma i tatou e faavavau (tagai i le Ioane 14:16, 26). E mafai ona avea o Ia ma a tatou soa tumau, e taialaina i tatou i luga o le ala o feagaiga. Na aoao mai Peresitene Russell M. Nelson, e faapea “i aso a sau, o le a le mafai ona ola ai faaleagaga e aunoa ma le taiala, taitaiga, faamafanafanaga, ma le faatosinaga faifai pea a le Agaga Paia” (“Faaaliga mo le Ekalesia, Faaaliga mo o Tatou Olaga,” Liahona, Me 2018, 96).
-
Na faatuina e le Faaola le sauniga o le faamanatuga, ina ia tatou manatua pea o Ia ma maua Lona Agaga e faatasi ma i tatou. O le papatisoga e tatalaina le faitotoa i le ola e faavavau, ma e fesoasoani le faamanatuga ia i tatou e fetuleni atu ai i luma ma le mausali i luga o le ala o feagaiga. A o tatou aai ma feinu i le faamanatuga, o le a avea o se molimau i le Tamā tatou te manatua pea Lona Alo. Ma a o tatou manatua pea o Ia ma tausi Ana poloaiga, o le a tatou maua pea lona Agaga e faatasi ma i tatou. E faaopoopo i lenei folafolaga, e faafou ai e le Alii le faamagaloga na folafola mai o agasala pe a tatou salamo ma le lotomaualalo i a tatou agasala.
I le tumau faamaoni ai i a tatou feagaiga, e ao ona tatou taumafai ia i ai pea le Agaga e saunia i tatou ia aai ma feinu ma le agavaa i le faamanatuga, ma e faapena foi, tatou te aai ma feinu e le aunoa i le faamanatuga ina ia i ai pea le Agaga e faatasi ma i tatou.
Ina ua lima tausaga o lo ma afafine, sa i ai sana taavale e alu i le uila ma e fiafia lava e aveave faataamilo i le fale. I se tasi afiafi, sa sau ai o ia ma fai mai, “Tama, ua le o toe ola la’u taavale. E mafai ona aumai se kesi mai lau taavale e tuu i ai ina ia mafai ona toe ola? Atonu ua manaomia se kesi e pei o lau taavale e ola ai.”
Sa ou matauina mulimuli ane ua vaivai le maa, o lea sa ou fai atu ai o le toe faaolaina pe a ma se itula. Ma lona fiafia tele, sa ia fai mai ai, “Manaia! O le a tatou o e ave i le pamu kesi.” Sa na ona ou faafesoota’ia lava o le maa i se palaka e fafaga ai, ma i le mavae ai o se itula sa mafai ona ia toe aveina le taavale, ua ola i le maa sa fafaga. Sa ia aoaoina ai e taua le toefafaga pea o le maa e ala i le sulu i se mea e maua ai le eletise.
E pei ona aoaoina e lo’u afafine le sootaga o le maa ma le paoa e faaola ai lana taavale meataalo, e faapena foi ona tatou aoao e uiga ia Iesu Keriso, le faamanatuga, ma le Agaga. Tatou te manaomia le Agaga e fesoasoani e faatautaia i tatou i le olaga nei a o tatou tausia ma le faamaoni feagaiga, ma e tatou te manaomia le faamanatuga e faamalolosia o tatou tagata faaleagaga. O le faafouina o a tatou feagaiga o le papatisoga ma le aai ma feinu i le faamanatuga e aveina atu ai le faamaoni i isi feagaiga uma. E mautinoa se taunuuga fiafia pe a tatou suesue ma le agaga tatalo ma faamamaluina le valaaulia a le Faaola, ma olioli ai i Ana faamanuiaga folafolaina. Ua Ia fetalai mai, “Ina ia mafai ona e tausi atili atoatoa oe lava i le le pisia mai le lalolagi, ia e alu atu i le fale tatalo ma osi ae i luga au faamanatuga i lo’u aso paia” (Mataupu Faavae ma Feagaiga 59:9).
Ou te molimau atu o ē tausi feagaiga ua folafola mai i ai le “filemu i le lalolagi lenei ma le ola e faavavau i le lalolagi a sau” (Mataupu Faavae ma Feagaiga 59:23). Ou te molimau atu a outou aai ma feinu e le aunoa i faatusa o le Faaola e ala i le faamanatuga, o le a outou maua Lona Agaga e taiala ai outou i luga o le ala o feagaiga ma tumau faamaoni ai i a outou feagaiga. I le suafa o Iesu Keriso, amene.